TƏ́DA 30 - Bible sar

¹ Moijə əda ngán *Israel gə̄ yá̰a̰ malang ń Kɔ́ɔ̄ɓē mērən kədadə́ ní.

Ndū najə̄ kə́ dɔ ndū kə́ kənī tə́

² Gō tə́ anī Moijə əda ngār gə̄ kə́ dɔ gír ɓē yā ngán *Israel gə̄ tə́ na: Yá̰á̰ ń Kɔ́ɔ̄ɓē mēr̄ rāā ní n toó:

³ Ré de kə́ dəngam ənī ndūn yā ndējə̄ Kɔ́ɔ̄ɓē yá̰a̰, aké ənī ndūn yā mbātə́ yá̰á̰ kə́rēý anī, ni a lōō gíŕ yá̰á̰ ń ni-ənī ndūn yā rāā tə́ ní alé, banī a əndā kumən gírí yā rāā kə gōó.

⁴ Ré ngōn̄ kə́ dəyá̰ kə́ ndi ɓē bɔbə̄neé ɓáý əda rī rāā yá̰á̰ kógə̄ḿ kadə̄ Kɔ́ɔ̄ɓē, aláa ənī ndūn yā rāā,

⁵ ba bɔbə̄n ger̄ gō ō, əda yá̰a̰ aĺ ō anī, ngōn̄ kə́ dəyá̰ ní a rāā yá̰á̰ ní.

⁶ Ba ré bɔbə̄n mbātə́ gōn tə́ ndɔ̄ ń oōń najə̄ yá̰á̰ ń a sāā rāā tə́ ō, ndūn ń ənī yā kə rāań tə́ ō ní anī, ngōn̄ kə́ dəyá̰ ní a lōō gírí. Kɔ́ɔ̄ɓē a mā̰ȳ rɔ̄n dɔn tə́ tɔdɔ̄ bɔbə̄n ɔgə̄n rāā yá̰á̰ ní.

⁷ Ré ngōn̄ kə́ dəyá̰ əda rī rāā yá̰á̰ kógə̄ḿ, aláa ənī ndūn yā rāā yá̰á̰ kógə̄ḿ kadə̄ Kɔ́ɔ̄ɓē kanjə̄ gír̄ yá̰a̰ ō, reē taā ngaa dɔ tə́ ō,

⁸ ba ngaan oō ō mbātə́ gōn tə́ aĺ ō anī, dəyá̰ ní a rāā yá̰á̰ ní.

⁹ Ba ré ngaan mbātə́ gōn tə́ ndɔ̄ ń oōń tə́ ní anī, ndūn ń ənī ní a tél yā to karī ō, Kɔ́ɔ̄ɓē a mā̰ȳ rɔ̄n dɔn tə́ ō.

¹⁰ Ré dəyá̰ kə́ ngaa koy, aláa dəyá̰ kə́ ngaan mbātə́n ənī ndūn adə̄ Kɔ́ɔ̄ɓē anī, i gáŕ kadə̄ a rāā yá̰á̰ ń ni-ənī ndūn dɔ tə́ ní.

¹¹ Ba ré dəyá̰ ndi i jī ngaan tə́ n ədań rī rāā yá̰a̰, aláa ənīń ndūn yā rāā yá̰a̰

¹² ba ngaan oō ō, mbātə́ gōn tə́ aĺ anī, i gáŕ kadə̄ a rāā yá̰á̰ ní.

¹³ Ba ré ngaan mbātə́ gōn tə́ ndɔ̄ nəkɔ́ ń oōń tə́ noō anī, kəda rī rāā yá̰a̰ gə̄gē, kənī ndū gə̄gē a tél a ton̄ i yá̰á̰ kə́ karī tə́. Kɔ́ɔ̄ɓē a mā̰ȳ rɔ̄n dɔn tə́ tām̄ i ngaan n ɔgə̄n rāā yá̰á̰ ní.

¹⁴ Adə̄ ré dəyá̰ əda rī *ndi ɓō tām̄ yā Nə́ɓā tə́, aláa ənī ndūn yā ndi ɓō anī i ngaan n a adə̄n ta róbə aláa a ogə̄n ní.

¹⁵ Ba ré ngaan oō ba ədan yá̰a̰ aĺ bátə́ loo tīī anī ndigə i gōn tə́. Adə̄ kəda rī rāā yá̰a̰ gə̄gē kənī ndū gə̄gē ní a ton̄ gotoó, tām̄ ndɔ̄ ń ngaan oōń tə́ ní ədan yá̰a̰ alé.

¹⁶ Ba ré teē kə ndɔ̄ kə́ rangaá pá tá ngaan mbātə́ gōn tə́ anī, najə̄ yā dəyá̰ ní a tél yā kəsō i dɔ ngaan nəkɔ́ tə́.

¹⁷ *Ndū najə̄ kə́ dɔ kənī ndū yā dəyá̰ kə́ taā ngaa tə́ ō, yā ngōn̄ kə́ dəyá̰ kə́ taā ngaa aĺ ɓáý kə́ ndi ɓē bɔbə̄neé tə́ ō ń Kɔ́ɔ̄ɓē adə̄ Moijə ní n noó.