Biblia Todo Logo
Bib sou entènèt

- Piblisite -

TƏ́DA 3 - Bible sar


Kəla rāā ngán Lebi gə̄

1 Ngán *Aaro̰ ō, Moijə ō, kə́ kem ɓāl̄ ń Kɔ́ɔ̄ɓē ɔrə̄ń najə̄ kə Moijə dɔ mbal̄ *Sinai tə́ ní n toó.

2 Rī ngōn̄ Aaro̰ kə́ nga tɔ́gə na i Nadab. Gotə gə̄ rīdə́ na i Abihu ō, Eleajar ō, Itamar ō.

3 Ngán Aaro̰ gə̄ ń urən̄ yibə̄ dɔdə́ tə́ əndānəńdə́ kem kəla tun̄ yá̰á̰ tə́ ní n noó.

4 Nadab nin̄ kə Abihu oyn̄ ta kum Kɔ́ɔ̄ɓē tə́ kanjə̄ kojə ngán gə̄. Nin̄ oyn̄ i tām̄ hor kə́ karī ń aw̄nəń ta kumən tə́ kem dəla loo kə́ *Sinai tə́ ní. I Eleajar ō, Itamar ō n rāān̄ kəla *tun̄ yá̰a̰ ta kum bɔbə̄də́ Aaro̰ tə́ ní.

5 Kɔ́ɔ̄ɓē əda Moijə na:

6 Ī-ɓāŕ de gə̄ kə́ gír ɓē yā Lebi tə́ ādə̄ reēn̄ kadə̄ ré kəla to ɓáa Aaro̰ *nge tun̄ yá̰a̰ əladə́, a ɔsən̄ kílən kem kəlaá.

7 Nin̄ a rāān̄ kəla yān ō, a rāān̄ kəla yā ngán *Israel gə̄ malang ō, ta *kújə kənge naā tə́. I tītə̄ ń noō n a rāānəń kəla kújə yā Nə́ɓā ní.

8 Nin̄ a a̰a̰n̄ gō yá̰a̰ rāā kəla gə̄ malang kə́ kem *kújə kənge naā tə́ ō, a rāān̄ kəla yā ngán Israel gə̄ ō. I tītə̄ ń noō a rāānəń kəla kújə yā Nə́ɓā ní.

9 *Ngán Lebi gə̄ ní ā ādə̄də́ kə *Aaro̰ nin̄ kə ngánən gēé. Ngán Israel gə̄ a adə̄n̄də́ sedə́ ō, a ɔrə̄n̄ kemdə́ dɔdə́ tə́ ō.

10 Ā ə̄ndā Aaro̰ nin̄ kə ngánən gēé kem kəla tun̄ yá̰á̰ tə́. Ré de kə́ karī tun̄ yá̰á̰ ní, ɓáa a tɔ̄lnən̄ kɔ̄ɔ́.

11 Kɔ́ɔ̄ɓē əda Moijə na:

12 I mə̄kɔ́ n m̄-gə̄rā *ngán Lebi gə̄ dan ngán *Israel gə̄ tə́ kum gotə hágə́ ngán Israel gə̄ ní. *Ngán Lebi gə̄ i yá̰a̰ yāḿ,

13 tɔdɔ̄ ngōn̄ hágə i yá̰a̰ yāḿ. Tām̄ ndɔ̄ ń m̄-tɔ̄ləń hágə de gə̄ kə́ Ejiptə kɔ̄ɔ́ malang ní, m-ɔ̄r̄ kam̄ hágə́ ngán Israel gə̄ ō, hágə́ yá̰a̰ kul̄ yādə́ gē ō, tām̄ yāḿ tə́. Mā i Kɔ́ɔ̄ɓē.


Tə́dá kutə ngán Lebi gə̄ kə́ ta kəga dɔ

14 Kɔ́ɔ̄ɓē ɔr̄ najə̄ kə Moijə kem dəla loo kə́ *Sinai tə́, əda na:

15 Ī-tə́da kutə *ngán Lebi gə̄ kə gō gír kojə yādə́ gēé ō, gír kaadə́ gēé ō. Ā ī-tə́da dəngam gə̄ malang. Əla gír dɔ ngáń kə́ nāā kógə̄ḿ gə̄ tə́ kum kə̄ dɔɔ́.

16 Moijə tə́dádə́ tītə̄ ń gō míndə́ Kɔ́ɔ̄ɓē ɔjənəń ní.

17 Rī *ngán Lebi gə̄ n toó: Gerson ō, Kehat ō, Merari ō.

18 Rī ngán Gerson gə̄ n toó kə gō gír kaadə́ gēé: Libəni ō, Simei ō.

19 Rī ngán Kehat gə̄ n toó kə́ gō gír kaadə́ gēé: Amram ō, Isar ō, Hebron ō, Ujiel ō.

20 Ngán Merari gə̄ kə gō gír kaadə́ gēé n toó: Mali ō, Musi ō. Gír kaa yā *ngán Lebi gə̄ n tə́dan̄də́ kə gō gír kojədə́ gēé ní n noó.

21 De gə̄ kə́ gír kaa yā Libəni tə́ ō, yā Simei tə́ ō ní, kaadə́ i Gerson. Gír kaa gə̄ yā Gerson n noó.

22 Ngán Gerson kə́ dəngam gə̄ malang ń tə́dan̄də́ á əlan̄ gír i dɔ ngáń kə́ nāā kógə̄ḿ gə̄ tə́ kum kə̄ dɔɔ́ ní, kutədə́ malang i deē 7 500.

23 De gə̄ kə́ gír kaa yā Gerson tə́ ndin̄ ɓē i gidə kújə yā Nə́ɓā tə́, dām̄ kə́ no ɓē tə́.

24 De kə́ bo ń əndānən̄ ngār dɔ gír kojə gə̄ yā Gerson tə́ ní i Eliasap ngōn̄ Layel.

25 Kəla rāā ngán Gerson gə̄ kə́ kem *kújə kənge naā tə́ ɔjə i dɔ kūbə̄ ń rāānəń ní ō, yá̰á̰ ń utə̄nəń dɔ ní ō, kūbə̄ ń utə̄nəń ta *kújə kənge naā ní ō,

26 ndogə̄ kūbə̄ ń gān̄gnəń gíŕ ndágə loo kə́ gīr̄ gidə *kújə yā Kɔ́ɔ̄ɓē tə́ nin̄ kə *loo tun̄ yá̰á̰ ní ō, kūbə̄ kə́ ta róbə ndogə̄ ní tə́ ō, kəlā gə̄ kə́ yā tó̰o̰ń kújə yā Nə́ɓā ō, ndogə̄ ō.

27 De gə̄ kə́ gír kaa yā Amram tə́ ō, Isar tə́ ō, Hebron tə́ ō, Ujiel tə́ ō ní, kaadə́ i Kehat. Gír kaa gə̄ yā Kehat n noó.

28 ngán Kehat kə́ dəngam gə̄ malang ń tə́dan̄də́ á əlan̄ gír i dɔ ngáń kə́ nāā kógə̄ḿ gə̄ tə́ kum kə̄ dɔɔ́ ní, kutədə́ malang i deē 8 600. Adə̄n̄də́ kəla i kem *loo kə́ táĺ tə́.

29 Gír kaa gə̄ yā Kehat gə̄ ndin̄ ɓē i kadə kújə yā Nə́ɓā tə́, dām̄ mbɔ́r ɓē kə́ geleé tə́.

30 De kə́ bo ń əndānən̄ ngār dɔ gír kaa gə̄ yā Kehat tə́ ní, i Elisapan ngōn̄ Ujiel.

31 Kəla rāādə́ ɔjə i dɔ sandúkə *ndū najə̄ ō, tábəl ō, ɗəra hor ō, *loo tun̄ yá̰a̰ gə̄ ō, yá̰a̰ rāā kəla gə̄ kə́ kem *loo kə́ táĺ tə́ ō, kūbə̄ ń gān̄gnəń kem kújə yā Nə́ɓā ní ō, gotə kəla kə́ rang gə̄ ō.

32 Ngār kə́ dɔ ngār gə̄ yā *ngán Lebi gə̄ tə́ i Eleajar ngōn̄ *Aaro̰ *nge tun̄ yá̰a̰. I ni n i nge kəndā kumən gō ngé rāā kəla gə̄ kə́ kem *loo kə́ táĺ tə́ ní.

33 De gə̄ kə́ gír kaa yā Mali tə́ ō, Musi tə́ ō ní, kaadə́ i Merari. Gír kaa gə̄ yā Merari n toó.

34 Ngán Merari kə́ dəngam gə̄ malang n ɓāl̄də́ əla gír dɔ nāā kógə̄ḿ tə́ kum kə̄ dɔɔ́ á tə́dan̄də́ ní, kutədə́ malang i deē 6 200.

35 De kə́ bo n əndānən̄ ngār dɔ gír kaa gə̄ yā Merari tə́ ní i Suriel ngōn̄ Abihail. Ndin̄ ɓē i kadə kújə yā Nə́ɓā tə́, dām̄ mbɔ́r ɓē kə́ ko̰ó̰ tə́.

36 Kəla rāā ngán Merari gə̄ ɔjə i dɔ kāgə̄ kə́ yā rāań mbōgə̄ kújə yā Nə́ɓā ō, kāgə̄ kə́ yā dēsə́ mbo̰ó̰ madə̄ gə̄ tə́ ō, kāgə̄ nga dan kújə yā Nə́ɓā ō, bir̄ nja kāgə̄ gə̄ ō, gotə kəla kə́ rang gə̄ ō,

37 kāgə̄ ndogə̄ kūbə̄ ń gīr̄ gidə ndágə loo kə́ gīr̄ gidə *kújə yā Kɔ́ɔ̄ɓē ní ō, bir̄ njadə́ gə̄ ō, bēl̄ gə̄ kə́ tū tə́ ō, kəlā gə̄ ō.

38 Moijə ō, *Aaro̰ ō, ngán Aaro̰ gə̄ ō, ndin̄ ɓē i ta *kújə kənge naā tə́, dām̄ kə́ gír ɓē tə́. Nin̄ i ngé rāā kəla kem *loo kə́ táĺ tə́ tām̄ yā ngán *Israel gə̄ tə́. De kə́ karī ń a aw̄ loo kəla ń noō tə́ ní a tɔ̄lnən̄ kɔ̄ɔ́.

39 *Ngán Lebi kə́ dəngam gə̄ ń Moijə nin̄ kə Aaro̰ tə́dan̄də́ tītə̄ gō míndə Kɔ́ɔ̄ɓē ɔjəńdə́ ní, kutədə́ malang i deē dūbú kutə jōó gidə i jōó. Ɓāl̄də́ əla gír i dɔ ngáń kə́ nāā kógə̄ḿ gə̄ tə́ kum kə̄ dɔɔ́.


Kɔ́ɔ̄ɓē taā ngán Lebi gə̄ kum gotə hágə́ ngán Israel gə̄

40 Kɔ́ɔ̄ɓē əda Moijə na: Ī-tə́dá hágə́ ngán *Israel gə̄ malang kə́ dəngam gə̄, ə́lá gír dɔ ngáń kə́ nāā kógə̄ḿ gə̄ tə́ kum kə̄ dɔɔ́, ba ə́da kutədə́.

41 Ā ī-taā *ngán Lebi gə̄ tām̄ yāḿ mā Kɔ́ɔ̄ɓē tə́ kum gotə hágə́ ngán *Israel gə̄ malang ō, ā ī-taā yá̰a̰ kul̄ gə̄ malang yā *ngán Lebi gə̄ yā kadə̄m̄ kum gotə hágə́ yá̰a̰ kul̄ gə̄ malang yā ngán Israel gə̄ ō.

42 Moijə tə́dá hágə́ ngán *Israel kə́ dəngam gə̄ malang tītə̄ ń Kɔ́ɔ̄ɓē ədanəń ní.

43 Əla gír i dɔ ngáń kə́ nāā kógə̄ḿ gə̄ tə́ kum kə̄ dɔɔ́. Kutədə́ malang i deē 22 273.

44 Kɔ́ɔ̄ɓē əda Moijə na:

45 Ī-taā *ngán Lebi gə̄ ādə̄m̄ mā Kɔ́ɔ̄ɓē kum gotə hágə́ ngán *Israel gə̄ malang ō, ī-taā yá̰a̰ kul̄ gə̄ yā *ngán Lebi gə̄ ādə̄m̄ kum gotə hágə́ yá̰a̰ kul̄ gə̄ malang yā ngán Israel gə̄ ō.

46 Kutə hágə́ ngán Israel kə́ dəngam gə̄ ń mānə̄n̄ dɔ kutə *ngán Lebi gə̄ ní, i deē 273. I nin̄ gə̄ ń noō n i yā gān̄g dɔdə́ ní.

47 Ā ī-gān̄g sə́lē arjā̰a̰ gə̄ mí mí dɔdə́ tə́, i nar ń a əsan̄ kem *loo kə́ táĺ tə́ ní, adə̄ sə́lē kógə̄ḿ kɔȳn i ngán kəlōo kutə.

48 Ā ī-tél kə nar ní yā kadə̄ *Aaro̰ nin̄ kə ngánən gēé yā gāngəń dɔ hágə́ ngán *Israel gə̄ ń tɔȳn̄ dɔ *ngán Lebi gə̄ ní.

49 Moijə taā nar kə́ yā gāngəń dɔ ngé gə̄ ń *ngán Lebi gə̄ unən̄ gotədə́ aĺ ní.

50 Nar ń ni taā jī ngáń hágə gə̄ tə́ ní, kutən malang i sə́lē arjā̰a̰ kə́ kem *loo kə́ táĺ tə́ 1 365.

51 Ni-téləń adə̄ Aaro̰ nin̄ kə ngánən gēé, tītə̄ ń gō míndə́ Kɔ́ɔ̄ɓē ədań ní.

© 2006, 2010 Alliance Biblique du Tchad

Bible Society of Chad
Swiv nou:



Piblisite