TƏ́DA 14 - Bible sar

Kósə de gə̄ mbātə́n̄ kaw̄ dɔ nang kə́ Kanaan tə́

¹ Ngán Israel gə̄ malang unən̄ ndūdə́ kə̄ dɔɔ́ əganə̄ń kɔŕ ō, nōōn̄ naā ndɔ̄ ń noō tə́ ō.

² Nin̄ tə́dan̄ najə̄ dɔ Moijə nin̄ kə *Aaro̰ tə́ ədan̄ na: Ré j-oyī i dɔ nang kə́ Ejiptə tə́ a i só tə́ aĺ a? Aláa ré j-oyī i kem dəla loo ń toō tə́ a i só tə́ aĺ a?

³ Kɔ́ɔ̄ɓē a aw̄ sejí kə̄ dɔ nang kə́ to beé tə́ kadə̄ aw̄ tɔ̄lə̄n̄jí tū tə́ kə kəyā kaskaraá ō, kadə̄ madə̄ ba̰ā̰jí gə̄ əhɔn̄ nə̄yá̰jí gə̄ kə ngáńjí gə̄ ɓəlo tə́ ō, i najə̄ rí tə́? Jə-tél j-awī gogə́ dɔ nang kə́ Ejiptə tə́ i só tə́ aĺ a?

⁴ Tā anī nin̄ tél ədan̄ naā dɔ dáńdə́ tə́ na: Ādə̄ j-əndāī ngār kógə̄ḿ dɔjí tə́, ba jə-tél j-awī gogə́ dɔ nang kə́ Ejiptə tə́.

⁵ Moijə nin̄ kə Aaro̰ əsō sébən̄ kumdə́ nang tə́ ta kum ngán *Israel gə̄ malang ń kánə̄n̄ naā tə́ ní.

⁶ Ba Jojue nin̄ kə Kaleb ń nin̄ i de gə̄ kə́ dan ngé kaw̄ kəndā ma̰ȳ dɔ nang kə́ Kanaan tə́ ní, wōn̄g asədə́ nak adə̄ *rə́yā̰n̄ kūbə̄ kə́ rɔ̄də́ gə̄ tə́,

⁷ ba ədan̄ kósə de gə̄ na: Dɔ nang ń j-āw̄ j-əndā ma̰ȳ j-a̰a̰ ní i dɔ nang kə́ majə ngá̰ý,

⁸ kə́ mba ō, yibə̄ tejə ō, i ngá̰ý tū tə́. Ré nel̄ Kɔ́ɔ̄ɓē sejí anī a aw̄ sejí tū tə́ yā kadə̄jí.

⁹ Ba ī-lōōī kənī wúȳ jī Kɔ́ɔ̄ɓē tə́ ō, ī-lōōī ɓōĺ de gə̄ kə́ dɔ nang ní tə́ ō, tɔdɔ̄ j-a jə-tetiīdə́ rɔ̄ɔ̄ i gidə kógə̄ḿ beē. Tām̄ ɓesə̄ yādə́ gə̄ kə́ ngé ngɔ̄m̄də́ gə̄ əya̰n̄də́ kɔ̄ɔ́, banī Kɔ́ɔ̄ɓē i naā tə́ sejí, adə̄ ī-lōōī ɓōĺdə́.

¹⁰ Ngán Israel gə̄ malang ɔrə̄n̄ najə̄ tə́nīdə́ kə mbalá yā tɔ̄l̄də́ anī *kɔsə gɔn yā Kɔ́ɔ̄ɓē teē ta kumdə́ tə́ malang dɔ *kújə kənge naā tə́.

Moijə dəje mā̰ȳ rɔ̄ tām̄ yā kósə de gə̄ tə́

¹¹ Kɔ́ɔ̄ɓē əda Moijə na: I ndɔ̄ kə́ rá tə́ n a asə gír de gə̄ toō mbātə́m̄ ní? m̄-rāā yá̰á̰ kə́ yáā gə̄ malang kə́ ɔjən̄ tɔ́gə́ḿ kə̄ ndágá dɔ dáńdə́ tə́, ba i rə́ngáý tə́ n a ənīn̄ kemdə́ yā kadə̄m̄ ní?

¹² M-ā m-ə́ndádə́ kə mo̰y kə́ yā tɔ̄l̄də́ ō, m-ā m̄-nujə sedə́ kɔ̄ɔ́ ō. Ba m-ā m̄-rāāī kadə̄ ā ī-téĺ gír de gə̄ kə́ kutədə́ ō, tɔ̄gə́də́ ō, i ngá̰ý tɔȳ yādə́.

¹³ Moijə tél əda Kɔ́ɔ̄ɓē na: Ejiptə gə̄ gerə̄n̄ kadə̄ i kə ta kūl̄ tɔ́gí n ī-teēń kə de gə̄ ń toō kem ɓē yādə́ tə́ ní ō,

¹⁴ ədan̄ de kə́ gō nang ń toō tə́ gə̄ gotə adə̄ oōn̄ ō. Nin̄ ń toō gerə̄n̄ kadə̄ ḭ̄ Kɔ́ɔ̄ɓē ḭ̄ i naā tə́ kə de gə̄ yāí gēé ō, ā ɔ́jə́də́ rɔ̄í ō, ā á̰a̰ī ta kum naā ō. Nin̄ gerə̄n̄ kadə̄ i ḭ̄ n i nge ngɔ̄m̄ deē yāí gə̄ ní, tām̄ ī-njə̄rā nodə́ tə́ kadaá dan kil̄ man̄ kə́ ra kə ngālāá ɓururu tə́ ō, ī-njə̄rā nodə́ tə́ ndɔ̄ɔ́ dan hor kə́ ra kə ngālāá ɓururu tə́ ō.

¹⁵ Adə̄ ré ī-tɔ̄l̄ gír de gə̄ ń toō gidə kógə̄ḿ anī, gír de gə̄ ń oōń kōō yá̰a̰ malang ń ī-rāā ní a ədan̄ na,

¹⁶ tɔ́gə́ Kɔ́ɔ̄ɓē na asə kaw̄ sedə́ kem ɓē ń ənī mindən dɔ tə́ yā kadədə́ ní tə́ alé, i tām̄ noō tə́ n tɔ̄ləńdə́ kɔ̄ɔ́ malang kem dəla loo tə́ ní.

¹⁷ Ní m̄-rāāī ɓɔ́ Kɔ́ɔ̄ɓē, ɔ́jə́ tɔ́gí malang kə̄ ndágá, tām̄ ə́da na:

¹⁸ Kɔ́ɔ̄ɓē i de kə́ nge rāā wōn̄g láẃ aĺ ō, nge rāā kem majə ngá̰ý ō, nge kəndā njan dɔ yá̰á̰ kə́ gōtə́ aĺ kə́ deē rāā tə́ ō, dɔ dum̄ naā yā deē tə́ ō. Banī deē ń najə̄ əhɔn̄ ní, a mbəre najə̄ dɔn tə́ kɔ̄ɔ́ aĺ ō, yá̰á̰ kə́ majaĺ gə̄ ń bəra ngán gə̄ rāān̄ ní, a ənda ngáńdə́ gə̄ ō, ngán kaadə́ gə̄ ō, kaa gugūdə́ gə̄ ō, kaa dɔgədə́ gə̄ ō najə̄n tə́.

¹⁹ Kɔ́ɔ̄ɓē dan ń kem majə yāí i ngá̰ý ɓá ní, ī-mā̰ȳ rɔ̄í ɓáý to̰ dɔ majaĺ yā gír de gə̄ ń toō tə́, tītə̄ ń ə́lań gír mā̰ȳ rɔ̄í dɔdə́ tə́ i dɔ nang kə́ Ejiptə tə́ bátə́ ūgəń sedə́ laā ní.

²⁰ Anī Kɔ́ɔ̄ɓē əda na: m̄-mā̰ȳ rɔ̄ḿ dɔdə́ tə́ tītə̄ ń ī-dejemə̄ń ní.

²¹ Ba ré m̄-ndi kə kumuú rɔ̄kum ō, kɔsə gɔn yāḿ taā loo dɔ nang tə́ malang rɔ̄kum ō anī,

²² de gə̄ malang ń a̰a̰n̄ kɔsə gɔn ń noō ō, a̰a̰n̄ yá̰a̰ kɔjə̄ gə̄ ń m̄-rāā dɔ nang kə́ Ejiptə tə́ ō, kem dəla loo tə́ ō, banī oōn̄ taḿ alé nāāmə̄nəń nja kutə kɔ̄ɔ́ ɓá ní,

²³ m-ə̄nī ndūḿ kadə̄ deē kógə̄ḿ dandə́ tə́ a ugə̄ dɔ nang ń m-ə̄nī míndə́ḿ dɔ tə́ m-ādə̄ kaadə́ gə̄ ní alé. De gə̄ malang ń kídə̄mə̄n̄ ní, deē kógə̄ḿ dandə́ tə́ kə́ yā kugə̄ dɔ nang ń noō tə́ a gətóo.

²⁴ Ba ndíĺ kə́ rang i kem nge kəla yāḿ Kaleb tə́, adə̄ ni un gōḿ kanjə̄ kadə̄ kemən rāān ní, m-ā m-āw̄ seneé kadə̄ ugə̄ dɔ nang ń ni-aw̄ tū tə́ kété əndā ma̰ȳ ní. Dɔ nang ní m-ā m-ādə̄ ngánən gə̄ ō, ngán kaan gə̄ ō.

²⁵ Amalek gə̄ ō, Kanaan gə̄ ō, ndin̄ wól loo gə̄ kə́ dɔ nang ń noō tə́. Ní, bírí anī ī-téliī dɔ tə́, āwī gogə́ kem dəla loo tə́, ādī kumsí sɔɔ̄ bā tə̄ɓā gə̄.

Kɔ́ɔ̄ɓē rāā de gə̄ yān gə̄ yá̰á̰ kə́ tōr̄

²⁶ Kɔ́ɔ̄ɓē əda Moijə nin̄ kə *Aaro̰ ɓáý to̰ na:

²⁷ Ngán Israel gə̄ kə́ ngé ta majaĺ gə̄ ń toō a asədə́ tam̄ seḿ i rə́ngáý tə́?

²⁸ Āw̄ ə́daīdə́ na: Mā Kɔ́ɔ̄ɓē kə́ m̄-ndi kə kumḿ, m-ə́dásí kə́ ngáā tə́, m-ā m̄-rāāsí yá̰á̰ ń ə́daī á m-ōō ní.

²⁹ Sḭḭ̄ malang ń tə́dan̄ kutəsí ō, ndangən̄ rīsí makətūbūú ō, á ɓāl̄sí ḭḭ dɔ kutə jōó kum kə̄ dɔɔ́ ní, ā óyiī kem dəla loo ń toō tə́, tām̄ sḭḭ̄ ī-tāmī seḿ.

³⁰ Dɔ nang ń m-ə̄nī míndə́ḿ yā kadə̄sí kadə̄ ī-ndiī tū tə́ ní, ā ūgī tū tə́ aĺ bátə́, ba i Kaleb ngōn̄ Yepune ō, Jojue ngōn̄ Nun ō, ngóy n a ugə̄n̄ tū tə́ ní.

³¹ Banī ngáńsí gə̄ ń ə́daī na madə̄ ba̰ā̰sí gə̄ na a əhɔn̄də́ ní, m-ā m-āw̄ sedə́ kadə̄ ugə̄n̄ dɔ nang ní tə́. Nin̄ a a̰a̰n̄ dɔ nang ń sḭḭ̄ ī-mbātíī ní kə kumdə́.

³² Nīńsí a to kem dəla loo tə́ laā.

³³ Ba ngáńsí gə̄ a ngɔ̄mə̄n̄ yá̰a̰ kul̄ yādə́ gə̄ loo ń toō tə́ ɓāl̄ kutə sɔ́. Yá̰á̰ kə́ tōr̄ a rāādə́ tām̄ rāā gōtə́ aĺ yāsí tə́ bátə́ kadə̄ óyiīń malang kɔ̄ɔ́ kem dəla loo ń toō tə́.

³⁴ Ə̄ndāī ma̰ȳ dɔ nang kə́ Kanaan i ndɔ̄ kutə sɔ́, adə̄ yá̰á̰ kə́ tōr̄ kə́ tām̄ majaĺ yāsí tə́ a rāāsí i ɓāl̄ kutə sɔ́.Ɓāl̄ kógə̄ḿ i tām̄ yā ndɔ̄ kə́ kógə̄ḿ tə́. I beé tá ā ī-gerīiń yá̰á̰ ń a rāā de gə̄ ń m̄-mbātə́ najə̄ gōdə́ tə́ ní.

³⁵ Yá̰á̰ ń kadə̄ mā Kɔ́ɔ̄ɓē m-ə́dásí ní n noó. M-ə́dásí najə̄ kə́ rɔ̄kum, ngán *Israel gə̄ kə́ ngé ta majaĺ gə̄ ń toō ń əndān̄ rɔ̄də́ naā tə́ ba mbātə́mə̄n̄ ní, yá̰á̰ ń m-ā m̄-rāā sedə́ ní n noó. A oyn̄ yā təgā kem dəla loo ń toō tə́.

³⁶ De gə̄ ń Moijə əladə́ kəndā ma̰ȳ dɔ nang kə́ Kanaan tə́, ba télən̄ anī tə́dan̄ najə̄ kə́ majaĺ gə̄ dɔ tə́, adə̄ ngán Israel gə̄ malang tamnəń kə Moijə ní

³⁷ gāngə̄n̄ dɔɔ́ oyn̄ ta kum Kɔ́ɔ̄ɓē tə́ gō najə̄ kɔr̄də́ gə̄ tə́.

³⁸ Dan de gə̄ ń Moijə əladə́ kəndā ma̰ȳ dɔ nang kə́ Kanaan tə́ ní, i Jojue nin̄ kə Kaleb ngóy n ndin̄ kə kumdə́, ba gotə gə̄ oyn̄ kɔ̄ɔ́ malang.

Ngán Israel gə̄ rāān̄ dɔ ngan̄g

³⁹ Moijə tél kə najə̄ malang ń Kɔ́ɔ̄ɓē ɔr̄ seneé ní əda ngán *Israel gə̄, anī ndə̄ngān̄ rɔ̄də́ ngá̰ý.

⁴⁰ Teē kə ndɔ̄ kə́ noō anī ḭḭn̄ kə gír looí ɓatə, əsōn̄ róbó a aw̄n̄ kə̄ dām̄ kə́ mbalá tə́ Nin̄ ədan̄ na: Jḭḭ n toó. J-a j-aw̄ loo ń Kɔ́ɔ̄ɓē əda najə̄n tə́ ní, tām̄ yá̰á̰ ń jə-rāā ní i yá̰á̰ kə́ majə alé rɔ̄kum.

⁴¹ Moijə ədadə́ na: Ā ī-rāāī i rí n noó? Sḭḭ̄ ī-mānī i dɔ ndū Kɔ́ɔ̄ɓē, adə̄ a majə sesí alé.

⁴² Ī-lōōī kaw̄ tām̄ Kɔ́ɔ̄ɓē i sesí alé. Ī-lōōī kaw̄ kadə̄ madə̄ ba̰ā̰sí gə̄ tetən̄sí rɔ̄ɔ̄.

⁴³ Tɔdɔ̄ Amalek gə̄ ō, Kanaan gə̄ ō, nin̄ i nosí tə́ noó. A tɔ̄lə̄n̄sí kɔ̄ɔ́ malang tām̄ sḭḭ̄ ī-lōōī njə̄rā gō Kɔ́ɔ̄ɓē tə́ kɔ̄ɔ́, adə̄ Kɔ́ɔ̄ɓē a aw̄ sesí alé.

⁴⁴ Ngán Israel gə̄ əndān̄ kemdə́ dɔ tɔ̄gə́də́ nin̄ kɔ́ gə̄ tə́ adə̄ aw̄n̄ dɔ mbalá. Banī Moijə ō, *sandúkə madə̄ naā yā Kɔ́ɔ̄ɓē ō, ndin̄ gotə kógə̄ḿ kem ɓēé.

⁴⁵ Tā anī Amalek gə̄ ō, Kanaan gə̄ ō ń ndin̄ dɔ mbalá ní risə reē rɔ̄ɔ̄n̄ ngán *Israel gə̄ ō, tə̄ɓān̄də́ bátə́ ugə̄n̄ sedə́ Horma ō.