Makətūbə̄ ń Pol ndang adə̄ Rom gə̄ ní 6 - Bible sar

Jḭḭ̄ i ngé gə̄ ń oyn̄ kə Kərist ō, ndólə̄n̄ naā tə́ seneé ō ní

¹ Kumən na i rí? I kadə̄ kə jə-ndiī dan rāā majaĺ tə́ yā kadə̄ rajə yā Nə́ɓā taāń loo a?

² I tītə̄ ń noō alé. Tɔdɔ̄ dan ń jḭḭ̄ i kə́ koy kɔ̄ɔ́ gə̄ ta yá̰a̰ rāā kə́ majaĺ tə́ ní, loo kadə̄ jə-ndiī dan rāā majaĺ tə́ ɓáý to̰ i ba̰ý?

³ Aké jḭḭ̄ malang ń rāān̄jí *batém kə rī *Kərist ní, batém ní ɓoojí naā tə́ kə Kərist dan ń ni-oy ní ī-gerī aĺ a?

⁴ Batéḿ ń rāān̄jí ní, rāān̄jí i batém koy ń j-oyiī naā tə́ kə Kərist adə̄ dubə̄n̄jí naā tə́ seneé ní. I yā kadə̄ tītə̄ ń *kɔsə gɔn yā Bɔbə̄ Ngōn̄ ndóləń Kərist dan de kə́ koy gə̄ tə́ ní, jḭḭ̄ jə-ndiī kə kumjí ndi kə́ kijə ō.

⁵ Ré jə-rāāī i dā̰ rɔ̄ kə́ kógə̄ḿ beē seneé loo koy kə́ tītə̄ yān tə́ anī, j-a jə-rāāī dā̰ rɔ̄ kə́ kógə̄ḿ beē seneé loo ndól̄ kə́ tītə̄ yān tə́ ō.

⁶ Banī majə kadə̄ ī-gerī najə̄ ń toō majə: Əndan̄ háĺjí kə́ jóo kə máyá̰ naā tə́ kə Kərist tū kāgə̄ kə́ dēsə́ tə́, yā kadə̄ tɔ́gə rāā majaĺ yā de kə́ loo kōkə̄ ní teē kɔ̄ɔ́ ō, majaĺ rāāńjí ɓəlo tə́ to̰ aĺ ō.

⁷ Tɔdɔ̄ deē ń oy ní, ni-teē ɓəlo rāā yá̰á̰ kə́ majaĺ tə́ kɔ̄ɔ́.

⁸ Ba ré jḭḭ̄ i kə́ koy kɔ̄ɔ́ gə̄ kə *Kərist anī, jə-taāī kem kadə̄ j-a jə-ndiī kə kumjí seneé ō.

⁹ Jə-gerī majə kadə̄ Kərist ń ndól̄ dan de kə́ koy gə̄ tə́ ní, a oy to̰ alé. Tɔ́gə yo kə́ yā tɔ̄l̄nəń to̰ gətóo.

¹⁰ Tɔdɔ̄ koy ń ni-oy ní, i tām̄ yā kɔrə̄ń majaĺ kə ngəran gēé ō, i nja kógə̄ḿ beē ngóy ō. Ba ndi ń ni-ndi ngɔlaā kə kumneé toō ní, ángalən malang i dɔ Nə́ɓā tə́.

¹¹ I beé ní, sḭḭ̄ á̰a̰ī rɔ̄sí de kə́ koy kɔ̄ɔ́ gə̄ tə́ tām̄ yā yá̰á̰ kə́ majaĺ tə́, ba á̰a̰ī rɔ̄sí de kə́ ndi kə kumuú gə̄ tə́ tām̄ yā Nə́ɓā tə́ kə gō ɓoo naā yāsí kə́ kə Jeju *Kərist.

¹² Ī-lōōī kadə̄ majaĺ o̰o̰ ɓē dɔ dā̰ rɔ̄sí kə́ a oy kɔ̄ɔ́ ń toō tə́, na sōgə́ ā ōōī i yān tá loo rāā yá̰a̰ gə̄ ń ngurdə́ a rāān tə́ ní.

¹³ Ī-lōōī kun ngōn̄ rɔ̄sí kógə̄ḿ rāań yá̰á̰ kə́ majaĺ, tītə̄ kə́ dām̄ rɔ̄sí ní i yá̰a̰ rāā kəla yā yá̰á̰ kə́ majaĺ beē. Banī ādī Nə́ɓā rɔ̄sí tītə̄ de gə̄ kə́ oyn̄ tá ndólə̄n̄ beé ō, ə̄ndāī rɔ̄sí kə taá malang ta kəla yān tə́ tītə̄ kə́ sḭḭ̄ i yá̰a̰ rāā kəla yā yá̰á̰ kə́ gōtə́ beē ō.

¹⁴ Tɔdɔ̄ yá̰á̰ kə́ majaĺ a o̰o̰ ɓē dɔsí tə́ to̰ alé, tām̄ i *ndū najə̄ n i dɔsí tə́ ɓáý ní to̰ ní alé, ba i rajə yā Nə́ɓā.

Ndi kə rī rāā yá̰á̰ kə́ gōtə́

¹⁵ Kumən na i rí? Kə jə-rāāī yá̰á̰ kə́ majaĺ tām̄ ndi ń jə-ndiī gír *ndū najə̄ tə́ to̰ alé, banī i gír rajə yā Nə́ɓā tə́ ní a? I tītə̄ ń noō alé.

¹⁶ Dan ń ḭ̄ i ɓəlo yā deē ní ā ōō tan, adə̄ ā ī-rāā kəla yān. Ré ōō i ta yá̰á̰ kə́ majanī yá̰á̰ kə́ majaĺ a aw̄ seí yā kəlaī ta yo tə́, ba ré ōō i ta Nə́ɓā anī ā ī-tél de kə́ gōtə́.

¹⁷ Banī ādə̄ jə-tɔ̄yī Nə́ɓā, tɔdɔ̄ kété ní sḭḭ̄ i ɓəlo gə̄ yā yá̰á̰ kə́ majaĺ, ba ngɔlaā sḭḭ̄ ōōī ta Nə́ɓā adə̄ ī-rāāī yá̰á̰ ń ndóōn̄sí ní kə ngarān̄g kemsí gēé malang.

¹⁸ Tá sḭḭ̄ ī-teēī ɓəlo rāā yá̰á̰ kə́ majaĺ tə́ kɔ̄ɔ́, ba ī-téliī ɓəlo rāā yá̰á̰ kə́ gōtə́. Adə̄ yá̰a̰ gə̄ ń toō i yá̰á̰ kə́ kadə̄ jə-ndadī Nə́ɓā tāmən tə́.

¹⁹ M-ɔ̄r̄ najə̄ sesí i tītə̄ deē ndul gə̄, tɔdɔ̄ ré i beé aĺ anī, sḭḭ̄ ā ásiī ger̄ kum alé. Tītə̄ ń kété sḭḭ̄ ī-rāāī rɔ̄sí i ɓəlo gə̄ tə́ adə̄ ī-ndiī i kə rī rāā yá̰á̰ kə́ yḛr to kum gə̄ ō, kə rī rāā yá̰á̰ kə́ gōtə́ aĺ gə̄ ń a rāān̄sí kadə̄ ī-téliī de kə́ gōtə́ aĺ gə̄ ō ní, ngɔlaā majə kadə̄ ī-rāāī rɔ̄sí ɓəlo gə̄ tə́, ba i kadə̄ ī-ndiīń kə rī rāā yá̰á̰ kə́ gōtə́ gə̄ ń a rāān̄sí kadə̄ ī-téliī de kə́ *táĺ gə̄ ní ō.

²⁰ Dan ń sḭḭ̄ i ɓəlo yā majaĺ ɓáý ní, sḭḭ̄ i ɓəlo yā yá̰á̰ kə́ gōtə́ gə̄ alé.

²¹ Ní, nge ń noō teēsí i yá̰á̰ rí gə̄? Sḭḭ̄ i kə rɔ̄sɔlɔ̄ɔ́ tū tə́ ɓōólaā, tɔdɔ̄ yá̰a̰ gə̄ ń ə́ngeī ní ta tɔ̄l̄ tadə́ i yo.

²² Ba ngɔlaā sḭḭ̄ ī-teēī kɔ̄ɔ́ ɓəlo rāā yá̰á̰ kə́ majaĺ tə́ banī sḭḭ̄ i ɓəlo gə̄ yā Nə́ɓā. Yá̰á̰ ń ə́ngeī tū tə́ ní i háĺsí ń ɔjə kadə̄ sḭḭ̄ i de kə́ *táĺ gə̄ ní. Ta tɔ̄l̄ tasí anī ā ə́ngeī i ndi kə kumuú kə́ ngándáńg.

²³ Tɔdɔ̄ yá̰a̰ kəndā nja kə́ loo rāā majaĺ tə́ i yo, ba yá̰á̰ ń Nə́ɓā adə̄ karī ɔjəń dɔ tár yān ní, i ndi kə kumuú kə́ ngándáńg, kə gō ɓoo naā yājí kə Jeju *Kərist Kɔ́ɔ̄ɓē yājí.