PILIPƏ 3 - Bible sar

Loo tél de kə́ nge rāā yá̰á̰ kə́ gōtə́ ta kum Nə́ɓā tə́

¹ Ba ngɔlaā ní ngákó̰ó̰ḿ gə̄, ī-rāāī rɔ̄nel̄ najə̄ ɓoo ń ī-ɓooī naā kə Kɔ́ɔ̄ɓēé ní tə́. M-ɔ́r loo ndang yá̰á̰ kə́ kógə̄ḿ beē tə́ yā kadə̄sí kə̄ nja naā tə́ alé. Tām̄ yāsí tə́ ɓáa i nge ń noō n kadə̄ ī-raī dɔ tə́ ngan̄g ní.

² Ə̄ndāī kum kedə̄ dɔ rɔ̄sí tə́ najə̄ yā ngé rāā kəla kə́ majaĺ gə̄ tə́, bísə gə̄ ń noō ń nin̄ i ngé *kəja mɔtə kə́ rɔ̄kum aĺ gə̄ ní!

³ I jḭḭ̄ n i ngé *kəja mɔtə kə́ rɔ̄kum gə̄ ní ba i nin̄ alé, tām̄ jḭḭ̄ jə-rāāī kəla j-adī Nə́ɓā i kə Ndíĺ Nə́ɓāá ō, i Jeju *Kərist n i kɔsə gɔn yājí ní ō, j-əndāī tɔ́gə́jí i dɔ rɔ̄jí jḭḭ̄ kɔ́ gə̄ tə́ aĺ ō.

⁴ Tá mā i kə yá̰a̰ gə̄ kə́ asə kadə̄ m-ə̄ndań tɔ́gə́ḿ dɔ rɔ̄ḿ mə̄kɔ́ tə́ ō. Ré de kə́rēý taā kem kadə̄ n-asə kəndā tɔ́gən dɔ rɔ̄n nəkɔ́ tə́ anī, mā m-ásə kəndā tɔ́gə́ḿ dɔ rɔ̄ḿ mə̄kɔ́ tə́ tɔȳ yā kɔ́ɔ̄.

⁵ Tɔdɔ̄ əjan̄ mɔtəḿ i gō ndɔ̄ kojəḿ kə́ nge ko̰ sɔ́sɔ́ tə́ ō, mā i *Israel kə́ kojə ō, mā i de kə́ gír ɓē yā Benjamḛ tə́ ō, mā i Hebəro kə́ i Hebəro gə̄ n ojəmə̄n̄ ō. Kə́ ɔjə dɔ yá̰a̰ rāā kə́ kə gō *ndū najə̄ yā *Jipə gə̄ ɓáa, mā i de kə́ dan ɓūtə̄ yā *Parijiyḛ gə̄ tə́.

⁶ Kə́ ɔjə dɔ ko̰o̰ kə́ o̰o̰ deē tɔdɔ̄ Nə́ɓā tə́ ɓáa, mā i de kə́ o̰o̰m̄ tɔdɔ̄ Nə́ɓā ngá̰ý, adə̄ m̄-rāā Egəlijə yā Jeju *Kərist ndoō tə́. Kə́ ɔjə dɔ rāā yá̰á̰ kə́ *ndū najə̄ əda tə́ yā kadə̄ deē téləń de kə́ nge rāā yá̰á̰ kə́ gōtə́ ɓáa, najə̄ kə́ yā kadə̄ deē əda dɔḿ tə́ loon tə́ gətóo.

⁷ Tá yá̰á̰ kə́ majə gə̄ ń noō ń m̄-rāādə́ kété ní, ngɔlaā m̄-rāādə́ i yá̰á̰ kə́ m̄-tḭ̄ḭ̄ ta kɔ̄ɔ́ tə́ najə̄ yā Jeju Kərist tə́.

⁸ Rɔ̄kum, m̄-rāā yá̰a̰ malang i yá̰á̰ kə́ m̄-tḭ̄ḭ̄ ta kɔ̄ɔ́ tə́ sɔɔ̄ń ger̄ kə́ m̄-ger̄ Jeju *Kərist Kɔ́ɔ̄ɓē yāḿ tə́. Ger̄ Jeju Kərist i yá̰á̰ kə́ majə tɔȳ yá̰a̰ gə̄ malang. m̄-tḭ̄ḭ̄ ta yá̰a̰ malang najə̄ yān tə́ ō, yá̰a̰ gə̄ ń noō malang ní, m-á̰á̰də́ i tītə̄ yedə̄ beé ta kumḿ tə́ ō. I *Kərist ngóy n i yá̰a̰ tām̄ yāḿ tə́ ní.

⁹ Ɓoo naā yājí seneé i ɓoo naā kə́ líbə́ri a mān̄ mbo̰ō̰ tə́ alé. Loo ń noō tə́ m̄-tél de kə́ nge rāā yá̰á̰ kə́ gō tə́ ta kum Nə́ɓā tə́, i kə ta kūl̄ rāā kə́ m̄-rāā yá̰a̰ gə̄ ń *ndū najə̄ yā Nə́ɓā əda ní to̰ alé, ba i kə ta kūl̄ taā kə́ m̄-taā kem Kərist. Yá̰á̰ kə́ gōtə́ ń noō i yā Nə́ɓā. I deē ń taā kem ní n Nə́ɓā rāān de kə́ gōtə́ tə́ ní.

¹⁰ Yá̰á̰ ń m̄-sāā ní i kadə̄ m̄-ger̄ *Kərist ō, tɔ́gə́ ń ni ndóləń bəlo yo tə́ ní ō. m̄-sāā i ka̰a̰ tápə̄ seneé ō, kadə̄ m̄-to tītə̄n dan ń ni-oyń tə́ ní ō,

¹¹ yā kadə̄ ré i loon tə́ anī ndól̄mə̄n̄ dan ngé gə̄ ń oyn̄ tə́ ní ō.

Ngɔ̄də̄ kə́ ka̰ȳ kum kə̄ rɔ̄ Kərist tə́

¹² Ba i kə́ yā kədań na mā na m-ūgə̄ loo kə́ yā dəba tū tə́ tə́ kɔ̄ɔ́ ɓá, aláa na mā na i de kə́ m̄-majə m-ɔ̄tə̄ kə taá kɔ̄ɔ́ ɓá alé. Banī m̄-na̰y kə̄ loo ka̰ȳ ngɔ̄də̄ tə́ laā ɓáý kum kə̄ kété. M-ə́hɔ rɔ̄ḿ tɔgə kadə̄ m̄-taā yá̰a̰ kəndā nja yā ngé nējə̄ naā ngɔ̄də̄ gə̄, tɔdɔ̄ Jeju *Kərist əhɔm̄ mā kɔ̄ɔ́ ɓá.

¹³ Ngákó̰ó̰ḿ gə̄, m̄-gír̄ kadə̄ mā na m-ə́ngé yá̰a̰ kəndā nja ní kɔ̄ɔ́ ɓá alé. Yá̰á̰ ń m̄-rāā ní i kógə̄ḿ beē: Dɔḿ ndígə̄nal yá̰á̰ kə́ gōḿ tə́ kɔ̄ɔ́, ba m-ə́hɔ rɔ̄ḿ tɔgə kadə̄ m-ūgə̄ rɔ̄ yá̰á̰ kə́ kété noḿ tə́ tə́.

¹⁴ I beé n m-a̰yń ngɔ̄də̄ kum kə̄ loo kə́ yā dəba tū tə́ tə́, yā kadə̄ m-ə́ngeń yá̰a̰ kəndā nja ń Nə́ɓā ɓāŕjí kə ta kūl̄ Jeju *Kərist, yā kadə̄ j-aw̄ j-əngeī dɔɔ́ nú ní.

¹⁵ Jḭḭ̄ malang ń i de kə́ majə ɔtə̄ kə taá gə̄ ní, ādī gír̄ yājí i tītə̄ ń noō. Ba ré gír̄ yāsí i tītə̄ ń noō aĺ anī, Nə́ɓā nəkɔ́ a teē kumsí dɔ tə́.

¹⁶ Ká i rí gə̄gē anī loo ń j-ugī tū tə́ toō ní, ādə̄ jə-njə̄rāī kumjí kə̄ loo kə́ kógə̄ḿ beē tə́.

¹⁷ Ngákó̰ó̰ḿ gə̄, sḭḭ̄ malang ī-ndájə̄mī. Yá̰á̰ kə́ yā kadə̄ de gə̄ ndájə̄n̄ ní, jḭḭ jə-rāā kɔ̄ɔ́ ɓá. I beé ní, ādī kumsí i dɔ ngé gə̄ ń nin̄ a rāān̄ háĺ ń jḭḭ j-ɔjə ní tə́.

¹⁸ Najə̄ ń toō m-ə́dásí kété kɔ̄ɔ́ kə̄ nja naā tə́, ba m̄-téĺ m-ə́dásí ngɔlaā ɓáý kə man̄ nōó kumḿ tə́: Ngá̰ý gə̄ ní, háĺdə́ i háĺ ngé mbātə́ kāgə̄ kə́ dēsə́ yā *Kərist.

¹⁹ Ta tɔ̄l̄ tadə́ i kudə ń nin̄ a udən̄ kɔ̄ɔ́ ní. Nə́ɓā yādə́ i kemdə́. Yá̰á̰ ń majə kadə̄ adə̄də́ rɔ̄sɔl̄ ɓá anī nin̄ a ɔjənə̄ń i rɔ̄də́. Nin̄ a gírə̄n̄ i dɔ yá̰á̰ kə́ dɔ nang tə́ laā gə̄ tə́ ngóy ō.

²⁰ Banī jḭḭ̄ ɓáa jḭḭ̄ i de gə̄ kə́ ɓē yājí i dɔ rā̰ tə́, tá jə-ndi j-a jə-ngóōī i mbée ɓee kadə̄ nge kajəjí ń i Kɔ́ɔ̄ɓē Jeju Kərist ní, ḭḭ dɔ rā̰ tə́ reē ō.

²¹ Ni a tūr̄ rɔ̄jí kə́ dɔ nang tə́ kə́ to rɔ̄ tō ndoō ń toō kɔ̄ɔ́, kadə̄ tél to tītə̄ rɔ̄n nəkɔ́ ń i rɔ̄ kə́ to *kɔsə gɔn ní. Ni a rāā nge ń noō i kə tɔ́gə́ ń ni a əlań dɔ yá̰a̰ malang gíŕ tɔ́gə yān tə́ ní.