PILEMO̰ 1 - Bible sar

Pol rāā Pilemo̰ lápə́ya

¹ I mā Pol ń i dəngáy yā Jeju *Kərist ní, jḭḭ kə ngōkó̰ó̰jí Timote, jə-ndang najə̄ ń toō j-əlań j-adī ḭ̄ kó tár yājí Pilemo̰ madə̄ kəlají ō,

² ngōkó̰ó̰jí kə́ dəyá̰ Apya ō, madə̄ rɔ̄ɔ̄jí Arkipə ō, ngé kán̄ naā gə̄ kə́ kem kújə yāí tə́ ō.

³ Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.

Tár yā Pilemo̰ ō taā kem yān ō

⁴ Dan ń m̄-ndɔ̄ȳ Nə́ɓā anī əga kemḿ dɔí tə́, adə̄ m̄-ndadə̄ Nə́ɓā yāḿ ngándáńg tām̄ yāí tə́.

⁵ Tɔdɔ̄ m-ōō najə̄ tár yāí ō, taā kem yāí ō, kə́ ɔjə dɔ Kɔ́ɔ̄ɓē Jeju ō, de gə̄ yā Nə́ɓā malang ō.

⁶ m̄-dəje Nə́ɓā kadə̄ kem kógə̄ḿ ń do̰ō̰jí naā tə́ seí kə ta kūl̄ taā kem yāí ní, rāā adə̄ ī-ger̄ yá̰á̰ kə́ majə gə̄ malang ń j-əngeī i kə ta kūl̄ ɓoojí naā kə *Kərist ní kə gōó majə.

⁷ Tām̄, ngōkó̰ó̰ḿ, m-ə́nge rɔ̄nel̄ ngá̰ý ō, m-ə́nge tɔ́gə ō, najə̄ tár yāí tə́. Tɔdɔ̄ ḭ̄ ī-sɔl̄ kem de gə̄ yā Nə́ɓā.

Pol dəje yá̰á̰ kógə̄ḿ tām̄ yā Onejim tə́

⁸ I tām̄ ń toō tə́ n mā ń *Kərist adə̄m̄ ta róbə kɔjiī yá̰á̰ gə̄ kə́ yā kadə̄ ī-rāā ní,

⁹ m̄-gír̄ kadə̄ i só tə́ kadə̄ m-ə̄ndā tɔ́gə́ḿ dɔ tár tə́ m̄-rāāīneé ɓɔ́: Mā Pol ń i ɓə́ga ō, i dəngáy tām̄ yā Jeju Kərist tə́ kə̄ dɔ tə́ ɓáý to̰ ngɔlaā ō ní,

¹⁰ m̄-rāāī ɓɔ́ tām̄ yā ngōnə̄ḿ Onejim ń m-ójən kə súlú jīḿ tə́ ní.

¹¹ Kété ni-teē yá̰a̰ tām̄ yāí tə́ alé, ba ngɔlaā a teē yá̰a̰ tām̄ yāí tə́, tītə̄ ń teēń yá̰a̰ tām̄ yāḿ tə́ ní.

¹² m̄-tél m-ə́la seneé gogə́ m-ādī, ni ń i dām̄ rɔ̄ḿ kə́rēý ní.

¹³ Əndā kumḿ ngɔ̄mə̄n rɔ̄ḿ tə́, kadə̄ ni-rāā seḿ kum gotií, dan ń mā i dəngáyá tām̄ yā Najə̄ kə́ Majə tə́ toō.

¹⁴ Banī m̄-gḛy rāā yá̰a̰ kanjə̄ koō yāí alé, yā kadə̄ kem majə yāí to tītə̄ kə́ i kə́ kɔsə seí ta rāā alé, banī i kə gō kem ndigə yāí tá.

¹⁵ Majanī Onejim əya̰ī kum i ngá̰ý alé i yā kadə̄ ī-téĺ ə́ngen gogə́ ngándáńg ní,

¹⁶ i kə́ ɓəlo tə́ to̰ alé, banī ni-mān̄ ɓəlo, adə̄ ni i ngōkó̰ó̰í kə́ kó tár yāí. Mə̄kɔ́ m̄-tárən ngá̰ý, ba ḭ̄ ā ī-tárən ngá̰ý aĺ naā, kə́ gō yā dā̰ rɔ̄ tə́ ō, tām̄ yā Kɔ́ɔ̄ɓē tə́ ō.

¹⁷ Ré ī-rāām̄ mā i madí tə́ rɔ̄kum anī, ə́hɔn kə̄ rɔ̄í tə́ tītə̄ kə́ ə́hɔm̄ i mā nəkɔ́ kə̄ rɔ̄í tə́ beē.

¹⁸ Ba ré ni-rāā yá̰á̰ kə́ gōtə́ aĺ seí, aké kə̄rā yāí i dɔn tə́ anī, ə̄ndā dɔḿ mə̄kɔ́ tə́.

¹⁹ Mā Pol m̄-ndang najə̄ ń toō kə jīḿ mə̄kɔ́ na m-ā m-ə̄gā kə̄rā ní. M-ə́da i najə̄ kə̄rā yāḿ mā kə́ dɔí tə́ alé.

²⁰ A̰á̰ā̰, ngōkó̰ó̰ḿ, ī-rāā kem majə ń toō seḿ tām̄ yā Kɔ́ɔ̄ɓē tə́. Ī-rāā ādə̄ kemḿ tetə kə̄ nang tə́ kem *Kərist tə́.

²¹ I tām̄ ger̄ kə́ m̄-ger̄ majə kadə̄ ā ōō najə̄ taḿ tə́ n m̄-ndangəń najə̄ ń toō ní. m̄-ger̄ kadə̄ yá̰á̰ ń m̄-dəjeī ní, ā ī-rāā kadə̄ mān̄ dɔ.

²² m̄-dəjeī yá̰á̰ kə́ rang, i kadə̄ ī-rāā loo ndi yāḿ, tɔdɔ̄ m̄-gír̄ kadə̄ a télən̄ seḿ a adə̄n̄sí gogə́ kə ta kūl̄ ndɔ̄ȳ yāsí.

Lápə́ya kə́ ta tɔ̄l̄ ta tə́

²³ Epapəras dəngáy madə́ḿ kə́ tām̄ yā najə̄ yā *Kərist Jeju tə́,

²⁴ nin̄ kə madə̄ kəlaḿ gə̄ ń i Mark ō, Aristark ō, Demas ō, Luk ō ní, rāāīn̄ lápə́ya.

²⁵ Ādə̄ Kɔ́ɔ̄ɓē Jeju Kərist rāā kem majə sesí.