OJEE 7 - Bible sar

¹ Kum mbang ń m̄-sāā rāań kadə̄ *Israel ənge rɔ̄ ngáā ní ɓáa, m-á̰á̰ yá̰á̰ kə́ gōtə́ aĺ gə̄ ń *Epəraim gə̄ rāān̄ ní ō, m-á̰á̰ yá̰á̰ kə́ majaĺ ngá̰ý gə̄ ń de kə́ Samari gə̄ rāān̄ ní ō. A̰á̰ā̰, nin̄ i de kə́ rɔ̄kum aĺ gə̄, ngé ɓogə gə̄ a túdə̄n̄ kə̄ kem kújə gə̄ tə́ dɔ gúú tə́ ō, ngé gān̄g róbə gə̄ a rāān̄ yá̰a̰ i kum róbə kɔsə gə̄ tə́ ō.

² Banī nin̄ gírə̄n̄ yá̰á̰ ń toō alé: Yá̰á̰ kə́ majaĺ gə̄ malang ń nin̄ rāān̄ ní, əga kemḿ dɔ tə́. Ngɔlaā ní, yá̰a̰ rāādə́ gə̄ gīr̄ gidədə́ əla ta naā tə́. M-á̰á̰də́ ta kumḿ tə́ ngándáńg.

³ Kə ta kūl̄ kem ndul yādə́, nin̄ rāān̄ mban̄g adə̄ rɔ̄n nelə̄n , kə ta kūl̄ sor̄ yādə́, nin̄ rāān̄ de kə́ bo gə̄ ādə̄ əren̄ kumdə́ ta yá̰á̰ tə́ alé.

⁴ Nin̄ malang rāān̄ rāȳ. Nin̄ ton̄ i tītə̄ púŕ kə́ təngā ngá̰ý, kə́ nge kɔr̄ mápa əndā kumən gírí to̰ alé. Ni-əla gír ka̰a̰ púŕ ní to̰ alé i dan ń ni ló̰yń ndujə̄ tə́ ní, bátə́ kadə̄ ndujə̄ kə́ ló̰ȳ ní agə̄ń.

⁵ Dan ń i ndɔ̄ yā mban̄g anī, de kə́ bo yān gə̄ rāān̄ yá̰a̰ tītə̄ kə́ mo̰y rāādə́ beē, nin̄ a̰ȳn̄ kasə *nduú adə̄ mān̄ dɔ majən. Nin̄ rāān̄ de gə̄ mbóó tə́ ō, mban̄g rāā tītə̄ yādə́ ō.

⁶ Ngé gə̄ ń əndān̄ dɔ yá̰á̰ kə́ majaĺ danaá yā rāā ní, təngān̄ tītə̄ púŕ mápa beé. Ndɔ̄ɔ́ bátə́ yā kadə̄ loo tīiń ní, wōn̄g yādə́ a ɓīī i mbée, banī dəloí anī, ni ndól̄ ba o̰o̰ loo tītə̄ hor kə́ bo beé.

⁷ Nin̄ malang ní, təngān̄ tītə̄ púŕ mápa beé ō, nin̄ tɔ̄lə̄n̄ ngār yādə́ gə̄ ō. Mban̄g yādə́ gə̄ malang tə́sōn̄ kɔ̄ɔ́ ō, de kə́ sāā njaḿ mā gətóo ō.

⁸ *Epəraim ə́la rɔ̄n dan gír de kə́ rang gə̄ tə́. Ni to i tītə̄ makəla kə́ kɔbə̄ kə́ deē tūr̄ gidə alé.

⁹ Tə̄rā gə̄ taān̄ tɔ́gən kɔ̄ɔ́, banī ni a̰ā̰ alé. Dɔn ndaa kɔ̄ɔ́, banī ni ger̄ gō alé.

¹⁰ Ngán *Israel gə̄ ɔjən̄ rɔ̄də́, banī kɔjə rɔ̄ yādə́ ní ɔjə i rāā yá̰a̰ kə gōó alé yādə́ kə̄ ndágá. Israel tél reē rɔ̄ḿ mā Kɔ́ɔ̄ɓē Nə́ɓā yān tə́ alé. Yá̰a̰ malang ń rāān ní gə̄gē, ni sāā njaḿ alé.

¹¹ *Epəraim to i tītə̄ déŕ kə́ mbóo beé. Ni gír̄ yá̰a̰ alé. Ni ɓāŕ Ejiptə ba gō tə́ anī, ni aw̄ dɔ nang kə́ Asiri tə́.

¹² Dan ngeé ń noō tə́ ní, mā m-ə̄nī réng yāḿ dɔ *Epəraim gə̄ tə́, m̄-rāā adə̄ nin̄ tə́sōn̄ tītə̄ yel̄ gə̄ beé. Dan ń m-ōō kōōdə́ loo kɔsə dɔdə́ naā tə́ tə́ anī, m-ə́wádə́ kə gūmbūú.

¹³ Yá̰á̰ kə́ to kum kaȳ aĺ kə́ ba̰ý beē tām̄ yā *Epəraim gə̄ tə́! Nin̄ a̰ȳn̄ rɔ̄ḿ tə́ kɔ̄ɔ́ aw̄n̄ sa̰y! A nujən̄də́ kɔ̄ɔ́, tɔdɔ̄ nin̄ əsōn̄ wōn̄g taḿ tə́. Nin̄ ɔrə̄n̄ najə̄ kə́ sor̄ gə̄ dɔḿ tə́. Loo ń noō tə́ ní, m-ā m̄-rāā i ba̰ý n m-ā m-ásəń gān̄g dɔdə́ ní?

¹⁴ Dan ń nin̄ ɓāŕmə̄n̄ kadə̄ m̄-dḭḭ̄də́ anī, i kə́ rɔ̄kum tə́ alé. Banī nin̄ tṵ́ṵ̄n̄ dɔ tə̄rá yādə́ gə̄ tə́ ō, tə́jān̄ rɔ̄də́ kə doó ō, yā kəngeń gémē ō, kasə *nduú kə́ kijə ō. I tītə̄ ń noō n yá̰á̰ ń mā m̄-ndigə ní nin̄ rāān̄ alé.

¹⁵ Tá kété ní, mā m-ādə̄də́ tɔ́gə. Banī nin̄ gírə̄n̄ i rāā yá̰á̰ kə́ majaĺ seḿ.

¹⁶ Ré a tél a reēn̄ i kə̄ rɔ̄ deē kógə̄ḿ tə́ anī, i kə̄ rɔ̄ḿ mā tə́ alé. Nin̄ ton̄ i tītə̄ ga̰ gərā kə́ rugə beé. Ngār yādə́ gə̄ a oyn̄ ta rɔ̄ tə́, tɔdɔ̄ nin̄ ɔrə̄n̄ najə̄ kə́ majaĺ dɔḿ tə́. Ba de gə̄ a mbóōn̄ sedə́ dɔ nang kə́ Ejiptə tə́.