NEHEMI 5 - Bible sar

Nehemi rāā adə̄ gír háĺ kə́ gōtə́ aĺ gə̄ kə́ kem ɓēé gān̄g

¹ Ndɔ̄ kə́rēý tə́ anī de kə́ kem ɓēé gə̄ nin̄ kə nə̄yá̰də́ gēé nōōn̄ rɔ̄də́ ngá̰ý dɔ ngákó̰ó̰də́ *Jipə gə̄ tə́.

² De kə́rēý gə̄ dandə́ tə́ ədan̄ na: Ngánjí kə́ dəngam gə̄ ō kə́ dəyá̰ gə̄ ō, jḭḭ kɔ́ gə̄ ō ní, jḭḭ i ngá̰ý. Ādə̄ adə̄n̄jí kōō gémē ādə̄ j-əsa tá jə-ndiń kə kumjí.

³ Ngé kə́ rang gə̄ ədan̄ na: Ndɔr̄ yājí gə̄ ō, *kāgə̄ nduú yājí gə̄ ō, kújə yājí gə̄ ō ní, j-adə̄ əhɔn̄ kə̄rā tə́ gír kōō gémē tə́ dan yā ɓō tə́.

⁴ Ngé kə́ rang gə̄ ɓáý to̰ ədan̄ yādə́ na: J-ɔr̄ i ta nar ndɔr̄ yājí gə̄ ō, nar ndɔr̄ *kāgə̄ nduú yājí gə̄ ō n j-əgāń tīr̄ yā mban̄g ní.

⁵ Tá dā̰jí to tītə̄ dā̰ ngákó̰ó̰jí gə̄ ō, ngánjí gə̄ ton̄ i tītə̄ yādə́ gə̄ ō. Banī i gáŕ kadə̄ j-əya̰ ngáń jí kə́ dəngam gə̄ ō kə́ dəyá̰ gə̄ ō kadə̄ rāān̄ kəla ɓəlo. Tá ngáńjí kə́ dəyá̰ kə́rēý gə̄ a rāān̄ i kəla ɓəlo kɔ̄ɔ́ ɓá. J-asə rāā yá̰á̰ kógə̄ḿ tū tə́ alé. Ndɔr̄ yājí gə̄ kə ndɔr̄ *kāgə̄ nduú yājí gə̄ i tām̄ yā de kə́ rang gə̄ tə́.

⁶ Dan ń m-ōō najə̄ gə̄ ń noō ō, nōō rɔ̄ gə̄ ń noō ō anī, wōn̄g rāām̄ ngá̰ý.

⁷ Loo ń noō tə́ m̄-gḛy gákə̄ de kə́ bo gə̄ ō, ngé rāā sarya gə̄ ō, adə̄ m-ə́dádə́ na: I yá̰a̰ kətō kə́ ɔȳ n ī-tə́ndāī dɔ naā tə́ ní! Gō tə́ anī m̄-ɓāŕdə́ loo kán̄ naā kə́ bo tə́

⁸ ba m-ə́dádə́ na: Jḭḭ jə-gān̄g dɔ ngákó̰ó̰jí *Jipə gə̄ ń igən̄ kə rɔ̄də́ jī nápar de kə́ rang gə̄ tə́ ní kə gō ń tɔ́gə́jí asə ní, banī sḭḭ̄ ígiī kə ngákó̰ó̰sí gēé, tá ígiī sedə́ i jījí jḭḭ kɔ́ gə̄ tə́ ɓáý to̰! Nin̄ ndin̄ tadə́ mbóo, tām̄ əngen̄ najə̄ kə́ yā kəda alé.

⁹ Tā anī m-ə́dádə́ na: Yá̰á̰ ń ī-rāāī ní majə alé. Yá̰á̰ ń kadə̄ ī-rāāī ní i kadə̄ ī-ɓolíī ndíĺ Nə́ɓā yājí. Tá kadə̄ nápar de kə́ rang gə̄ ń i madə̄ ba̰ā̰jí gə̄ ní əlan̄ rɔ̄sɔl̄ dɔjí tə́ alé.

¹⁰ Mə̄kɔ́ ō ngákó̰ó̰ḿ gə̄ ō, ngé kəla yāḿ gə̄ ō, j-adə̄də́ nar ō kōō gémē ō loo tə̄nā tə́. Beé ní ādə̄ j-əya̰ī gō kə̄rā yājí gə̄ kɔ̄ɔ́.

¹¹ Ī-téliī kə ndɔr̄ yādə́ gēé ō, ndɔr̄ *kāgə̄ nduú yādə́ gēé ō, *kāgə̄ olibə yādə́ gēé ō, kújə yādə́ gēé ō, ādīdə́ gogə́ ɓōólaā nəkɔ́ ń toō tə́. Yá̰a̰ gə̄ ń ādīdə́ loo tə̄nā tə́ á i nar, aké i kōō gémē, aké i kasə *nduú kə́ kijə, aké i yibə̄ ní, manə̄n kə́ dɔ tə́ gə̄ ń ī-taāī jīdə́ tə́ ní ī-téliīneé ādīdə́ gogə́ ō.

¹² Nin̄ tél ədan̄ na: J-a jə-rāā tītə̄ ń ə́dańjí ní. Yá̰a̰ gə̄ ń jə-táā jīdə́ tə́ ní j-a jə-téləń yā kadə̄də́ gogə́ ō, j-a jə-dəjedə́ yá̰á̰ kógə̄ḿ dɔ tə́ aĺ ō. Loo ń noō tə́ m̄-ɓāŕ *ngé tun̄ yá̰a̰ gə̄ ba m-ādə̄ de gə̄ ń kə̄rā yādə́ i dɔ madə̄də́ gə̄ tə́ ní túbən̄ kadə̄ ran̄ dɔ míndə́də́ tə́.

¹³ Gō tə́ anī m̄-yéȳ ta kūbə̄ yāḿ yakə yakə ba m-ə́da na: De gə̄ malang ń a ran̄ dɔ míndə́də́ tə́ aĺ ní, Nə́ɓā a yéȳdə́ yakə yakə kɔ̄ɔ́ tītə̄ ń noō, kadə̄ a teēn̄ kem kújə yādə́ tə́ yā kəsō ndágá ō, kadə̄ a teēn̄ kadə yá̰a̰ kənge yādə́ tə́ yā kəsō sa̰y ō. A yéȳdə́ yakə yakə ō, a əya̰n̄də́ kanjə̄ yá̰á̰ kógə̄ḿ ō tītə̄ ń noō! Ngé kán̄ na ā gə̄ malang ədan̄ na: *Adə̄ i tītə̄ ń noō! Gō tə́ anī tɔ̄ȳn̄ Kɔ́ɔ̄ɓē ō, rāān̄ yá̰á̰ ń i kə́ kəda ní ō.

¹⁴ Əla gír ndɔ̄ ń əndān̄neé dɔḿ tə́ kadə̄ i mā n i nge ko̰o̰ ɓē dɔ *Jipə gə̄ tə́ gō nang kə́ *Juda tə́, adə̄ i ɓāl̄ ko̰o̰ ɓē yā Artajerses kə́ nge ko̰ kutə jōó tə́ bátə́ ɓāl̄ ko̰o̰ ɓē yān kə́ nge ko̰ kutə mətá gidə i jōó tə́, adə̄ i bátə́ ɓāl̄ kutə gidə i jōó ní, tīr̄ ń mban̄g adə̄ ngé ko̰o̰ ɓē gə̄ ta róbə taā jī de gə̄ tə́ dɔ lambóó tə́ ní, mā ō ngákó̰ó̰ḿ gə̄ ō jə-taā jī de gə̄ tə́ alé.

¹⁵ Ngé ko̰o̰ ɓē kə́ kété noḿ tə́ gə̄ rāān̄ de gə̄ rakəta ngá̰ý: Nin̄ taān̄ sə́lē arjā̰a̰ kutə sɔ́ jīdə́ tə́ ō, ran̄ dɔ tə́ taān̄ yá̰a̰ kəsa yādə́ gə̄ ō, kasə *nduú yādə́ gə̄ ō. Ngé kəla yādə́ gə̄ rāān̄ kum de gə̄ ndoō tə́ ō. Banī mā m̄-rāā tītə̄ ń noō nja kógə̄ḿ alé tɔdɔ̄ m̄-ɓōĺ ndíĺ Nə́ɓā.

¹⁶ Mə̄kɔ́ m-ə̄ndā rɔ̄ḿ ta kəla kəndā ndogə̄ mbal̄ tə́ ō, m̄-mang loo ndɔr̄ aĺ ō. Ngé kəla yāḿ gə̄ ń rāān̄ kəla kəndā ndogə̄ mbal̄ ō ní mangən̄ loo ndɔr̄ aĺ ō.

¹⁷ Tá *Jipə kə́ ngé rāā sarya gə̄ ɓú kə kutə mí a əsan̄ yá̰a̰ i ɓēé looḿ, naā tə́ kə mbā gə̄ ń reēn̄ dɔjí tə́ ní. Mbā gə̄ ní ḭḭn̄ i dan nápar de gə̄ ń ndin̄ gīrə̄n̄ gidəjí tə́ ní.

¹⁸ Yá̰a̰ kəsa ń a ndīrə̄n̄ kə dɔ ndɔ̄ gə̄ tām̄ yāḿ tə́ ní i man̄g kógə̄ḿ ō batə̄ gə̄ mehḛ́ kə́ gə̄rān̄də́ dan madə̄ gə̄ tə́ ō, kə̄njá gə̄ ō. Ba kə dɔ ndɔ̄ kə́ nge ko̰ kutə gə̄ malang ní kasə *nduú i ngá̰ý. Ɓá tā ba m̄-dəje najə̄ kəsa ń a adə̄n̄ ngé ko̰o̰ ɓē gə̄ ní alé, tɔdɔ̄ kəla rāā de gə̄ ngá̰ý kɔ̄ɔ́ ɓá.

¹⁹ Nə́ɓā yāḿ, ādə̄ əga kemií dɔ yá̰a̰ malang ń m̄-rāā tām̄ yā gír de gə̄ ń toō tə́ ní ba ī-rāā kem majə seḿ.