NEHEMI 4 - Bible sar

¹ Dan ń Sanbalat ō Tobia ō Arabə gə̄ ō Amon gə̄ ō Asdod gə̄ ō oōn̄ kadə̄ kəla kəndā ndogə̄ mbal̄ kə́ Jerusalem a aw̄ i kum kə̄ kété ō, kum loo kə́ ra wōȳ kə́ tū tə́ gə̄ i kə́ kutə̄ kɔ̄ɔ́ ō anī, wōn̄g rāādə́ ngá̰ý.

² Nin̄ oōn̄ naā yā reē malang gidə kógə̄ḿ yā kənī ɓē kə́ Jerusalem rɔ̄ɔ̄ ō, yā nujə loo kemeé ō.

³ Tā anī jə-ndɔ̄ȳ Nə́ɓā yājí ba j-əndā de gə̄ kadə̄ ngɔ̄mə̄n̄ loo kadaá ō ndɔ̄ɔ́ ō najə̄ yādə́ tə́.

⁴ Ɓá tā ba de kə́ dəngam kə́ *Juda tə́ gə̄ ədan̄ na: Tɔ́gə́ ngé rāā kəla gə̄ təgā kɔ̄ɔ́! Loo kə́ nujə gə̄ i ngá̰ý! J-asiī kəndā ndogə̄ mbal̄ tɔ̄l̄ alé!

⁵ Madə̄ ba̰ā̰jí gə̄ ədan̄ yādə́ na: A gerə̄n̄ gōjí aĺ ō, a a̰a̰n̄jí aĺ ō, bátə́ kadə̄ j-ugīīneé dandə́ tə́. Loo ń noō tə́ j-a jə-tɔ̄līdə́ ō, j-a jə-bāāī ta kəla ō.

Nehemi adə̄ ngé rāā kəla gə̄ yá̰a̰ rɔ̄ɔ̄ gə̄

⁶ *Jipə gə̄ ń ndin̄ ɓē kadə madə̄ ba̰ā̰jí gə̄ tə́ ngɔr ní reē tāān̄jí kə̄ nja naā tə́ najə̄ yá̰á̰ kə́ to yo ń a ngḛy jí nang tə́ ní, ədan̄ na: Loo malang ń sḭḭ̄ āwī tū tə́ ba ī-tél ī-reēī ní, nin̄ teēn̄ kə̄ ta gə̄ tə́ yā reē rɔ̄ jí! Loo ń noō tə́ m-á̰a̰ ku loo gə̄ gidə ndogə̄ mbal̄ tə́ ndágá.

⁷ Anī m̄-tə́ndā ngé rɔ̄ɔ̄ gə̄ tū tə́ kə gō gír kaa yādə́ gēé. Yá̰a̰ rɔ̄ɔ̄ yādə́ gə̄ i kaskar ō nənga ō ga̰ gərā ō.

⁸ M-á̰a̰ loo oy anī m-ə́da de kə́ bo gə̄ ō, ngé rāā sarya gə̄ ō, gotə ngán *Israel gə̄ ō na: Ī-lōōī ɓōĺdə́! Ādə̄ əga kemsí dɔ Kɔ́ɔ̄ɓē ń i de kə́ bo ō, to ɓōĺ ngá̰ý ní ō tə́, ba ī-rɔ̄ɔ̄ī tām̄ yā ngákó̰ó̰sí gə̄ tə́ ō, ngáńsí gə̄ tə́ ō nə̄yá̰sí gə̄ tə́ ō, kújə yāsí gə̄ tə́ ō.

⁹ Dan ń madə̄ ba̰ā̰jí gə̄ oōn̄ kadə̄ tāān̄jí kɔ̄ɔ́ anī, nin̄ gerə̄n̄ kadə̄ Nə́ɓā nujə yá̰á̰ ń nin̄ númə̄n̄ yā rāā ní kɔ̄ɔ́. Loo ń noō tə́ jḭḭ malang jə-tél j-aw̄ ta kəla kəndā ndogə̄ mbal̄ tə́ gogə́. De gə̄ kógə̄ḿ kógə̄ḿ ran̄ ta kəla yādə́ gə̄ tə́.

¹⁰ Banī əla gír ndɔ̄ ń noō tə́ ní i núsə de gə̄ ngóy n a rāān̄ kəla. Gotə gə̄ ran̄ i kə yá̰a̰ rɔ̄ɔ̄ gēé. Ran̄ i kə nənga gə̄, kə der gə̄, kə ga̰ gərā gə̄, kə kūbə̄ gində̄ gə̄. Ngār gə̄ əndān̄ kumdə́ gír *Juda gə̄ tə́ malang.

¹¹ Ngé kəndā ndogə̄ mbal̄ gə̄ ō, ngé kətō yá̰a̰ gə̄ ō, ngé kɔy yá̰a̰ kə̄ dɔɔ́ gə̄ ō, a rāān̄ kəla i kə jīdə́ kə́ kógə̄ḿ, banī jīdə́ kə́rēý a əhɔ i yá̰a̰ rɔ̄ɔ̄.

¹² Ngé kəndā ndogə̄ mbal̄ gə̄ ran̄ i kə kaskar gēé ɓōdə̄də́ tə́ n a əndān̄neé ndogə̄ mbal̄ ní. Nge kɔ̄ŕ tōw̄ ra i kadəḿ mā tə́.

¹³ M-ə́da de kə́ bo gə̄ ō, ngé rāā sarya gə̄ ō, gotə ngán *Israel gə̄ ō na: Kəla i ngá̰ý ō, laa ngá̰ý ō, jə-tə̄ndā jə-tḭ̄ḭ̄ naā kə̄ loo gə̄ tə́ dɔ ndogə̄ mbal̄ tə́ ō, adə̄ jḭḭ̄ i sa̰y rɔ̄ naā tə́ ní,

¹⁴ ré ōōī kōō tōw̄ kə́ ɓār̄ anī, ɔ́siī dɔsí naā tə́ rɔ̄ḿ tə́. Nə́ɓā yājí a rɔ̄ɔ̄ tām̄ yājí tə́.

¹⁵ Dan ń jə-ra j-a jə-rāā kəla ní, deē yājí kə́rēý gə̄ ran̄ i kə nənga gēé jīdə́ tə́. J-əla gír rāā kəla i dan ń ta gír loo unjə̄ wororo ní. Jə-rāā bátə́ kadə̄ tə́yō̰ gə̄ ndangən̄ ngururu dɔjí tə́.

¹⁶ I dan ngeé ń noō tə́ n m-ə́dań ngán *Israel gə̄ najə̄ ń toō ní. M-ə́dádə́ na: Sḭḭ̄ kógə̄ḿ kógə̄ḿ ní, ndɔ̄ɔ anī ī-toī Jerusalem kə ngé kəla yāsí gēé. Ndɔ̄ɔ́ anī ādə̄ j-əndāī ngé ngɔ̄m̄ loo gə̄ dɔjí tə́, banī kadaá anī jə-rāāī kəla malang.

¹⁷ Mə̄kɔ́ ō, ngééḿ gə̄ ō, madə̄ kəlaḿ gə̄ ō, ngé ngɔ̄m̄ loo gə̄ ń a unən̄ gōḿ ō ní, de kə́ danjí tə́ kə́ ɔr̄ kūbə̄ rɔ̄n tə́ gətóo. Jḭḭ kógə̄ḿ kógə̄ḿ malang ní, yá̰a̰ rɔ̄ɔ̄ yājí gə̄ i jījí kə́ ko̰ó̰ tə́.