NEHEMI 10 - Bible sar

Ngán Israel gə̄ ənīn̄ ndūdə́ yā rāā yá̰á̰ ń *ndū najə̄ əda ní

¹ J-ənī ndūjí kə ngangá ngá̰ý sɔɔ̄ń yá̰a̰ malang ń teē dɔjí tə́ ní. Ba ndūjí ń j-ənī ní jə-ndang kem makətūbūú ō, j-əndā *tambō̰o̰ dɔ tə́ ō. Ngār yājí gə̄ ō *ngán Lebi yājí gə̄ ō, *ngé tun̄ yá̰a̰ yājí gə̄ ō, əndān̄ jīdə́ gír makətūbə̄ ní tə́.

² De gə̄ ń əndān̄ jīdə́ gírí ní rīdə́ n toó: Nehemi kə́ ngōn̄ Hakalia, ni i nge ko̰o̰ ɓē. Sidekia,

³ Seraya, Ajaria, Irmeya,

⁴ Pasəhur, Amaria, Malkia

⁵ Hatus, Sebania, Maluk,

⁶ Harim, Meremot, Obadia,

⁷ Daniel, Gineton, Baruk,

⁸ Mesulam, Abia, Miamin,

⁹ Maajia, Bilgai, Semaya. Nin̄ malang i *ngé tun̄ yá̰a̰ gə̄.

¹⁰ *Ngán Lebi gə̄ i Yesua kə́ ngōn̄ Ajania ō, Binui ń i de kə́ gír kaa yā Henadad tə́ ní ō, Kadəmiel ō,

¹¹ ngákó̰ó̰də́ gə̄ i Sebania ō Hodia ō Kelita ō Pelaya ō Hanan ō

¹² Mika ō Rehob ō Hasabia ō

¹³ Jakur ō Serebia ō Sebania ō

¹⁴ Hodia ō Bani ō Beninu ō.

¹⁵ Ngār gə̄ yā ngán *Israel gə̄ i Paros ō Pahat Moab ō Elam ō Jatu ō Bani ō

¹⁶ Buni ō Asgad ō Bebai ō

¹⁷ Adonia ō Bigwai ō Adin ō

¹⁸ Ater ō Hijəkia ō Ajur ō

¹⁹ Hodia ō Hasum ō Besai ō

²⁰ Harip ō Anatot ō Nebai ō

²¹ Magəpias ō Mesulam ō Hejir ō

²² Mesejabel ō Sadok ō Yadua ō

²³ Pelatia ō Hanan ō Hanania ō

²⁴ Ose ō Hanania ō Hasub ō

²⁵ Halohes ō Pila ō Sobek ō

²⁶ Rehum ō Hasabəna ō Maseya ō

²⁷ Ahia ō Hanan ō Anan ō

²⁸ Maluk ō Harim ō Baana ō.

²⁹ Gotə ngán *Israel gə̄ ō, *ngé tun̄ yá̰a̰ gə̄ ō, *ngán Lebi gə̄ ō, ngé ngɔ̄m̄ ta róbə́ kújə gə̄ ō, gōsə̄ pā gə̄ ō, ngé kəla gə̄ ō, de gə̄ malang ń ɔrə̄n̄ rɔ̄də́ kɔ̄ɔ́ rɔ̄ de gə̄ kə́ dɔ ɓē kə́ rang gə̄ tə́ yā kunəń gō *ndū najə̄ yā Nə́ɓā ní ō, nə̄yá̰də́ gə̄ ō, ngáńdə́ kə́ dəngam gə̄ ō, kə́ dəyá̰ gə̄ ō ń asən̄ ger̄ kum najə̄ ní ō,

³⁰ ɓoon̄ rɔ̄də́ tū yā ngákó̰ó̰də́ gə̄ ń i de kə́ bo gə̄ ní tə́. Nin̄ túbən̄ njadə́ ənīn̄neé ndūdə́ yā rāā yá̰á̰ ń *ndū najə̄ yā Nə́ɓā əda ní ō, gō míndə gə̄ malang ń Kɔ́ɔ̄ɓē ń i kɔ́ɔ̄jí ní əda kadə̄ yā rāā ní ō, yā rāań yá̰a̰ kə g ō, jī bēl̄ loo rāā yá̰a̰ yān gə̄ ō. Nə́ɓā adə̄ ndū najə̄ ní i kə ta kūl̄ Moijə kə́ nge kəla yān.

³¹ Adə̄ de gə̄ ń ndin̄ kem ɓēé ní j-adə̄də́ ngáńjí kə́ dəyá̰ gə̄ aĺ ō, j-a jə-taā ngáńdə́ kə́ dəyá̰ gə̄ yā kadə̄ ngáńjí kə́ dəngam gə̄ aĺ ō.

³² Ré reēn̄ kə kōō gémēé, aláa yá̰a̰ gātə̄ kə́ rang gēé yā kigəń ndɔ̄ *sabat yā Nə́ɓā tə́, aláa ndɔ̄ rāā nāā tə́ anī, j-a jə-mangdə́ yá̰á̰ kógə̄ḿ alé. Kə dɔ ɓāl̄ kə́ sīrí gə̄ malang ní, j-a j-əya̰ dɔ nang kadə̄ taā koō ō, j-a jə-lōō gír dəje kə̄rā gə̄ tə́ ō.

³³ J-əndā *ndū najə̄ kógə̄ḿ dɔjí jḭḭ kɔ́ gə̄ tə́ kadə̄ j-adə̄ kəlōo gə̄ sɔ́ kə dɔ ɓāl̄ gēé yā rāań kəla kə́ kem *kújə yā Nə́ɓā yājí tə́.

³⁴ Adə̄ i yā sāań mápá kə́ yā ndējə̄ Nə́ɓā ō, *yá̰a̰ tun̄ kə́ yā róō horoó gə̄ ō, *yá̰a̰ ndējə̄ kə́ rāā kə kōó gə̄ kə́ yā ndējə̄ kə dɔ ndɔ̄ gə̄ ō, *yá̰a̰ tun̄ gə̄ kə́ ndɔ̄ *sabat tə́ ō, ndɔ̄ teē nāā tə́ ō, ndɔ̄ rāā nāā gə̄ tə́ ō, yá̰á̰ kə́ kɔr̄ kam̄ tayā tām̄ yā Nə́ɓā tə́ gə̄ ō, *yá̰a̰ tun̄ gə̄ kə́ yā kutəń dɔ majaĺ gə̄ yā ngán Israel gə̄ ō, yā rāań kəla malang kə́ tū *kújə yā Nə́ɓā yājí tə́ ō.

³⁵ Jḭḭ *ngé tun̄ yá̰a̰ gə̄ ō, ngán *Lebi gə̄ ō, de kə́ karī gə̄ ō, jə-túgə̄ wə̄lā j-adə̄ń gír kojə yājí gə̄ kum m bang gə̄ kə́ yā reēń kə kīr̄í yā ndējə̄ kem kújə yā Nə́ɓā yājí tə́. A reēn̄neé i kə dɔ ɓāl̄ gə̄ yā tə́ngań yá̰á̰ kə́ tun̄ dɔ *loo tun̄ yá̰a̰ yā Kɔ́ɔ̄ɓē Nə́ɓā yājí tə́ tītə̄ ń *ndū najə̄ ədań ní.

³⁶ Kan̄ yá̰á̰ kə́ dɔ nang yājí tə́ kə́ ta kəga dɔ ō, kan̄ kāgə̄ yājí kə́ ta kəga dɔ gə̄ ō ní, i gáŕ kadə̄ jə-reēń kem *kújə yā Kɔ́ɔ̄ɓē tə́ kə dɔ ɓāl̄ gə̄.

³⁷ I gáŕ kadə̄ jə-reē kə ngáń hágə́jí kə́ dəngam gə̄ ō, hágə́ yá̰a̰ kul̄ yājí gə̄ ō, kem *kújə yā Kɔ́ɔ̄ɓē tə́ tītə̄ ń ndangən̄neé kem makətūbə̄ *ndū najə̄ tə́ ní. Hágə man̄g yājí gə̄ ō, hágə batə̄ yājí gə̄ ō, hágə bə̄yā̰ yājí gə̄ ō ní, j-a jə-reēń kem kújə yā Nə́ɓā yājí tə́ yā kadə̄ *ngé tun̄ yá̰a̰ gə̄ ń a rāān̄ kəla kem kújə yā Nə́ɓā yājí tə́ ní.

³⁸ J-a jə-kēgə̄ ndujə̄ yājí kə́ majə yā kadə̄də́ ō, j-a j-adə̄də́ *yá̰a̰ ndējə̄ yājí kə́ kəla kə̄ dɔɔ́ gə̄ ō, kan̄ kāgə̄ yājí gə̄ ō, kasə *nduú yājí kə́ kijə ō, yibə̄ ō. J-a j-aw̄ń kem kújə́ kə́ kadə *kújə yā Nə́ɓā yājí tə́ yā kadə̄də́. Kan̄ yá̰a̰ gə̄ ń teēn̄ dɔ nang yājí tə́ ní i kutə anī, j-a j-ɔr̄ kógə̄ḿ danaá yā kadə̄ *ngán Lebi gə̄ ō. Nin̄ kɔ́ gə̄ ngán Lebi gə̄ kə deē dɔdə́ a aw̄n̄ kə̄ kem ɓē gə̄ malang ń j-a jə-rāā kəla kemeé tə́ ní yā kaw̄ taā dɔ yá̰á̰ kə́ kɔr̄ kógə̄ḿ dan kə́ kutə gə̄ tə́.

³⁹ Dan ń a taān̄ anī *nge tun̄ yá̰á̰ kógə̄ḿ kə́ ngōn̄ *Aaro̰ a ra loo taān tə́ sedə́ ō, ré dɔ yá̰á̰ kə́ kɔr̄ kógə̄ḿ dan kə́ kutə gə̄ tə́ ní ugə̄ kutə anī, nin̄ a ɔrə̄n̄ kógə̄ḿ tām̄ yā *kújə yā Nə́ɓā yājí tə́ ō, ba a aw̄n̄neé i kem kújə ngɔ̄m̄ yá̰a̰ kənge tə́.

⁴⁰ Tām̄ ngán *Israel gə̄ ō, ngán Lebi gə̄ ō, a reēn̄ kə kōō gémē kə́ ndējə̄ gə̄ ō, kasə *nduú kə́ guḿ ō, yibə̄ ō, a ɓōkə́n̄ i kem kújə ngɔ̄m̄ yá̰a̰ kənge ní tə́. Yá̰a̰ rāā kəla gə̄ kə́ kem *loo kə́ táĺ tə́ a ton̄ i kem kújə́ ní tə́ ō, *ngé tun̄ yá̰a̰ gə̄ ń a rāān̄ kəla ní ō, ngé ngɔ̄m̄ ta róbə́ kújə gə̄ ō, gōsə̄ pā gə̄ ō ní a ran̄ i kemeé. I tītə̄ ń noō n j-a j-əya̰ń *kújə yā Nə́ɓā yājí kɔ̄ɔ́ aĺ ní.