MARK 6 - Bible sar

De kə́ Najaret gə̄ taān̄ kem Jeju alé

¹ Jeju ḭḭ loo ń noō tə́ aw̄ gō nang yān tə́. Ngé ndóō yá̰a̰ yān gə̄ unən̄ gōn.

² Loo ń ndɔ̄ *sabat ugə̄ anī, əla gíŕ ndóō de gə̄ yá̰a̰ kem kújə́ kán̄ naā tə́. De gə̄ ń oōn̄ najə̄ yān ní nin̄ i ngá̰ý. Ɔr kumdə́, adə̄ dəjen̄ na ké ni-ḭḭ kə yá̰a̰ gə̄ ń toō i rá wa, ké kum kedə̄ ń adə̄nən̄ ń toó ḭḭ i rá wa, ké ni-rāā yá̰á̰ kə́ yáā gə̄ ngá̰ý kə́ tītə̄ ń noō gə̄ kə dɔneé i ba̰ý wa.

³ Ké ni i nge kəja kāgə̄ aĺ wa, ké ni i ngōn̄ Mari ō, ni i ngōkó̰o̰ Jakə ō, Jose ō, Jud ō, Simo̰ ō aĺ wa, tá ké i ngákó̰o̰n kə́ dəyá̰ gə̄ n ndin̄ danjí tə́ laā toó aĺ wa. Jeju i tītə̄ bə̄dē kə́ əgadə́ beé.

⁴ Banī ədadə́ na deē ń i *nge koō ta ní, de gə̄ a kídə̄nən̄ i kem ɓē kojən tə́ ngóy ō, dan ngéén gə̄ tə́ ngóy ō, gír kojə yān tə́ ngóy ō.

⁵ Adə̄ Jeju asə rāā yá̰á̰ kə́ yáā kógə̄ḿ loo ń noō tə́ alé banī əndā jīn i dɔ ngé mo̰y kə́rēý gə̄ tə́ ngóy adə̄ rɔ̄də́ ngáā.

⁶ Ba ɔr kumən tām̄ taā kem aĺ yādə́ tə́. Jeju njə̄rā kə gō ngán ɓē gə̄ ń gīrə̄n̄ gidə ɓē tə́ ní, a ndóoń de gə̄ yá̰a̰.

Jeju əla ngé ndóō yá̰a̰ yān gə̄ kə́ kutə gidə i jōó gə̄ jōó jōó

⁷ Jeju ɓār̄ ngé ndóō yá̰a̰ gə̄ ń nin̄ i deē kutə gidə i jōó ní kə̄ rɔ̄n tə́, ba əladə́ jōó jōó. Ni-adə̄də́ tɔ́gə dɔ ndíĺ kə́ yḛr gə̄ tə́.

⁸ Ni ɔgə̄də́ kun yá̰á̰ kə́ tām̄ yā róbə́ tə́, ba kə i kāgə̄ tɔ́sə̄ tá ngóy. Ədadə́ kadə̄ na kə lōōn̄ kun mápa, aláa ngong, aláa sə́lē kem ngong nar tə́.

⁹ Kə əlan̄ sākə̄rā njadə́ tə́, banī kə əlan̄ kūbə̄ dɔ naā tə́ jōó alé.

¹⁰ Tā anī ədadə́ na: Kújə́ kə́ rá gə̄gē ń ā údiī tū tə́ ní, ā ī-ndiī tū tə́ bátə́ kadə̄ ḭ́ḭīneé loo ń noō tə́.

¹¹ Ba ré kem loo kógə̄ḿ tə́ de gə̄ əhɔn̄sí kə̄ rɔ̄də́ tə́ aĺ ō, oōn̄ najə̄ yāsí aĺ ō anī, ī-teēī loo ń noō tə́ kɔ̄ɔ́, ba ī-*gógī bumbə́rú kə́ njasí tə́, tɔdɔ̄ nge ń noō tél i najə̄ kə́ kum tə́ yādə́.

¹² Ngé kə́ kutə gidə i jōó gə̄ ní aw̄n̄, a ənīn̄ mbēr̄ tūr̄ hál.

¹³ Nin̄-tə̄ɓān̄ ndíĺ kə́ majaĺ gə̄ ngá̰ý ō, *urən̄ yibə̄ dɔ ngé mo̰y kə́ ngá̰ý gə̄ tə́ adə̄ rɔ̄də́ ngáā ō.

Ja̰a̰ Batistə oy

¹⁴ Mban̄g Herod oō kōō Jeju, tɔdɔ̄ rīn asə gō loo gə̄ ngá̰ý, adə̄ de gə̄ ədan̄ na i Ja̰a̰ Batistə n ndól̄ dan de kə́ koy gə̄ tə́ kɔ̄ɔ́ ní, adə̄ na i tām̄ ń noō tə́ n aw̄ kə tɔ́gə yā rāā yá̰á̰ kə́ yáā gə̄ ń noō ní.

¹⁵ Ba de kə́rēý gə̄ ədan̄ na ni i *Eli ō, de kə́rēý ədan̄ na ni i *nge koō ta kə́ tītə̄ nge kógə̄ḿ dan *ngé koō ta gə̄ tə́ ō.

¹⁶ Tá loo ń Herod oō beé ní anī, əda na: I Ja̰a̰ nəkɔ́ ń m̄-gān̄g dɔn ní n ndól̄ noó.

¹⁷ Tɔdɔ̄ Herod nəkɔ́ adə̄ əhɔn̄ Ja̰a̰ ənīnən̄ kújə dəngáyá kə súĺ njan tə́, najə̄ yā Herodiad nə̄yá̰ ngōkó̰o̰n Pilipə tə́.

¹⁸ I tām̄ Ja̰a̰ əda Herod na: *Ndū najə̄ yā Nə́ɓā ɔgə̄ kadə̄ ī-taā nə̄yá̰ ngōkó̰ó̰í.

¹⁹ Herodiad im̄ Ja̰a̰ kemən tə́ ngá̰ý. Ni gḛy tɔ̄lə̄n, ba asə alé,

²⁰ tɔdɔ̄ Herod ɓōĺ ndíĺ Ja̰a̰, tām̄ ni-ger̄ kadə̄ Ja̰a̰ i de kə́ súmūú ō, i de kə́ *táĺ yā Nə́ɓā ō, adə̄ ngɔ̄mə̄n. Loo ń ni-oō najə̄ yān ní, ni gír̄ najə̄ ngá̰ý gə̄gē, ba oō najə̄ yān kə rɔ̄nelēé.

²¹ Ba ndɔ̄ kə́ majə tām̄ yā Herodiad tə́ reē ugə̄. Herod rāā yá̰a̰ kəsa tām̄ nāā kojən tə́, mērəń de kə́ bo yān gə̄ ō, ngol áskar yān gə̄ ō, ngār kə́ Galile gə̄ ō.

²² Ngōn̄ Herodiad kə́ dəyá̰ reē udə loo kəsa yá̰á̰ tə́, a ndām̄, adə̄ nel̄ Herod ō, ngé gə̄ ń a əsan̄ yá̰a̰ seneé ní ō. Mban̄g əda ngōmandə ní na: Ī-dəjem̄ yá̰á̰ ń ī-gḛy ní anī m-ā m-ādī.

²³ Ni-ənī míndən əda na: Yá̰á̰ rí nəkɔ́ ń ā ī-dəjem̄ ní, ká i dām̄ ɓē ko̰o̰ yāḿ gə̄gē anī, m-ā m-ādī.

²⁴ Ngōmandə ní teē, aw̄ dəje kó̰o̰n na ké kə n-dəje i yá̰á̰ rí wa. Anī kó̰o̰n tél ədan na kə dəje dɔm dɔ Ja̰a̰ Batistə.

²⁵ Kə̄ ta jī tə́ noō ni-reē láẃ rɔ̄ mban̄g tə́, ba ədan na: m̄-gḛy kadə̄ ādə̄m̄ dɔm dɔ Ja̰a̰ Batistə kem səmbēé ngɔr ń toō tə́.

²⁶ Najə̄ ní rāā adə̄ rɔ̄ mban̄g nelə̄n aĺ ngá̰ý tā, ba dan ń ni-ənī míndən kɔ̄ɔ́ ta kum ngé rāā nāā gə̄ tə́ ní, ni-gḛy kɔgə̄n alé.

²⁷ Kə̄ ta jī tə́ noō ni-əla áskar kógə̄ḿ kadə̄ reē kə dɔm dɔ Ja̰a̰.

²⁸ Áskar ní aw̄ gān̄g dɔ Ja̰a̰ kújə dəngáyá, ba reēń kem səmbēé adə̄ ngōmandə ní, adə̄ ngōmandə taā adə̄ kó̰o̰n.

²⁹ Ba loo ń ngé ndóō yá̰á̰ yā Ja̰a̰ gə̄ oōn̄ najə̄ ní anī, reē unən̄ nīnə́n aw̄ dubə̄n̄.

Jeju adə̄ de kə́ dūbú mí gə̄ yá̰a̰ kəsa

³⁰ Ngámbang kəla gə̄ kánə̄n̄ naā rɔ̄ Jeju tə́, ba ɔjənən̄ gotə yá̰a̰ malang ń nin̄-rāān̄ ní ō, gotə yá̰a̰ malang ń nin̄-ndóōn̄ de gə̄ ní ō.

³¹ Jeju ədadə́ na: Sḭḭ̄ kɔ́ gə̄, ī-reē, j-awī dām̄ loo kə́ deē gətóo tū tə́ tə́, ɔ̄rī koō sḛ́ý. Tɔdɔ̄ de gə̄ ngá̰ý aw̄n̄ ō télən̄ ō, adə̄ Jeju nin̄ kə ngé ndóō yá̰a̰ yān gə̄ gerə̄n̄ loo kəsa yá̰a̰ gə̄gē aĺ bátə́.

³² Tā anī nin̄-alə̄n̄ kem toó yā kaw̄ tayā, dām̄ loo kə́ ɓē gətóo tū tə́ tə́.

³³ De gə̄ ngá̰ý a̰a̰n̄də́ loo kaw̄ tə́, banī gerə̄n̄ loo ń nin̄ a aw̄n̄ kə̄ tū tə́ ní kɔ̄ɔ́. Adə̄ nin̄-teēn̄ kə̄ kem ɓē gə̄ tə́, ba a̰ȳn̄ ngɔ̄də̄ kə njadə́ aw̄ ugə̄n̄ kété nodə́ tə́.

³⁴ Loo ń Jeju teē kem to tə́, ba a̰a̰ kósə de gə̄ ngá̰ý anī, kumən o̰o̰n sedə́. Tɔdɔ̄ nin̄-ton̄ tītə̄ batə̄ gə̄ kə́ nge kul̄də́ gətóo beé, ba ni-əla gíŕ ndóōdə́ yá̰á̰ ngá̰ý.

³⁵ Loo ń mbang a udə ngɔr anī, ngé ndóō yān gə̄ ndɔ́tə̄n̄ kə̄ rɔ̄n tə́ ba ədanən̄ na: Loo ń toō i loo kə́ ɓē gətóo tū tə́ ō, mbang a udə i mbée ō ní,

³⁶ ə́yá̰də́ ādə̄ aw̄n̄ kə̄ kem ɓē bo kə́ gidə loo gə̄ tə́ ō, kə̄ kem ngán ɓē gə̄ tə́ ō, mangən̄ yá̰a̰ kəsa.

³⁷ Jeju tél ədadə́ na kə nin̄ kɔ́ gə̄ kə adə̄n̄də́ yá̰a̰ kadə̄ əsan̄. Ba nin̄-ədanən̄ na: Kə j-aw̄ jə-mang mápa kə gúrsə dūbú kutə j-adə̄də́ kadə̄ əsan̄ a?

³⁸ Ni ədadə́ na: Mápa to jīsí tə́ noō i kóndóńg? Āw̄ á̰a̰ī! Loo ń nin̄-aw̄ a̰a̰n̄ anī, tél ədanən̄ na mápa na i mí ō, kānjə̄ na i jōó ō.

³⁹ Anī Jeju ədadə́ na kadə̄ de gə̄ ní kə ndin̄ kə gō ɓūtə̄ gə̄ ɓūtə̄ gə̄ nang tə́ dɔ mu kə́ mbōl̄ tə́,

⁴⁰ adə̄ ndin̄ nang tə́ kə gō ɓūtə̄ kə́ ɓú ɓú ō, kutə mí kutə mí ō.

⁴¹ Anī Jeju taā mápá kə́ mí gə̄ ní ō, kānjə̄ kə́ jōó gə̄ ní ō, ba ənī kumən kə̄ dɔɔ́ dɔ rā̰ tə́, ndadə̄ Nə́ɓā dɔ tə́, pá tá tétə̄ mápa gə̄ ní naā tə́, ba adə̄ ngé ndóō yá̰a̰ yān gə̄ kadə̄ nə̄ɓōn̄ kósə de gə̄. Ni-gán̄g kānjə̄ kə́ jōó gə̄ ní naā tə́ ō, ba adə̄də́ kadə̄ nə̄ɓōn̄ de gə̄ malang.

⁴² Nin̄ malang əsan̄ ndānə̄n̄.

⁴³ Tá ɔyn̄ gotə mápá ń na̰y ní ō gotə kānjə̄ kə́ jōó gə̄ ní ō, rosə dōbə̄ kutə gidə i jōó, aw̄n̄neé.

⁴⁴ Dəngam gə̄ ń əsan̄ mápá ní i deē dūbú mí.

Jeju njə̄rā dɔ bā bo tə́

⁴⁵ Kə̄ ta jī tə́ noō, Jeju ɔsə kə ngé ndóō yá̰a̰ yān gēé kadə̄ alə̄n̄ kem toó, ba aw̄n̄ kété non tə́ gidə kə́rēý tə́ Betsaida, ba nəkɔ́ tá kə n-ɔr̄ najə̄ kə kósə de gēé kadə̄ tḭ̄ḭ̄n̄ naā kə̄ ɓē gə̄ tə́.

⁴⁶ Loo ń nin̄-aw̄n̄ tītə̄ ń ni ədańdə́ ní anī, ni al̄ dɔ mbalá yā ndɔ̄ȳ.

⁴⁷ Loo tíbí anī to i dan bā bo tə́ sa̰y, ba Jeju i kə kérneé ndágá.

⁴⁸ Ni a̰a̰də́ a nēlə̄n̄ to ba tōr̄ rɔ̄də́ ngá̰ý, tɔdɔ̄ nél əla i kə gō gūsə̄rūú. Kété sḛ́ý tá kadə̄ loo tīī ní a, Jeju njə̄rā dɔ bā bo tə́ kum kə̄ rɔ̄də́ tə́, ba a sāā mān̄də́.

⁴⁹ Banī loo ń nin̄-a̰a̰nən̄ a njə̄rā dɔ bā bo tə́ tītə̄ ń noō ní anī, gírə̄n̄ kemdə́ tə́ kadə̄ i ndíĺ deē, adə̄ nin̄-gángə̄n̄ kɔŕ,

⁵⁰ tɔdɔ̄ nin̄ malang ń a̰a̰nən̄ ní, ndíĺdə́ a̰ȳ kɔ̄ɔ́. Kə̄ ta jī tə́ noō Jeju ɔr̄ najə̄ sedə́, ədadə́ na kə əhɔn̄ kemdə́ ngan̄g na i ni ba kə lōōn̄ ɓōĺ.

⁵¹ Gō tə́ anī ni-al̄ kem toó kə̄ rɔ̄də́ tə́ ō, nél əla to̰ aĺ ō. Adə̄ ɔr kumdə́ ngá̰ý,

⁵² tām̄ nin̄-gerə̄n̄ kum yá̰á̰ ń Jeju rāā kə mápá ní alé, tɔdɔ̄ kemdə́ i kə́ ngan̄g ngóróró.

Jeju rāā ngé mo̰y gə̄ kə́ gō nang kə́ Jenejaret tə́ adə̄ rɔ̄də́ ngáā

⁵³ Dan ń gāngə̄n̄ bā bo oy anī, ugə̄n̄ nang kə́ Jenejaret tə́, ba do̰ō̰n̄ to ta gogə́ tə́.

⁵⁴ Loo ń risən̄ kem to tə́ ní anī, kə̄ ta jī tə́ noō de gə̄ gerə̄n̄ kadə̄ i Jeju,

⁵⁵ Adə̄ a̰ȳn̄ ngɔ̄də̄ kə̄ loo gə̄ tə́ gō nang ngeé ń noō tə́ malang, ba ɔyn̄ ngé mo̰y gə̄ kem waá gə̄ tə́, reēn̄ sedə́ loo ń oōn̄ kadə̄ Jeju i tū tə́ ní tə́.

⁵⁶ Loo malang ń ni-ugə tū tə́ ní, ká i kem ngán ɓē gə̄ tə́, aké i kem ɓē bo gə̄ tə́, aké i kem ɓē ndɔr̄ gə̄ tə́ gə̄gē anī, de gə̄ ɓōkə́n̄ ngé mo̰y gə̄ ndágə looó, ba rāānən̄ ɓɔ́ kadə̄ əya̰də́ kadə̄ ɔdən̄ ta kūbə̄ yān ngóy. Ba de gə̄ malang ń ɔdən̄ ní rɔ̄də́ ngáā.