MARK 11 - Bible sar

Jeju udə kem ɓē kə́ Jerusalem tə́

¹ Dan ń Jeju nin̄ kə ngé ndóō yá̰a̰ yān gēé əndān̄ dɔ ɓē kə́ *Jerusalem, adə̄ nin̄ i ngɔr kə̄ kadə ɓē kə́ Betpaje tə́ o, Betani tə́ ō, kum kə̄ mbal̄ *kāgə̄ olibə gə̄ tə́ ní anī,

² Jeju ɔr̄ ngé ndóō yá̰a̰ yān gə̄ jōó, əladə́ ba ədadə́ na: Āwī kem ɓē ń ra nosí tə́ noō. Dan ń ā údiī kə̄ kemeé anī, ā ə́ngeī ngōn̄ kərō kə́ deē kógə̄ḿ al̄ gidən tə́ aĺ ɓáý, kə́ do̰ō̰nən̄ ta bēl̄ tə́. Ī-tútəniī, ba ī-reēī seneé.

³ Ba ré deē kógə̄ḿ a dəjesí na ké ī-rāāī yá̰á̰ ń noō i tām̄ rí tə́ wa anī, ə́daī na i Kɔ́ɔ̄ɓē n a sāā ní, ba kə̄ ta jī tə́ noō a tél yā kadə̄sí gogə́.

⁴ Ngé ndóō yá̰a̰ yān gə̄ aw̄n̄, əngen̄ ngōn̄ kə̄rō kə́ do̰ō̰nən̄ ta ndogə̄ tə́ ndágá kadə róbə́ tə́, ba nin̄-tútənən̄.

⁵ De kə́rēý gə̄ dan ngé gə̄ ń ran̄ noó tə́ ní dəjen̄də́ na ké a rāān̄ i rí wa. Ké a tútən̄ ngōn̄ kərō i tām̄ rí tə́ wa.

⁶ Ba nin̄-ədan̄də́ tītə̄ ń Jeju tāańdə́ ní. Anī nin̄-əya̰n̄də́ adə̄ aw̄n̄neé.

⁷ Nin̄-reēn̄ kə ngōn̄ kərō ní, adə̄n̄ Jeju, tə́nīn̄ kūbə̄ yādə́ gə̄ gidən tə́, ba Jeju al̄ ndi dɔ tə́.

⁸ De gə̄ ngá̰ý selə́n̄ kūbə̄ tapīi gə̄ kum róbó kadə̄ ni-njə̄rā dɔ tə́ ō, de kə́rēý gə̄ gángə̄n̄ ta jī kāgə̄ kə̄ kem ndɔr̄ gə̄ tə́ ɓōkə́n̄ kum róbó ō.

⁹ Ngé gə̄ ń njə̄rān̄ kété no Jeju tə́ ō, ngé gə̄ ń unən̄ gōn ō ní, əgan̄ kɔŕ ədan̄ na: Kɔsə gɔn i yā Nə́ɓā! Ādə̄ Nə́ɓā rāā majə kə nge ń reē kə rī Kɔ́ɔ̄ɓēé ní!

¹⁰ Ādə̄ Nə́ɓā rāā majə kə ɓē ko̰o̰ ń a reē tə́ ní, adə̄ i kə ɓē ko̰o̰ yā kaají Dabid tə́! Kɔsə gɔn i yā Nə́ɓā dɔ rā̰ tə́!

¹¹ Dan ń Jeju ugə̄ *Jerusalem anī, ni udə kem *kújə yā Kɔ́ɔ̄ɓē tə́. Ba loo ń ni-a̰a̰ yá̰a̰ malang ń gīr̄ gidən ní oy anī, nin̄ kə ngé kə́ kutə gidə i jōó gēé teē aw̄n̄ Betani, tɔdɔ̄ loo tíbə kɔ̄ɔ́.

Jeju ndɔ̄ĺ kāgə̄ kótə̄

¹² Teē kə ndɔ̄ kə́ noō, dan ń nin̄-teēn̄ kɔ̄ɔ́ kem ɓē kə́ Betani tə́ anī, ɓō rāā Jeju.

¹³ Ni-a̰a̰ kāgə̄ kótə̄ kə́ kə mbīn gēé kə̄ sa̰y anī, aw̄ yā ka̰ā̰ ké n-ənge kanən kə́rēý tū tə́ wa. Banī loo ń ni-ugə rɔ̄ tə́ anī, ənge i mbīn gə̄ ngóy, tɔdɔ̄ i nāā kan̄ kótə̄ aĺ ɓáý.

¹⁴ Anī ni-un najə̄ əda na: Deē a əsa kaní to̰ aĺ bátə́! Ba ngé ndóō yá̰a̰ yān gə̄ oōn̄ najə̄ ní.

Jeju udə kem kújə yā Kɔ́ɔ̄ɓē tə́

¹⁵ Nin̄-ugə̄n̄ *Jerusalem anī Jeju udə kem *kújə yā Kɔ́ɔ̄ɓē tə́, ba tə̄ɓā ngé gə̄ ń a igən̄ yá̰a̰ ō, a mangən̄ yá̰a̰ ō, kem *kújə yā Kɔ́ɔ̄ɓē tə́ ní kɔ̄ɔ́. Kāgə̄ tə́ndā yá̰a̰ gə̄ yā ngé mbél̄ nar gə̄ ō, kāgə̄ ndi gə̄ yā ngé kigə dér gə̄ ō ní, ni-mbə́rē tə́nī kɔ̄ɔ́.

¹⁶ Ni əya̰ deē kógə̄ḿ adə̄ ətō yá̰a̰ mānəń kem *kújə yā Kɔ́ɔ̄ɓē tə́ alé.

¹⁷ Anī ni-ndóōdə́ yá̰a̰, ədadə́ na: I kə́ ndang kem makətūbə̄ tə́ na: A ɓārə́n̄ kújə yāḿ na i kújə ndɔ̄ȳ kə́ tām̄ yā nápar de gə̄ tə́ malang aĺ a? Ba sḭḭ̄ ī-rāāī adə̄ tél i bəlo mbal̄ ɓɔ̄ɔ̄ rɔ̄ yā ngé gān̄g róbə gə̄!

¹⁸ Loo ń ngol gə̄ kə́ dɔ *ngé tun̄ yá̰a̰ gə̄ tə́ kə ngé ndóō de gə̄ ndū najə̄ gə̄ oōn̄ beé ní anī, sāān̄ loo tɔ̄lən kɔ̄ɔ́, tɔdɔ̄ nin̄-ɓōĺnən̄, tām̄ yá̰a̰ gə̄ ń ni ndóō kósə de gə̄ ní ɔr kumdə́ ngá̰ý.

¹⁹ Dan ń loo tíbə anī, Jeju nin̄ kə ngé ndóō yá̰a̰ yān gə̄ teēn̄ kɔ̄ɔ́ kem ɓēé.

Jeju ō, kāgə̄ kótə̄ kə́ tutə kɔ̄ɔ́ ō

²⁰ Dəloí loo ń nin̄ a mānə̄n̄ anī, ngé ndóō yá̰a̰ yān gə̄ a̰ā̰n̄ kāgə̄ kótə̄ ní tutə dɔn tə́ dɔɔ́ bátə́ ugə̄ ngəran tə́ nang tə́.

²¹ Əga kem Piyer dɔ najə̄ ń Jeju əda tə́ ní anī, ni-ədan na: Ngoljí á̰a̰ kāgə̄ kótə̄ ń ī-təmbē ní tutə kɔ̄ɔ́!

²² Anī Jeju tél ədadə́ na: Ī-taāī kem Nə́ɓā.

²³ Ādə̄ m-ə́dásí najə̄ kə́ bo ngá̰ý, ré deē kógə̄ḿ əda mbal̄ ń toō na kə ɔtə kɔ̄ɔ́ kə aw̄ kum bā bo tə́, ba ré kemən tɔ́sən aĺ ō, ni-taā kem mámák kadə̄ yá̰á̰ ń ni-əda ní a rāā yá̰a̰ ō anī, a reē tām̄ yān tə́.

²⁴ I tām̄ ń toō tə́ n m-ə́dásí na yá̰a̰ malang ń ī-dəjeī kə ndɔ̄yɔ̄ɔ́ ní, ī-taāī kem kadə̄ ə́ngeī yá̰á̰ ní kɔ̄ɔ́ anī a reē tām̄ yāsí tə́.

²⁵ Ba loo ń ā ī-raī dɔɔ́ loo ndɔ̄ȳ tə́ ní, ré najə̄ kógə̄ḿ i mbo̰ō̰sí tə́ kə deē kógə̄ḿ anī, ī-mā̰yī rɔ̄sí dɔ tə́, yā kadə̄ Bɔbə̄sí kə́ dɔ rā̰ tə́ mā̰yń rɔ̄n dɔ majaĺ yāsí tə́ ō.

²⁶ Banī ré ī-mā̰yī rɔ̄sí dɔn tə́ aĺ anī, Bɔbə̄sí kə́ dɔ rā̰ tə́ a mā̰ȳ rɔ̄n dɔ majaĺ yāsí gə̄ tə́ aĺ ō.

I náā n adə̄ Jeju tɔ́gə́ á rāań yá̰a̰ gə̄ ń toō ní

²⁷ Jeju nin̄ kə ngé ndóō yá̰a̰ yān gə̄ tél aw̄n̄ *Jerusalem gogə́. Ba dan ń Jeju a njə̄rā kem *kújə yā Kɔ́ɔ̄ɓē tə́ anī, ngol gə̄ kə́ dɔ *ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō,

²⁸ *kum kɔɔ̄ gə̄ ō, reēn̄ rɔ̄n tə́, ba dəjenən̄ na ké i náā n adə̄n tɔ́gə wa, ké tɔ́gə́ ń a rāań yá̰a̰ gə̄ ní ké teēń i rá wa.

²⁹ Ba Jeju tél ədadə́ na: M-ā m̄-dəjesí i najə̄ kógə̄ḿ beē ngóy, ré ī-tūrmī tə́ anī, m-ā m-ə́dásí loo ń m̄-teē kə tɔ́gə́ń toō tū tə́ á m̄-rāań yá̰a̰ gə̄ ń toō ní ō.

³⁰ *Batém yā Ja̰a̰ ní ḭḭ i rɔ̄ Nə́ɓā tə́ aké i rɔ̄ de gə̄ tə́ ḿ? Ī-tél ī-tūrmī tə́.

³¹ Nin̄-nējə̄n̄ naā najə̄ beé dɔ dáńdə́ tə́ ba ədan̄ na: Ń toō ní, ré j-ədaī na ḭḭ i rɔ̄ Nə́ɓā tə́ anī, ni a tél yā dəjejí na ké i tām̄ rí tə́ á jə-taāī kem Ja̰a̰ aĺ wa.

³² Ba kə j-ədaī na ḭḭ i rɔ̄ de gə̄ tə́ a? Nin̄-ɓōlə́n̄ kósə de gə̄, tɔdɔ̄ nin̄ malang gírə̄n̄ kadə̄ Ja̰a̰ i *nge koō ta kógə̄ḿ.

³³ Anī tél ədan̄ Jeju na n-gerə̄n̄ alé. Banī Jeju tél ədadə́ na: Ɓáa mā m-ā m-ə́dásí loo ń m̄-teē kə tɔ́gə́ ń toō tū tə́ á m̄-rāań yá̰a̰ gə̄ ń toō ní aĺ ō.