Najə̄ kə́ Majə yā Jeju ń Luk ndang ní 6 - Bible sar

Jeju ō ndɔ̄ Sabat ō

¹ Jeju a mān̄ kem ndɔr̄ kōō gémē gə̄ tə́ ndɔ̄ *sabat tə́ anī, ngé ndóō yá̰a̰ yān gə̄ gángə̄n̄ dɔ kōō gə̄ ba tóng a əsan̄.

² Loo ń noō tə́ *Parijiyḛ kə́rēý gə̄ ədan̄ na: Yá̰á̰ ń *ndū najə̄ ɔgə̄ rāā ndɔ̄ *sabat tə́ ní sḭḭ̄ ī-rāāī i tām̄ rí tə́?

³ Jeju tūr̄ ədadə́ na: Yá̰á̰ ń Dabid rāā nin̄ kə madə̄n gēé dan ń ɓō rāānneé tə́ ní sḭḭ̄ ī-tə́daī kem makətūbə̄ tə́ aĺ a?

⁴ Ni udə kújə yā Nə́ɓā tə́, ba mápá kə́ ndējə̄ gə̄ ń *ndū najə̄ ɔgə̄ de gə̄ malang kəsa ba i *ngé tun̄ yá̰a̰ gə̄ ngóy n asən̄ kəsa ní, ni-ɔy əsa ō, adə̄ madə̄n gə̄ tə́ ō.

⁵ Jeju ədadə́ ɓáý to̰ na: Ngōn̄ deē i kɔ́ɔ̄ ndɔ̄ *sabat.

Jeju rāā adə̄ jī deē kógə̄ḿ kə́ oy tél majə gogə́

⁶ Ndɔ̄ *sabat kə́ rang tə́ anī Jeju udə kújə́ kán̄ naā tə́ a ndóō de gə̄ yá̰a̰. Deē kógə̄ḿ kə́ jī ko̰n tutə njururu ndi dan de gə̄ tə́ kem kújə́ kán̄ naā ní tə́.

⁷ Ngé ngé ndóō de gə̄ *ndū najə̄ gə̄ ō, *Parijiyḛ gə̄ ō, ndi a umə̄n̄ Jeju sḛḛ, sāān̄ ka̰ā̰ ké Jeju a rāā kadə̄ rɔ̄ deē kógə̄ḿ a ngáā ndɔ̄ *sabat tə́ wa, yā kadə̄ kə n-əngen̄neé kum najə̄ kə́ yā sekə́nəń.

⁸ Banī Jeju ger̄ gír̄ yādə́, adə̄ ni-əda de kə́ nge jīn oy ní na: Ḭ́ḭ ī-ra dan de gə̄ tə́ loo ń noō tə́. Deē ní ḭḭ ra dɔɔ́.

⁹ Anī Jeju ədadə́ na: Yá̰á̰ ń *ndū najə̄ adə̄ deē ta róbə rāān ndɔ̄ *sabat tə́ ní i rí? Adə̄n i ta róbə rāā yá̰á̰ kə́ majə aké i rāā yá̰á̰ kə́ majaĺ? I ta róbə kajə deē aké i nujə deē?

¹⁰ Ɔr̄ kumən a̰a̰də́ beé malang, ba gō tə́ anī əda dəngam ní na kə sə́ra jīn. Dəngam ní sə́ra jīn anī, tél to majə gogə́.

¹¹ Banī wōn̄g rāādə́ ngá̰ý adə̄ nējə̄n̄ naā najə̄ dɔ yá̰á̰ kə́ yā rāā kə Jejuú tə́.

Jeju gə̄rā ngámbang kəla kə́ kutə gidə i jōó gə̄

¹² Dan ngeé ń noō tə́ ní Jeju aw̄ ndɔ̄yɔ̄ɔ́ dɔ mbalá. Ni ndɔ̄ȳ Nə́ɓā bátə́ loo tīī dɔn tə́.

¹³ Dan ń loo tīī anī ni-ɓāŕ ngé ndóō yá̰a̰ yān gə̄ ba gə̄rā de gə̄ kutə gidə i jōó dandə́ tə́. Ni-əndā rīdə́ na i ngámbang kəla gə̄.

¹⁴ De gə̄ ní i Simo̰ ń ni a tūr̄ rīn na i Piyer ní ō, ngōkó̰o̰n Andəre ō, Jakə ō, Ja̰a̰ ō, Pilipə ō, Bartelemi ō,

¹⁵ Matiye ō, Toma ō, Jakə kə́ ngōn̄ Alpe ō, Simo̰ ń a ɓāŕnən̄ na i nge rɔ̄ɔ̄ dɔ ɓē yā *Jipə gə̄ tə́ ní ō,

¹⁶ Judas kə́ ngōn̄ Jakə ō, Judas Iskariot ń tél nge kəla Jeju jī de gə̄ ní ō.

Jeju ɔjə kósə de gə̄ yá̰a̰ ō, rāā adə̄ ngé mo̰y gə̄ əngen̄ rɔ̄ ngáā ō

¹⁷ Jeju risə sedə́ kɔ̄ɔ́ dɔ mbalá ba reē dəba loo kógə̄ḿ kə́ dūnə̄n asə naā tə́. Kósə́ ngé ndóō yá̰a̰ yān gə̄ ō, kósə́ ngán *Israel gə̄ kə́ ḭḭn̄ nang kə́ Jude tə́ ō, *Jerusalem ō, kem ɓē gə̄ kə́ kadə bā bo tə́ adə̄ i Tir ō Sidon ō i loo ngeé ń noō tə́.

¹⁸ Nin̄-reēn̄ i koō najə̄ yān tə́ ō, i kadə̄ ni-rāā adə̄ rɔ̄də́ ngáā ō. Ni-rāā adə̄ ngé gə̄ ń ndíĺ kə́ yḛr gə̄ a rāān̄ kumdə́ ndoō tə́ əngen̄ rɔ̄ ngáā.

¹⁹ Adə̄ kósə de gə̄ malang a sāān̄ i kɔdə rɔ̄n kə jīdə́, tɔdɔ̄ tɔ́gə́ kógə̄ḿ teē rɔ̄n tə́ ō, rɔ̄ de gə̄ malang ngáā ō.

Ndi majə ō, ndi majaĺ ō

²⁰ Loo ń noō tə́ Jeju ɔr̄ dɔn dɔɔ́ a̰a̰ ngé ndóō yá̰a̰ yān gə̄ ba əda na: Rɔ̄nel̄ i yāsí sḭḭ̄ ngé ndoō gə̄, tɔdɔ̄ *Ɓē ko̰o̰ yā Nə́ɓā i yāsí!

²¹ Rɔ̄nel̄ i yāsí sḭḭ̄ ń ɓō rāāsí ngɔlaā ní, tɔdɔ̄ ā ī-ndānī! Rɔ̄nel̄ i yāsí sḭḭ̄ ń ā i-nōōī naā ngɔlaā ní, tɔdɔ̄ ā ī-kəgōī naā!

²² Sḭḭ̄ i kə rɔ̄nelēé dan ń de gə̄ a imə̄n̄sí ō, a tə̄ɓān̄sí kɔ̄ɔ́ dɔ dáńdə́ tə́ ō, a tájə̄n̄sí ō, a ədan̄ najə̄ kə́ majaĺ dɔsí tə́ ō najə̄ yā Ngōn̄ deē tə́ ní.

²³ Ndɔ̄ ń noō tə́ ī-rāāī rɔ̄nel̄ ō, ī-tḭ́ḭ̄ bal walya ō, tɔdɔ̄ yá̰a̰ kəndā nja yāsí i yá̰á̰ kə́ ngá̰ý dɔ rā̰ tə́. Tɔdɔ̄ i loo rāā nəkɔ́ ń kaadə́ gə̄ rāān̄neé kə *ngé koō ta gēé ní n noó.

²⁴ Ba rɔ̄ tō ndoō i yāsí sḭḭ̄ ngé kənge yá̰a̰ gə̄, tɔdɔ̄ sḭḭ̄ ə́ngeī kem sɔl̄ yāsí kɔ̄ɔ́ ɓá!

²⁵ Rɔ̄ ndoō i yāsí sḭḭ̄ ń ī-ndānī ngɔlaā ní, tɔdɔ̄ ɓō a rāāsí! Rɔ̄ ndoō i yāsí sḭḭ̄ ń ā ə̄gōī ngɔlaā ní, tɔdɔ̄ ā ə́hɔī ndoō ō, ā ī-nōōī ō.

²⁶ Rɔ̄ ndoō i yāsí dan ń de gə̄ malang a ədan̄ najə̄ yāsí kə́ majə ní, tɔdɔ̄ i loo rāā nəkɔ́ ń kaadə́ gə̄ rāān̄neé kə *ngé koō ta kə́ rɔ̄kum aĺ gə̄ ní n noó.

Najə̄ kə́ dɔ tár madə̄ ba̰ā̰ gə̄ tə́

²⁷ Ba sḭḭ̄ ń ī-ndi ā ōōī najə̄ taḿ tə́ toō ādə̄ m-ə́dásí, ī-táriī madə̄ ba̰ā̰sí gə̄ ō, ngé gə̄ ń imə̄n̄sí ní ī-rāāī majə sedə́ ō,

²⁸ ī-rāāī Nə́ɓā ɓɔ́ kadə̄ rāā majə kə ngé ndɔ̄ĺsí gə̄ ō, ī-ndɔ̄yī tām̄ yā ngé tétə̄ najə̄ dɔsí tə́ gə̄ ō.

²⁹ Deē ənda mbɔ́rí kə́ dām̄ kógə̄ḿ tə́ anī, ī-tūr̄ kə́ dām̄ kə́ noó tə́ ādə̄n ɓáý to̰. Deē taā kūbə̄ yāí kə́ dɔ madə̄ gə̄ tə́ anī, ī-lōō kɔgə̄n nge kə́ kemeé ń ā ə́lá pá tə́ ā ə́la madə̄ dɔ tə́ ní.

³⁰ Náā nəkɔ́ ń dəjeī yá̰a̰ anī adə̄n. Deē taā yá̰a̰ yāí anī ī-lōō sāā nja.

³¹ Yá̰á̰ ń ī-gḛyiī kadə̄ de gə̄ rāān̄ sesí ní ī-rāāī sedə́ tītə̄ ń noō ō.

³² Ré i ngé táŕsí gə̄ ngóy n ā ī-táriīdə́ anī, i rí kə́ ngá̰ý n ā ə́ngeī gírí ní? Tɔdɔ̄ ngé rāā majaĺ gə̄ a tárən̄ ngé táŕdə́ gə̄ ō.

³³ Ré i ngé rāā majə sesí gə̄ ngóy n ā ī-rāāī majə sedə́ anī, i rí kə́ ngá̰ý n ā ə́ngeī gírí ní? Ngé rāā majaĺ gə̄ gə̄gē a rāān̄ i tītə̄ ń noō ō.

³⁴ Ré i ngé gə̄ ń ə̄ndāī kemsí dɔdə́ tə́ kadə̄ a əgān̄sí kə̄rā ní tá ngóy n ā ādīdə́ yá̰a̰ loo tə̄nā tə́ anī i rí kə́ ngá̰ý n ā ə́ngeī gírí ní? Tɔdɔ̄ ngé rāā majaĺ gə̄ a adə̄n̄ ngé rāā majaĺ madə̄də́ gə̄ yá̰a̰ loo tə̄nā tə́ kadə̄ tél əgān̄də́ kə̄rā ō.

³⁵ Ba sḭḭ̄, ī-táriī madə̄ ba̰ā̰sí gə̄ ō, ī-rāāī majə kə de gēé ō, ādī yá̰a̰ loo tə̄nā tə́ kanjə̄ kəndā kemsí dɔ tél kənge yá̰á̰ ní gogə́ ō. Loo ń noō tə́ ā ə́ngeī yá̰a̰ kəndā nja kə́ ngá̰ý ō, ā ī-téliī ngáń Nə́ɓā kə́ dɔɔ́ gə̄ ō. Tɔdɔ̄ ni-rāā kem majə kə ngé ger̄ kem majə yān aĺ gə̄ ō, kə ngé kem ndul gə̄ ō.

³⁶ Ādī kumsí o̰o̰sí kə de gēé tītə̄ ń kum Bɔbə̄sí a o̰o̰nəń kə de gēé ní ō.

Ī-lōōī rāā madə̄sí gə̄ kə najá

³⁷ Ī-gāngī sarya dɔ deē tə́ alé, anī a gāngə̄n̄ sarya dɔsí tə́ aĺ ō. Ī-gāngī dɔ madə̄sí gə̄ anī a gāngə̄n̄ dɔsí ō.

³⁸ Ādī madə̄sí gə̄ yá̰á̰ ń ndoōn rāādə́ ní anī Nə́ɓā a adə̄sí yá̰á̰ ń ndoōn rāāsí ní, a ɔjən̄ kadə̄ majə ō, a əren̄ ō, a yéȳn̄ ō, a rə̄ɓā ō, pá tá a ɓōkə́n̄ ta kūbə̄ yāsí tə́. Tɔdɔ̄ a mbɔ̄jə́n̄ yá̰a̰ yā kadə̄sí i kə kār̄ tɔ̄jə̄ yá̰á̰ ń sḭḭ̄ ī-mbɔ̄jíīneé yá̰a̰ ādī madə̄sí gə̄ ní.

³⁹ Jeju ɔjədə́ kūjə́ najə̄ kógə̄ḿ ɓáý to̰ əda na: De kə́ nge kum tɔ̄ɔ̄ a ndɔ́r̄ nge kum tɔ̄ɔ̄ madə̄n ta róbə a? Nin̄ jōó mbak a əsōn̄ bəloó aĺ a?

⁴⁰ De kə́ nge ndóō yá̰a̰ tɔȳ nge kɔjən yá̰a̰ alé. Banī de kə́ nge ndóō yá̰á̰ ń ndóōnən̄ yá̰a̰ majə ní, a to tītə̄ nge kɔjən yá̰a̰ beé.

⁴¹ Á̰a̰ buĺ mu kə́ kum madí tə́, banī á̰a̰ kāgə̄ kə́ bo ń kumií īkɔ́ tə́ ní aĺ ní i najə̄ rí tə́?

⁴² Ḭ̄ ń á̰a̰ kāgə̄ kə́ bo kə́ kumií īkɔ́ tə́ aĺ ní, loo kəda madí na kə ra ɓam kadə̄ ún buĺ mu kumən tə́ kɔ̄ɔ́ i ba̰ý? Ḭ̄ de kə́ ngé gól̄ loo, ún kāgə̄ kə́ kumií tə́ kɔ̄ɔ́ pá tá á̰a̰ loo unjə̄ anī, ún buĺ mu kə́ kum madí tə́ kɔ̄ɔ́ ɓáý!

Kāgə̄ ō kanə̄n ō

⁴³ Kāgə̄ kə́ majə a a̰a̰n̄ kan̄ kə́ majaĺ aĺ ō, kāgə̄ kə́ majaĺ a a̰a̰n̄ kan̄ kə́ majə aĺ ō.

⁴⁴ A gerə̄n̄ kāgə̄ i kanə̄n tə́. Deē a sāā kan̄ kótə̄ dɔ kōn̄ ngɔkərɔ tə́ aĺ ō, deē a sāā kan̄ *kāgə̄ nduú dɔ kōn̄ ngar̄ tə́ aĺ ō.

⁴⁵ Deē ń i de kə́ majə ní, ngarān̄g kemən i loo ngɔ̄m̄ yá̰á̰ kə́ majə gə̄, adə̄ a teē kə yá̰á̰ kə́ majə gə̄ tū tə́ ō, deē ń i de kə́ majaĺ ní, ngarān̄g kemən i loo ngɔ̄m̄ yá̰á̰ kə́ majaĺ gə̄, adə̄ ni a teē kə yá̰á̰ kə́ majaĺ gēé tū tə́ ō. Tɔdɔ̄ ta deē əda i yá̰á̰ gə̄ ń rosən̄ kemən ba rə̄ɓā kə̄ ndágá ní.

Kújə́ kə́ jōó gə̄

⁴⁶ I tām̄ rí tə́ á ī-ɓāŕmī Kɔ́ɔ̄ɓē, Kɔ́ɔ̄ɓē, ba ré m-ə́dásí yá̰a̰ anī ī-rāāī aĺ ní?

⁴⁷ Deē ń reē rɔ̄ḿ tə́ ba oō najə̄ yāḿ ō, rāā yá̰a̰ kə gō najə̄ yāḿ ō ní, ādə̄ m-ɔ̄jə̄sí deē ń ni-tītə̄n ní.

⁴⁸ Ni to i tītə̄ de kə́ nge rāā kújə. Deē ndēr̄ bəlo adə̄ rúu ba əndā gíŕ kújə dɔ mbal̄ tə́ beē. Dan ń man̄ taā loo ba un nja kújə́ ní anī kújə́ ní yéȳ alé, tɔdɔ̄ rāān̄ kújə́ ní adə̄ ngan̄g majə.

⁴⁹ Banī deē ń oō najə̄ yāḿ ba rāā yá̰a̰ kə gō najə̄ yāḿ aĺ ní, to i tītə̄ de kə́ əndā kújə yān i dɔɔ́ karī kanjə̄ ndēr̄ bəlo tá kəndāń. Dan ń man̄ taā loo ba un nja kújə́ ní anī kújə́ ní tetə ənda nang kə̄ ta jī tə́ beē ō, nujə sák sák kɔ̄ɔ́ ō.