KOHELET 9 - Bible sar

¹ A̰á̰ā̰, m-ə̄ndā kumḿ gír yá̰a̰ gə̄ ń noō tə́ malang, anī yá̰á̰ ń m-á̰a̰ā̰ ní n toó: De kə́ súmūú gə̄ ō, de kə́ ngé kum kedə̄ gə̄ ō ní, nin̄ i kem jī Nə́ɓā tə́ kə kəla yādə́ gēé. Yá̰á̰ ń deē ndul ger̄ danən aĺ ní n toó, i tár ō, i kim̄ ō. Yá̰a̰ gə̄ ń noō malang i kə́ ton̄ kété non tə́ kɔ̄ɔ́ ɓáá.

² Yá̰a̰ gə̄ malang ton̄ tītə̄ naā tām̄ yā de gə̄ tə́ malang. Yá̰á̰ ń rāā de kə́ súmūú ō, nge kem ndul ō ní i yá̰á̰ kə́ kógə̄ḿ beē. Yá̰á̰ ń rāā de kə́ majə ō, de kə́ majaĺ ō ní i yá̰á̰ kə́ kógə̄ḿ beē. Yá̰á̰ ń rāā de kə́ *unjə̄ njáý njáý ō, de kə́ majaĺ tákə̄n ō ní i yá̰á̰ kə́ kógə̄ḿ beē. Yá̰á̰ ń rāā nge ndējə̄ yá̰a̰ ō, nge ndējə̄ yá̰a̰ aĺ ō ní i yá̰á̰ kə́ kógə̄ḿ beē. Yā de kə́ majə to tītə̄ yā de kə́ majaĺ ō, yā nge túbə to tītə̄ yā nge ɓōĺ túbə ō.

³ Kadə̄ yá̰á̰ kə́ kógə̄ḿ beē rāā de gə̄ malang tū yá̰a̰ malang ń de gə̄ a rāān̄ tə́ dɔ nang tə́ ní i yá̰á̰ kógə̄ḿ kə́ majaĺ. I yá̰á̰ ń noō n rāā adə̄ ngam i ngá̰ý kem ngán kaa Adam gə̄ tə́ ō, mbóo i kemdə́ tə́ dan ndidə́ kə kumdə́ tə́ ō ní. Ba gō tə́ anī a oyn̄ i mbéé ngóy.

⁴ Tɔdɔ̄ i náā n a gḛynən̄ ngá̰ý ní? Kə́ tām̄ yā de gə̄ malang ń ndin̄ kə kumdə́ tə́ ní, yá̰á̰ kógə̄ḿ kə́ rɔ̄kum i noó: Bísə́ kə́ kə kumuú i só tə́ tɔȳ ɓɔl kə́ oy kɔ̄ɔ́.

⁵ Tɔdɔ̄ de gə̄ ń ndin̄ kə kumdə́ ní nin̄ gerə̄n̄ kadə̄ a oyn̄. Banī de kə́ koy kɔ̄ɔ́ gə̄ ní gerə̄n̄ yá̰á̰ kógə̄ḿ alé. Deē a əndā njadə́ nin̄ to̰ alé, tām̄ dɔ deē ndígə̄naldə́ kɔ̄ɔ́.

⁶ Tár yādə́ ō, kim̄ yādə́ ō, kəndā ni yādə́ ō ní oyn̄ naā tə́ sedə́ ō, yá̰a̰ malang ń a rāā yá̰a̰ dɔ nang tə́ ní, nin̄ a gətóon̄ kum tə́ i kə́ bátə́ gə̄ tə́ ō.

⁷ Loo ń noō tə́ ní ə́sá yá̰a̰ yāí kə rɔ̄nelēé ō, ə̄nī kemií ā̰yń kasə *nduú ō, tɔdɔ̄ Nə́ɓā ndigə yá̰a̰ rāāí gə̄ kɔ̄ɔ́ ɓá.

⁸ Ə́la kūbə̄ rɔ̄nel̄ rɔ̄í tə́ kə dɔ ndɔ̄ gə̄ ō, ādə̄ dɔí ndígə̄nal rāā yibə̄ dɔí tə́ aĺ ō!

⁹ Dan ń ī-ndi kə kumií kem ndɔ̄ gə̄ kə́ kanjə̄ kumən ń Nə́ɓā adī dɔ nang tə́ ní, ī-rāā rɔ̄nel̄ kə dəyá̰ ń ī-tárən ní. Tɔdɔ̄ núsə́ yá̰á̰ kə́ tām̄ yāí tə́ ō, kə́ tū kəla ń ī-rāā tə́ ní ō, dɔ nang tə́ ní n noó.

¹⁰ Yá̰a̰ malang ń jīí asə rāā ní ī-rāā kə tɔ́gí īkɔ́. Tām̄ loo kə́ ɓádá ń de kə́ koy gə̄ i tū tə́, á ā ī-rāā yā kaw̄ gōdə́ tə́ tū tə́ ní, kəla aláa ka̰a̰ gō tóo kəla kə́ majə aké kə́ majaĺ, aláa ger̄ yá̰a̰, aláa kum kedə̄ gətóo tū tə́.

Kum kedə̄ rāā yá̰a̰ dejə alé

¹¹ M-á̰á̰ yá̰á̰ kə́ rang gə̄ ngá̰ý dɔ nang tə́ ɓáý to̰. Ngé ka̰ȳ ngɔ̄də̄ ngá̰ý gə̄ ngɔ̄dən̄ tɔy madə̄də́ gə̄ dejə loo nējə̄ naā ngɔ̄də̄ tə́ aĺ ō, i de kə́ ngan̄g gə̄ n a tetən̄ rɔ̄ɔ̄ dejə ní aĺ ō, i de kə́ kumən edə̄ tɔȳ madə̄n gə̄ n a ənge yá̰a̰ kəsa ngándáńg ní aĺ ō, i de kə́ ger̄ najə̄ yān i ngá̰ý tɔȳ yā madə̄n gə̄ n yá̰a̰ kənge yān i ngá̰ý dejə ní aĺ ō, i ngé ger̄ yá̰á̰ ngá̰ý gə̄ n de gə̄ a ɔsən̄ gondə́ ngándáńg ní aĺ ō. Tɔdɔ̄ nin̄ malang ní, kə́rēý gə̄ anī nel̄ de gə̄ sedə́ ō, kə́rēý gə̄ anī yá̰á̰ kə́ to kum kaȳ aĺ rāādə́ ō.

¹² Tām̄ deē ndul ger̄ ndɔ̄ ń yá̰á̰ kə́ majaĺ a teēń dɔn tə́ ní alé. Yá̰á̰ kə́ to kum kaȳ aĺ a teē dɔn tə́ rétə́ gēé kānjə̄ kadə̄ ni ger̄ gō, tītə̄ kānjə̄ ń réng əhɔn aké yel̄ ń gūmbə̄ əhɔn ní.

¹³ M-á̰a̰ kum kedə̄ ń toō dɔ nang tə́ ō, tām̄ yāḿ mā tə́ ɓáa i kum kedə̄ kə́ bo ngá̰ý ō.

¹⁴ Ɓē kógə̄ḿ kə́ dūú kə́ de kə́ kemeé gə̄ i ngá̰ý aĺ ba mban̄g kógə̄ḿ kə́ bo reē yā kənīn rɔ̄. Ni gīr̄ ɓē ní ō, rāā yá̰a̰ rɔ̄ɔ̄ kə́ bo gə̄ kə́ yā rɔ̄ɔń ɓē ní ō.

¹⁵ De kógə̄ḿ kə́ nge ndoō ba ni i nge kum kedə̄ ndi kem ɓē ní tə́. Deē ní ajə ɓē ní kə kum kedə̄ yānneé, banī deē kógə̄ḿ kə́ əga kemən dɔ nge ndoō ní tə́ gətóo.

¹⁶ Tā anī mā m-ə́da na kum kedə̄ i só tə́ tɔȳ tɔ́gə deē. Banī de gə̄ kídə̄n̄ kum kedə̄ yā nge ndoō ō, deē oō yā n aĺ ō.

¹⁷ Nge kum kedə̄ ń ɔr̄ najə̄ hɔlyɔ ní koō najə̄ kɔrə̄n i só tə́ tɔȳ koō ndán̄g rɔ̄ yā nge ndi dɔ de kə́ mbóo gə̄ tə́.

¹⁸ Kum kedə̄ i só tə́ tɔȳ yá̰a̰ rɔ̄ɔ̄ gə̄, banī nge rāā majaĺ kə́ kógə̄ḿ beē nujə yá̰á̰ kə́ majə gə̄ ngá̰ý.