KOHELET 7 - Bible sar

¹ Rī ɓār̄ kə́ majə i só tə́ tɔȳ yibə̄ kə́ majə ngá̰ý ō, ndɔ̄ koy deē i só tə́ tɔȳ ndɔ̄ kojə deē ō.

² Kaw̄ kem kújə́ kə́ de gə̄ a nōōn̄ yo tū tə́ tə́ i só tə́ tɔȳ kaw̄ kem kújə́ kə́ rāān̄ yá̰a̰ kəsa kə́ ngá̰ý kemeé tām̄ yā de gə̄ tə́ tə́. Yo i loo ń de gə̄ malang, a tɔ̄lən tadə́ tū tə́ ní adə̄ majə kadə̄ de gə̄ ń ndin̄ kə kumdə́ ɓáý ní əndān̄ kemdə́ dɔ tə́ majə.

³ Wur kɔl i só tə́ tɔȳ kəgō. Ni-rāā adə̄ ta kum deē i kə rɔ̄nelēé alé, banī rāā adə̄ kem deē majə tɔȳ kə́ kété.

⁴ Ngarā̰ kem ngé kum kedə̄ gə̄ i kem kújə́ ń de gə̄ a nōōn̄ yo tū tə́ ní tə́ ō, ngarā̰ kem de kə́ mbóo gə̄ i kem kújə rɔ̄nel̄ tə́ ō.

⁵ Koō kɔ̄l̄ yā de kə́ nge kum kedə̄ i só tə́ tɔȳ koō pā yā mbóo gə̄.

⁶ Tɔdɔ̄ kəgō yā de kə́ mbóo to i tītə̄ kōn̄ gə̄ kə́ a ndɔ́bə̄n̄ kum hor tə́ gíŕ jóó beē. Banī nge ń noō i yá̰á̰ kə́ kanjə̄ kumən ō.

⁷ Rāā deē ndoō tə́ rāā adə̄ de kə́ nge kum kedə̄ tél mbóo deē ō, yá̰á̰ kə́ kadə̄ deē karī rāā adə̄ kem de kə́ majə tél kə́ majaĺ ō.

⁸ Ta tɔ̄l̄ ta yá̰a̰ i só tə́ tɔȳ ta kəla gíŕən. Kənī rɔ̄ lɔm i só tə́ tɔȳ kɔjə rɔ̄.

⁹ Ī-lōō kadə̄ wōn̄g rāāī láẃ ngá̰ý, tɔdɔ̄ i de kə́ mbóo gə̄ n i ngé rāā wōn̄g láẃ gə̄ ní.

¹⁰ Ī-lōō kəda na i ba̰ý áké yá̰á̰ kə́ jóo majə tɔȳ kə́ ngɔlaā wa. Tɔdɔ̄ i kum kedə̄ n rāāī á ī-dəjeń najə̄ ń noō ní alé.

¹¹ Kum kedə̄ i yá̰á̰ kə́ majə tītə̄ yá̰a̰ gotə yo deē beé. Ni-rāā majə kə ngé gə̄ ń a̰a̰n̄ kum mbang ní.

¹² Ni a əndā deē loo kə́ yá̰á̰ kə́ majaĺ a rāān tū tə́ aĺ tə́ tītə̄ yā nar beé. Ni i nge rāā kadə̄ ngé kəngen gə̄ ndin̄ ta kaw̄ jóo.

¹³ Á̰a̰ kəla rāā Nə́ɓā: Yá̰á̰ ń ni rugən ní i náā n asə ndájə̄n gogə̄ ní?

¹⁴ Ndɔ̄ kə́ majə tə́ anī ādə̄ rɔ̄í nelī, banī ndɔ̄ yá̰á̰ kə́ to kum kaȳ aĺ tə́ anī á̰a̰ā̰: Nge ń toō ō nge ń noō ō ní, Nə́ɓā rāādə́ i yā kadə̄ deē gerə̄ń yá̰á̰ ń a to gotən tə́ ní alé.

¹⁵ Ndiḿ kə kumḿ kə́ sḛ́ý beē nəkɔ́ ń toō ní m-á̰á̰ yá̰a̰ malang: De kə́ gōtə́, kə́ hálən kə́ gōtə́ tɔlən ō, de kə́ nge kem ndul kə́ hál kem ndul yān ajən ō.

¹⁶ Ī-lōō rāā háĺ kə́ gōtə́ kadə̄ mān̄ dɔ majən ō, ī-lōō kadə̄ kumií edə̄ kadə̄ mān̄ dɔ majən ō. Ī-sāā nujə rɔ̄í i tām̄ rí tə́?

¹⁷ Ī-lōō rāā kem ndul kadə̄ al̄ naā ō, ī-lōō tél de kə́ mbóo ō. Ī-sāā koy kété ta kadə̄ ndɔ̄í asə i najə̄ rí tə́?

¹⁸ Kəhɔí gō nge ń toō kadə̄ ngan̄g kanjə̄ kadə̄ jīí əya̰ nge ń noō dɔɔ́ i yá̰á̰ kə́ majə. Tɔdɔ̄ deē ń ɓōĺ ndíĺ Nə́ɓā ní a rāā yá̰á̰ kə́ jōó gə̄ ń noō kadə̄ udə gírí.

¹⁹ Kum kedə̄ rāā adə̄ nge kum kedə̄ ngan̄g tɔȳ ngé ko̰o̰ ɓē gə̄ kutə kə́ ndin̄ kem ɓē kə́ kógə̄ḿ beē tə́.

²⁰ Tɔdɔ̄ de kə́ dɔ nang tə́ kə́ rāā yá̰a̰ malang súmūú kanjə̄ rāā yá̰á̰ kə́ majaĺ aĺ ní gətóo.

²¹ Najə̄ kɔr̄ de gə̄ malang ń noō ní ī-lōō kəndā mbīí gírí. Loo ń noō tə́ ā ōō ndū nge kəla yāí loo haí tə́ alé.

²² Tɔdɔ̄ īkɔ́ ī-ger̄ kadə̄ ī-ha madí gə̄ nja i ngá̰ý ō.

²³ m̄-nāā yá̰a̰ gə̄ ń noō malang kə kum kedēé. Anī m-ə́da na: M-ā m̄-tél de kə́ kumən edə̄. Banī kum kedə̄ i sa̰y ngá̰ý rɔ̄ḿ tə́.

²⁴ Yá̰á̰ ń to kɔ̄ɔ́ ɓá ní i yá̰á̰ kə́ sa̰y ō, i yá̰á̰ kə́ lú ngá̰ý ō. I náā n a teē dɔ tə́ ní?

²⁵ Adə̄ m-ə̄ndā rɔ̄ḿ ta ndóō yá̰á̰ tə́ ō, ta ndəle gíŕ yá̰á̰ tə́ ō. m̄-sāā ger̄ yá̰á̰ ń i kum kedə̄ ní ō, m̄-sāā ger̄ kum yá̰a̰ gə̄ ń a rāān̄ yá̰á̰ ní ō. M-á̰a̰ kadə̄ kem ndul i mbóo, i mbóó kə́ a rāā deē kɔ̄r̄ tə́.

²⁶ Mā m-á̰a̰ kadə̄ dəyá̰ adə̄ deē wur katə̄ tɔȳ yo dan ń ni-tél i gūmbə̄ ō, kemən tél i réng ō, jīn gə̄ télən̄ i kəlā do̰ō̰ deē ō ní. Deē ń nel̄ Nə́ɓā seneé ní a teē jī dəyá̰ ní tə́ yā ka̰ȳ, banī nge rāā majaĺ əsō kem jīn tə́.

²⁷ Dan ń m-ə̄ndā ma̰ȳ yá̰a̰ gə̄ kógə̄ḿ kógə̄ḿ kə gō naá yā ger̄ kum ní, yá̰á̰ ń m-ə́ngé ní n noó, nge kɔjə ngé kán̄ naā gə̄ najə̄ əda i beé.

²⁸ M-ā m̄-sāā i mbéé ɓáý ō, m-ə́nge aĺ ɓáý ō. Dan de kə́ dəngam gə̄ dūbú tə́ ní, m-ə́nge dəngam i kógə̄ḿ beē. Banī dan de kə́ dəyá̰ gə̄ tə́ malang ní, ni kə́ kal kógə̄ḿ gə̄gē a m-ə́nge alé.

²⁹ Banī yá̰á̰ ń m-ə́ngé ní á̰a̰ā̰ a? Nə́ɓā rāā de gə̄ adə̄ ran̄ súmūú, banī nin̄ tə́lan̄ yá̰a̰ naā tə́ adə̄ al̄ naā ngá̰ý.