KOHELET 12 - Bible sar1 Dan ń ī-na̰y ngōn̄ ɓáý ní, ādə̄ əga kemií dɔ nge kəndāí tə́. Ādə̄ əga kemií dɔn tə́ kété pá tá kadə̄ ndɔ̄ kə́ majaĺ gə̄ reē ugə̄n̄ ɓáý, pá tá kadə̄ kum mbang ń ā ə́dań najə̄ń toō ní reē ugə̄ ɓáý, ā ə́da na: Ngur ndi kə kumḿ rāām̄ to̰ alé. 2 Kum mbang ngeé ń noō tə́ ní, mbang ndə́lē aĺ ō, nāā ndaa aĺ ō, tə́yō̰ gə̄ unjə̄n̄ aĺ ō, kil̄ man̄ gə̄ tél ilə̄n̄ gogə́ gō man̄ kə́ edə tə́ ō. 3 Loo ń noō tə́ ní, ɓōĺ rāā ngé ngɔ̄m̄ kújə gə̄ adə̄ ndewn̄ ō, de kə́ ngan̄g gə̄ tél gɔkə́n̄ gɔ́kə́ kɔ̄ɔ́ ō. Dəyá̰ gə̄ urən̄ yá̰a̰ to̰ alé, tām̄ kutədə́ i ngá̰ý alé, ngé gə̄ ń go̰ō̰n̄ loo ko̰rō̰ kújə́ tə́ ní, mandən̄ to̰ alé. 4 Loo ń noō tə́ ta róbə́ ń deē ra tū tə́ anī, a a̰a̰ loo kə̄ róbə kɔsɔɔ́ ní, i kə́ kutə̄ kɔ̄ɔ́ ō, deē ur goy to̰ aĺ ō. Yel̄ ənī pā to̰ aĺ ō, pā gə̄ malang dəban̄ ō. 5 Loo ń noō tə́ ní, róbə́ kə́ əta tan kə̄ dɔɔ́ rāā adə̄ deē ɓōĺ ō, deē ɓōĺ njə̄rā ō. Dɔ deē ndaa bum tītə̄ kāgə̄ kə́ hútə̄ beé ō, rɔ̄ deē ɔȳn tītə̄ gaẃ kə́ ḭḭ ba tél əsō nang tə́ beē ō. Ndi kə kumuú yā deē aw̄ kɔ̄ɔ́ tītə̄ kan̄ kāgə̄ kə́ ḭḭ dɔɔ́ əsō beé ō. A̰á̰ā̰, ndɔ̄ kógə̄ḿ tə́ anī, de gə̄ kógə̄ḿ kógə̄ḿ a aw̄n̄ kum kə́ ɓádá. Loo kə́ ɓádá i kújə yā de kə́ ta tɔ̄l̄ ta tə́. Dəyá̰ kə́ ngé nōō yo gə̄ i kum róbə kɔsɔɔ́ kɔ̄ɔ́ ɓá. 6 Loo ń noō tə́ ní, kəlā gində̄ arjā̰a̰ gān̄g ō, bay lɔ́r tɔ̄ɔ̄ ō, jóo man̄ tɔ̄ɔ̄ ō, kāgə̄ ta bəlo man̄ kə́ kəlā əsan ngá̰ý əsō gír bəlo maná kɔ̄ɔ́ ō. 7 Loo ń noō tə́ ní dā̰ rɔ̄ deē téĺ nán̄g gogə́ tām̄ rāānən̄ i kə nángāá ō, koō deē tél kə̄ rɔ̄ Nə́ɓā tə́ gogə́, tām̄ i Nə́ɓā n i nge kəla koō kem deē tə́ ní ō. 8 Kumən gətóo, nge kɔjə ngé kán̄ naā gə̄ najə̄ əda na: I yá̰á̰ kə́ kumən gətóo, yá̰a̰ malang ní kumən gətóo. Najə̄ kə́ ta tɔ̄l̄ ta tə́ 9 Tá ɓáý to̰ nge kɔjə ngé kán̄ naā gə̄ najə̄ ndóō de gə̄ yá̰á̰ ń ni ger̄ ní. Ni-a̰a̰ tɔ́gə kāgə̄ najə̄ gə̄ ngá̰ý ō, əndā ma̰ȳdə́ ō, rāādə́ adə̄ ton̄ kə gōó majə ō. 10 Ni-əhɔ rɔ̄n tɔgə ənge najə̄ gə̄ kə́ nel̄ de gə̄. Ndangən̄ kum najə̄ gə̄ ní laā, adə̄ i najə̄ kə́ gōtə́ gə̄. 11 Najə̄ kɔr̄ ngé kum kedə̄ gə̄ to i tītə̄ kāgə̄ kə́ ta katə gə̄ ō. Gosə̄ najə̄ kə́ kɔsə nja naā tə́ gə̄ ton̄ i tītə̄ máyá̰ gə̄ kə́ udən̄ majə ō. Yá̰á̰ ń nge kul̄ kə́ kógə̄ḿ beē adə̄ karī ní n noó. 12 Ngōnə̄ḿ, ī-lōō kənī najə̄ kə́ rang dɔ tə́. Makətūbə̄ gə̄ ń deē asə rāā ní ta ngóýdə́ gətóo ō, ndóō yá̰á̰ kə́ ngá̰ý a taā tɔ́gə deē ō. 13 Ta tɔ̄l̄ ta najə̄ malang n toó, ī-ɓōĺ ndíĺ Nə́ɓā ba ī-rāā gō míndə gə̄ ń ni ə́ndā dɔ deē tə́ kadə̄ rāā ní. Yá̰á̰ ń majə kadə̄ de gə̄ malang rāān̄ ní n noó. 14 Tɔdɔ̄ Nə́ɓā a aw̄ kə yá̰a̰ malang loo sarya tə́, yá̰á̰ kə́ to loo mundə̄ tə́ gə̄gē, ká i kə́ majə aké i kə́ majaĺ gə̄ gē anī ni a aw̄ń loo sarya tə́. |
© 2006, 2010 Alliance Biblique du Tchad
Bible Society of Chad