JOJUE 9 - Bible sar

Madə̄ naā kə́ kə de kə́ Gabaon gə̄

¹ Dan ń mban̄g gə̄ ń ndin̄ gidə bā Jurdḛ tə́ gō nang kə́ mbal̄ bo gə̄ i tū tə́ tə́ ō, kə́ mbal̄ bo gə̄ gətóon̄ tū tə́ tə́ ō, kə́ kadə̄ bā bo tə́ bátə́ ugə̄n̄ Liban ō, adə̄ i Het gə̄, kə *Amor gə̄ kə Kanaan gə̄, kə Periji gə̄, kə Hibi gə̄, kə Yebus gə̄ ní, oōn̄ najə̄ yā ɓē kə́ Ai kə́ nujə kɔ̄ɔ́ anī,

² əndān̄ rɔ̄də́ naā tə́ yā rɔ̄ɔń Jojue ō, ngán *Israel gə̄ ō.

³ De kə́ Gabaon gə̄ ń i Hibi gə̄ ní, oōn̄ yá̰á̰ ń Jojue rāā kə ɓē kə́ Jeriko ō, kə ɓē kə́ Ai ní ō,

⁴ ba gḛyn̄ rāā yá̰a̰ i kə kum kedēé. Nin̄ sāān̄ sādə́ gə̄ ba ɔyn̄ ngísə ngong gə̄ gidə kərō yādə́ gə̄ tə́ ō, ɔyn̄ ngísə sɔl kasə *nduú kə́ tə́nī kum gə̄ gidə kərō yādə́ gə̄ tə́ ō,

⁵ tə́lan̄ ngísə kūbə̄ gə̄ rɔ̄də́ tə́ ō, ngísə sākə̄rā kə́ tə́nī kum gə̄ njadə́ tə́ ō, ɔyn̄ butə̄ mápá kə́ tutə gə̄ ō,

⁶ ba aw̄n̄ rɔ̄ Jojue tə́ gérger kə́ Gilgal tə́, aw̄ ədan̄ Jojue ō, de kə́ dəngam gə̄ kə́ Israel tə́ ō na: J-ḭḭ i dɔ nang kə́ sa̰y tə́ n jə-reē rāā madə̄ naá sesí ní.

⁷ De kə́ dəngam gə̄ kə́ Israel tə́ tél ədan̄də́ na: Majanī ī-ndiī i rɔ̄jí tə́ ngɔr, adə̄ j-a j-əhɔ *madə̄ naā sesí alé.

⁸ Banī nin̄ ədan̄ Jojue na: Jḭḭ i ɓer̄ yāí gə̄. Anī Jojue dəjedə́ najə̄ əda na: Sḭḭ̄ i náā gə̄? Ḭ́ḭḭ̄ i rá n ī-reēī toó?

⁹ Nin̄ tél ədan̄ na: Ɓer̄ yāí gə̄ ḭḭn̄ i dɔ nang kə́ sa̰y tə́ n reēn̄ ní tām̄ oōn̄ lūlū Kɔ́ɔ̄ɓē Nə́ɓā yāí, j-oō yá̰a̰ malang kə́ kɔrkum gə̄ ń ni-rāā dɔ nang kə́ Ejiptə tə́ ní ō,

¹⁰ yá̰á̰ ń ni-rāā kə mban̄g yā *Amor gə̄ kə́ jōó gə̄ ń ndin̄ gidə bā Jurdḛ kə́ dām̄ kə́ nú tə́ ní, adə̄ i yá̰á̰ ń ni-rāā kə Sihon mban̄g kə́ Hesəbon ní ō, kə Og mban̄g kə́ Basan ń ndi Asətarot ní ō.

¹¹ Kum kɔɔ̄ yājí gə̄ ō, de gə̄ malang kə́ kem ɓē yājí tə́ ō, mērə̄n̄jí kɔy sádə̄ jījí tə́ ba kə jə-reē j-əngesí kə kə j-ədasí na jḭḭ i ɓer̄ yāsí gə̄. Ní, ə̄nī ndūsí ādījí ī-ə́hɔiń *madə̄ naā sejí.

¹² Á̰a̰ī mápa yājí gə̄. Ndɔ̄ ń j-ɔrə̄ń dɔɔ́ yā reē kə̄ rɔ̄sí tə́ ní, j-ɔydə́ kújú i kə təngāá n jə-rāā sádə̄ tə́ ní. Ba ń toō, á̰a̰ī, tutə kɔ̄ɔ́ ō, tétə̄ rárák kɔ̄ɔ́ ō.

¹³ Sɔl gə̄ ń toō, dan ń jə-tūr̄ kasə *nduú kemeé ní, ton̄ i kə kijədə́ ɓáý. Ba ń toō á̰a̰ī, rə́ya̰n̄ kɔ̄ɔ́. Á̰a̰ī kūbə̄ yājí gə̄ kə sākə̄rā yājí gə̄ ngísən̄ kɔ̄ɔ́, tɔdɔ̄ j-ḭḭ i sa̰y.

¹⁴ Ngán Israel gə̄ taān̄ núsə́ sádə̄ yādə́ sḛ́ý əsan̄ kanjə̄ koō yā Kɔ́ɔ̄ɓē.

¹⁵ Jojue ənī ndūn adə̄də́ əhɔń *madə̄ naā sedə́ tām̄ yā lɔm tə́. Madə̄ naā ní ɔjə kadə̄ ni a əya̰də́ kadə̄ a ndin̄ kə kumuú. Ngāgəra dɔ ngán *Israel gə̄ túbən̄ ɔjənə̄ńdə́ kadə̄ najə̄ ní i najə̄ kə́ rɔ̄kum.

¹⁶ Gō ndūdə́ ń ənīn̄ tə́ ní, rāā ndɔ̄ mətá anī, ngán Israel gə̄ oōn̄ kadə̄ de gə̄ ní i madə̄ ɓēdə́ gə̄ ndin̄ i ngɔr rɔ̄də́ tə́.

¹⁷ Ngán Israel gə̄ əsōn̄ róbó, ba kə ndɔ̄ kə nge ko̰ mətá anī teēn̄ ɓē gə̄ ń de gə̄ ní ndin̄ kemeé tə́ ní. Rī ɓē gə̄ ní na i Gabaon ō, Kepira ō, Beerot ō, Kiryat Yearim ō.

¹⁸ Ngán Israel gə̄ tɔ̄lə̄n̄ de gə̄ ní alé, tɔdɔ̄ ngāgəra dɔdə́ gə̄ túbən̄ kə rī Kɔ́ɔ̄ɓē Nə́ɓā yā Israel adə̄n̄də́. Banī ngán *Israel gə̄ malang tāmə̄n̄ kə ngāgəra dɔdə́ gēé.

¹⁹ Banī ngāgəra dɔdə́ gə̄ ədan̄də́ na: Jə-túbə j-adə̄də́ kə rī Kɔ́ɔ̄ɓē Nə́ɓā yā Israel kɔ̄ɔ́ ɓá, adə̄ j-asə rāā yá̰á̰ kə́ majaĺ sedə́ to̰ alé.

²⁰ J-a j-əya̰īdə́ kadə̄ ndin̄ kə kumdə́ sɔɔ̄ń túbú ń jə-túbə j-adə̄də́ ní, ré i beé aĺ anī, j-a j-ɔr wōn̄g yā Kɔ́ɔ̄ɓē yā reēń dɔjí tə́. Ba yá̰á̰ ń j-a jə-rāāī sedə́ ni n toó:

²¹ J-a j-əya̰īdə́ kadə̄ ndin̄ kə kumdə́, ba j-a j-əndāīdə́ ta kəla sāā kīr̄ tə́ ō, kɔdə man̄ tə́ ō, tām̄ yājí tə́. Yá̰á̰ ń ngāgəra dɔ ngán *Israel gē ndigən̄ rāā ní n nuú.

²² Tā anī Jojue ɓāŕ de kə́ Gabaon gə̄ ba ədasí na: I tām̄ rí tə́ á ī-gólījí ə́daī na ḭ́ḭḭ̄ sa̰y, tá sḭḭ̄ i de gə̄ kə́ ī-ndiī i ngɔr rɔ̄jí tə́ ní

²³ Ngɔlaā ní ndɔ̄ĺ i dɔsí tə́ ō, sḭḭ̄ malang i ɓer̄ gə̄ kə́ gír a gān̄g dɔsí tə́ aĺ ō, ā ī-nárī kīr̄ ō, ā ūyī man̄ ō, tām̄ yā kújə yā Nə́ɓā yāḿ tə́.

²⁴ De kə́ Gabaon gə̄ tūr̄ ədan̄ Jojue na: J-oō kadə̄ Kɔ́ɔ̄ɓē Nə́ɓā yāí mēr̄ nge kəla yān Moijə kadə̄sí dɔ nang ń toō malang ō, mēr̄ tɔ̄l̄ de kə́ tū tə́ gə̄ kɔ̄ɔ́ malang nosí tə́ ō. I yá̰á̰ ń nuū n jə-ɓōĺsí ngá̰ý á rāań yá̰a̰ beé ní.

²⁵ Ngɔlaā ní jḭḭ i gíŕ tɔ́gə yāí tə́, adə̄ ī-rāā sejí yá̰á̰ ń kadə̄ i yá̰á̰ kə́ majə ta kumií tə́ ō, i yá̰á̰ kə́ gōtə́ ō ní.

²⁶ Yá̰á̰ ń Jojue rāā sedə́ ní n toó: Ni ɔgə̄ ngán *Israel gə̄ tɔ̄l̄də́,

²⁷ ba əndā kəla tə́gā kīr̄ ō, kuȳ man̄ ō, dɔdə́ tə́ kadə̄ rāān̄ kəla gə̄ ń nuū tām̄ yā ngán *Israel gə̄ tə́ ō, *loo tun̄ yá̰a̰ yā Kɔ́ɔ̄ɓē tə́ ō, loo ń Kɔ́ɔ̄ɓē a gə̄rā tə́ ní. Ɓōólaā gə̄gē ngán kaadə́ gə̄ a rāān̄ kəla ń nuū laā ɓáý.