JOJUE 7 - Bible sar

Akan rāā yá̰á̰ kə́ gōtə́ aĺ

¹ Ngán Israel gə̄ rāān̄ yá̰á̰ kə́ gōtə́ alé, tɔdɔ̄ yá̰a̰ kənge ń Kɔ́ɔ̄ɓē ɔgə̄də́ kun ní nin̄ unən̄. I de kə́ gír ɓē yā *Juda tə́ n ɔy núsə́ yá̰a̰ kənge kə́rēý gə̄ adə̄ wōn̄g rāā Kɔ́ɔ̄ɓē kə ngán *Israel gēé ngá̰ý ní. Rī deē ní na i Akan. Ni i ngōn̄ Karmi kə́ ngōn̄ Jabədi kə́ ngōn̄ Jera.

² Jojue ndi Jeriko ba əla de gə̄ ɓē ń a ɓārə́n̄ na i Ai tə́, ɓē ní ra i kadə̄ ɓē madə̄ ń a ɓārə́n̄ na i Bet Aben ní tə́ Ré deē ra Betel anī, Ai i kə̄ dām̄ kə́ gír ɓē tə́. Ni-mēr̄də́ kaw̄ kəndā ma̰ȳ loo ní. Dan ń de gə̄ ní aw̄ əndān̄ ma̰ȳ loo ní oy anī,

³ tél reē ədan̄ Jojue na: Ādə̄ gír de gə̄ malang aw̄n̄ alé. De gə̄ dūbú jōó, aláa dūbú, ətá asən̄ kaw̄ rɔ̄ɔ̄ ɓē kə́ Ai karī. Ī-lōō kadə̄ gír de gə̄ malang aw̄n̄ njə̄ɓānəń rɔ̄də́ ndáńg, tɔdɔ̄ de kə́ Ai gə̄ ngá̰ý alé.

⁴ De gə̄ asən̄ dūbú mətá ń nuū aw̄n̄, banī aw̄ a̰ȳn̄ naā kɔ̄ɔ́ no de kə́ Ai gə̄ tə́.

⁵ De kə́ Ai gə̄ tɔ̄lə̄n̄də́ asə de gə̄ kutə mətá gidə i mehḛ́, ngɔ̄də̄n̄ gotə gə̄, ḭḭn̄ sedə́ ta róbə́ kə́ yā kudəń kə̄ kem ɓē tə́ bátə́ ugə̄n̄ sedə́ Sebarim, nin̄ tɔ̄lə̄n̄də́ ta risədə́ kum kə̄ wól loo tə́. Kem ngán *Israel gə̄ gān̄g man̄ adə̄ tɔ̄gə̄də́ gətóo.

⁶ Jojue nin̄ kə *kum kɔɔ̄ gə̄ yā ngán Israel gēé *rə́yā̰n̄ kūbə̄ kə́ rɔ̄də́ gə̄ tə́ ō, ɔyn̄ *bumbə́ru kə̄ dɔdə́ tə́ ō, əsōn̄ sébən̄ kumdə́ nang tə́ no sandúkə yā Kɔ́ɔ̄ɓē tə́. Nin̄ ton̄ tītə̄ ń nuū bátə́ loo tíbə dɔdə́ tə́.

⁷ Jojue əda na: Kɔ́ɔ̄ɓē Nə́ɓā, ādə̄ de gə̄ ń toō teēn̄ bā Jurdḛ i tām̄ rí tə́? I kadə̄ ə́lájí jī *Amor gə̄ tə́ kadə̄ tɔ̄lə̄n̄jí a? Jə-ndi i gidə bā Jurdḛ kə́ dām̄ kə́ nu tə́ anī i só tə́ gə̄gē.

⁸ Ngán Israel gə̄ aȳn̄ naā kɔ̄ɔ́ no madə̄ ba̰ā̰də́ gə̄ tə́ toō kə m-ə́da na i rí tā Kɔ́ɔ̄ɓē?

⁹ Kanaan gə̄ kə de gə̄ malang kə́ dɔ nang ń toō tə́ a oōn̄, adə̄ nin̄ a əndān̄ rɔ̄də́ naā tə́ yā reē rɔ̄ɔ̄jí, a tɔ̄lə̄njí kɔ̄ɔ́ malang. Ní ā ī-rāā i ba̰ý n de gə̄ a ger̄nneé rīí kə́ to kɔsə go̰n ngá̰ý ní?

¹⁰ Kɔ́ɔ̄ɓē əda Jojue na: Ḭ́ḭ dɔɔ́. Ə̄sō ī-sébə kumií nang tə́ tītə̄ ń nuū i tām̄ rí tə́?

¹¹ Ngán Israel gə̄ rāān̄ majaĺ. Nin̄-mānə̄n̄ dɔ *ndū najə̄ kə́ dɔ *madə̄ naā ń m-ə́hɔ sedə́ tə́ á m-ə́dádə́ kadə̄ ngɔ̄mə̄n̄ ní. Nin̄ ɔyn̄ yá̰á̰ kə́ bāā dɔ gə̄ ń m-ɔ̄gə̄də́ kɔy ní, ɓogən̄ yá̰a̰ gə̄ ní ba aw̄ ɓɔ̄ɔ̄n̄ dan yá̰a̰ yādə́ tə́.

¹² Adə̄ a asən̄ dum̄ ta madə̄ ba̰ā̰də́ gə̄ alé. A aȳn̄ naā no madə̄ ba̰ā̰də́ gə̄ tə́ tām̄ télən̄ de kə́ bāān̄ dɔdə́ kɔ̄ɔ́ gə̄. Adə̄ yá̰á̰ kə́ bāā dɔ gə̄ ń ton̄ dɔ dáńsí tə́ ní ré ɔ́y ī-teēiń kɔ̄ɔ́ aĺ anī m-ā m-ɔ̄r̄ rɔ̄ḿ kɔ̄ɔ́ rɔ̄sí tə́

¹³ Ngɔlaā ní āw̄ əda de gə̄ ādə̄ əndān̄ dɔ rɔ̄də́ danaá tām̄ yāḿ tə́. ə́dádə́ ādə̄ ɔrə̄n̄ kamdə́ tayā tām̄ yā Nə́ɓā tə́, ādə̄ majaĺ gətóo dɔdə́ tə́ tām̄ yā ndɔ̄ kə́ bírí tə́. Tɔdɔ̄ yá̰á̰ ń Kɔ́ɔ̄ɓē Nə́ɓā yā Israel əda ní n toó Sḭḭ̄ ngán *Israel gə̄, yá̰á̰ kə́ bāā dɔ dáńsí tə́, adə̄ ā ásiī dum̄ ta madə̄ ba̰ā̰sí gə̄ alé, bátə́ kadə̄ ré uniī yá̰á̰ ní ī-teēiń kɔ̄ɔ́ pá tá.

¹⁴ Bírí dəloí ā ī-reēī kə gō gír ɓē yāsí gēé. Ba gír ɓē ń Kɔ́ɔ̄ɓē a ɔjə dɔ ní kə́ kemeé gə̄ a reēn̄ kə gō gír kojə yādə́ gēé ō, gír kaa ń Kɔ́ɔ̄ɓē a ɔjə dɔ ní de kə́ kemeé gə̄ a reēn̄ kə gō gír kojə yādə́ gēé ō, kojə ń Kɔ́ɔ̄ɓē a ɔjə dɔ ní de kə́ kemeé gə̄ a reēn̄ kógə̄ḿ kógə̄ḿ ō.

¹⁵ Deē ń ɔy yá̰á̰ kə́ bāā dɔ gə̄ á Kɔ́ɔ̄ɓē a ɔjə dɔn ní, a ənīnən̄ horoó, ni gə̄gē, yá̰a̰ kənge yān gə̄gē malang. Tɔdɔ̄ ni mān̄ i dɔ *ndū najə̄ ń Kɔ́ɔ̄ɓē əhɔń madə̄ naā kə́ ngán *Israel gēé ní ō, rāā i yá̰á̰ kə́ to rɔ̄sɔl̄ ngá̰ý dan ngán Israel gə̄ tə́ ō.

¹⁶ Jojue ḭḭ dɔɔ́ kə gír looí ɓatə, ba adə̄ ngán Israel gə̄ reēn̄ rɔ̄n tə́ kə gō gír ɓē yādə́ gēé, anī Kɔ́ɔ̄ɓē ɔjə dɔ gír ɓē yā *Juda.

¹⁷ Jojue adə̄ de kə́ gír ɓē yā Juda tə́ gə̄ reēn̄ kə gō gír kaa yādə́ gēé anī, Kɔ́ɔ̄ɓē ɔjə dɔ gír kaa yā Jera. Jojue adə̄ de kə́ gír kaa yā Jera tə́ gə̄ reēn̄ kə gō gír kojə yādə́ gēé, anī Kɔ́ɔ̄ɓē ɔjə dɔ gír kojə yā Jabədi.

¹⁸ Jojue adə̄ de kə́ gír kojə yā Jabədi tə́ gə̄ reēn̄ kógə̄ḿ kógə̄ḿ, anī Kɔ́ɔ̄ɓē ɔjə dɔ Akan ń i deē ké gír ɓē yā Juda tə́ á, ni i ngōn̄ Karmi kə́ ngōn̄ Jabədi kə́ ngōn̄ kaa Jera ní.

¹⁹ Jojue əda Akan na: Ngōnə̄ḿ, ɔ́sə gɔn Kɔ́ɔ̄ɓē yā Israel ō, ī-ɓōkə́n tɔ̄ȳ ō, ɔ́jəm̄ yá̰á̰ ń ī-rāā ní ba ī-lōō munə̄m̄ yá̰á̰ kógə̄ḿ.

²⁰ Akan tél əda Jojue na: Ké rɔ̄kum tə́ tā anī i mā n m̄-rāā majaĺ kə Kɔ́ɔ̄ɓē Nə́ɓā yā Israel, ba yá̰á̰ ń m̄-rāā ní n toó:

²¹ M-á̰a̰ kūbə̄-jī kə́ Sinear kə́ majə ngá̰ý dan yá̰a̰ gə̄ kə́ kəhɔ ta rɔ̄ɔ̄ tə́ ō, m-á̰a̰ gində̄ arjā̰a̰ kə́ kɔȳn i kəlōo jōó ō, m-á̰a̰ lɔ́ŕ kə́ kɔȳn i ngán kəlōo ɓú mí ō, əsōn̄ kumḿ adə̄ m-ɔ́ýdə́. m̄-dubə̄də́ i gíŕ nángāá kem kújə tandā yāḿ tə́ dan looó, m̄-ɓōkə́ gində̄ arjā̰a̰ i gírí pá tá gotə yá̰a̰ gə̄ ń nuū i dɔ tə́.

²² Jojue əla de gə̄ adə̄ aw̄n̄ láẃ kem kújə tandā yā Akan tə́, anī əngen̄ yá̰á̰ ní kem kújə tandā yān tə́ rɔ̄kum, gində̄ arjā̰a̰ to i gírí.

²³ De gə̄ ní ɔrə̄n̄ yá̰a̰ gə̄ ní gíŕ nangāá dan kújú reēnəń adə̄n̄ Jojue nin̄ kə ngán *Israel gēé. ɓōkə́n̄ yá̰a̰ gə̄ ní no Kɔ́ɔ̄ɓē tə́

²⁴ Jojue nin̄ kə ngán *Israel gēé gon tə́ malang əhɔn̄ Akan ō, ɔyn̄ arjā̰a̰ ní ō, unən̄ kūbə̄-jī ní ō, unən̄neē lɔ́r ní ō, əhɔn̄ ngán Akan kə́ dəngam gə̄ ō, kə́ dəyá̰ gə̄ ō, əhɔn̄ man̄g kə́ bəra yān ō, kərō yān ō, batə̄ yān ō, bə̄yā̰ yān gə̄ ō, ɔrə̄n̄ kújə tandā yān ō, ɔyn̄ gotə yá̰a̰ kənge yān gə̄ malang ō, ba aw̄n̄ sedə́ wól loo ń y ɓārə́n̄ na i Akor ní tə́.

²⁵ Jojue əda Akan na: Ī-rāā ādə̄ yá̰á̰ kə́ to kum kaȳ aĺ reē dɔjí tə́ i tām̄ rí tə́? Ādə̄ Kɔ́ɔ̄ɓē reē kə yá̰á̰ kə́ to kum kaȳ aĺ dɔí tə́ ɓōólaā. Loo ń nuū tə́ ngán Israel gə̄ malang tə́nīnən̄ kə mbalá tə̄nā tɔ̄lnən̄. Tɔ̄lə̄n̄ deē yān gə̄ i tītə̄ ń nuū ō, ba əlan̄ hor dɔdə́ tə́. Əlan̄ hor dɔ yá̰a̰ kənge yān gə̄ tə́ malang ō.

²⁶ Gō tə́ anī kánə̄n̄ mbal̄ gə̄ adə̄ ton̄ dɔ naā tə́ bing dɔn tə́. Mbal̄ gə̄ ń kánə̄n̄ dɔn tə́ ní ton̄ nuú bátə́ ɓōólaā. Loo ń noō tə́ wōn̄g yā Kɔ́ɔ̄ɓē tetə. I tām̄ najə̄ ń nuū tə́ n a ɓārə́n̄ wól loo ní na i Akor bátə́ ɓōólaā ní.