JOJUE 6 - Bible sar

¹ Ta róbə́ kə́ yā kudəń kə̄ kem ɓē kə́ Jeriko tə́ i kə́ kutə̄ kɔ̄ɔ́ míŕ míŕ, najə̄ yā ngán *Israel gə̄ tə́ De kə́ ndágá asə kudə kem ɓēé aĺ ō, de kə́ kem ɓēé asə teē ndágá aĺ ō.

² Anī Kɔ́ɔ̄ɓē əda Jojue na: Á̰a̰ā̰, m-ə́la ɓē kə́ Jeriko kem jīí tə́, kə mban̄g kə́ kemeé ō, go̰ rɔ̄ɔ̄ gə̄ kə́ kemeé ō.

³ Ba ḭ̄ ō, ngé rɔ̄ɔ̄ yāí gə̄ ō, ā ī-njə̄rā ā ī-gīrī gidə ɓē nja kógə̄ḿ kə dɔ ndɔ̄ gə̄ bátə́ ndɔ̄ mehḛ́.

⁴ Ngé tun̄ yá̰a̰ gə̄ sīrí a njə̄ran̄ kété no *sandúkə madə̄ naā tə́ kə tōw̄ gajə batāá jīdə́ gə̄ tə́ kógə̄ḿ kógə̄ḿ. Kə ndɔ̄ kə́ nge ko̰ sīrí anī, ā ī-njə̄rāī yā gīr̄ gidə ɓē nja sīrí ō, *ngé tun̄ yá̰a̰ gə̄ a kɔ̄rə́n̄ tōw̄ ō.

⁵ Loo ń ré a kɔ̄rə́n̄ tōw̄ kə́ dan ngāl̄ adə̄ ōōī kōō anī, gír de gə̄ malang a əgan̄ kɔŕ əda ō, ndogə̄ mbal̄ ń gīr̄ gidə ɓē ní a tetə nang tə́ ō. Loo ń nuū tə́ ngán *Israel gə̄ malang a udən̄ kem ɓēé, náā nəkɔ́ anī kumən i súmūú non tə́.

⁶ Jojue ngōn̄ Nun ɓāŕ *ngé tun̄ yá̰a̰ gə̄ ba ədadə́ na: Úniī *sandúkə madə̄ naā yā Kɔ́ɔ̄ɓē əndāī dɔ bɔ̄gə̄sí tə́, ba ādī de gə̄ sīrí dansí tə́ njə̄rān̄ kété no tə́ kə tōw̄ gajə batə̄ gēé.

⁷ Gō tə́ anī əda gír de gə̄ na: Ī-njə̄rā ī-gīrī gidə ɓē. Ba ādī ngé rɔ̄ɔ̄ kə́ ngé njə̄rā kété gə̄ mānə̄n̄ kété no sandúkə yā Kɔ́ɔ̄ɓē tə́.

⁸ Yá̰a̰ malang i kə́ rāā tītə̄ ń Jojue ədań gír de gə̄ ní: *Ngé tun̄ yá̰á̰ kə́ sīrí gə̄ ń tōw̄ gajə batə̄ kə́ sīrí gə̄ i jīdə́ tə́ ní, njə̄rān̄ kété no *sandúkə madə̄ naā tə́ a kɔ̄ŕnəń tōw̄ gə̄ ní, ba sandúkə madə̄ naā i gōdə́ tə́.

⁹ Ɓūtə̄ ngé rɔ̄ɔ̄ kə́ ngé njə̄rā kété gə̄ njə̄rān̄ kété no *ngé tun̄ yá̰a̰ gə̄ ń a kɔ̄rə́n̄ tōw̄ gə̄ ní tə́ ō, ɓūtə̄ ngé rɔ̄ɔ̄ kə́ ngé njə̄rā gogə́ gə̄ utə̄n̄ gō *sandúkə madə̄ naā ō. De gə̄ a njə̄rān̄ ō, *ngé tun̄ yá̰a̰ gə̄ a kɔ̄rə́n̄ tōw̄ ō.

¹⁰ Jojue tāā gír de gə̄, ədadə́ na: Ā ī-túrī kɔĺ aĺ ō, ādī deē oō ndūsí aĺ ō, ādī najə̄ kógə̄ḿ teē tasí tə́ aĺ ō, kdə̄ ndɔ̄ ń m-ā m-ə́dásí kadə̄ ī-túrīneé kɔĺ ní reē ugə̄ń. Tā anī ā ī-túrī kɔĺ ɓáý.

¹¹ De gə̄ njə̄rān̄ kə *sandúkə madə̄ naā gīrə̄n̄neé gidə ɓē nja kógə̄ḿ ba tél aw̄n̄ gogə́ gérgereé aw̄ ɓīīn̄.

¹² Teē kə ndɔ̄ kə́ nuū anī, Jojue ḭḭ dɔɔ́ kə gírloí ɓatə ō, *ngé tun̄ yá̰a̰ gə̄ unən̄ sandúkə yā Kɔ́ɔ̄ɓē əndān̄ dɔ bɔ̄gə̄də́ tə́ ɓáý to̰ ō.

¹³ *Ngé tun̄ yá̰á̰ kə́ sīrí gə̄ ń a ətōn̄ tōw̄ gajə batə̄ kə́ sīrí gə̄ a njə̄rān̄ kété no sandúkə yā Kɔ́ɔ̄ɓē tə́ ní, əsōn̄ róbó ba kɔ̄rə́n̄ tōw̄ gə̄ ní. Ɓūtə̄ ngé rɔ̄ɔ̄ gə̄ kə́ ngé njə̄rā kété no madə̄də́ gə̄ tə́ njə̄rān̄ kété nodə́ tə́ ō, kə́ ngé njə̄rā gō madə̄də́ gə̄ tə́ utə̄n̄ gō sandúkə yā Kɔ́ɔ̄ɓē ō. De gə̄ a njə̄rān̄ ō, *ngé tun̄ yá̰a̰ gə̄ a kɔ̄rə́n̄ tōw̄ ō.

¹⁴ Nin̄ njə̄rān̄ gīrə̄n̄ gidə ɓē nja kógə̄ḿ kə ndɔ̄ kə́ ko̰ jōó, ba tél aw̄n̄ gogə́ gérgereé, rāān̄ tītə̄ ń noō ndɔ̄ mehḛ́.

¹⁵ Kə ndɔ̄ kə́ nge ko̰ sīrí anī, ḭḭn̄ dɔɔ́ kə gírloí ba njə̄rān̄ tītə̄ kə́ kété gīrnəń gidə ɓē nja sīrí. I ndɔ̄ ń nuū tə́ ngóy n nin̄ gīrə̄n̄ gidə ɓē nja sīrí ní.

¹⁶ Nja kə́ nge ko̰ sīrí ní, *ngé tun̄ yá̰a̰ gə̄ a rāān̄ yā kɔ̄ŕ tōw̄ anī, Jojue əda gír de gə̄ na: Ī-túrī kɔĺ, tɔdɔ̄ Kɔ́ɔ̄ɓē adə̄sí ɓē ń toō.

¹⁷ Ɓē ní kə yá̰a̰ malang kə́ kemeé i kə́ bāā dɔ tām̄ yā Kɔ́ɔ̄ɓē tə́ Ba i Rahab ń i dəyá̰ ájə́ba ní ngóy n ā ə́ya̰in̄ kadə̄ ndi kə kumuú ō, de gə̄ malang ń a ndin̄ kújú gon tə́ ní ō, tɔdɔ̄ ni ɓɔ̄ɔ̄ ngé kum̄ loo gə̄ ń j-əlaīdə́ ní.

¹⁸ Ba sḭḭ̄ ī-ngɔ̄mī rɔ̄sí majə. Yá̰á̰ ń i kə́ bāā dɔ tām̄ yā Kɔ́ɔ̄ɓē tə́ ní, ī-lōōī kum, na sōgə́ ī-nujiī kə gérger yā ngán *Israel gēé ō, ī-ndɔ́rī yá̰á̰ kə́ to kum kaȳ aĺ ī-reēiń dɔ tə́ ō.

¹⁹ Ba gində̄ arjā̰a̰ malang ō, gində̄ lɔ́r malang ō, yá̰a̰ malang kə́ rāā kə gində̄ nə̄ngá kasə ō, kə gində̄ kə́ karī ō ní, i kə́ yā kɔr̄ kam̄ tayā tām̄ yā Kɔ́ɔ̄ɓē tə́ ō, i kə́ yā kaw̄ń kem loo ngɔ̄m̄ yá̰a̰ kənge yā Kɔ́ɔ̄ɓē tə́ ō.

²⁰ Ngé tun̄ yá̰a̰ gə̄ kɔ̄rə́n̄ tōw̄. Dan ń de gə̄ oōn̄ kōō anī, túrə̄n̄ kɔĺ rɔ̄ɔ̄ kə́ to ɓōĺ ngá̰ý, anī ndogə̄ mbal̄ tetə. Kə̄ ta jī tə́ nuū ngán *Israel gə̄ udən̄ kem ɓēé, náā nəkɔ́ a kumən i súmūú non tə́, adə̄ nin̄ taān̄ ɓē ní.

²¹ Nin̄ bāān̄ dɔ de kə́ kemeé gə̄ malang tɔ̄ləndə́ kə kaskaraá dəngam gə̄, kə dəyá̰ gə̄, kə ngán gə̄, kə de kə́ tɔgə gə̄, tɔ̄lə̄n̄ man̄g kə́ bəra gə̄ ō, batə̄ gə̄ ō, kərō gə̄ ō.

Jojue ajə Rahab

²² Jojue əda ngé kum̄ loo kə́ jōó gə̄ ń əndān̄ ma̰ȳ dɔ nang kə́ Jeriko ní na: Údiī kújə yā Rahab ń i dəyá̰ ájə́ba ní tə́, ba ī-teēī seneé ndágá, ī-teēī kə ngéén gēé malang ndágá ō, tītə̄ ń ə̄nīiń ndūsí ādīiń ní.

²³ Nin̄ udən̄ gō Rahab tə́ ba teēn̄ seneé ndágá, teēn̄ kə bɔbə̄n ō, kó̰o̰n ō, ngákó̰o̰n gə̄ ō, yá̰a̰ malang ń i yān ní teēnəń ndágá ō. Teēn̄ sedə́ kə gír kojə yādə́ malang aw̄ əndān̄də́ gidə gérger yā ngán *Israel gə̄ tə́ ndágá.

²⁴ Ba əlan̄ hor dɔ ɓē tə́ ō, dɔ yá̰a̰ malang kə́ kem ɓēé tə́ ō, yá̰á̰ ń əlan̄ hor dɔ tə́ aĺ ní i gində̄ arjā̰a̰ ō, lɔ́r ō, yá̰á̰ kə́ rāā kə gində̄ nə̄ngá kasaá ō, kə gində̄ kə́ karīí ō. Nin̄ aw̄nəń kem *kújə yā Kɔ́ɔ̄ɓē tə́ aw̄ ɓōkə́n̄ loo ń a ngɔ̄mə̄n̄ yá̰a̰ kənge yā Kɔ́ɔ̄ɓē tū tə́ ní tə́.

²⁵ Jojue ajə Rahab ń i ájə́ba ní ō, ajə ngéén gə̄ malang ō, tɔdɔ̄ Rahab ɓɔ̄ɔ̄ ngé kum loo gə̄ ń ni əladə́ kəndā ma̰ȳ ɓē kə́ Jeriko tə́ ní, adə̄ Rahab ndi dan ngán Israel gə̄ tə́ ō, ngán kaan gə̄ ndin̄ dan ngán Israel gə̄ tə́ bátə́ ɓōólaā ō.

²⁶ Dan ngeé ń nuū tə́ ní, Jojue tāā de gə̄ əda na: Ndɔ̄ĺ i dɔ deē ń a nāā rāā ɓē ń toō gogə́ rang tə́ ní. Ni a əndā ngəran i kə ngōn̄ hágəneé ō, a tə́lá bápə́ kə́ ta tə́ gə̄ i kə ta rútə ngōn̄neé ō.

²⁷ Kɔ́ɔ̄ɓē i naā tə́ kə Jojue, adə̄ rīn ɓār̄ ngá̰ý dɔ nang ní tə́ kə taá malang.