JOJUE 4 - Bible sar

Mbal̄ kə́ kutə gidə i jōó gə̄

¹ Dan ń ngán *Israel gə̄ malang teēn̄ bā Jurdḛ oy anī, Kɔ́ɔ̄ɓē əda Jojue na:

² Ī-gə̄rāī de gə̄ kógə̄ḿ kógə̄ḿ kə dɔ gír ɓē gēé, ādə̄ de gə̄ malang i kutə gidə i jōó,

³ ba ə́daīdə́ kadə̄ ɔyn̄ mbal̄ gə̄ kutə gidə i jōó loo ń *ngé tun̄ yá̰a̰ gə̄ dəba ran̄ tū tə́ kum bā Jurdḛ tə́ ní, nin̄ a ɔyn̄ mbal̄ gə̄ ní yā kaw̄ tə́ndā loo ń ā ī-ɓīī tū tə́ ní tə́.

⁴ Gō tə́ anī, Jojue ɓāŕ de kə́ kutə gidə i jōó gə̄ ń ni gə̄rādə́ dan ngán *Israel gə̄ tə́ ní,

⁵ ba ədadə́ na: Ī-mānī no sandúkə yā Kɔ́ɔ̄ɓē Nə́ɓā yāsí tə́, āwī kum bā Jurdḛ tə́ āw̄ ɔ́yiī mbal̄ gə̄ kutə gidə i jōó. Ɔ́yiī kógə̄ḿ kógə̄ḿ ə̄tōī dɔ bɔ̄gə̄sí gə̄ tə́, kadə̄ mbal̄ kógə̄ḿ i tām̄ yā ɓē kógə̄ḿ yā ngán Israel gə̄ tə́.

⁶ Mbal̄ gə̄ ní a rāān̄ kadə̄ əga kemsí dɔ yá̰á̰ ń rāā yá̰a̰ loo ń toō tə́ laā ní. Ré ndɔ̄ń tə́ ngáńsí gə̄ dəjen̄sí gír anī,

⁷ ī-tél ə́daīdə́ na: Dan ń *sandúkə madə̄ naā yā Kɔ́ɔ̄ɓē a mān̄ kum bā Jurdḛ tə́ ní, man̄ bā Jurdḛ ń a nūgə́ ní dəba. Bā Jurdḛ gān̄g naā tə́ jōó, adə̄ mbal̄ gə̄ ń toō rɔ̄də́ i yá̰a̰ i yá̰a̰ kəga kem dɔ yá̰á̰ kə́ rāā yá̰á̰ tə́ yā ngán Israel gə̄, kadə̄ əgań kemdə́ dɔ yá̰á̰ kə́ kɔr kum ń rāā yá̰á̰ tə́ ní ngándáńg.

⁸ Ngán Israel gə̄ rāān̄ yá̰á̰ ń Jojue ədadə́ kadə̄ rāān̄ ní. Nin̄ ɔyn̄ mbal̄ gə̄ kutə gidə i jōó kum bā Jurdḛ tə́ kə dɔ gír ɓē gə̄ yā ngán *Israel gēé tītə̄ ń Kɔ́ɔ̄ɓē ədań Jojue ní. Nin̄ ətōn̄ mbal̄ gə̄ ní aw̄nəń, ba aw̄ tə́ndān̄ loo ń dəban̄ tū tə́ ní tə́.

⁹ Jojue adə̄ túdə̄n̄ mbal̄ kə́ rang gə̄ kutə gidə i jōó kə njadə́ dɔɔ́ kum bā Jurdḛ tə́ ō, túdə̄n̄ i loo ń ngé kətō *sandúkə madə̄ naā gə̄ dəba ran̄ tū tə́ ní tə́. Ɓōólaā gə̄gē mbal̄ gə̄ ní ran̄ loo ní tə́ nuū ɓáý.

¹⁰ Ngé tun̄ yá̰a̰ gə̄ n ətōn̄ *sandúkə madə̄ naā ní dəba ran̄ kum bā Jurdḛ tə́ bátə́ adə̄ de gə̄ rāān̄neé yá̰a̰ malang ń Kɔ́ɔ̄ɓē mēr̄ Jojue kədadə́ ní. I beé n Jojue rāań yá̰a̰ malang kə gō ń Moijə ɔjəń ní. Ba de gə̄ gāngə̄n̄ bā i láẃ, ɔrən̄ bā̰ā̰ loon tə́ alé.

¹¹ Dan ń de gə̄ teēn̄ bā Jurdḛ kə̄ gidə kə́rēý tə́ malang oy anī, *ngé tun̄ yá̰a̰ gə̄ mān̄ aw̄ ran̄ kété nodə́ tə́ kə *sandúkə madə̄ naā yā Kɔ́ɔ̄ɓē.

¹² De gə̄ kə́ gír ɓē yā Ruben tə́ ō, yā Gad tə́ ō, núsə de gə̄ kə́ gír ɓē yā Manase tə́ ō, ɔyn̄ yá̰a̰ rɔ̄ɔ̄ yādə́ gə̄ ba mānə̄n̄ kété no ngán *Israel gə̄ tə́ tītə̄ ń Moijə ədańdə́ ní.

¹³ De gə̄ kə́ ndin̄ dɔ rɔ̄də́ tə́ kɔ̄ɔ́ tām̄ yā rɔ̄ɔ̄ tə́ asən̄ dūbú kutə sɔ́ ń nuū, mānə̄n̄ no Kɔ́ɔ̄ɓē tə́ kə yá̰a̰ rɔ̄ɔ̄ gēé ba aw̄n̄ kum kə̄ ndágə loo gə̄ kə́ Jeriko tə́.

¹⁴ Ndɔ̄ ń nuū tə́ Kɔ́ɔ̄ɓē rāā adə̄ Jojue tél de kə́ bo ta kum ngán *Israel gə̄ tə́ malang, adə̄ nin̄ ɓōlə́n̄ ndílən kə dɔ ndɔ̄ ndin kə kumuú gə̄ malang tītə̄ ń ɓóĺneé ndíl Moijə kété ní.

¹⁵ Tā anī Kɔ́ɔ̄ɓē əda Jojue na:

¹⁶ Ə́dá *ngé tun̄ yá̰a̰ gə̄ ətōn̄ *sandúkə madə̄ naā ní ādə̄ teēn̄ kɔ̄ɔ́ bā Jurdḛ tə́.

¹⁷ Anī Jojue əda *ngé tun̄ yá̰a̰ gə̄ kadə̄ teēn̄ kɔ̄ɔ́ kum bā Jurdḛ tə́.

¹⁸ Dan ń *ngé tun̄ yá̰a̰ gə̄ ń ətōn̄ *sandúkə madə̄ naā ní teēn̄ kɔ̄ɔ́ kum bā Jurdḛ tə́ ba əndān̄ njadə́ kə̄ ndágá anī, man̄ bā Jurdḛ tél nūgə́ gogə́ adə̄ taā loo tītə̄ kə́ kété.

¹⁹ Ngán Israel gə̄ teēn̄ bā Jurdḛ i kə ndɔ̄ kə́ nge ko̰ kutə yā nāā kə́ ta kəga dɔ. Aw̄ ndin̄ Gilgal ba rāān̄ gérger yādə́ loo ń nuū tə́. Ré deē ra Jeriko anī, loo ń ndin̄ tū tə́ ní i kə̄ dām̄ kə́ gír ɓē tə́.

²⁰ Mbal̄ gə̄ kə́ kutə gidə i jōó ń ngán *Israel gə̄ ɔyn̄ kum bā Jurdḛ tə́ ní, Jojue adə̄ túdə̄n̄də́ kə nja dɔɔ́ Gilgal.

²¹ Gō tə́ anī ni-əda ngán Israel gə̄ na: Ré ndɔ̄ń tə́ ngáńsí gə̄ a dəjen̄sí najə̄ kə́ dɔ mbal̄ gə̄ ń toō tə́ anī,

²² ɔ́jiīdə́ kadə̄ ngáń Israel gə̄ teēn̄ bā Jurdḛ kə njadə́ loo kə́ tutə tə́.

²³ Tɔdɔ̄ Kɔ́ɔ̄ɓē Nə́ɓā yāsí rāā adə̄ bā Jurdḛ iī kɔ̄ɔ́ adə̄ ī-mānīiń, tītə̄ ń ni rāań adə̄ bā tə̄ɓā gə̄ iīń kɔ̄ɔ́ tām̄ yājí tə́ adə̄ jə-mānəń ní.

²⁴ Ni-rāā beé i yā kadə̄ gír de gə̄ malang kə́ dɔ nang tə́ gerə̄n̄ kadə̄ tɔ́gə́ Kɔ́ɔ̄ɓē i ngá̰ý ō, kadə̄ sḭḭ̄ ī-ɓōliīneé ndíĺ Kɔ́ɔ̄ɓē yāsí kə ndɔ̄ gə̄ ō.