JOJUE 11 - Bible sar

Rɔ̄ɔ̄ kə́ Merom

¹ Dan ń Yabin, mban̄g kə́ Hasor, oō najə̄ tetə rɔ̄ɔ̄ yā Jojue anī, əla kəla rɔ̄ Yobab, mban̄g kə́ Madon tə́ ō, rɔ̄ mban̄g kə́ Simron tə́ ō, rɔ̄ mban̄g kə́ Akesap tə́ ō,

² rɔ̄ mban̄g gə̄ ń ndin̄ gō nang kə́ mbal̄ bo gə̄ i tū tə́ tə́ dām̄ mbɔ́r ɓē kə́ ko̰ó̰ tə́ ní ō, rɔ̄ mban̄g gə̄ ń ndin̄ gō nang kə́ Araba ń deē ra Kinerot anī, i kə̄ dām̄ mbɔ́r ɓē kə́ geleé tə́ ní ō, rɔ̄ mban̄g gə̄ ń ndin̄ gō nang kə́ mbal̄ bo gə̄ gətoón̄ tū tə́ tə́ ní ō, rɔ̄ mban̄g gə̄ ń ndin̄ loo kə́ kḭḭ kə̄ dɔɔ́ tə́ kadə ɓē kə́ Dor tə́, dām̄ kə́ no ɓē tə́ ní ō.

³ Kanaan gə̄ ń ndin̄ i dām̄ kə́ gír ɓē tə́ ō, no ɓē tə́ ō, *Amor gə̄ kə Het gə̄ kə Periji gə̄ kə Yebus gə̄ ndin̄ i dɔ mbalá ō, Hibi gə̄ ndin̄ i nja mbal̄ Hermon tə́ gō nang kə́ Misəpa tə́ ō.

⁴ Adə̄ mban̄g gə̄ teēn̄ kə ɓūtə̄ ngé rɔ̄ɔ̄ yādə́ gēé malang. I kósə de kə́ dum̄ tə́da, tām̄ nin̄ ton̄ tītə̄ kum nán̄g ngárə̄ḿnjēý. Sə́nda yādə́ gə̄ i ngá̰ý ō, púsə́ sə́nda yādə́ i ngá̰ý ō.

⁵ Nin̄-əngen̄ naā malang ba aw̄ ənīn̄ rɔ̄də́ ta kəɓa man̄ gə̄ kə́ Merom tə́ yā rɔ̄ɔń ngán *Israel gə̄.

⁶ Kɔ́ɔ̄ɓē əda Jojue na: Ī-lōō ɓōĺ, tɔdɔ̄ bírí kə kum mbang ń toō, m-ā m̄-tetədə́ rɔ̄ɔ̄ rá tá m-ā m-ə́la nīńdə́ jī Israel gə̄ tə́ ɓáý. Ā ī-gán̄g ngəra nja sə́nda yādə́ gə̄ ō, ā ə́la hor dɔ rúsə́ sə́nda yādə́ gə̄ tə́ ō.

⁷ Jojue nin̄ kə ngé rɔ̄ɔ̄ yān gēé teēn̄ kə madə̄ ba̰ā̰də́ gēé tétə́ ta kəɓa man̄ gə̄ kə́ Merom tə́, ba udən̄ dɔdə́ tə́ rɔ̄ɔ̄n̄də́.

⁸ Kɔ́ɔ̄ɓē əladə́ jī Israel gə̄ tə́ adə̄ Israel gə̄ tetən̄də́ rɔ̄ɔ̄ ba ngɔ̄də̄n̄də́ bátə́ teēn̄ sedə́ Sidon kə́ bo tə́ ō, Misərepot Maim tə́ ō, ngɔ̄də̄ndə́ kum kə̄ gír ɓē tə́ bátə́ teēn̄ sedə́ kum wól loo kə́ Misəpe tə́ ō. Ngán Israel gə̄ tetən̄də́ rɔ̄ɔ̄ ō, tɔ̄lə̄n̄də́ malang kanjə̄ kəya̰ deē kógə̄ḿ kadə̄ ndi kə kumuú ō.

⁹ Jojue rāā yá̰á̰ ń Kɔ́ɔ̄ɓē ədan kadə̄ rāā ní: Ni-gán̄g ngəra nja sə́nda yādə́ gə̄ ō, əla hor dɔ púsə́ sə́nda yādə́ gə̄ tə́ ō.

Jojue taā ɓē kə́ Hasor

¹⁰ Dan ń noō tə́ ní Jojue a tél kə̄ gógə́ anī taā ɓē kə́ Hasor ń kété i ɓē bo kə́ dɔ ɓē ko̰o̰ gə̄ kə́ dām̄ mbɔ́r ɓē kə́ ko̰ó̰ tə́ ní. Ni-tɔ̄l̄ mban̄g kə́ tū tə́ kə kaskaraá ō,

¹¹ adə̄ tɔ̄lə̄n̄ de kə́ kem ɓēé gə̄ malang kə kəyā kaskaraá bāān̄neé dɔdə́ adə̄n̄ Nə́ɓā ō. Tɔ̄lə̄n̄ yá̰a̰ malang kə́ ndi kə kumuú kɔ̄ɔ́ ba əlan̄ hor dɔ ɓē tə́.

¹² Mban̄g gə̄ ń əndān̄ rɔ̄də́ naā tə́ ní Jojue tetədə́ rɔ̄ɔ̄ malang ba táā ɓē yādə́ gə̄. Ni-tɔ̄l̄ mban̄g gə̄ ní ō, de kə́ kem ɓēé gə̄ malang ō, kə kəyā kaskaraá bāań dɔdə́ adə̄ Nə́ɓā tītə̄ ń Moijə nge kəla yā Kɔ́ɔ̄ɓē ədanəń ní.

¹³ Ɓá tā ba ɓē gə̄ ń tə́ndān̄də́ dɔ loo kə́ kḭḭ kə̄ dɔɔ́ gə̄ tə́ ní, Israel gə̄ tə́lan̄ hor dɔ tə́ alé. I ɓē kə́ Hasor ngóy n Jojue əla hor dɔ tə́ ní.

¹⁴ Yá̰a̰ kənge gə̄ kə́ kem ɓē gə̄ ní tə́ ō, yá̰a̰ kul̄ gə̄ kə́ kemeé ō ní, ngán *Israel gə̄ ɔyn̄ tām̄ yādə́ tə́ ba tɔ̄lə̄n̄ de kə́ kemeé gə̄ malang. Nin̄ tɔ̄lə̄n̄ de kə́ kemeé gə̄malang kə kəyā kaskaraá ba əya̰n̄ deē kógə̄ḿ adə̄ ndi kə kumuú alé.

¹⁵ Yá̰á̰ ń Kɔ́ɔ̄ɓē ɔjə nge kəla yān Moijə ní, Moijə ɔjə Jojue kə gō ń Kɔ́ɔ̄ɓē ɔjənəń ní. Jojue rāā yá̰a̰ malang ń Kɔ́ɔ̄ɓē ɔjə Moijə ní kanjə̄ kəya̰ yá̰á̰ kógə̄ḿ kɔ̄ɔ́.

Jojue taā ɓē malang

¹⁶ I beé n Jojue taāń dɔ nang malang ní. Ni-taā gō nang ń mbal̄ bo gə̄ i tū tə́ ní ō, nang kə́ Negeb ō, kə́ Gosen ō, nang ké mbal̄ bo gə̄ gətóon̄ tū tə́ ō, nang kə́ Araba ō, mbal̄ bo kə́ Israel tə́ ō, nang kə́ kadə tə́ kə́ mbal̄ bo gətóo tū tə́ ō.

¹⁷ Əla gír mbal̄ Halak ń ra sɔɔ̄ Seir ní tə́, bátə́ teēn̄ Baal Gad kum wóĺ kə́ Liban tə́ nja mbal̄ Hermon tə́ ní, ni-tetə mban̄g kə́ tū tə́ gə̄ rɔ̄ɔ̄ ba tɔ̄l̄də́ malang.

¹⁸ Jojue rɔ̄ɔ̄ mban̄g gə̄ ní dan i ngá̰ý.

¹⁹ I Hibi gə̄ ń ndin̄ Gabaon ní ngóy n əhɔn̄ madə̄ naā kə ngán *Israel gēé tām̄ yā lɔm tə́ ní. Ba gotə de gə̄ ń noō malang ní, Jojue taā ɓē yādə́ i kə rɔ̄ɔ́.

²⁰ Tɔdɔ̄ Kɔ́ɔ̄ɓē rāā adə̄ kemdə́ ngan̄g ngóróró yā kadə̄ nin̄-dum̄nəń naā ba rɔ̄ɔ̄nneé ngán Israel gə̄, yā kadə̄ ngán Israel gə̄ *bāān̄neé dɔdə́ adə̄n̄ Nə́ɓā kanjə̄ ka̰a̰ kum tó ndoō yādə́ ba tɔ̄l̄nəńdə́ kɔ̄ɔ́ malang tītə̄ ń Kɔ́ɔ̄ɓē nəkɔ́ ədań Moijə ní.

²¹ Dan ngeé ń noō tə́ ní Jojue aw̄ yā rɔ̄ɔ̄ Anak gə̄ ń ndin̄ gō nang kə́ mbal̄á Hebron ō, Debir ō, Anab ō, gō nang kə́ mbalá kə́ *Juda tə́ malang ō, gō nang kə́ mbalá kə́ Israel tə́ malang ō ní. Ni-bāā dɔdə́ naā tə́ kə ɓē yādə́ gə̄ adə̄ Nə́ɓā.

²² Anak gə̄ gətóon̄ malang dɔ nang yā ngán *Israel gə̄ tə́, ba ndin̄ i Gaja ō, Gat ō, Asdod ō ngóy.

²³ Adə̄ Jojue taā dɔ nang malang tītə̄ ń Kɔ́ɔ̄ɓē ədań Moijə ní. Gō tə́ anī ni-adə̄ Israel gə̄ dɔ nang ní kə́ yādə́ tə́. Ni-gán̄g dɔ nang ní adə̄də́ i kə dɔ gír ɓē yādə́ gēé. Loo ń noō tə́ ngán Israel gə̄ ndin̄ lɔm tām̄ rɔ̄ɔ̄ gətóo tā.