JOJUE 10 - Bible sar

Israel gə̄ tetən̄ mban̄g yā Amor gə̄ rɔ̄ɔ̄

¹ Adoni Sedek ń mban̄g kə́ *Jerusalem ní, ōō kadə̄ Jojue taā ɓē kə́ Ai ba bāā dɔ adə̄ Nə́ɓā. Ni-oō kadə̄ yá̰á̰ ń Jojue rāā kə ɓē kə́ Jeriko ō, kə mban̄g kə́ Jeriko ō ní, rāā kə ɓē kə́ ō, kə mban̄g kə́ Ai ō, tá ni oō kadə̄ de kə́ Gabaon gə̄ əhɔn̄ madə̄ naā kə ngán *Israel gēé tām̄ yā lɔm tə́ ō, kadə̄ ndin̄ i dan ngán Israel gə̄ tə́ ō.

² Dan ń de kə́ *Jerusalem gə̄ oōn̄ najə̄ ń nuū ní, ɓōĺ asədə́ nk, tɔdɔ̄ Gabaon i ɓē kə́ bo tītə̄ ɓē ndi mban̄g beé ō, bo tɔȳ ɓē kə́ Ai ō, de kə́ kemeé gə̄ i go̰ rɔ̄ɔ̄ gə̄ malang ō.

³ Anī Adoni Sedek mban̄g kə́ *Jerusalem əla kəla əda Hoham mban̄g kə́ Hebron ō, Piram mban̄g kə́ Yarmut ō, Yapia mban̄g kə́ Lakis ō, Debir mban̄g kə́ Egəlon ō na:

⁴ Ā̰yī kə̄ rɔ̄ḿ tə́, ī-reē ī-rɔ̄ɔ̄ī ɓē kə́ Gabaon seḿ, tɔdɔ̄ de kə́ kemeé gə̄ əhɔn̄ madə̄ naā kə Jojue ō, ngán *Israel gə̄ ō, tām̄ yā lɔm tə́.

⁵ I beé n mban̄g kə́ mí gə̄ yā *Amor gə̄, adə̄ i mban̄g kə́ *Jerusalem ō, kə́ Hebron ō, kə́ Yarmut ō, kə́ Lakis ō, kə́ Egəlon ō, əndān̄neé rɔ̄də́ naā tə́ ba ɔynə̄ń ɓūtə̄ áskar yādə́ gə̄ malang aw̄ utə̄n̄neé ɓē kə́ Gabaon yā rɔ̄ɔ̄n ní.

⁶ De kə́ Gabaon gə̄ əlan̄ kəla ədan̄ Jojue gérger kə́ Gilgal tə́ na: Ī-lōō əya̰ ɓer̄ yāí gə̄ kɔ̄ɔ́, ī-reē láẃ ī-dḭḭ̄jí ba ájə́jí. Tɔdɔ̄ mban̄g yā Amor gə̄ malang ń ndin̄ gō nang kə́ mbalá tə́ ní, ɓoon̄ naā dɔjí tə́.

⁷ Anī Jojue ḭḭ Gilgal, aw̄ kə ngé rɔ̄ɔ̄ yān gēé malang ō, go̰ rɔ̄ɔ̄ yān gēé malang ō.

⁸ Kɔ́ɔ̄ɓē əda Jojue na: Ī-lōō ɓōĺdə́, tām̄ m-ə́ládə́ kem jīí tə́ kɔ̄ɔ́ ɓá. De kə́ yā dumī dandə́ tə́ nuū gətóo.

⁹ Jojue nin̄ kə ngé rɔ̄ɔ̄ gēé ḭḭn̄ Gilgal, njə̄rān̄ ndɔ̄ɔ́ bátə́ loo tīī anī, teēn̄ kə̄ rɔ̄də́ tə́ bus.

¹⁰ Kɔ́ɔ̄ɓē tə̄ndā *Amor gə̄ tḭ̄ḭ̄də́ kɔ̄ɔ́ no ngán *Israel gə̄ tə́, adə̄ ngán *Israel gə̄ tɔ̄lə̄ndə́ ngá̰ý kadə ɓē kə́ Gabaon tə́. Ngán Israel gə̄ ngɔ̄də̄n̄ Amor gə̄ kum kə̄ Bet Horon ń i loo kə́ kḭḭ kə̄ dɔɔ́ tə́ ní, rɔ̄ɔ̄n̄də́ bátə́ ugə̄n̄ sedə́ Ajeka ō, Makeda ō.

¹¹ Dan ń Amor gə̄ ń a̰ȳn̄ naā no ngán Israel gə̄ tə́ ní, ḭḭn̄ Bet Horon ba a risən̄ kə̄ wól loo tə́ anī, Kɔ́ɔ̄ɓē rāā adə̄ kɔ̄sə̄ kə́ bo tītə̄ kūbə̄rū mbal̄ gə̄ tə́sōn̄ dɔdə́ bátə́ Ajeka. Adə̄ de gə̄ ngá̰ý oyn̄. De gə̄ ń kɔ̄sə̄ tɔ̄ldə́ ní, kutədə́ tɔȳ kutə de gə̄ ń ngán Israel gə̄ tɔ̄lə̄n̄də́ kə kaskaraá ní.

¹² Ndɔ̄ ń Kɔ́ɔ̄ɓē əlań Amor gə̄ kem jī ngán Israel gə̄ tə́ ní, Jojue dəje Kɔ́ɔ̄ɓē yá̰á̰ ń toō ta kum ngán Israel gə̄ tə́ malang, ni-əga kɔŕ əda na: Mbang, ī-dəba dɔ ɓē kə́ Gabaon tə́, nāā, ī-dəba dɔ wól loo kə́ Ayalon tə́.

¹³ Anī mbang dəba ō, nāā ra gotə kógə̄ḿ ō, bátə́ adə̄ ngán *Israel gə̄ tetənə̄ń madə̄ ba̰ā̰də́ gə̄ rɔ̄ɔ̄. Tītə̄ ń ndangnə̄ń kem makətūbə̄ yā de kə́ súmūú tə́ ní, mbang dəba ra gotə kógə̄ḿ ɓōdə̄ loo tə́. Ni-lōō gír ngɔ̄də̄ yān kə́ kum kə̄ no ɓē tə́ tə́ bátə́ ndɔ̄ kógə̄ḿ kə taá.

¹⁴ Kété no ndɔ̄ ń nuū tə́, aké gō ndɔ̄ ń nuū tə́ ní, ndɔ̄ kə́ rang kə́ tītə̄ ndɔ̄ ń nuū gətóo. I ndɔ̄ ń nuū tə́ ngóy n Kɔ́ɔ̄ɓē raań yá̰a̰ kə gō ń deē ndul dəjenəń ní. Tɔdɔ̄ i Kɔ́ɔ̄ɓē nəkɔ́ n rɔ̄ɔ̄ tām̄ yā ngán Israel gə̄ tə́ ní.

¹⁵ Gō tə́ anī Jojue ō, ngán Israel gə̄ malang ō, tél reēn̄ gogə́ gérger kə́ Gilgal tə́.

Jojue tɔ̄l̄ mban̄g kə́ mí gə̄

¹⁶ Mban̄g kə́ mí gə̄ ní a̰ȳ aw̄ ɓɔ̄ɔ̄n̄ rɔ̄də́ bəlo mbal̄ kə́ Makeda tə́.

¹⁷ De gə̄ teēn̄ dɔdə́ tə́ ba reē ədan̄ Jojue.

¹⁸ Anī Jojue əda na: Ī-ndūbūrū mbal̄ kə́ bo gə̄ ī-tə́ndāī ta bəlo mbal̄ ní tə́, ba ə̄ndāī ngé ngɔ̄m̄ loo gə̄ ta tə́.

¹⁹ Ba sḭḭ̄ ī-dəbaī alé, ī-ngɔ̄dī madə̄ ba̰ā̰sí gə̄, āw̄ ī-gāngī tadə́, ī-lōōī kəya̰də́ kadə̄ tél tudən̄ gogə́ kə̄ kem ɓē yādə́ gə̄ tə́, tɔdɔ̄ Kɔ́ɔ̄ɓē Nə́ɓā yāsí əladə́ kem jīsí tə́ kɔ̄ɔ́ ɓá.

²⁰ Jojue kə ngán *Israel gēé tetən̄ *Amor gə̄ rɔ̄ɔ̄ tetə kə́ to ɓōĺ ngá̰ý. Nin̄ nujən̄ sedə́ sák sák kɔ̄ɔ́. Ngé kə́rēý gə̄ ń teēn̄ ta yo tə́ ní, a̰ȳ udən̄ kem ɓē yādə́ gə̄ kə́ ndogə̄ mbal̄ kə́ ngan̄g gə̄ gīrə̄n̄ gidə tə́.

²¹ Gō tə́ anī ngán Israel gə̄ tél reēn malang rɔ̄ Jojue tə́ gérger kə́ Makeda tə́ kanjə̄ kadə̄ yá̰a̰ rāā deē kógə̄ḿ. Deē ɓār̄ rī ngán Israel gə̄ kə́ majaĺ to̰ alé.

²² Gō tə́ anī Jojue mēr̄ teē ta bəlo mbal̄ ń mban̄g yā Amor kə́ mí gə̄ ton̄ kemeé, ba kadə̄ teēn̄ sedə́ ndága reēn̄ sedə́ rɔ̄n tə́.

²³ De gə̄ rāān̄ yá̰á̰ ń ni-əda ní, adə̄ tēn̄ kə mban̄g kə́ *Jerusalem ō, kə Hebron ō, kə Yarmut ō, kə́ Lakis ō, kə́ Egəlon ō, reēn̄ sedə́ rɔ̄n tə́.

²⁴ Dan ń teēn̄ kə mban̄g kə́ mí ní reēn̄ sedə́ rɔ̄ Jojue tə́ oy anī, Jojue ɓāŕ de kə́ dəngam gə̄ malang ké Israel tə́ ba əda ngol ngé rɔ̄ɔ̄ gə̄ ń aw̄n̄ seneé rɔ̄ tə́ ní na: Ī-reē ī-tə́ndāī njasí míndə mban̄ gə̄ ń toō tə́. Ngol ngé rɔ̄ɔ̄ gə̄ ní reē tə́ndān̄ njadə́ míndə mban̄g gə̄ ní tə́.

²⁵ Anī Jojue ədadə́ na: Ī-lōō ɓōĺ ō, ī-lōōī kadə̄ kemsí gān̄g man̄ ō, əhɔī tɔgə ō, ī-raī dəngam ō, tɔdɔ̄ madə̄ ba̰ā̰sí gə̄ malang ń ā ī-rɔ̄ɔ̄īdə́ ní, Kɔ́ɔ̄ɓē a rāādə́ i tītə̄ ń nuū.

²⁶ Gō tə́ anī Jojue adə̄ tɔ̄lə̄n̄ mban̄g gə̄ ní, ba do̰ō̰n̄də́ dɔɔ́ ta jī kāgə̄ gə̄ tə́ gír loo mí. Nīńdə́ ra tū kāgə̄ gə̄ ní tə́ bátə́ loo sɔlí.

²⁷ Dan ń mbang a rāā yā kudə anī, Jojue mēr̄ kɔr̄də́ kɔ̄ɔ́ ba adə̄ ɓōkə́n̄də́ bəlo mbal̄ ń ɓɔ̄ɔ̄n̄ rɔ̄də́ tū tə́ ní tə́. Gō tə́ anī adə̄ utə̄n̄ ta bəlo mbal̄ ni kə mbal̄ kə́ bo gēé. Mbal̄ gə̄ ní ton̄ nuú bátə́ ɓōólaā.

Jojue taā ɓē gə̄ kə́ Kanaan kə́ dām̄ mbɔ́r ɓē kə́ geleé tə́

²⁸ Ndɔ̄ nəkɔ́ ń nuū tə́ Jojue taā ɓē kə́ Makeda. Ni-tɔ̄l̄ mban̄g kə́ Makeda ō, de kə́ kem ɓē gə̄ malang ō, kə kəyā kaskaraá bāań dɔdə́ adə̄ Nə́ɓā. Ni-əya̰ deē kógə̄ḿ adə̄ ndi kə kumuú alé. Yá̰á̰ ń rāā kə mban̄g kə́ Makeda ní i tītə̄ yá̰á̰ ń rāā kə mban̄g kə́ Jeriko ní.

²⁹ Jojue nin̄ kə ngán *Israel gēé malang ḭḭn̄ Makeda aw̄n̄ Libəna, aw̄ ənīn̄ ɓē kə́ Libəna rɔ̄ɔ̄.

³⁰ Kɔ́ɔ̄ɓē əla ɓē kə́ Libəna kə mban̄g kə́ tū tə́ kem jīdə́ ɓáý to̰. Ngán Israel gə̄ tɔ̄lə̄n̄ de kə́ kem ɓēé gə̄ malang kə kəyā kaskaraá əya̰n̄ deē kógə̄ḿ adə̄ ndi kə kumuú alé. Yá̰á̰ ń rāān̄ kə mban̄g kə́ Libəna ní i tītə̄ yá̰á̰ ń rāān̄ kə mban̄g kə́ Jeriko ní.

³¹ Jojue nin̄ kə ngán *Israel gēé malang ḭḭn̄ Libəna aw̄n̄ Lakis, aw̄ utə̄n̄ ɓē kə́ Lakis ba ənīnən̄ rɔ̄ɔ̄.

³² Kɔ́ɔ̄ɓē əla ɓē kə́ Lakis kem jī ngán Israel gə̄ tə́, adə̄ ngán Israel gə̄ taān̄ ɓē kə́ Lakis kə ndɔ̄ rɔ̄ɔ̄ kə́ nge ko̰ jōó. Nin̄ tɔ̄lə̄n̄ de kə́ kem ɓēé gə̄ malang kə kəyā kaskaraá tītə̄ ń tɔ̄lneé de kə́ Libəna gə̄ ní.

³³ Horam, mban̄g kə́ Gejer aw̄ dḭḭ̄ ɓē kə́ Lakis tə́, banī Jojue tɔ̄l̄də́ malang kə de gə̄ yān gēé kanjə̄ kadə̄ deē kógə̄ḿ teē.

³⁴ Jojue nin̄ kə ngán *Israel gēé malang ḭḭn̄ Lakis aw̄n̄ Egəlon, aw̄ utə̄n̄ ɓē kə́ Egəlon ba ənīnən̄ rɔ̄ɔ̄.

³⁵ Nin̄ taān̄ ɓē kə́ Egəlon ndɔ̄ nəkɔ́ ń nuū tə́, ba tɔ̄lə̄n̄ de kə́ kemeé gə̄ malang kə kəyā kaskaraá bāān̄neé dɔdə́ adə̄n̄ Nə́ɓā, tītə̄ ń rāānəń kə ɓē kə́ Lakis ní.

³⁶ Jojue nin̄ kə ngán Israel gēé malang ḭḭn̄ Egəlon aw̄n̄ Hebron, aw̄ ənīn̄ ɓē kə́ Hebron rɔ̄ɔ̄.

³⁷ Nin̄ taān ɓē kə́ Hebron ba tɔ̄lə̄n̄ mban̄g kə́ kemeé ō, tɔ̄lə̄n̄ de kə́ kem ɓē gə̄ kə kəyā kaskaraá malang ō, taān̄ ngán ɓē gə̄ ń ndin̄ kadə ɓē kə́ Hebron tə́ ní ō, tɔ̄lə̄n̄ de kə́ kemeé gə̄ malang ō. Jojue bāā dɔ ɓē kə́ Hebron adə̄ Nə́ɓā tītə̄ ń bāań dɔ ɓē kə́ Egəlon ní. Ni-tɔ̄l̄ de kə́ kemeé gə̄ malang, ba əya̰ deē kógə̄ḿ adə̄ ndi kə kumuú alé.

³⁸ Gō tə́ anī Jojue nin̄ kə ngán *Israel gēé malang tél tūrə̄n̄ rɔ̄də́ aw̄n̄ Debir aw̄ ənīn̄ ɓē kə́ Debir rɔ̄ɔ̄.

³⁹ Nin̄ taān̄ ɓē kə́ Debir ō, tɔ̄lə̄n̄ mban̄g kə́ tū tə́ ō, taān̄ ɓē gə̄ ń ndin̄ kadə tə́ ní ō. Nin̄ tɔ̄lə̄n̄ de ké kem ɓēé gə̄ malang kə kəyā kaskaraá bāān̄neé dɔdə́ adə̄n̄ Nə́ɓā, əya̰n̄ deē kógə̄ḿ adə̄ ndi kə kumuú alé. Yá̰á̰ ń Jojue rāā kə ɓē kə́ Debir ō, kə mban̄g kə́ Debir ō ní, i tītə̄ yá̰á̰ ń ni-rāā kə ɓē kə́ Hebron ō, kə ɓē kə́ Libəna ō, kə mban̄g kə́ tū tə́ ō ní.

⁴⁰ Jojue taā ɓē malang. Mban̄g gə̄ ń ndin̄ gō nang kə́ mbal̄ bo gə̄ i tū tə́ tə́ ní ō, gō nang kə́ Negeb tə́ ní ō, gō nang kə́ mbal̄ bo gə̄ gətóon̄ tū tə́ ní ō, gō nang kə kḭḭ kə̄ dɔɔ́ tə́ ní, ni tetədə́ rɔ̄ɔ̄. Ni-əya̰ deē kógə̄ḿ alé. Ni-bāā dɔ yá̰a̰ malang ń ndi kə kumuú ní, tām̄ yā Nə́ɓā tə́. Ni-rāā i tītə̄ ń Kɔ́ɔ̄ɓē Nə́ɓā yā Israel ədań ní.

⁴¹ Dɔ nang ń Jojue taā ní ḭḭ Kades Barnea ō, Gaja ō, bátə́ ugə̄ń Gosen ō, Gabaon ō.

⁴² Jojue tetə mban̄g gə̄ ń nuū rɔ̄ɔ̄ gidə kógə̄ḿ ō, taā dɔ nang yādə́ ō, tɔdɔ̄ Kɔ́ɔ̄ɓē Nə́ɓā yā Israel n rɔ̄ɔ̄ tām̄ yā Israel tə́ ní.

⁴³ Gō tə́ anī, Jojue nin̄ kə ngán *Israel gēé télən̄ malang aw̄n̄ gogə́ gérger kə́ Gilgal tə́.