JOJUE 1 - Bible sar

¹ Dan ń Moijə ń nge kəla yā Kɔ́ɔ̄ɓē ní oy anī Kɔ́ɔ̄ɓē əda Jojue ngōn̄ Nun ń i nge kílən ní na:

² Nge kəla yāḿ Moijə oy kɔ̄ɔ́, adə̄ ngɔlaā ní i ḭ̄ n ə̄ndā dɔ rɔ̄í danaá yā teē bā Jurdḛ kə ngán *Israel gēé yā kaw̄ sedə́ dɔ nang ń m-ādə̄də́ tə́ ní.

³ Loo malang ń ā ə̄ndāī da njasí tū tə́ ní, m-ādə̄sí tītə̄ ń m-ə́dań Moijə ní.

⁴ Dɔ nang yāsí a əla gír i dəla loo tə́ bátə́ mbal̄ gə̄ kə́ Liban tə́ ō, a əla gír i bā kə́ bo ń rīn na i Opəratə ní tə́ yā teēń gō nang yā ngán Het gə̄ tə́ bátə́ bā bo kə́ dām̄ kə́ no ɓē tə́ tə́ ō.

⁵ De kə́ asə ra ta kumií tə́ yā dumī a gətóó bátə́ kadə̄ óyń. Tɔdɔ̄ mā i naā tə́ seí tītə̄ ń mā i naā tə́ kə Moijə kété ní. M-ā m-ə́ya̰ī kɔ̄ɔ́ aĺ ō, m-ā m̄-lo dḭḭ̄ aĺ ō.

⁶ ə́hɔ rɔ̄í tɔgə ō, ī-ra dəngam ō. Tɔdɔ̄ i ḭ̄-n ā ādə̄ gír de gə̄ ń toō dɔ nang ń m-ə̄nī ndūḿ m-ādə̄ kaadə́ gə̄ yā kadə̄də́ ní.

⁷ Yá̰á̰ ń kadə̄ ī-rāā ní i kadə̄ ə́hɔ rɔ̄í tɔgə ō, ī-ra dəngam ō, ī-ngɔ̄m̄ *ndū najə̄ malang ń nge kəla yāḿ Moijə adī ní ō ngóy. Ī-tɔ̄ɔ̄ geleé aĺ ō, ko̰ó̰ aĺ ō. I beé n yá̰a̰ malang ń ā ī-rāā ní a majəń ní.

⁸ Yá̰á̰ ndóō gə̄ ń ton̄ kem makətūbə̄ *ndū najə̄ ń toō tə́ ní, ādə̄ i sa̰y rɔ̄í tə́ aĺ ō, ī-toń taí tə́ ndɔ̄ɔ́ ō, kadaá ō, kadə̄ ī-rāań yá̰a̰ malang ń i kə́ ndang kemeé ní. Loo ń noō tə́ yá̰a̰ gə̄ ń ā ī-rāā ní a majən̄ ō, a teēn̄ yá̰a̰ ō.

⁹ Najə̄ ń m-ə́daī ní ādə̄ dɔí ndígə̄nal alé: M-ə́daī na kə ə́hɔ rɔ̄í tɔgə ō, ī-ra dəngam dɔ rɔ̄í tə́ ō. Ī-lōō ndebə ō, ī-lōō kadə̄ kemií gān̄g man̄ ō. Tɔdɔ̄ loo malang ń āw̄ tū tə́ ní, Kɔ́ɔ̄ɓē yāí i naā tə́ seí.

Jojue əndā dɔ rɔ̄n danaá yā teē bā Jurdḛ

¹⁰ Jojue mēr̄ ngé gə̄ ń i ngé ndóō ngán *Israel gə̄ *ndū najə̄ ní kadə̄

¹¹ njə̄rān̄ kem gérgereé ədan̄ de gə̄ kadə̄ rāān̄ sádə̄ gə̄, tɔdɔ̄ na̰y na i ndɔ̄ mətá kadə̄ na a teēn̄ bā Jurdḛ yā kaw̄ taā dɔ nang ń Kɔ́ɔ̄ɓē Nə́ɓā yādə́ adə̄də́ ní.

¹² Gō tə́ anī Jojue əda de gə̄ kə́ gír ɓē yā Ruben tə́ ō, Gad tə́ ō, núsə de kə́ gír ɓē yā Manase tə́ gə̄ ō na:

¹³ Ādə̄ əga kemsí dɔ yá̰á̰ ń Moijə nge kəla yā Kɔ́ɔ̄ɓē ədasí kadə̄ ī-rāāī tə́ ní. Ni-ədasí na Kɔ́ɔ̄ɓē Nə́ɓā yādə́ na adə̄sí loo kə́ yā kadə̄ ī-ndiīneé lɔm. Na a adə̄sí dɔ nang ń toō.

¹⁴ Na nə̄yá̰sí gə̄ ō, ngáńsí kə́ dūú gə̄ ō, yá̰a̰ kul̄ yāsí gə̄ ō, na a na̰yn̄ gogə́ dɔ nang ń na n-ádə̄sí gidə bā Jurdḛ kə́ dām̄ kə́ laā tə́ ní. Banī sḭḭ̄ go̰ rɔ̄ɔ̄ gə̄ malang na ā ī-mānī kété no ngákó̰ó̰sí gə̄ tə́ teē bā Jurdḛ kə yá̰a̰ rɔ̄ɔ̄ yāsí gēé jīsí tə́ yā rāań sedə́

¹⁵ bátə́ kadə̄ Kɔ́ɔ̄ɓē adə̄ńdə́ loo kə́ yā kadə̄ ndin̄neé tū tə́ lɔm tītə̄ yāsí ō, kadə̄ əngen̄neé dɔ nang ń Kɔ́ɔ̄ɓē Nə́ɓā yāsí adə̄də́ ní ō, pá tá ā ī-téliī kə̄ gogə́ dɔ nang ń ni Moijə nge kəla yā Kɔ́ɔ̄ɓē n-adə̄sí gidə bā Jurdḛ kə́ laā tə́ dām̄ kə́ gír ɓē tə́ ní.

¹⁶ Nin̄ tél ədan̄ Jojue na: Yá̰a̰ malang ń ə́dájí kadə̄ jə-rāā ní, j-a jə-rāā ō, loo malang ń ə́lájí tū tə́ ní j-a j-aw̄ ō.

¹⁷ J-a j-oō taí tītə̄ ń j-oōń ta Moijə tū yá̰a̰ gə̄ té malang ní. Rɔ̄kum, Kɔ́ɔ̄ɓē Nə́ɓā yāí a ndi seí tītə̄ ń ni ndiń kə̄ Moijə kété ní.

¹⁸ Deē ń a mbātə́ koō taí ō, a mbātə́ rāā yá̰a̰ malang ń ə́dájí kadə̄ j-rāā ō ní, a tɔ̄lnən̄ kɔ̄ɔ́. Yāí i yā kadə̄ ə́hɔ rɔ̄í tɔgə ō, ī-ra dəngam ō ngóy.