JOEL 3 - Bible sar

Kɔ́ɔ̄ɓē adə̄ de gə̄ malang Ndílən

¹ Gō tə́ anī, m-ā m-ādə̄ Ndílə́ḿ risə dɔ de gə̄ tə́ malang. Ngáńsí kə́ dəngam gə̄ ō, ngáńsí kə́ dəyá̰ gə̄ ō, a ədan̄ najə̄ kə́ Nə́ɓā əndā tadə́ tə́ ō, nī a rāā de kə́ tɔgə ɓə́ga yāsí gə̄, ngósaa yāsí gə̄ a a̰a̰n̄ yá̰a̰.

² Kem ndɔ̄ gə̄ ngeé ń noō tə́ ní, m-ā m̄-rāā kadə̄ Ndílə́ḿ risə dɔ ngé kəla kə́ dəngam gə̄ tə́ ō, dɔ ngé kəla kə́ dəyá̰ gə̄ tə́ ō.

³ M-ā m̄-rāā kadə̄ yá̰á̰ kə́ to kɔr kum gə̄ ton̄ dɔ rā̰ tə́ ō, dɔ nang tə́ ō, Mósə a to ō, hor a to ō, sa hor kə́ ra kə ngālāá ɓururu gə̄ a ton̄ ō.

⁴ Mbang a tél loo kə́ risə til nding ō, nāā a tél mósə ō, pá tá kadə̄ ndɔ̄ yā Kɔ́ɔ̄ɓē ń i ndɔ̄ kə́ bo ngá̰ý ō, to ɓōĺ ngá̰ý ō ní ugə̄ ɓáý.

⁵ Loo ń noō tə́, de gə̄ malang ń a ɓārə́n̄ rī Kɔ́ɔ̄ɓē ní, a ajən̄. Tɔdɔ̄ tītə̄ ń Kɔ́ɔ̄ɓē ədań ní, de gə̄ a teēn̄ *Jerusalem ō, dɔ mbal̄ kə́ *Siyo̰ tə́ ō, nin̄ a ajən̄. Nin̄ i dɔ dán ngé gə̄ ń teēn̄ ta yo tə́ ní, dɔ dáń ngé gə̄ ń Kɔ́ɔ̄ɓē ɓāŕdə́ tə́ ní.