JEREMI 8 - Bible sar

¹ Kem ndɔ̄ gə̄ ń noō tə́ ní de gə̄ a tēgə́n̄ kə̄ngā mban̄g gə̄ ō, kə̄ngā de kə́ bo gə̄ ō, *ngé tun̄ yá̰a̰ gə̄ ō, *ngé koō ta gə̄ ō, kə̄ngā de kə́ Jerusalem gə̄ ō bəloó kə̄ ndágá.

² A ɓōkə́n̄də́ kum mbang tə́ ō, nāā ndaá ō, ta kum kɔýyo̰ gə̄ tə́ ō. I yá̰a̰ gə̄ ń nin̄ tárən̄də́ ō, rāān̄ kəla adə̄n̄də́ ō, unən̄ gōdə́ ō, aw̄n̄ koō tadə́ tə́ ō, əsōn̄ kə̄ nang tə́ nodə́ tə́ rɔȳn̄də́ ō ní. De gə̄ a kánə̄n̄ kə̄ngā gə̄ ń toō yā dubə̄ alé, a télən̄ i yedə̄ yá̰a̰ dɔ nang tə́.

³ Gotə de gə̄ malang kə́ gír kaa kə́ majaĺ ń toō tə́, adə̄ i ngé gə̄ ń teēn̄ ta yo tə́ loo malang ń m̄-tə̄ndā m̄-tḭ̄ḭ̄də́ tū tə́ ní, a ndə̄ngān̄ i koy ba i ndi kə kumuú alé. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní ń noó.

Háĺ kə́ deē ger̄ loon alé

⁴ Ā ə́dádə́ na: Najə̄ ń Kɔ́ɔ̄ɓē əda ní n toó: Deē əsō nang tə́ kanjə̄ kḭḭ dɔɔ́ a? Deē tūr̄ gidən ta madə̄n tə́ kanjə̄ tél tūr̄ kumən kə̄ rɔ̄n tə́ a?

⁵ Jerusalem, i tām̄ rí tə́ á gír de gə̄ ń toō tūrə̄n̄ gidədə́ kɔ̄ɔ́ taḿ tə́ ō, túyn̄ taā kem yādə́ kə̄ nodə́ tə́ kanjə̄ kadə̄ asədə́ ō ní? Nin̄ gólə̄n̄ rɔ̄də́ kə̄ nodə́ tə́ ba mbātə́n̄ tél dɔ njadə́ tə́.

⁶ m̄-nēl̄ mbīḿ majə m-ōoń ndūdə́, najə̄ kɔr̄də́ əhɔ naā alé. De kógə̄ḿ kə́ əya̰ gō kem ndul yān, aláa kə́ əda na: I rí n m̄-rāā toó ní gətóo. Nin̄ malang tél unən̄ ta ngɔ̄də̄ yādə́, tītə̄ sə́ndá kə́ a ngɔ̄də̄ ta rɔ̄ɔ̄ tə́ beé.

⁷ Kóndə́la ń a nēl̄ dɔɔ́ ní gə̄gē, ger̄ kum mbang kə́ yā ndɔ́təń ɓē. Tá dér ndaa ō, gabə kɔsə ō, dāngā ō, mānə̄n̄ dɔ kum mbang kə́ yā téləń kə̄ ɓēé tə́ alé. Ba gír deē yāḿ gə̄ tá usədə́ dɔ *ndū najə̄ ń Kɔ́ɔ̄ɓē adə̄də́ ní tə́ alé.

Ngé kum kedə̄ kə́ rɔ̄kum aĺ gə̄

⁸ I ba̰ý á sḭḭ̄ ə́daī na: Sḭḭ̄ na i ngé kum kedə̄ gə̄, tɔdɔ̄ *ndū najə̄ yā Kɔ́ɔ̄ɓē na to na i tām̄ yāsí tə́ ní? Majə tā ba yá̰a̰ ndang makətūbə̄ yā ngé sór̄ gə̄ rāā adə̄ tél i *ndū najə̄ kə́ rɔ̄kum aĺ kɔ̄ɔ́

⁹ Rɔ̄ ngé kum kedə̄ gə̄ sɔl̄də́, gerə̄n̄ yá̰á̰ kə́ yā rāā alé, əsōn̄ kum gūmbə̄ tə́. Dan ń nin̄ kídə̄n̄ najə̄ yā Kɔ́ɔ̄ɓē ní, yá̰a̰ ger̄ yādə́ kə́ ngá̰ý i rí?

Ngé gə̄ ń ɔjən̄ kadə̄ yá̰a̰ malang a njə̄rā majə ní

¹⁰ Tām̄ ń toō tə́ ní, m-ādə̄ nə̄yá̰də́ gə̄ de kə́ rang gə̄ ō, m-ādə̄ ndɔr̄ yādə́ gə̄ ngé gə̄ ń a taān̄ jīdə́ tə́ kɔ̄ɔ́ ní ō. Tɔdɔ̄ de kə́ yá̰a̰ aĺ gə̄ ō, de kə́ bo gə̄ ō malang naā tə́ i ngé rāā ta nar gə̄. Háĺ *ngé koō ta gə̄ ō, *ngé tun̄ yá̰a̰ gə̄ ō i háĺ kə́ rɔ̄kum alé.

¹¹ Nin̄ tebəlen̄ ngá̰ý loo kəda gír deē yāḿ gə̄ ń nujən̄ sák sák tə́ ní na: Loo to majə, loo to majə. Banī yá̰a̰ kógə̄ḿ sḛ́ý kə́ to majə gətóo.

¹² Majə kadə̄ rɔ̄də́ sɔl̄də́ tɔdɔ̄ rāān̄ yá̰á̰ kə́ majaĺ ngá̰ý gə̄, ba mbātə́n̄ ger̄ yá̰á̰ kə́ to rɔ̄ sɔl̄ gə̄ ń rāān̄ ní. Gerə̄n̄ gō yá̰á̰ kə́ to rɔ̄sɔl̄ gə̄ ń rāān̄ ní kem ángaldə́ tə́ alé. I tām̄ ń toō tə́ a bḭ́ḭ̄n̄ dan ń m-ā m-ə́ndádə́ ní ō, a tə́sōn̄ tītə̄ yā gotə de gə̄ ō ní. Najə̄ ń Kɔ́ɔ̄ɓē əda ní n noó.

Jī Kɔ́ɔ̄ɓē ō gír deē yān gə̄ ō ur̄ wak (Kɔ́ɔ̄ɓē əda na)

¹³ m̄-gḛy kadə̄ gír yādə́ gān̄g kɔ̄ɔ́. Kan̄ *kāgə̄ nduú gətóo dɔ kāgən tə́ ō. Kan̄ kótə̄ gətóo dɔ kāgə̄ tə́ ō. Mbī kāgə̄ gə̄ ndəlē ō. M-ə́yá̰də́ kem jī ngé mān̄ róbə gə̄ tə́.

(De gə̄ ədan̄ na)

¹⁴ I tām̄ rí tə́ á jə-ndiī kanjə̄ kɔdə rɔ̄jí ní? Ɔ́siī dɔsí naā tə́. J-udiī kem loo ndi kə́ ngan̄g gə̄ tə́, ba j-awī loo alé. Tɔdɔ̄ Kɔ́ɔ̄ɓē Nə́ɓā yājí ɔgə̄jí ndɔ́tə̄ loo. Ni-adə̄jí man̄ kə́ yḛl kum adə̄ j-a̰ȳī. Kə́ rɔ̄kum tə́ ní, jə-rāāī majaĺ kə Kɔ́ɔ̄ɓēé.

¹⁵ Jə-ngóōī kadə̄ rɔ̄jí ngan̄g, ba yá̰á̰ kə́ to ngáā gətóo. Jə-ngóōī kum mbang kə́ kadə̄ rɔ̄jí ngangə̄ń, ba i ɓōĺ n rāājí ní.

¹⁶ Kōō sə́nda yān gə̄ ɓār̄ kə̄ Dan nú. Dɔ nang kə taá malang ndebə dan ń oō kōō nōō sə́nda yān gə̄ ní. Nin̄ reē nujən̄ kə dɔ nangaá ō, kə yá̰á̰ kə́ kemeé gēé ō, kə ɓēé ō, kə de kə́ kemeé gēé ō.

(Kɔ́ɔ̄ɓē əda na)

¹⁷ m̄-ɓōkə́ lī kakə́m gə̄ ō, lī kə́ rang gə̄ ō dɔsí tə́. Ā ī-gólīdə́ sétə́. Nin̄ a tṵ́ṵ̄n̄sí.

Jeremi nōō rɔ̄n (Jeremi)

¹⁸ Yá̰á̰ kə́ asə kɔr̄ wur kɔl yāḿ gətóo. Rɔ̄ḿ kə taá malang oy yélélé.

¹⁹ De kə́ dɔ nang kə́ sa̰y ngá̰ý tə́ gə̄ oōn̄ kɔŕ nōō rɔ̄ yā gír deē yāḿ gə̄. Kɔ́ɔ̄ɓē gətóo *Siyo̰ a? Mban̄g yān gətóo looneé a? I tām̄ rí tə́ á adə̄mə̄n̄ wōn̄g kə ɓesə̄ yādə́ gə̄ ń i yá̰á̰ kə́ kanjə̄ kumən gə̄ kə́ kḭḭ loo kə́ rang tə́ ní?

(Kɔ́ɔ̄ɓē əda na) (Jeremi əda na)

²⁰ Gír sāā kōō gān̄g kɔ̄ɔ́ ō, gír ngā nəngā gān̄g kɔ̄ɔ́ ō, banī j-ənga kajə aĺ ɓáý.

²¹ m̄-tétə̄ rárák tɔdɔ̄ gír deē yāḿ gə̄ nujən̄ sák sák. m̄-ndi i kum loo kə́ ndul ndí ndí tə́. Mā i dan yá̰á̰ kə́ to kum ko̰ tə́.

²² Bəto kə kāgə̄ kə́ yā rāā ta do tə́ gətóo Galaad i mbée a? Nge rāā de gə̄ mo̰y gətóo noó a? I tām̄ rí tə́ á rɔ̄ gír deē yāḿ gə̄ əsō naā tə́ aĺ ní?

²³ I náā n a asə rāā dɔḿ kadə̄ téĺ gár̄ man̄ ō, kumḿ kadə̄ tél ta kəɓa man̄ kum deē ō. Kadə̄ m̄-nōoń yo gír deē yāḿ gə̄ kadaá ō, ndɔ̄ɔ́ ō ní?