JEREMI 48 - Bible sar

Moab

¹ Najə̄ kə́ dɔ ɓē kə́ Moab tə́. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, əda ní n toó: Yá̰á̰ kə́ to kum kaȳ aĺ əsō dɔ ɓē kə́ Nebo tə́, nujən̄ seneé sák sák kɔ̄ɔ́. Taān̄ ɓē kə́ Kiryataim adə̄ rɔ̄n sɔlə̄n. Ɓē kə́ ngan̄g ngá̰ý ń toō əsō adə̄ rɔ̄n sɔlə̄n.

² Gír rī ɓār̄ yā Moab gān̄g kɔ̄ɔ́. De gə̄ ndin̄ Hesəbon ba oōn̄ naā yā nujə seneé. J-aw̄ jə-tɔ̄lī gír nápar de gə̄ ń toō kɔ̄ɔ́. Ḭ̄ Madəmen, gír yāí gān̄g kɔ̄ɔ́, tɔdɔ̄ kaskar ngɔ̄də̄ gōí.

³ De gə̄ əgan̄ kɔŕ Horonaim ɓārə́n̄neé ngé dḭḭ̄də́ gə̄. Loo nujə sák sák ō, yá̰a̰ i kə́ tɔ̄ɔ̄ nang tə́ malang ō.

⁴ Moab ənda nang kɔ̄ɔ́, ngánən gə̄ əgan̄ kɔŕ adə̄ ɓār̄ ngá̰ý.

⁵ De gə̄ alə̄n̄ kə̄ dɔ loo kə́ kḭḭ kə̄ dɔɔ́ kə́ Luhit tə́ i kə noó tadə́ tə́. De gə̄ risən̄ kə̄ nang tə́ loo kə́ risə kə̄ nang tə́ kə́ Horonaim tə́ anī, ōōn̄ kōō de gə̄ ń loo nujə dɔdə́ tə́ sák sák á a ɓārə̄n̄ ɓār̄ ní.

⁶ Āyī naā, ādə̄ náā nəkɔ́ anī njan adə̄n! Sḭḭ̄ ī-tél ī-toī tītə̄ ɓē kə́ Aroer ń ra i kum dəla loo tə́ ní.

⁷ Moab, ḭ̄ ə̄ndā kemií i dɔ kəhɔ rɔ̄ tɔgə yāí tə́ ō, dɔ yá̰a̰ kənge yāí kə́ to loo ɓɔ̄ɔ̄ tə́ tə́ ō. Banī taāīn̄ gidə yādə́ tə́ kɔ̄ɔ́. Unən̄ nə́ɓā Kemos yāí dɔ gúú tə́ aw̄n̄ seneé dɔ ɓē kə́ rang tə́, naā tə́ kə *ngé tun̄ yá̰a̰ yāí gə̄ ō, ngār yāí gə̄ ō.

⁸ Nge nujə loo taā ɓē gə̄ malang, kógə̄ḿ kə́ teē jīn tə́ gətóo. Yá̰a̰ malang kə́ wól loo tə́ gətóo kɔ̄ɔ́, ndágə loo kə́ kḭḭ kə̄ dɔɔ́ nujə sák sák kɔ̄ɔ́. I yá̰á̰ ń noō n Kɔ́ɔ̄ɓē əda najə̄n kété ní, ni-əda na:

⁹ Údiī yá̰á̰ kógə̄ḿ kə́ kadə̄ əgań kem de gə̄ dɔ ɓē kə́ Moab kə́ nujə sák sák kɔ̄ɔ́ tə́. Ɓē yān gə̄ télən̄ loo kə́ to kum ko̰ gə̄. De kə́ kemeé gə̄ gətóon̄ malang kɔ̄ɔ́.

¹⁰ Ndɔ̄ĺ i dɔ deē ń rāā kəla yā Kɔ́ɔ̄ɓē kə yayaá ní tə́. Ndɔ̄ĺ i dɔ deē ń ɔgə̄ kaskar yān ɓōkə́ mósə́ nang tə́ ní tə́.

¹¹ Moab ndi kanjə̄ sōl̄ yá̰á̰ kógə̄ḿ i kə ngōn̄ dūúneé beē. Ni to i tītə̄ kasə kə́ ɗīgə̄ beé, tɔdɔ̄ tūrə̄n̄ gírən kem káĺ kə́ rang tə́ nja kógə̄ḿ alé. Kumən na əhɔ aw̄n̄ seneé dɔ nang kə́ rang tə́ nja kógə̄ḿ aĺ ɓáý, adə̄ nelə̄n ō, kotən ō, ton̄ gotoó.

¹² Tā anī kem ndɔ̄ gə̄ ń a reēn̄ noó tə́ ní, m-ā m-ə́la kə de gēé kadə̄ tūrə̄n̄ gírən kem jóó kə́ rang gə̄ tə́ ō, yā kəya̰ kem jóo yān gə̄ karī ō, tɔ̄ɔ̄də́ kɔ̄ɔ́ ō.

¹³ Rɔ̄ Moab gə̄ a sɔldə́ najə̄ yā Kemos tə́, tītə̄ ń rɔ̄ *Israel gə̄ sɔlə̄ńdə́ najə̄ yā Betel ń nin̄ ənīn̄ kemdə́ adə̄nən̄ tə́ ní.

¹⁴ I najə̄ rí tə́ á ə́daī na sḭḭ̄ na i go̰ rɔ̄ɔ̄ gə̄ ō, áskar gə̄ kə́ tām̄ yā rɔ̄ɔ̄ tə́ ō ní?

¹⁵ Nge nujə kə dɔ nang kə́ Moab sák sák aw̄ kə̄ kənī ɓē yān gə̄ rɔ̄ɔ̄ tə́. Balsáa kə́ kɔl watang gə̄ kə́ Moab a aw̄n̄ kə̄ ta yo tə́. I mban̄g ń rīn na i Kɔ́ɔ̄ɓē kə́ bo kə́ tɔ́gən i ngá̰ý ní n əda ní.

¹⁶ Moab a nujə sák sák ngɔr. Yá̰á̰ kə́ to kum kaȳ aĺ a əsō dɔn tə́.

¹⁷ Sḭḭ̄ madə̄ ɓēn gə̄, kə madə̄ tan gə̄, ə́hɔī ndoō seneé ə́daīn̄ na: I rí n rāā yá̰á̰ á tɔ́gə́ kə́ ngá̰ý ń toō tetə kɔ̄ɔ́ ní, ko̰o̰ ɓē kə́ majə ngá̰ý ń toō əsō kɔ̄ɔ́ ní?

¹⁸ Sḭḭ̄ de kə́ Dibon gə̄, ī-risiī dɔ yá̰á̰ kə́ to kɔsə gɔn yāsí tə́ ō, ī-ndiī kə kəndā maná ō. Nge nujə kə ɓē kə́ Moab sák sák aw̄ kənīsí rɔ̄ɔ̄ tə́, ni nujə ɓē yāsí kə́ ngan̄g ngá̰ý gə̄ kɔ̄ɔ́.

¹⁹ Sḭḭ̄ de kə́ Aroer gə̄ ī-tə́nāī rɔ̄sí kə gō róbó ō, ūmī loo ō. Ī-dəjeī ngé ka̰ȳ naā gə̄ ō, de gə̄ ń teēn̄ ta yo tə́ ō ní, ké i rí n rāā yá̰á̰ ní wa.

²⁰ Rɔ̄ Moab sɔlən̄ adə̄ tɔ́gən ur̄ wak kɔ̄ɔ́. Ī-nōōī kə̄ dɔɔ́ ɓoo ɓoo ō, ī-ɓārí yá̰a̰ ādə̄ dḭḭ̄n̄sí ō. Ə̄nīī mbēr̄ kadə man̄ Arnon tə́ ə́daī na: Nujən̄ ɓē kə́ Moab sák sák kɔ̄ɔ́.

²¹ Najə əsō dɔ ndágə loo kə́ kḭḭ kə̄ dɔɔ́ tə́ ō, dɔ Holon tə́ ō, Yasa tə́ ō, Mepat tə́ ō,

²² Dibon tə́ ō, Nebo tə́ ō, Bet Dibəlataim tə́ ō,

²³ Kiryataim tə́ ō, Bet Gamul tə́ ō, Bet Meon tə́ ō,

²⁴ Keriyot tə́ ō, Bosra tə́ ō, adə̄ i dɔ ɓē gə̄ malang kə́ Moab tə́, kə́ sa̰y gə̄ ō, kə́ ngɔr gə̄ ō.

²⁵ Tɔ́gə Moab təgā malang kɔ̄ɔ́ jīn i kə́ tetə kɔ̄ɔ́. Najə̄ ń Kɔ́ɔ̄ɓē əda ní n noó.

²⁶ Ādīin̄ kasə ādə̄ rāān, tām̄ ni ɔjə kə̄ ndágá kadə̄ na n-bo n-tɔȳ Kɔ́ɔ̄ɓē. Á̰a̰ī i ni n to a ndūbə̄rū kum tōmbə̄ tə́ toō. Ta i dɔn tə́ kadə̄ ni-tél kur̄ kəgō tā.

²⁷ I rɔ̄kum kadə̄ *Israel tél kur̄ kəgō tām̄ yāí tə́ aĺ a? Ə́ngen kə ngé ɓogə gə̄ á ré ā ɔ̄r̄ najə̄ yān anī, ā ī-wél̄ i dɔí tá dejə ní a?

²⁸ Moab gə̄ ī-teēī kɔ̄ɔ́ kem ɓēé ba aw̄ ī-ndiī mbal̄á. Ī-ndájə dér gutə gə̄ ń a rāān̄ ɓēdə́ i ta bəlo kə́ bo tə́, adə̄ i loo kə́ dum kadə̄ deē aw̄ ugə̄ tū tə́ tə́ ní.

²⁹ J-oō hoy kɔjə rɔ̄ yā Moab i kun ta rɔ̄ kə́ al̄ naā ngá̰ý, i ta ngan̄g ō, i kɔjə rɔ̄ ō, i tə́da najə̄ ō, i kɔjə kasə rāā yá̰a̰ ō kə́ ba̰ý beē.

³⁰ m̄-ger̄ kɔr ta rɔ̄ yān ō najə̄ kɔrə̄n gə̄ ō, kəla rāān gə̄ ō kə́ kanjə̄ kumən. Najə̄ ń Kɔ́ɔ̄ɓē əda ní n noó.

³¹ I tām̄ najə̄ ń toō tə́ n m̄-nōō najə̄ yā Moab tə́ ní. m̄-ɓār̄ ɓār̄ kadə̄ dḭḭ̄n̄ Moab kə taá malang. m̄-toō rus rus najə̄ yā Kir Heres gə̄ tə́.

³² *Kāgə̄ nduú kə́ Sibəma, m̄-nōō najə̄ yāí tə́ tɔȳ nōō ń m̄-nōō tām̄ yā Yajer gə̄ tə́ ní. Ta jīí gə̄ al mānə̄n̄ dɔ bā bo tə́ aw̄ ugə̄n̄ Yajer tə́. Nge nujə loo sák sák tetə jīn dɔ kōō yāí tə́ ō, dɔ kan̄ *kāgə̄ nduú yāí gə̄ kə́ tə́jā tə́ ō.

³³ Rɔ̄nel̄ kə́ ngá̰ý gətóo kɔ̄ɔ́ kem ndɔr̄ kāgə̄ nduú gə̄ kə́ Moab tə́ ō, gō nang yān tə́ ō. m̄-rāā adə̄ kasə *nduú iī kɔ̄ɔ́ kem jóon gə̄ tə́. De gə̄ mbə́rēn̄ kan̄ nduú kə kɔŕ rɔ̄nelēé to̰ alé.

³⁴ De gə̄ kə́ Hesəbon tə́ gə̄ ń ɓārə̄n̄ ɓār̄ kadə̄ dḭḭ̄n̄də́ ní, oōn̄ kōōdə́ bátə́ gān̄g kə̄ Elale tə́. Tá ndūdə́ ɓār̄ bátə́ ugə̄ Yahas kə́ Soar tə́ ō, téē Horonaim ō, Egəlat Selisiya ō. Tɔdɔ̄ man̄ gə̄ kə́ Nimrim tə́ gə̄gē a télən̄ i yá̰á̰ kə́ deē əda rī to̰ alé.

³⁵ M-ā m̄-tɔ̄l̄ de kə́ Moab tə́ gə̄ ń tunə̄n̄ yá̰a̰ kə taá malang ō, róōn̄ *yá̰a̰ ndējə̄ gə̄ ō dɔ loo ndɔ̄ȳ gə̄ tə́ rɔȳnəń nə́ɓā yādə́ gə̄ ní.

³⁶ Kemḿ síkə̄ nōō najə̄ yā Moab tə́ ō, síkə̄ nōō najə̄ yā Kir Heres gə̄ tə́ ō, tītə̄ nal kə́ a ɓār̄ beé. Nin̄ oyn̄ najə̄ yá̰a̰ kənge yādə́ kə́ teēdə́ yá̰á̰ tə́ alé.

³⁷ Tā anī, dəsān̄ dɔ de gə̄ malang ō, mbāý de gə̄ malang ō, tə́jān̄ jī de gə̄ malang kə doó ō, de gə̄ malang o̰ō̰n̄ kūbə̄ kəhɔ ndoō ō.

³⁸ Deē a oō i nōō rɔ̄ dɔ kújə gə̄ kə́ Moab tə́ ō, ndágə loo gə̄ tə́ ō. m̄-tetə Moab naā tə́ tītə̄ yá̰á̰ kə́ nelə̄m̄ aĺ beē. Najə̄ ń Kɔ́ɔ̄ɓē əda ní n noó.

³⁹ I rí n rāā yá̰á̰ á tɔ́gə Moab ur̄ wak kɔ̄ɔ́ ní? I ba̰ý á ni tūr̄ gidən kə̄ rɔ̄sɔlɔ̄ɔ́ ní? Ī-nōōī ɓoo ɓoo, tɔdɔ̄ Moab tél kur̄ kəgō yā de gə̄ malang ń ndi gīrə̄n̄ gidən ní ō, tél yá̰á̰ kə́ a əla ɓōĺ kemdə́ tə́ ō.

⁴⁰ Najə̄ ń Kɔ́ɔ̄ɓē əda ní n toó: To i tītə̄ māl̄ kə́ a nēl̄ ō, jā̰ bɔ̄gə̄n ō, dɔ ɓē kə́ Moab tə́ beē.

⁴¹ Taān̄ ɓē kə́ Keriyot ō, tetən̄ ɓē kə́ Mesadot rɔ̄ɔ̄ ō. Ndɔ̄ ń noō tə́ ní, kem go̰ rɔ̄ɔ̄ kə́ Moab gə̄ a to tītə̄ kem dəyá̰ ń a rāā loo kojə ní beē.

⁴² Nujən̄ ɓē kə́ Moab sák sák kɔ̄ɔ́, adə̄ gír de kə́ kemeé gə̄ gətóon̄. Tɔdɔ̄ nin̄ ɔjən̄ kə̄ ndágá kadə̄ nin̄ boon̄ tɔȳn̄ Kɔ́ɔ̄ɓē.

⁴³ Moab gə̄, ɓōĺ a rāāsí ngá̰ý ō, ā ə̄sōī bəlo kə́ bo tə́ ō, réng a əhɔsí ō. Najə̄ ń Kɔ́ɔ̄ɓē əda ní n noó.

⁴⁴ Nge ka̰ȳ ta yá̰á̰ kə́ to ɓōĺ ngá̰ý tə́ a əsō kem bəlo kə́ bo tə́ ō, deē ń al̄ bəlo kə́ bo teē ní, réng a əhɔn ō. A̰á̰ā̰, m-ā m-ādə̄ yá̰á̰ kə́ tōr̄ a əsō dɔ Moab tə́ ɓāl̄ ń m-ā m-ādə̄ a ɔjəm̄neé gíŕ yá̰a̰ rāān gə̄ ní. Najə̄ ń Kɔ́ɔ̄ɓē əda ní n noó.

⁴⁵ Ngé ka̰ȳ naā kə́ kɔr asədə́ nák gə̄ reē dəban̄ ndílí kem ɓē kə́ Hesəbon tə́. Banī hor əɓa bup Hesəbon, ta ndo̰ hor teē kem kújə yā mban̄g Sihon tə́ kə̄ ndagá ba o̰o̰ bɔ̄gə̄ ɓē gə̄ kə́ Moab ō, kār̄ dɔ ngé kutə mbī gə̄ ō.

⁴⁶ Moab, i yá̰á̰ kə́ to kum kaȳ aĺ kə́ ba̰ý beé n rāāī ní? Ta gír de kə́ Kemos tə́ gə̄ tḭ̄ḭ̄ kɔ̄ɔ́. Əhɔn̄ ngání kə́ dəngam gə̄ ta rɔ̄ɔ̄ tə́ aw̄n̄ sedə́ ō, əhɔn̄ ngání kə́ dəyá̰ gə̄ əlan̄də́ dəngáyá ō.

⁴⁷ Banī ta tɔ̄l̄ ta ndɔ̄ gə̄ tə́ anī, m-ā m̄-tél yā reē sedə́ gogə́. Najə̄ ń Kɔ́ɔ̄ɓē əda ní n noó. Sarya ń gāngə̄n̄ dɔ Moab tə́ ní, ta tɔ̄l̄ tan i loon ń toō tə́.