JEREMI 45 - Bible sar

Najə̄ ń kadə̄ ədan̄ Baruk ní

¹ Kem ɓāl̄ kə́ nge ko̰ sɔ́ ń Joakim kə́ ngōn̄ Josias ndiń mban̄g *Juda tə́ ní, Jeremi tə́da najə̄ gə̄ adə̄ Baruk kə́ ngōn̄ Neriya ndang makətūbūú anī, ɔr̄ najə̄ seneé ədan na:

² Kɔ́ɔ̄ɓē, Nə́ɓā yā *Israel ɔr̄ najə̄ seí ḭ̄ Baruk i tītə̄ ń toō beē:

³ Ḭ̄ ə́da na: Rɔ̄ ndoō wa. Tɔdɔ̄ Kɔ́ɔ̄ɓē na tél ənī wur kɔl dɔ yá̰a̰ gə̄ ń tōrə̄n̄ rɔ̄í tə́ ní, tɔ́gí na təgā kɔ̄ɔ́ loo to̰ō̰ rus rus tə́, na á̰a̰ loo taā koō alé.

⁴ Kɔ́ɔ̄ɓē ɔr̄ najə̄ seí i tītə̄ ń toō beē: Yá̰á̰ ń m̄-rāā ní, mə̄kɔ́ m̄-nujəń ō, yá̰á̰ ń m-ə̄ndā ní, mə̄kɔ́ m-ɔ̄r̄ kɔ̄ɔ́ kə gír ngəraá ō, m̄-rāā tītə̄ ń noō kə gō loo gə̄ malang.

⁵ Ḭ̄ ī-sāā rāā yá̰á̰ kə́ bo ngá̰ý gə̄ ní, ī-lōō gír̄ dɔ tə́ to̰. M-ā m̄-rāā kadə̄ yá̰á̰ kə́ to kum kaȳ aĺ əsō dɔ de gə̄ tə́ malang, banī m-ā m-ādə̄ ā ī-teē ta yo tə́, loo malang ń ā āw̄ tū tə́ ní tə́. Najə̄ ń Kɔ́ɔ̄ɓē əda ní n noó.