JEREMI 42 - Bible sar

Ngé teē ta yo tə́ gə̄ aw̄n̄ koō taá ɓē Jeremi

¹ Tā anī Yohanan kə́ ngōn̄ Karea ō, Ajaria kə́ ngōn̄ Hosaya ō ń nin̄ i ngol ngé rɔ̄ɔ̄ gə̄ malang ní ō, kósə de gə̄ malang, adə̄ i ngáń kə́ dūú gə̄gē, de kə́ tɔgə gə̄gē ní, ndɔ́tə̄n̄

² kə̄ rɔ̄ Jeremi *nge koō ta tə́ ba ədanən̄ na: Jə-rāāī ɓɔ́ ba ī-nēl̄ mbīí ōoń najə̄ yājí. Ɔ̄r̄ najə̄ kə Kɔ́ɔ̄ɓē Nə́ɓā yāí tām̄ yājí jḭḭ gotə de kə́ séý beē gə̄ ń jə-na̰y tə́ toō. Rɔ̄kum, kété ní jḭḭ i de kə́ ngá̰ý gə̄ ba ń toō ɓáa jḭḭ ngé teē ta yo tə́ gə̄ i sḛ́ý beē, tītə̄ ń īkɔ́ á̰a̰ń kə kumií toō.

³ Ādə̄ Kɔ́ɔ̄ɓē Nə́ɓā yāí ɔjəjí róbə kə́ kadə̄ j-un ō, yá̰á̰ kə́ kadə̄ jə-rāā ō.

⁴ Anī Jeremi *nge koō ta ədadə́ na: Majə, m-ā m̄-ɔ̄r̄ najə̄ kə Kɔ́ɔ̄ɓē Nə́ɓā yāsí tītə̄ ń ī-dəjemīnneé ní ō, m-ā m-ə́dásí najə̄ malang ń Kɔ́ɔ̄ɓē a tél yā kədasí ní ō, kanjə̄ ngɔ̄m̄ kumən kógə̄ḿ tām̄ yāḿ tə́.

⁵ Tā anī nin̄ ədan̄ Jeremi na: Ré jə-mbātə́ rāā yá̰á̰ ń Kɔ́ɔ̄ɓē Nə́ɓā yāí ədaī tām̄ yājí tə́ ní anī, ādə̄ Kɔ́ɔ̄ɓē əndā najə̄ dɔjí tə́ kə́ de kə́ kum tə́ kə́ rɔ̄kum tə́ ō, kə́ sew tə́ ō.

⁶ Ká ré najə̄ ní nel̄jí aáā, nel̄jí aĺ aáā, j-a j-oō najə̄ ta Kɔ́ɔ̄ɓē Nə́ɓā yājí ń j-əlaī rɔ̄n tə́ ní, yā kadə̄ yá̰a̰ malang əsō naā tə́ majə najə̄ koō ń j-oō tan ní tə́.

⁷ Rāā ndɔ̄ kutə gō tə́ anī Kɔ́ɔ̄ɓē ɔr̄ najə̄ kə Jeremi

⁸ adə̄ ni ɓāŕ Yohanan, ngōn̄ Karea kə ngol ngé rɔ̄ɔ̄ gə̄ malang kə́ gōn tə́ ō, ngán gə̄ ō, de kə́ tɔgə gə̄ ō malang,

⁹ ba ədadə́ na: Kɔ́ɔ̄ɓē Nə́ɓā yā *Israel ń ə́lamī rɔ̄n tə́ kadə̄ m̄-rāān ɓɔ́ tām̄ yāsí tə́ ní əda əda na:

¹⁰ Ré ī-ndigiī ndi kem ɓē ń toō tə́ anī, m-ā m̄-ə̄ndāsí kemeé ō, m-ā m̄-nujə sesí to̰ aĺ ō. M-ā m̄-mbūsə̄sí kadə̄ ī-raī ngan̄g ō, m-ā m-ɔ̄r̄sí to̰ aĺ i kə́ bátə́ gə̄ tə́ ō. Yá̰á̰ kə́ majaĺ ń m̄-rāā sesí ní, m-ā m̄-tə́ndā gír yā gán̄g kɔ̄ɔ́ ō.

¹¹ Mban̄g kə́ *Babilon ń ī-ɓōlíin̄ ngá̰ý ní, ī-ɓōlniī to̰ alé. Ī-ɓōĺniī to̰ alé, tɔdɔ̄ mā i sesí yā gān̄g dɔsí ō, yā kɔr̄sí jīn tə́ kɔ̄ɔ́ ō. Najə̄ ń Kɔ́ɔ̄ɓē əda ní n noó.

¹² M-ā m̄-rāā kadə̄ kumən a o̰o̰n sesí, adə̄ kumən a o̰o̰n tām̄ yāsí tə́ ō, a əya̰sí kadə̄ ī-tél āwī gogə́ dɔ nang yāsí tə́ ō.

¹³ Banī ré ī-mbātíī ndi kem ɓē ń toō tə́ ō, ī-mbātíī koō najə̄ ta Kɔ́ɔ̄ɓē Nə́ɓā yāsí tə́ ō,

¹⁴ adə̄ ə́daī na: A̰ á̰, jə-gḛy kaw̄ Ejiptə tə́ kadə̄ rɔ̄ɔ̄ rāājí to̰ aĺ ō, kadə̄ kōō tōw̄ yā ngé kaw̄ ta rɔ̄ɔ̄ tə́ gə̄ ɓār̄ ta mbījí tə́ to̰ aĺ ō, kadə̄ jə-nal̄ yá̰a̰ kəsa to̰ aĺ ō, ré ə́daī na jə-gḛy i ndi ɓē Ejiptə tə́ ō anī,

¹⁵ sḭḭ̄ *Juda gə̄ ń ī-teēī ta yo tə́ ní, ōōī najə̄ ń Kɔ́ɔ̄ɓē əda ní. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, əda ní n toó: Ré kə́ rɔ̄kum tə́ sḭḭ̄ ə̄sōī róbó kadə̄ āwī Ejiptə tə́ ō, kadə̄ āwī ī-ndiī noó ō anī,

¹⁶ kaskar ń ī-ɓōlíī ní a tɔ̄l̄sí noó, kem ɓē kə́ Ejiptə tə́ ō, ɓō ń ī-sōlī ní a un gōsí bátə́ Ejiptə tə́ ō, adə̄ i loo ń noō n sḭḭ̄ ā óyiī tū tə́ ní.

¹⁷ De gə̄ ń a əsōn̄ róbó yā kaw̄ ndi Ejiptə tə́ ní, a oyn̄ yo kaskar ō, yo ɓō ō, yo mo̰y ngāl̄bɔ̄gīí ō. De kə́ dandə́ tə́ kə́ a ndi kə kumneé, aké a teē ta yo tə́ kum yá̰á̰ kə́ to kum kaȳ aĺ ń m-ā m̄-rāā kadə̄ əsō dɔdə́ tə́ ní a gətóo.

¹⁸ Rɔ̄kum, najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: Tītə̄ ń wōn̄g yāḿ ō, wōn̄g kə́ ngá̰ý yāḿ ō rāāmə̄nneé dɔ de kə́ Jerusalem tə́ gə̄ ní, wōn̄g kə́ ngá̰ý yāḿ a rāām̄ dɔsí tə́ i tītə̄ ń noō ō, dan ń ā ūgīneé Ejiptə tə́ ní. Sḭḭ̄ ā ī-téliī i yá̰á̰ kə́ nujə sák sák kɔ̄ɔ́ ō, kə́ túbə ō, ndɔ̄ĺ ō i dɔ tə́, kə́ de gə̄ kídə̄n̄ ō, kə́ to rɔ̄sɔl̄ ō.

¹⁹ Kɔ́ɔ̄ɓē ədasí, sḭḭ̄ *Juda gə̄ ń ī-teēī ta yo tə́ ní na: Ī-lōōī kaw̄ Ejiptə tə́. Ī-gerī majə kadə̄ ɓōólaā mā i de kə́ kum tə́ kə́ ngé kəndā najə̄ dɔsí tə́.

²⁰ Sḭḭ̄ kɔ́ gə̄ ī-gólī rɔ̄sí, tɔdɔ̄ sḭḭ̄ ə́lamī rɔ̄ Kɔ́ɔ̄ɓē Nə́ɓā yāsí tə́ ə́daī na: Ɔ̄r̄ najə̄ kə Kɔ́ɔ̄ɓē Nə́ɓāá tām̄ yājí tə́, ə́dájí yá̰a̰ malang ń Kɔ́ɔ̄ɓē Nə́ɓā yājí əda ní kə ta njaá na j-a jə-rāā.

²¹ M-ə́dásí yá̰á̰ ní kɔ̄ɔ́ ɓá, banī sḭḭ̄ ōoī ndū Kɔ́ɔ̄ɓē Nə́ɓā yāsí aĺ ō, ōōī najə̄ ń əndā taḿ tə́ kadə̄ m-ɔ̄r̄ sesí ní aĺ ō.

²² Ngɔlaā ní, ī-gerī majə kadə̄ ā óyiī yo kaskar ō, yo ɓō ō, yo mo̰y ngāl̄bɔ̄gīí ō, loo ń sḭḭ̄ ī-gḛyiī kaw̄ ɓɔ̄ɔ̄ rɔ̄sí tū tə́ ní tə́.