JEREMI 4 - Bible sar

(Kɔ́ɔ̄ɓē əda na)

¹ *Israel, ré ī-tél ī-reē anī, majə kadə̄ ī-reē i rɔ̄ḿ mā tə́.

² Ré ī-túbə̄ ə́da na: Tītə̄ ń Kɔ́ɔ̄ɓē ndiń kə kumneé noō, ba ī-túbə̄ i dɔ najə̄ kə́ rɔ̄kum tə́ ō, i kem háĺ kə́ súmūú tə́ ō, kem yá̰a̰ rāā kə́ gōtə́ tə́ ō anī, nápar de gə̄ a tɔ́rə̄n̄ tadə́ dɔ naā tə́ ō, a rɔyn̄ naā ō, kə kūl̄neé.

³ Najə̄ ń Kɔ́ɔ̄ɓē əda de kə́ *Juda tə́ gə̄ ō, kə́ kem ɓē kə́ Jerusalem tə́ gə̄ ō ní n toó: Ī-tə́gāī loo ndɔr̄ yāsí, ī-lōōī dubə̄ kōō dan kōn̄ ngar̄ gə̄ tə́.

⁴ De kə́ *Juda tə́ gə̄ ō, de kə́ kem ɓē kə́ Jerusalem tə́ gə̄ ō, ə́jaī mɔtəsí tām̄ yā Kɔ́ɔ̄ɓē tə́, *ə́jaī mɔtə kə́ dan wursí tə́. Ré i beé aĺ anī, wōn̄g yāḿ a ndūbə̄ tītə̄ hor yā ko̰o̰ loo kanjə̄ kadə̄ deē asə tɔ̄l̄ ɔjəń dɔ kəla rāāsí kə́ majaĺ ngá̰ý gə̄.

Kɔŕ kógə̄ḿ ɓār̄ Juda tə́

⁵ Ə̄nīī mbēr̄ ń toō *Juda tə́. Ə̄nīī mbēr̄ ní ādə̄ de kə́ Jerusalem gə̄ oōn̄. Ī-kɔ̄rí tōw̄ kem ɓēé. Əgaī kɔŕ ə́daī na: Ī-kánī naā kadə̄ j-udiī kem loo kə́ ngan̄g gə̄ tə́.

⁶ Ə́laī dərapóo dɔɔ́ kum kə̄ *Siyo̰. Āw̄ ī-ɓɔ̄ɔ̄ī rɔ̄sí, ī-lōōī dəba róbó. I yá̰á̰ kə́ to kum kaȳ aĺ n m̄-rāā kadə̄ ḭḭ dām̄ mbɔ́r ɓē kə́ ko̰ó̰ tə́ yā reē ní. Loo a nujə sák sák.

⁷ Ɓɔl teē loo ton tə́, nge nujə kə nápar de gēé əsō róbó a reē. Ni teē loo ton tə́ yā kənī yá̰á̰ kə́ to kum ko̰o̰ dɔ ɓē yāí tə́. A əlan̄ hor dɔ ɓē yāí gə̄ tə́, de kə́ kemeé gə̄ a gətóon̄ kɔ̄ɔ́ malang.

⁸ Tām̄ najə̄ ń toō tə́ ní, ō̰ō̰ī sákə̄ kūbə̄ tə́ rɔ̄sí tə́. Ī-nōōī rɔ̄sí ō, ə́gaī kɔŕ ō, tɔdɔ̄ wōn̄g yā Kɔ́ɔ̄ɓē kə́ al̄ naā ngá̰ý əya̰ gōjí alé.

⁹ Ndɔ̄ nəkɔ́ ń noō tə́ ní tɔ́gə mban̄g ō, tɔ́gə de kə́ bo yān gə̄ ō a ɔr̄ kɔ̄ɔ́. Najə̄ ń Kɔ́ɔ̄ɓē əda ní n noó. Ngé tun̄ yá̰a̰ gə̄ ndin̄ tadə́ mbóó kóńg, ángal *ngé koō ta gə̄ nujə sák sák.

¹⁰ M-ə́da na: Aa, Kɔ́ɔ̄ɓē Nə́ɓā, kə́ rɔ̄kum tə́ ní, ḭ̄ ī-gól̄ gír de gə̄ ń toō dan ń ḭ̄ ə́dádə́ na: A əngen̄ lɔm ní, tɔdɔ̄ jə-to dan koy yo kaskar tə́ ɓáý.

Ngé taā loo gə̄ teēn̄ kə̄ ta gə̄ tə́

¹¹ Kem ndɔ̄ gə̄ ń noō tə́ ní, de gə̄ a ədan̄ gír de gə̄ ń toō ō, Jerusalem ō na: Nél kə́ təngā piling əla dɔ loo kə́ kḭḭ kə̄ dɔɔ́ gə̄ tə́ ō, kem dəla loo tə́ ō, aw̄ kum kə̄ dɔ gír deē yāḿ gə̄ tə́. Ni-aw̄ i kə̄ tó yá̰á̰ tə́ aĺ ō, kɔy tə́ aĺ ō.

¹² Néĺ kə́ əla kə tɔ́gɔ́ ngá̰ý ḭḭ nú a reē kum kə̄ dɔḿ tə́. Ngɔlaā ní, ta i dɔḿ tə́ tā, m̄-gḛy gān̄g sarya dɔdə́ tə́.

(Ngán Israel gə̄ ədan̄ na)

¹³ Á̰a̰ī, madə̄ ba̰ā̰jí n a reē tītə̄ kil̄ man̄ yā kənījí rɔ̄ɔ̄ toó. Púsə rɔ̄ɔ̄ yān gə̄ ton̄ tītə̄ nél balway. Sə́nda yān gə̄ ɔlən̄ tɔȳ kə̄rō. Jḭḭ̄ i kə rɔ̄ tō ndoó tɔdɔ̄ nujən̄ sejí sák sák kɔ̄ɔ́.

(Kɔ́ɔ̄ɓē əda na)

¹⁴ Ī-tə́go kem ndul kə́ kemií tə́ kɔ̄ɔ́ malang yā kadə̄ ə́ngeń gān̄g dɔ. I rə́ngáý tə́ n gir̄ kə́ majaĺ gə̄ a teēn̄ kemií tə́ kɔ̄ɔ́ ní?

¹⁵ De gə̄ ənīn̄ mbēr̄ kə̄ Dan nú. Ran̄ dɔ mbal̄ *Epəraim tə́ ənīn̄neé mbēr̄ yá̰á̰ kə́ majaĺ kə́ a rāā yā rāā yá̰a̰.

¹⁶ Ī-tāāī nápar de gə̄, ə́daī Jerusalem ādə̄ ger̄ gō yá̰á̰ ní. Ngé taā ɓē gə̄ ḭḭn̄ dɔ nang kə́ sa̰y ngá̰ý tə́ a reēn̄ noó. Nin̄ a əgan̄ kɔŕ dɔ ɓē bo gə̄ kə́ *Juda tə́.

¹⁷ Nin̄ teēn̄ rétə̄ gēé kə̄ ta loo gə̄ tə́ tītə̄ ngé ngɔ̄m̄ ndɔr̄ gə̄, ba gīrə̄n̄ Jerusalem, tɔdɔ̄ ni oō taḿ mā alé. Najə̄ ń Kɔ́ɔ̄ɓē əda ní n noó.

¹⁸ I hálí ō, kəla rāāí gə̄ ō n reēn̄ kə yá̰a̰ gə̄ ń noō kə̄ dɔí tə́ ní I yá̰á̰ ń kem ndul yāí ojə adī ní n noó. I yá̰á̰ kə́ atə̄ rɔ̄kum ba aw̄ bátə́ ɔtə̄ ngarā̰ kemií tə́.

Jeremi i moy tām̄ yā ɓē kə́ a nujə sák sák tə́

¹⁹ Kemḿ wa kemḿ wa. Rɔ̄ḿ tōrə̄m̄ mgá̰ý. Kemḿ əgam̄ biting biting. Ángaləḿ ndi sew alé. M-ásə ndi taḿ mbóo aĺ bátə́,

²⁰ De gə̄ əgan̄ kɔŕ ədan̄ na: Loo nujə ba tél nujə ɓáý to̰ sák sák. Rɔ̄kum, ɓē kə taá malang i kə́ nujə kɔ̄ɔ́. Gérger yāḿ nujə gidə kógə̄ḿ, kújə tandā yāḿ gə̄ nujən̄ kum mbang kógə̄ḿ beé.

²¹ M-ā m-á̰a̰ dərapóo rɔ̄ɔ̄ ō, m-ā m-ōō kōō tōw̄ ō, i bátə́ ta kə́ rá?

²² Rɔ̄kum, gír deē yāḿ gə̄ i de kə́ mbóo gə̄. Nin̄ ger̄mə̄n̄ alé. I ngán kə́ sapə gə̄, asən̄ ger̄ kum yá̰á̰ kógə̄ḿ alé. Nin̄ ɔlən̄ tū rāā yá̰á̰ kə́ majaĺ tə́, ba gerə̄n̄ rāā majə alé.

²³ M-á̰a̰ loo kə̄ dɔ nang tə́ anī, m-á̰a̰ kadə̄ dɔ ndágə doy ō, yá̰a̰ gətóo tū tə́ ō. M-á̰a̰ loo kə́ no rā̰ tə́ anī, m-á̰a̰ kadə̄ loo kə́ unjə̄ kow gətóo kɔ̄ɔ́ tū tə́.

²⁴ M-á̰a̰ mbal̄ gə̄ anī, m-á̰a̰ kadə̄ a ndewn̄ ō, kadə̄ ngán mbal̄ gə̄ malang a yéȳn̄ ō.

²⁵ M-á̰a̰ loo anī, m-á̰a̰ kadə̄ de gə̄ gətóon̄ ō, kadə̄ yel̄ gə̄ a̰ȳn̄ naā kɔ̄ɔ́ malang ō.

²⁶ M-á̰a̰ loo anī, m-á̰a̰ kadə̄ loo ń kāgə̄ gə̄ i ngá̰ý tū tə́ ní tél loo kə́ ndágə doy. Kɔ́ɔ̄ɓē əla hor dɔ ɓē gə̄ tə́ malang kə wōn̄g yān kə́ al̄ naā ngá̰ý.

²⁷ Najə̄ ń Kɔ́ɔ̄ɓē əda ní n toó: Dɔ nang malang kə taá a téĺ yá̰á̰ kə́ to kum ko̰ ngá̰ý banī m-ā m̄-nujəń malang alé.

²⁸ I tām̄ ń toō tə́ n dɔ nang əhɔ ndoō ní. No rā̰ əga ndul dɔɔ́ nú, tɔdɔ̄ i yá̰á̰ kə́ m-ún ndūḿ dɔ tə́ kɔ̄ɔ́ ɓá, i yá̰á̰ kə́ m̄-nóm̄ rāā i jóo ngá̰ý. M-ā m̄-lōō gírí alé, m-ā m̄-tūr̄ ndūḿ alé.

Siyo̰ ō, ngé tɔ̄l̄ de gə̄ ō ran̄ ta naā tə́

²⁹ Dan ń kōō ngé kal̄ sə́nda gə̄ ō, ngé kur gə̄ra gə̄ ō a ɓār̄ anī, de kə́ kem ɓēé gə̄ malang a̰ȳn̄ naā kɔ̄ɔ́. Udən̄ kem ku kāgə̄ gə̄ tə́ ō, alə̄n̄ dɔ mbal̄ gə̄ tə́ ō, teēn̄ kɔ̄ɔ́ kem ɓē bo gə̄ tə́ malang. De kógə̄ḿ kə́ na̰y kem ɓēé gətóó bátə́.

³⁰ Ba ḭ̄, ā ī-rāā i rí? Ə́la kūbə̄ kə́ kərē bḭḭ ō, ī-tə́lá yá̰á̰ súū rɔ̄ kə́ rāā kə lɔ́rɔ́ gə̄ ō. Ī-rāā yá̰á̰ súū rɔ̄ dɔ kumií tə́. Ī-rāā mandə i ndāńg. ngé sāāí gə̄ idən̄ tadə́ gírí tə́, nin̄ sāān̄ tɔ̄lī.

³¹ M-ōō nōō rɔ̄ kə́ tītə̄ yā dəyá̰ kə́ a rāā kem ō, m-ōō kɔŕ kə́ tītə̄ yā dəyá̰ kə́ a ojə ngōn̄ kem mandən ō. I kɔŕ ngōmandə kə́ *Siyo̰, koō gāngən. Ni ɔy jīn kə̄ dɔɔ́. Mā i kə rɔ̄ ndoó. M-ā m-óy sɔɔ̄ń ndéý kə́ al̄ naā yā ngé tɔ̄l̄ de gə̄.