JEREMI 37 - Bible sar1 Mban̄g Sedekias, ngōn̄ Josias ndi dɔ kōr̄ kāgə̄ mbang tə́ gotə Konia, ngōn̄ Joakim tə́. Nabukodonosor mban̄g kə́ *Babilon tə́ əndān adə̄ o̰o̰ ɓē kə́ *Juda 2 Mban̄g ō, ngé kəla yān gə̄ ō, de kə́ kem ɓēé gə̄ ō ní, deē kógə̄ḿ kə́ ōō najə̄ gə̄ ń Kɔ́ɔ̄ɓē əndā ta Jeremi *nge koō ta tə́ ní gətóo. 3 Mban̄g Sedekias əla Yehukal, kə́ ngōn̄ Selemia ō, Sepania *nge tun̄ yá̰á̰ kə́ ngōn̄ Maseya ō, rɔ̄ Jeremi *nge koō ta tə́ kadə̄ ədanən̄ na: m̄-rāāī ɓɔ́ ba ɔ̄r̄ najə̄ kə Kɔ́ɔ̄ɓē Nə́ɓā yājí tām̄ yājí tə́! 4 Jeremi njə̄rā mbənā de gə̄ tə́ aw̄ ō tél ō. Deē ənīn dəngáyá alé. 5 Ɓūtə̄ ngé rɔ̄ɔ̄ gə̄ yā *Parao̰ teēn̄ kɔ̄ɔ́ kem ɓē kə́ Ejiptə tə́. Kalde gə̄ ń gīrə̄n̄ gidə ɓē kə́ Jerusalem ní oōn̄ najə̄n anī, ɔrə̄n̄ rɔ̄də́ kə̄ gogə́ sa̰y. 6 Tā anī Kɔ́ɔ̄ɓē ɔr̄ najə̄ kə Jeremi *nge koō ta ədan na: 7 Najə̄ ń mā Kɔ́ɔ̄ɓē, Nə́ɓā yā *Israel m-ə́dá ní n toó: Najə̄ ń ā ə́daī mban̄g kə́ *Juda tə́ ń əlasí rɔ̄ḿ tə́ ní n toó: Ɓūtə̄ ngé rɔ̄ɔ̄ gə̄ yā *Parao̰ ń ḭḭn̄ Ejiptə tə́ ba reēn̄ yā dḭḭ̄sí ní tél aw̄n̄ gogə́ ɓē yādə́ tə́ kɔ̄ɔ́. 8 Kalde gə̄ a télən̄ yā reē, a ənīn̄ ɓē ń toō rɔ̄ɔ̄ ō, a əlan̄ hor dɔ tə́ ō. 9 Mā Kɔ́ɔ̄ɓē, Nə́ɓā yā Israel m-ɔ̄r̄ najə̄ i tītə̄ ń toō beé: Ī-lōōī gól̄ rɔ̄sí ba gír̄ kəda na Kalde gə̄ na teēn̄ kem ɓē yāsí tə́ kɔ̄ɔ́ ō, na aw̄n̄ na i kə́ njɔ́ḿ gə̄ tə́ ō. Nin̄ aw̄n̄ loo alé. 10 Ngé rɔ̄ɔ̄ gə̄ malang kə́ Kalde tə́ ń ənīn̄sí rɔ̄ɔ̄ ní, ká ré ā ī-tetiīdə́ rɔ̄ɔ̄ gə̄gē anī, ngé gə̄ ń ton̄ kə do kum gərāá rɔ̄də́ tə́ kem kújə tandā yādə́ gə̄ tə́ ní, a ḭḭn̄ dɔɔ́ yā kəla hor dɔ ɓē ń toō tə́. Ənīn̄ Jeremi dəngáyá 11 Dan ń ngé rɔ̄ɔ̄ kə́ Kalde tə́ gə̄ ɔrə̄n̄ rɔ̄də́ kɔ̄ó sa̰y rɔ̄ Jerusalem tə́ najə̄ ngé rɔ̄ɔ̄ gə̄ yā *Parao̰ tə́ ní 12 anī, Jeremi sāā teē kem ɓē kə́ Jerusalem tə́ ba kaw̄ gō nang yā Benjamḛ tə́ kadə̄ kə kēgə̄n̄ naā kə de kə́ gír kojə yān tə́ gə̄. 13 Dan ń ni ugə̄ ta róbə ń a ɓārə́n̄ na i yā Benjamḛ ní tə́ anī, ənge ngol ngé ngɔ̄m̄ loo gə̄ ń rīn na i Yiriya, ngōn̄ Selemia kə́ ngōn̄ Hanania ní. Ni-əhɔ Jeremi *nge koō ta adə̄ dəba ba ədan na: Ḭ̄ ā āw̄ i kə̄ kəsōó gír Kalde gə̄ tə́! 14 Jeremi tél əda na: I beé alé, m̄-gír̄ dɔ kaw̄ kəsō tə́ gír Kalde gə̄ tə́ alé. Banī Yiriya mbātə́ koō najə̄ kɔr̄ Jeremi ba əhɔn aw̄ seneé ta de kə́ bo gə̄ tə́. 15 Wōn̄g rāā de kə́ bo gə̄ ní adə̄ əndan̄ Jeremi ō, əlanən̄ dəngáyá kem kújə yā Yonatan, nge ndang makətūbə̄ tə́ ō. Nin̄ rāān̄ kújə yān ní i kújə dəngáý tə́. 16 Jeremi aw̄ ndi i kem bəlo kə́ ta kū tə́. Ni-rāā ndɔ̄ ngá̰ý tū tə́ noō. 17 Mban̄g Sedekias əla gōn tə́ adə̄ reē ba dəjen loo mundə̄ tə́ jəke kem kújə yān tə́ ədan na: Kɔ́ɔ̄ɓē əndā kəla taí tə́ aĺ a? Jeremi ədan na: Ni-əndā kəla taḿ tə́! Ni-əda ɓáý to̰ na: A əlanī jī mban̄g kə́ *Babilon tə́. 18 Ba Jeremi tél əda mban̄g Sedekias na: I rí kə́ majaĺ n m̄-rāā seí ḭ̄ḭ́ ō, kə ngé kəla yāí gēé ō, kə gír de gə̄ ń toō ō, á ə́lamī dəngáyá ní? 19 Ngé koō ta yāsí gə̄ ń ədan̄sí na mban̄g kə́ Babilon na a reē yā kənīsí rɔ̄ɔ̄ aĺ ō, kənī ɓē ń toō rɔ̄ɔ̄ aĺ ō ní, nin̄ i rá? 20 Ngɔlaā ní, Kɔ́ɔ̄ḿ mban̄g ī-nēl̄ mbīí ōoń. m̄-rāāī ɓɔ́ ba ī-lōō tél kəlam̄ gogə́ kem kújə yā Yonatan nge ndang makətūbə̄ tə́ na m-ā m-óy loo ń noō tə́. 21 Tā anī mban̄g Sedekias əda kadə̄ Jeremi rāā dəngáy i ndágə loo ngɔ̄m̄ ta kújə yā mban̄g tə́ ō, kadə̄ kə dɔ ndɔ̄ gə̄ anī kə adə̄nən̄ mápá kə́ gōr̄ kə́ kḭḭ róbə yā ngé kɔr̄ mápa gə̄ tə́ bátə́ kadə̄ mápa təgāń kɔ̄ɔ́ kem ɓēé malang. I beé n Jeremi ndiń ndágə loo ngɔ̄m̄ ta kújə yā mban̄g tə́ ní. |
© 2006, 2010 Alliance Biblique du Tchad
Bible Society of Chad