JEREMI 36 - Bible sar

Joakim əla hor dɔ makətūbə̄ kə́ Baruk ndang tə́

¹ Kem ɓāl̄ kə́ nge ko̰ sɔ́ ń Joakim, ngōn̄ Josias ndiń mban̄g *Juda tə́ ní, Kɔ́ɔ̄ɓē ɔr̄ najə̄ ń toō kə Jeremi:

² Ún ndāŕ ndang najə̄ kógə̄ḿ kə́ ɓír̄ gidə naā tə́ ba ī-ndang najə̄ gə̄ malang ń m-ə́daī sɔɔ̄ dɔ *Israel ō, *Juda ō, nápar de gə̄ ō ní tū tə́. Əla gír dɔ ndɔ̄ ń m-ɔ̄rəń najə̄ seí ɓāl̄ yā Josias tə́ ní bátə́ ɓōólaā.

³ Majanī de kə́ Juda tə́ gə̄ a əndān̄ ma̰ȳ yá̰á̰ kə́ to rɔ̄ tō ndoō gə̄ malang ń m̄-gír̄ kadə̄ rāādə́ ní, adə̄ náā nəkɔ́ ɓáa a tūr̄ hálən ō, m-ā m-ásə mā̰ȳ rɔ̄ḿ dɔ yá̰á̰ kə́ gōtə́ aĺ yādə́ gə̄ tə́ ō, dɔ majaĺ yādə́ gə̄ tə́ ō.

⁴ Jeremi ɓāŕ Baruk, ngōn̄ Neriya, kadə̄ ndang najə̄ gə̄ malang ń Kɔ́ɔ̄ɓē ɔr̄ seneé ní kem ndāŕ ndang najə̄ kógə̄ḿ kə́ ɓír̄ gidə naā tə́ ní tə́.

⁵ Gō tə́ anī Jeremi əda Baruk na: Yá̰á̰ kógə̄ḿ ɔgə̄m̄ kaw̄ kem *kújə yā Kɔ́ɔ̄ɓē tə́ adə̄ m-ásə kaw̄ alé.

⁶ Ní īkɔ́ āw̄, ī-tə́da najə̄ kə́ tū tə́ ndɔ̄ *ndi ɓō tām̄ yā Nə́ɓā tə́ tə́ ba ī-tə́da najə̄ gə̄ yā Kɔ́ɔ̄ɓē ń m-ādə̄ ī-ndang kem ndāŕ ndang najə̄ kógə̄ḿ kə́ ɓír̄ gidə naā tə́ ní ta kum de gə̄ malang kə́ *Juda tə́ ń a ḭḭn̄ kə gō ɓē yādə́ gēé yā reē ní.

⁷ Majanī ndɔ̄ȳ yādə́ a ugə̄ ta kum Kɔ́ɔ̄ɓē tə́ ō, nin̄ kógə̄ḿ kógə̄ḿ a tūrə̄n̄ yá̰a̰ rāādə́ kə́ majaĺ gə̄ ō, tɔdɔ̄ wōn̄g ō, wōn̄g kə́ ngá̰ý ō ń Kɔ́ɔ̄ɓē rāā kə gír de gə̄ ń toō ní to ɓōĺ ngá̰ý.

⁸ Baruk, ngōn̄ Neriya, rāā yá̰a̰ malang ń Jeremi *nge koō ta mērən rāā ní. Ni tə́da najə̄ gə̄ yā Kɔ́ɔ̄ɓē kə́ kem makətūbə̄ ní tə́ kem *kújə yā Kɔ́ɔ̄ɓē tə́.

⁹ Kem nāā kə́ nge ko̰ ndōhó yā ɓāl̄ kə́ nge ko̰ mí ń Joakim, ngōn̄ Josias, ndiń mban̄g Juda tə́ ní, ɓārə́n̄ de gə̄ malang kə́ Jerusalem tə́ ō, ngé gə̄ malang ń a ḭḭn̄ kem ɓē gə̄ kə́ Juda tə́ a reēn̄ Jerusalem ní ō, kadə̄ *ndin̄ ɓō tām̄ yā Nə́ɓā tə́ ta kumən tə́.

¹⁰ Tā anī Baruk tə́da najə̄ gə̄ yā Jeremi kə́ kem makətūbūú ɓē Kɔ́ɔ̄ɓēé, kem kújə yā Gemariya, ngōn̄ Sapan kə́ nge ndang makətūbə̄ tə́. Ni-tə́da i ndágə loo kə́ gīr̄ gidə *kújə yā Kɔ́ɔ̄ɓē kə́ dɔɔ́ ta róbə kújə kə́ kijə yā Kɔ́ɔ̄ɓē tə́ ta kum kósə de gə̄ tə́ malang.

¹¹ Dan ń Mika, ngōn̄ Gemariya kə́ ngōn̄ Sapan, oō najə̄ gə̄ yā Kɔ́ɔ̄ɓē malang ń ndangən̄ kem makətūbūú ní anī,

¹² ni risə aw̄ ɓē mbangāá kem kújə yā nge ndang makətūbə̄ tə́ loo ń de kə́ bo gə̄ malang kánə̄n̄ naā kemeé ní. De gə̄ ní i Elisama kə́ nge ndang makətūbə̄ ō, Delaya ngōn̄ Semaya ō, Elnatan ngōn̄ Akbor ō, Gemariya ngōn̄ Sapan ō, Sedekias ngōn̄ Hanania ō tá de kə́ bo kə́ rang gə̄ ō.

¹³ Mika ənīdə́ gotə najə̄ gə̄ malang ń ni oō dan ń Baruk, ngōn̄ Neriya a tə́dań makətūbə̄ ta kum kósə de gə̄ tə́ ní.

¹⁴ Tā anī, de kə́ bo gə̄ ń kánə̄n̄ naā ní əlan̄ Yehudi ngōn̄ Netania kə́ ngōn̄ Selemia ń i ngōn̄ Kusi ní rɔ̄ Baruk tə́ kadə̄ ədan na: Ún ndāŕ ndang najə̄ kə́ ɓír̄ gidə naā tə́ ń ī-tə́da ta kum kósə de gə̄ tə́ ní jīí tə́, ba ī-reē. Baruk, ngōn̄ Neriya un makətūbə̄ ní ba aw̄ rɔ̄də́ tə́.

¹⁵ Nin̄ ədanən̄ na: Ī-ndi nang tə́ ba ī-tə́da najə̄ kə́ tū tə́ ní ādə̄ j-oō. Baruk tə́da najə̄ ní adə̄ oōn̄.

¹⁶ Dan ń nin̄ oōn̄ najə̄ gə̄ ń noō malang anī, ɓōĺ rāādə́ ngá̰ý adə̄ a̰a̰n̄ ta kum naā ba ədan̄ Baruk na: J-a j-aw̄ yā kənī gotə najə̄ ń toō malang kadə̄ mban̄g oō.

¹⁷ Ba tél ədanən̄ na: Najə̄ gə̄ ń toō malang ń Jeremi tə́daī ní, ɔ́jə́jí loo ndang ń ī-ndang ní.

¹⁸ Baruk tél ədadə́ na: Tə́dam̄ najə̄ gə̄ ń noō malang i kə taneé, banī mā m̄-ndang i kə man̄ ndang yá̰á̰ kem ndāŕ ndang najə̄ tə́.

¹⁹ De kə́ bo gə̄ ədan̄ Baruk na: Ḭ̄ ō, Jeremi ō, āw̄ ī-ɓɔ̄ɔ̄ī rɔ̄sí ādə̄ deē kógə̄ḿ gə̄gē a ger̄ loo ń sḭḭ̄ i tū tə́ ní alé.

²⁰ Gō tə́ anī nin̄ əya̰n̄ ndāŕ ndang najə̄ kógə̄ḿ kə́ ɓír̄ gidə naā tə́ ní kem kújə yā Elisama nge ndang makətūbə̄ tə́ ba udən̄ kújú gō mban̄g tə́ yā kənīn gotə yá̰a̰ malang ń rāā yá̰á̰ ní.

²¹ Tā anī mban̄g əla Yehudi kun makətūbə̄ ní tə́. Ni-aw̄ ɓē yā Elisama nge ndang makətūbə̄ tə́ un reēń ba tə́da ta kum mban̄g tə́ ō, ta kum de kə́ bo gə̄ malang ń ran̄ kə njadə́ dɔɔ́ rɔ̄ mban̄g tə́ ō ní.

²² I kem nāā kə́ nge ko̰ ndōhó tə́ adə̄ mban̄g ndi i kem kújə́ kə́ kūlūú tə́ ō, ganáń ndi kə horoó kemeé non tə́ ō.

²³ Dan ń Yehudi a tə́da gír najə̄ gə̄ ní asə mətá aláa sɔ́ anī, mban̄g gān̄g kə kəyā yā nge ndóō de gə̄ *ndū najə̄ ō, ənī kum hor ganáń tə́, adə̄ hor róō ndāŕ ndang najə̄ kógə̄ḿ kə́ ɓír̄ gidə naā tə́ ní malang kɔ̄ɔ́.

²⁴ Mban̄g ō, ngé kəla yān gə̄ ō ń oōn̄ najə̄ gə̄ ń toō ní ɓōĺ rāādə́ aĺ ō, *rə̄yā̰n̄ kūbə̄ kə́ rɔ̄də́ tə́ gə̄ aĺ ō.

²⁵ Elnatan ō Delaya ō Gemariya ō rāān̄ mban̄g ɓɔ̄ɔ̄ kadə̄ róō ndāŕ ndang najə̄ kə́ ɓír̄ gidə naā tə́ ní aĺ gə̄gē ba ni oō najə̄ yādə́ alé.

²⁶ Mban̄g əda Yerameel kə́ ngōn̄ ngār ō, Seraya, ngōn̄ Ajriel ō, Selemia, ngōn̄ Abədel ō, kadə̄ kə əhɔn̄ Baruk nge ndang makətūbə̄ ō, Jeremi *nge koō ta ō, banī Kɔ́ɔ̄ɓē ɓɔ̄ɔ̄ dɔdə́ kɔ̄ɔ́.

²⁷ Dan ń mban̄g róō ndāŕ ndang najə̄ kə́ ɓír̄ gidə naā tə́ ń Jeremi adə̄ Baruk ndang najə̄ kemeé ní oy anī, Kɔ́ɔ̄ɓē ɔr̄ najə̄ kə Jeremi ədan na:

²⁸ Ún ndāŕ ndang najə̄ kógə̄ḿ kə́ ɓír̄ gidə naā tə́ kə́ rang ō, ī-ndang najə̄ gə̄ malang ń ton̄ kem nge kə́ kété tə́ ń Joakim, mban̄g kə́ *Juda tə́ róō kɔ̄ɔ́ ní ō kemeé.

²⁹ Ā ə́da Joakim, mban̄g kə́ Juda na najə̄ ń mā Kɔ́ɔ̄ɓē m-ə́dá ní n toó: Ī-róō ndāŕ ndang najə̄ kə́ ɓír̄ gidə naā tə́ ń toō ō, ī-gákə̄m̄ ə́da na ké i tām̄ rí tə́ á m̄-ndang najə̄ kemeé m-ə́da na mban̄g kə́ *Babilon tə́ na a reē yā nujə kə ɓē ń toō gáŕ ō, na a rāā kadə̄ de gə̄ ō, dā̰ gə̄ ō kə́ kemeé na a gətóon̄ kɔ̄ɔ́ ō ní wa?

³⁰ Ɓá anī mā Kɔ́ɔ̄ɓē m-ə́da najə̄ ń toō dɔ Joakim mban̄g kə́ *Juda tə́: Ni a ənge deē kógə̄ḿ kə́ kadə̄ a ndi dɔ kōr̄ kāgə̄ mbang yā Dabid tə́ gotən tə́ alé. Nīnə́n a to kum mbang tə́ kadaá ō, kum kūl̄ tə́ ndɔ̄ɔ́ ō.

³¹ M-ā m̄-rāān ni ō, de kə́ gír kojə yān tə́ gə̄ ō, ngé kəla yān gə̄ ō, yá̰á̰ kə́ tōr̄ najə̄ yá̰á̰ kə́ gōtə́ aĺ gə̄ ń rāān̄ tə́ ní. M-ā m̄-rāā kadə̄ yá̰á̰ kə́ to kum kaȳ aĺ ngá̰ý gə̄ malang ń m-ɔ̄r̄ najə̄n sedə́ á oōn̄ aĺ ní a əsō dɔdə́ tə́ ō, dɔ de gə̄ ń ndin̄ ɓē Jerusalem tə́ ní, dɔ de kə́ Juda tə́ gə̄ ō.

³² Tā anī, Jeremi un ndāŕ ndang najə̄ kə́ ɓír̄ gidə naā tə́ kə́ rang adə̄ Baruk nge ndang makətūbə̄ kə́ ngōn̄ Neriya. Ni ndang najə̄ gə̄ malang ń Jeremi tə́dan á Joakim, mban̄g kə́ Juda tə́ róō kɔ̄ɔ́ ní kemeé. Ndangən̄ najə̄ kə́ rang kə́ tītə̄ ngé gə̄ ń noō gə̄ ngá̰ý kemeé ɓáý to̰ ō.