JEREMI 34 - Bible sar

Najə̄ kə́ yā kəda Sedekias

¹ Kɔ́ɔ̄ɓē ɔr̄ najə̄ kə Jeremi dan ń Nabukodonosor, mban̄g kə́ *Babilon ō, ɓūtə̄ ngé rɔ̄ɔ̄ yān gə̄ malang ō, ənīn̄neé ɓē kə́ Jerusalem ō, ɓē gə̄ malang ń gīrə̄n̄ gidən ní ō rɔ̄ɔ̄ ní. Nabukodonosor ənīdə́ rɔ̄ɔ̄ naā tə́ kə ɓē ko̰o̰ gə̄ malang ń, ənīn̄ rɔ̄ɔ̄ Jerusalem ō, ɓē gə̄ malang ń a o̰o̰ ɓē dɔ tə́ ní ō kə gír de gə̄ malang ō.

² Najə̄ ń Kɔ́ɔ̄ɓē, Nə́ɓā yā *Israel əda ní n toó: Āw̄ ɔ̄r̄ najə̄ kə Sedekias mban̄g kə́ *Juda tə́, ə́dan na: M-ā m-ə́la ɓē ń toō kem jī mban̄g kə́ *Babilon tə́ kadə̄ a əla hor dɔ tə́.

³ Ḭ̄ ā ī-teē jīn tə́ alé. A əhɔnī kadə̄ ni a rāā yá̰á̰ ń kemən ndigə ní seí. Tasí a a̰a̰ naā kə Babilon ō, ni a ɔr̄ najə̄ seí kə taneé ō, ā āw̄ Babilon ō.

⁴ Ɓá tā ba Sedekias, mban̄g kə́ *Juda ī-nēl̄ mbīí ōoń najə̄ ń Kɔ́ɔ̄ɓē əda ní. Kɔ́ɔ̄ɓē ɔr̄ najə̄ yāí i tītə̄ ń toō beé: Ā óy yo kaskar alé.

⁵ Ā óy i kə kem sɔl̄ lɔmɔɔ́. A róōn̄ yá̰á̰ kə́ kotə majə tām̄ yāí tə́ tītə̄ ń róōn̄neé adə̄n̄ kaaí gə̄ ń ndin̄ dɔ kōr̄ kāgə̄ mbang tə́ o̰o̰n̄neé ɓē kété noí tə́ ní ō. A unən̄ pā nōō yo dɔí tə́ a ədan̄ na: Kɔ́ɔ̄ḿ, i yá̰á̰ to kum kaȳ aĺ kə́ ba̰ý beé! Kə́ rɔ̄kum tə́ ní najə̄ kɔrə̄ḿ n noó. Najə̄ ń Kɔ́ɔ̄ɓē əda ní n noó.

⁶ Jeremi kə́ *nge koō ta ɔr̄ najə̄ gə̄ ń noō malang ta kum Sedekias, mban̄g kə́ Juda tə́ kem ɓē kə́ Jerusalem tə́,

⁷ i dan ń ɓūtə̄ ngé rɔ̄ɔ̄ gə̄ yā mban̄g kə́ *Babilon ənīn̄neé ɓē kə́ Jerusalem rɔ̄ɔ̄ ō, i dan ń ɓē kə́ Juda tə́ gə̄ ń i Lakis ō Ajeka ō rɔ̄ɔ̄n̄neé dɔ rɔ̄də́ tə́ ɓáý ní ō. Tɔdɔ̄ dan ɓē gə̄ kə́ Juda tə́ ní ɓē kə jōó gə̄ ń toō ran̄ ngan̄g ɓáý.

Ɓəlo gə̄ kə́ əya̰n̄də́ dɔɔ́ ba tél əhɔn̄də́ gogə́

⁸ Mban̄g Sedekias əda de gə̄ malang kə́ Jerusalem kadə̄ ənīn̄ ndūdə́ yā kəya̰ ɓəlo gə̄ dɔɔ́,

⁹ kadə̄ náā nəkɔ́ ɓáa əya̰ ɓəlo yān kə́ dəngam gə̄ ō, kə́ dəyá̰ gə̄ ō ń i hebəro gə̄ ní dɔɔ́. De kə́ dɔ dáńdə́ tə́ kə́ a əhɔ ngōkó̰o̰n de kə́ *Juda tə́ ɓəloó ní a gətóo.

¹⁰ Anī de kə́ bo gə̄ malang ō, de gə̄ malang ń ənīn̄ ndūdə́ kadə̄ n-əya̰n̄ ɓəlo yādə́ kə́ dəngam gə̄ aláa kə́ dəyá̰ gə̄ dɔɔ́ ō, kadə̄ n-əhɔn̄də́ ɓəloó gogə́ to̰ aĺ ō ní, rāān̄ yá̰á̰ ń ədan̄ ní. Nin̄ ran̄ dɔ ndūdə́ tə́ adə̄ əya̰n̄ ɓəlo yādə́ gə̄ dɔɔ́.

¹¹ Ba gō tə́ anī, tél tūrə̄n̄ ndūdə́ adə̄ sāān̄ nja ɓəlo kə́ dəngam gə̄ ō, kə́ dəyá̰ gə̄ ō ń əya̰n̄də́ dɔɔ́ ní kadə̄ rāān̄ kəla adə̄n̄də́.

¹² Tā anī, Kɔ́ɔ̄ɓē ɔr̄ najə̄ kə Jeremi ədan na:

¹³ Najə̄ ń mā Kɔ́ɔ̄ɓē, Nə́ɓā yā *Israel m̄-ə́dá ní n toó: I mā n m-ə́da kaasí gə̄ kadə̄ ənīn̄ ndūdə́, dan ń m̄-teēń sedə́ kɔ̄ɔ́ ɓəloó kem ɓē kə́ Ejiptə tə́ ní.

¹⁴ M-ə́dádə́ m-ə́da na: Ré ī-tə́daī ɓāl̄ sīrí ta asə naā anī deē kógə̄ḿ kógə̄ḿ kə́ dansí tə́ a əya̰ ngōkó̰o̰n kə́ hebəro ń gātə̄ kə rɔ̄neé jīn tə́ ní dɔɔ́. Ni a rāā kəla ɓəlo adī kem ɓāl̄ mehḛ́, ba gō tə́ anī ā ə́ya̰n dɔɔ́. Banī kaasí gə̄ nēlə̄n̄ mbīdə́ oōn̄neé najə̄ yāḿ alé.

¹⁵ Ń toō ní, sḭḭ̄ ī-tūrī háĺsí adə̄ ī-rāāī yá̰á̰ kə́ gōtə́ ta kumḿ tə́. Sḭḭ̄ kógə̄ḿ kógə̄ḿ ə́daī na a ə́ya̰ī ngáń ngé ɓē madə̄sí gə̄ dɔɔ́ ō, ə̄nīī ndūsí ta kumḿ tə́ i kem kújə́ ń rīḿ ɓār̄ dɔ tə́ ní ō.

¹⁶ Ba ī-tél ī-tūrī ndūsí ī-nujiīneé kə rīḿ. Sḭḭ̄ kógə̄ḿ kógə̄ḿ ī-tél ī-sāāī nja ɓəlo kə́ dəngam gə̄ ō, kə́ dəyá̰ gə̄ ō ń əya̰īdə́ dɔɔ́ ní kadə̄ rāān̄ kəla adə̄n̄sí gogə́.

¹⁷ I tām̄ ń toō tə́ n Kɔ́ɔ̄ɓē ɔr̄ najə̄ tītə̄ ń toō beé ní: Sḭḭ̄ ōōī najə̄ yāḿ kadə̄ ə́ya̰īneé ngákó̰ó̰sí gə̄ ō, ngáń ngé ɓē gə̄ ō dɔɔ́ aĺ ní, mā m-ā m-ə́yá̰sí kadə̄ ə̄sōī ta kaskar tə́ ō, kadə̄ mo̰y ngāl̄bɔ̄gīí ō, ɓō ō əsōn̄ dɔsí tə́. M-ā m̄-rāā kadə̄ ī-téliī yá̰a̰ kɔjə kə́ to ɓōĺ ngá̰ý ta kum ɓē ko̰o̰ gə̄ malang kə́ dɔ nang tə́. Najə̄ ń Kɔ́ɔ̄ɓē əda ní n noó.

^18-19 Ngé ko̰o̰ ɓē kə́ *Juda gə̄ ō, kə́ Jerusalem gə̄ ō, ngé kəla kə́ bo gə̄ ō, *ngé tun̄ yá̰a̰ gə̄ ō, ngáń ngé ɓē gə̄ malang ō, njarən̄ duĺ man̄g kə́ tun̄ naā tə́ ba mānə̄n̄ danaá ənīn̄neé ndūdə́ adə̄mə̄n̄. Banī nin̄ ran̄ dɔ ndūdə́ ń ənīn̄ tə́ ní alé.

²⁰ M-ə́ládə́ kem jī madə̄ ba̰ā̰də́ gə̄ tə́ ō, jī ngé ndə̄ngādə́ yo tə́ ō. Nīńdə́ a tél yá̰a̰ kəsa yā yel̄ kə́ dɔ rā̰ tə́ gə̄ ō, dā̰ kə́ dɔ nang tə́ gə̄ ō.

²¹ Ba Sedekias, mban̄g kə́ *Juda tə́ ō, de kə́ bo yān gə̄ ō, tā anī m-ā m-ə́ládə́ jī madə̄ ba̰ā̰də́ gə̄ tə́ ō, jī ngé ndə̄ngādə́ yo gə̄ tə́ ō, jī ɓūtə̄ ngé rɔ̄ɔ̄ yā mban̄g kə́ *Babilon tə́ gə̄ ń ndɔ́tə̄n̄ kə gérger yādə́ ń gīrə̄n̄neé gidə ɓē ní i ngɔr ɓáý ní ō.

²² M-ā m-ādə̄də́ ndūḿ kadə̄ tél reē rɔ̄ɔ̄n̄ ɓē ń toō. A ənīnən̄ rɔ̄ɔ̄ ō, a əsō kem jīdə́ tə́ ō, a əlan̄ hor dɔ tə́ ō. M-ā m̄-rāā kadə̄ ɓē gə̄ kə́ *Juda télən̄ loo kə́ to kum ko̰ gə̄ ō, kə́ de gə̄ gətóon̄ tū tə́ gə̄ ō.