JEREMI 3 - Bible sar

Ájə́ba kə́ dəba ta háĺ ájə́ba yān tə́ alé

¹ Ré de kə́ dəngam mbātə́ nə̄yá̰n adə̄ aw̄ taā de kə́ rang anī, a tél yā taān gogə́ ɓáý a? dəyá̰ ní tél i loo kə́ yḛr kə́ njɔ́ḿ gə̄ tə́ aĺ a? Ba ḭ̄ ń ī-sāā dəngam gə̄ loo ájə́ba tə́ ngá̰ý ní, ā ī-tél yā reē jīḿ tə́ a? Najə̄ ń Kɔ́ɔ̄ɓē əda ní n noó.

² Ún kumií kə̄ dɔɔ́ ba á̰a̰ loo kum kə̄ dɔ mbal̄ kə́ ndágə doy gə̄ tə́: I loo kə́ rá n ādə̄ ɓīīn̄ seí tū tə́ aĺ ní? Ī-ndi ī-ngóōdə́ kə bɔ̄gə̄ róbə gēé tītə̄ Arabə kə́ ndi kem dəla loo tə́. Ḭ̄ ī-rāā ájə́ba ō, háĺ kə́ gōtə́ aĺ ō, ī-yḛrəń loo kə́ dɔ nang tə́.

³ Man̄ kə́ bo ngá̰ý edə alé najə̄ yāí tə́ ō, man̄ kaw̄ ɓēé edə aĺ ō. Ba ḭ̄ ī-to gír rāā ájə́ba tə́ kə̄ noí tə́ kanjə̄ kadə̄ rɔ̄í sɔlí.

⁴ Nəkɔ́ ń toō gə̄gē ní ā ɓārə́m̄ jīí tə́ laā ɓáý na: Bɔbə́ḿ, i ḭ̄ n kemjí əhɔ naā majə dan mandəḿ tə́ ní.

⁵ Nə́ɓā a rāā wōn̄g seḿ kə̄ non tə́ a? Ni a əhɔm̄ kemən tə́ kə́ njɔ́ḿ gə̄ tə́ a? Banī, taí a ɔ̄r najə̄ ō, ā ī-rāań yá̰á̰ kə́ majaĺ kə̄ noí tə́ kə́ nja ngáā tə́ ō.

Israel túy taā kem ō, Juda ndi dɔ ndūn tə́ aĺ ō

⁶ Ɓāl̄ ko̰o̰ ɓē yā mban̄g Josias tə́ ní Kɔ́ɔ̄ɓē ədam̄ na: Yá̰á̰ ń *Israel nge túy taā kem rāā ní á̰a̰ā̰ a? Ni al̄ aw̄ rāā ájə́ba dɔ mbal̄ malang kə́ ngāl̄ gə̄ tə́ ō, gír kāgə̄ malang kə́ to mbōl̄ gə̄ tə́ ō.

⁷ M-ə́da kə̄ kemḿ tə́ na: Rāā yá̰a̰ gə̄ ń noō malang gír gān̄g anī a tél yā reē. Ba ni-tél reē alé. *Juda kə́ sew aĺ ń i ngōkó̰o̰n kə́ dəyá̰ ní a̰a̰ yá̰á̰ ní ō,

^8-9 mā m-á̰a̰ā̰ ō. Kə́ rɔ̄kum tə́ m̄-mbātə́ Israel kə́ nge túy taā kem yān ō, m-ādə̄n makətūbə̄ mbātə́ naā ō i najə̄ rāā rāȳ yān tə́. Banī yá̰á̰ ń toō əla ɓōĺ kem ngōkó̰o̰n kə́ dəyá̰ ń i Juda kə́ sew aĺ tə́ ní sḛ́ý aĺ bátə́. Adə̄ ni yḛr loo kə́ dɔ nang tə́ tɔdɔ̄ ni-əndā kum kedə̄ dɔ rɔ̄n tə́ alé, ba əla gír rāā ájə́ba ō. Ni-rāā rāȳ tɔdɔ̄ ndɔ̄ȳ mbal̄ ō ndɔ̄ȳ kāgə̄ ō.

¹⁰ Ngōkó̰o̰ *Israel kə́ dəyá̰ ń i *Juda kə́ sew aĺ ní rāā yá̰a̰ gə̄ ń noō malang banī tél reē rɔ̄ḿ tə́ gogə́ kə ngarā̰ kemənneé alé, ni gól̄ i loo. Najə̄ ń Kɔ́ɔ̄ɓē əda ní n noó.

¹¹ Kɔ́ɔ̄ɓē ədam̄ na: Israel ń i nge túy taā kem yān ní, asə kəda ta kum Juda kə́ nge ra dɔ ndūn tə́ aĺ na ni i de kə́ súmūú.

¹² Āw̄, ə̄nī mbēr̄ ń toō dām̄ mbɔ́r ɓē kə́ ko̰ó̰ tə́ ə́da na: *Israel kə́ nge túy taā kem yān, ī-tél ī-reē tā. Najə̄ ń Kɔ́ɔ̄ɓē əda ní n noó. Ndíĺsí a a̰ȳ ta kumḿ tə́ to̰ alé. Rɔ̄kum, mā i de kə́ sew. M-ā m̄-rāā wōn̄g sesí kə́ njɔ́ḿ gə̄ tə́ alé. Najə̄ ń Kɔ́ɔ̄ɓē əda ní n noó.

¹³ Majə kadə̄ ī-gēr̄ gō majaĺ ń ī-rāā ní. I Kɔ́ɔ̄ɓē Nə́ɓā yāí n ī-mbātə́n ní. ī-ndi gotə kógə̄ḿ alé ba ī-tə́lá halí naā tə́ kə nə́ɓā kə́ mbā gēé kə gír kāgə̄ kə́ mbōl̄ gə̄ malang. Sḭḭ̄ ōōī ndūḿ alé. Najə̄ ń Kɔ́ɔ̄ɓē əda ní n noó.

De kə́ Juda tə́ gə̄ a telən̄ yā reē

¹⁴ Ngáń kə́ ngé túy taā kem gə̄ ī-tél ī-reēī! Tɔdɔ̄ i mā n i Kɔ́ɔ̄ɓē ní. Najə̄ ń Kɔ́ɔ̄ɓē əda ní n noó. M-ā m-ɔ́ýsí kógə̄ḿ, kógə̄ḿ kə dɔ ɓē gēé ō, jōó jōó kə dɔ gír kaa gēé ō, yā kaw̄ sesí *Siyo̰.

¹⁵ M-ā m-ādə̄sí ngé kulsí gə̄ kə́ kə gō kemḿ. Nin̄ a ulə̄n̄sí kə gōó ō, a əndān̄ kumdə́ gíŕsí tə́ majə ngá̰ý ō.

¹⁶ Kem ndɔ̄ ń noō tə́ ní, dan ń sḭḭ̄ ā ī-bəlaī ngá̰ý kem ɓēé anī, de gə̄ a ədan̄ na: I *sandúkə madə̄ naā yā Kɔ́ɔ̄ɓē to̰ alé, najə̄ ń Kɔ́ɔ̄ɓē əda ní n noó. De kə́ yā gír̄ dɔ tə́ a gətóo: Deē a ɔr̄ najə̄n to̰ aĺ bátə́ ō, a gerə̄n̄ gō kadə̄ ni gətóo aĺ ō, a télən̄ yā rāān rang aĺ ō.

¹⁷ Kem ndɔ̄ gə̄ ń noō tə́ ní, a ɓārə́n̄ Jerusalem na i ‹Kōr̄ kāgə̄ mbang yā Kɔ́ɔ̄ɓē›. Nápar de gə̄ malang a a̰ȳn̄ kum kə̄ rɔ̄n tə́ najə̄ yā rī Kɔ́ɔ̄ɓē ń əndān̄ dɔn tə́ ní. A ton̄ gír rāā dɔ ngan̄g yādə́ kə́ majaĺ al̄ naā tə́ to̰ alé.

¹⁸ Kem ndɔ̄ gə̄ ń noō tə́ ní, ngé kə́ *Juda tə́ gə̄ ō, ngé kə́ Israel tə́ gə̄ ō, a télən̄ yā reē naā tə́ mbak. Nin̄ a ḭḭn̄ dām̄ mbɔ́r ɓē kə́ ko̰ó̰ tə́ yā reē kugə̄ kem ɓēé ń m-ādə̄ kaadə́ gə̄ ní tə́.

Ngé túy taā kem gə̄ tél reēn̄ rɔ̄ Nə́ɓā tə́ (Kɔ́ɔ̄ɓē əda na)

¹⁹ M-ā m̄-rāā i ba̰ý n m-ā m-ə́laīneé dan ngánə́ḿ gə̄ tə́ ō, m-ā m-ādīneé ɓē kə́ nelī. Yá̰a̰ ndəbā tə́ kadə̄ i yá̰á̰ súū rɔ̄ kə́ majə ngá̰ý kə́ dɔ dáń nápar de gə̄ tə́ ní? M-ə́da kə̄ kemḿ tə́ na: Ā ī-ɓārə́m̄ na: Bɔbə́ḿ. Ā ī-tūr̄ gidií taḿ tə́ to̰ alé.

²⁰ Banī kə́ rɔ̄kum tə́, tītə̄ ń dəyá̰ a tə́la rɔ̄n naā tə́ kə nge *nong yānneé ní, sḭḭ̄ de kə́ *Israel tə́ gə̄ ī-tə́laī rɔ̄sí naā tə́ seḿ ō. Najə̄ ń Kɔ́ɔ̄ɓē əda ní n noó.

²¹ Ndū kógə̄ḿ ɓār̄ dɔ loo kə́ kḭḭ kə́ dɔɔ́ gə̄ tə́, i ngán Israel gə̄ n a nōōn̄ ō, a rāān̄ ɓɔ́ ō ní. Háĺdə́ nujə sák sák kɔ̄ɔ́. tɔdɔ̄ dɔdə́ ndigə̄nal Kɔ́ɔ̄ɓē Nə́ɓā yādə́.

²² Ngáń kə́ ngé túy taā kem gə̄ ī-tél ī-reēī, m̄-ndigə rāā kadə̄ gír túy taā kem yāsí gān̄g kɔ̄ɔ́. Jḭḭ n toó! Jḭḭ i tām̄ yāí tə́. Rɔ̄kum i ḭ̄ n i Kɔ́ɔ̄ɓē Nə́ɓā yājí ní.

(Ngán Israel gə̄ ədan̄ na)

²³ Kə́ rɔ̄kum gə̄ tə́ ní, yá̰á̰ kə́ ḭḭ dɔ ngán mbal̄ gə̄ tə́ i yá̰á̰ kə́ rɔ̄kum alé. De gə̄ rāān̄ adə̄ i kōōdə́ ngóy n ɓār̄ dɔ mbal̄ gə̄ tə́ ní. Kə́ rɔ̄kum gə̄ tə́ ní, *Israel ənge kajə i kem Kɔ́ɔ̄ɓē Nə́ɓā yājí tə́ ngóy.

²⁴ Banī rɔ̄sɔl̄ nujə kə kəla yā kaají gēé kɔ̄ɔ́, i kə ngōn̄ dūújí nú, nujə kə ngáń yá̰a̰ kul̄ yādə́ gə̄ ō, yá̰a̰ kul̄ kə́ bo yādə́ gə̄ ō, ngáńdə́ kə́ dəngam gə̄ ō, kə́ dəyá̰ gə̄ ō.

²⁵ Ādə̄ jə-laaī kemjí nang tə́ kə rɔ̄sɔlɔ̄ɔ́, ādə̄ yá̰á̰ kə́ to rɔ̄sɔl̄ yājí taā loo dɔjí tə́, tɔdɔ̄ jə-rāāī yá̰á̰ kə́ gōtə́ aĺ kə Kɔ́ɔ̄ɓē Nə́ɓā yājí, jḭḭ̄ ō, bɔbə̄jí gə̄ ō, i kə ngōn̄ dūújí nú bátə́ ɓōólaā. Jə-mbātíī koō ndū Kɔ́ɔ̄ɓē Nə́ɓā yājí kɔ̄ɔ́.