JEREMI 29 - Bible sar

Jeremi ndang makətūbə̄ adə̄ de gə̄ ń əhɔn̄də́ aw̄n̄ sedə́ Babilon ní

¹ Jeremi kə́ *nge koō ta Jeremi ndi Jerusalem ba ndang makətūbə̄ əlań adə̄ *kum kɔɔ̄ gə̄ malang kə́ dɔ dán de gə̄ ń əhɔn̄də́ aw̄n̄ sedə́ dɔ nang kə́ rang tə́ ní ō, əlań adə̄ *ngé tun̄ yá̰a̰ gə̄ ō, *ngé koō ta gə̄ ō, gír de gə̄ malang ń Nabukodonosor əhɔdə́ Jerusalem aw̄ sedə́ *Babilon tə́ ní ō.

² Ni-əla kə makətūbə̄ ní i dan ń mban̄g Yekonia ō, kó̰o̰n ō, ngé rāā kəla kə́ ndogó mbangāá gə̄ ō, de kə́ bo gə̄ kə́ *Juda tə́ ō, kə́ Jerusalem tə́ ō, de gə̄ kə́ gerə̄n̄ rāā kəla kəja kāgə̄ majə ō, gerə̄n̄ rāā kəla gində̄ majə ō teēn̄neé kɔ̄ɔ́ Jerusalem tə́ ní.

³ I Elasa kə́ ngōn̄ Sapan nin̄ kə Gemaria kə́ ngōn̄ Hilkia ń Sedekias, mban̄g kə́ Juda əladə́ rɔ̄ Nabukodonosor, mban̄g kə́ Babilon tə́ ní n Jeremi ɓɔ̄ɔ̄də́ makətūbə̄ ní kadə̄ aw̄n̄neé Babilon ní. Kum najə̄ kə́ kem makətūbə̄ ní tə́ n toó:

⁴ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel əda de gə̄ malang ń əhɔn̄də́ Jerusalem aw̄n̄ sedə́ *Babilon ní n toó.

⁵ Ī-rāāī kújə gə̄ ba ī-ndiī kemeé ō, ī-ndɔrī ba ə́saī kan̄ yá̰a̰ ndɔr̄sí gə̄ ō.

⁶ Ī-táāī dəyá̰ gə̄ ojiīneé ngáń kə́ dəngam gə̄ ō, kə́ dəyá̰ gə̄ ō, ī-táāī dəyá̰ gə̄ ādī ngáńsí kə́ dəngam gə̄ ō, ādī ngáńsí kə́ dəyá̰ gə̄ táān̄ dəngam gə̄ ō, yā kadə̄ ojən̄neé ngáń kə́ dəngam gə̄ ō, kə́ dəyá̰ gə̄ ō. Ójiī naā ngá̰ý loo ń ī-ndiī tū tə́ tə́ noō. Ādə̄ kutəsí tél kə̄ gogə́ alé.

⁷ Ādī o̰o̰sí tɔdɔ̄ majə yā ɓē ń m-ə́wásí m-āw̄ sesí kemeé ní ō, ī-rāāī Kɔ́ɔ̄ɓē ɓɔ́ tām̄ yān tə́ ō, tɔdɔ̄ sḭḭ̄ ā ī-ndiī majə i kə ta kūl̄ majə yānneé.

⁸ Kə́ rɔ̄kum tə́ ní, Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel ɔr̄ najə̄ i tītə̄ ń toō beé: Ādī *ngé koō ta gə̄ ń i dɔ dáńsí tə́ ní ō, kɔdə̄ sāā yāsí gə̄ ō gólə̄n̄sí alé. Ə̄ndāī kumsí gír nī gə̄ ń a rāān̄sí ní tə́ alé.

⁹ Nin̄ unən̄ rīḿ ɔrə̄n̄neé najə̄ sesí kə́ *ngé koō ta gə̄ tə́, ba i najə̄ kə́ rɔ̄kum alé, tɔdɔ̄ m-ə́ládə́ alé. Najə̄ ń Kɔ́ɔ̄ɓē əda ní n noó.

¹⁰ Kɔ́ɔ̄ɓē ɔr̄ najə̄ i tītə̄ ń toō beé: Ré ɓāl̄ ɓē ko̰o̰ kə́ *Babilon tə́ mān̄ asə kutə sīrí anī, m-ā m̄-gír̄ dɔsí tə́. M-ā m̄-rāā kadə̄ ndūḿ ń m-ə̄nī yā tél reē sesí gogə́ loo ń toō tə́ ní, a udə gírí majə.

¹¹ Mā m̄-ger̄ yá̰a̰ gə̄ ń m̄-nóm̄ yā rāā tām̄ yāsí tə́ ní, i ndi majə ba i yá̰á̰ kə́ to kum kaȳ aĺ alé. Ta ndo̰sí a aw̄ kum kə̄ kété majə ō, ā ə́ngeī yá̰á̰ kə́ yā kəndā kemsí dɔ tə́ ō. Najə̄ ń Kɔ́ɔ̄ɓē əda ní n noó.

¹² Tā anī, sḭḭ̄ ā ī-ɓārí rīḿ kem ndɔ̄ȳ tə́ ō, ā ī-njə̄rāī mbā kə rīḿ ō, ā ī-ndɔ̄ȳmī ō anī, mā m-ā m̄-rāā yá̰a̰ gə̄ ń ī-dəjeī ní.

¹³ Ā ī-sāāī njaḿ ō, ā ə́ngemī ō. Ā ī-sāāmī kə ngarā̰ kemsí sḭḭ̄ kɔ́ gə̄

¹⁴ ba m-ā m̄-rāā kadə̄ ə́ngemī. Najə̄ ń Kɔ́ɔ̄ɓē əda ní n noó. M-ā m̄-rāā kadə̄ ī-tél ī-ndiī gogə́ majə tītə̄ kə́ kété ō, m-ā m̄-teē sesí kɔ̄ɔ́ dan napár de gə̄ tə́ malang ō, kə gō loo gə̄ malang ō ń m̄-tə̄ndā m̄-tḭ̄ḭ̄sí tū tə́ ní yā kɔsə dɔsí naā tə́. M-ā m̄-tél yā reē sesí gogə́ loo ń m-ādə̄ əhɔn̄sí tū tə́ ba aw̄n̄ sesí ní. Najə̄ ń Kɔ́ɔ̄ɓē əda ní n noó.

¹⁵ Ré sḭḭ̄ ə́daī na Kɔ́ɔ̄ɓē na gə̄rā *ngé koō ta gə̄ *Babilon tām̄ yāsí tə́ ɓáa,

¹⁶ rɔ̄kum, i yá̰á̰ ń noō n Kɔ́ɔ̄ɓē əda mban̄g ń ndi dɔ kōr̄ kāgə̄ mbang yā Dabid tə́ ō, əda de gə̄ malang ń ndin̄ kem ɓē ń toō tə́ ō, əda ngákó̰ó̰sí gə̄ ń əhɔn̄də́ dɔ gúú tə́ aw̄n̄ sedə́ dɔ nang kə́ rang tə́ sesí aĺ ō ní.

¹⁷ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: M-ā m-ə́la kə kaskaraá ō, kə ɓōó ō, kə mo̰y ngāl̄bɔ̄gīí ō dɔdə́ tə́, m-ā m̄-rāādə́ kadə̄ a ton̄ tītə̄ kan̄ kótə̄ kə́ ndum gə̄ ō, kə́ majən̄ aĺ ngá̰ý adə̄ dum̄ kəsa ō.

¹⁸ M-ā m̄-tə̄ɓā gōdə́ kə kaskaraá ō, kə ɓōó ō, kə mo̰y ngāl̄bɔ̄gīí ō. M-ā m̄-rāādə́ kadə̄ a télən̄ yá̰á̰ kə́ to ɓōĺ kə́ ɓē ko̰o̰ gə̄ malang kə́ dɔ nang tə́ a ndɔ̄lə́n̄ naā i kə rīneé ō, yá̰á̰ kə́ to kum ko̰o̰ kə́ de gə̄ a əgan̄ kɔŕ ɓōĺ dɔ tə́ ō, a tájə̄n̄ ō, kem ɓē yā nápar de gə̄ ń m̄-tə̄ndā m̄-tḭ̄ḭ̄də́ tū tə́ ní.

¹⁹ Tɔdɔ̄ nin̄ oōn̄ najə̄ yāḿ alé. Nin̄ ń m̄-to dan kəla ngé kəla yāḿ gə̄ ń i *ngé koō ta gə̄ rɔ̄də́ tə́ ní, oōn̄ najə̄ yāḿ alé. Najə̄ ń Kɔ́ɔ̄ɓē əda ní n noó.

²⁰ Sḭḭ̄ de gə̄ malang ń m̄-rāā ādə̄ əhɔn̄sí Jerusalem aw̄n̄ sesí *Babilon tə́ ní, ōōī najə̄ yā Kɔ́ɔ̄ɓē.

²¹ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda Akab kə́ ngōn̄ Kolaya ō, əda Sedekias, ngōn̄ Maseya ō ń ədan̄sí najə̄ kə́ rɔ̄kum alé kə rīḿ ní n toō: M-ā m-ə́ládə́ kem jī Nabukodonosor, mban̄g kə́ Babilon tə́ kadə̄ a tɔ̄l̄də́ ta kumsí tə́.

²² Ngé gə̄ malang ń əhɔn̄də́ *Juda aw̄n̄ sedə́ Babilon tə́ ní, a ndɔ̄lə́n̄ naā i kə yá̰á̰ ń rāādə́ noō, adə̄ de gə̄ a ədan̄ na: Ādə̄ Kɔ́ɔ̄ɓē rāāī tītə̄ ń rāań Sedekias ō, Akab ō ń mban̄g kə́ Babilon gírēdə́ dɔ hor tə́ ní.

²³ Majaĺ yādə́ i yá̰á̰ kə́ to rɔ̄sɔl̄ ń rāān̄ Israel tə́ ní. Rāȳn̄ kə nə̄yá̰ madə̄də́ gēé ō, ɔrə̄n̄ najə̄ kə́ rɔ̄kum alé kə rīḿ ō, banī m̄-mēr̄də́ kəda najə̄ kógə̄ḿ alé. Mā m̄-ger̄ ō, m-á̰a̰ kə́ kumḿ ō. Najə̄ ń Kɔ́ɔ̄ɓē əda ní n noó.

Makətūbə̄ ń Semayahu ndang ní

^24-25 Ā ə́da Semaya kə́ Nehelam najə̄ ń toō: Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel ɔr̄ najə̄ i tītə̄ ń toō: Ḭ̄ ə́la kə makətūbə̄ gə̄ kə́ ndang kə rīí ādə̄ gír de gə̄ malang kə́ Jerusalem tə́ ō, *nge tun̄ yá̰a̰ Sepania, ngōn̄ Maseya ō, ngé tun̄ yá̰a̰ gə̄ malang ō. Najə̄ ń ɔ̄r̄ kem makətūbə̄ gə̄ ní tə́ ní n toó:

²⁶ I Kɔ́ɔ̄ɓē n əndāī gotə *nge tun̄ yá̰a̰ Yehoyada tə́ yā kadə̄ ḭ̄ i ngol nge tun̄ yá̰á̰ kə́ ə̄ndā kumií gír de gə̄ malang ń tāmə̄n̄ mbitə mbitə ō, ɔrə̄n̄ najə̄ kə́ *ngé koō ta gə̄ tə́ ō kem *kújə yā Kɔ́ɔ̄ɓē tə́ ní, majə kadə̄ ī-do̰ō̰də́ kə súlú ō, kə kəlā gindīí ō.

²⁷ I tām̄ rí tə́ á ī-rāā yá̰a̰ kə Jeremi kə́ Anatot tə́ ń ɔr̄ najə̄ kə́ *nge koō ta tə́ dɔ dáńsí tə́ ní aĺ ní.

²⁸ Ni ndang makətūbə̄ əlań adə̄jí *Babilon i ngɔr ɓáý ədańjí na: Ā ī-ndiī noó dan i ngá̰ý. Ní, ī-rāāī kújə gə̄, ba ī-ndiī kemeé ō, ī-ndɔrī ba ə́saī kan̄ yá̰a̰ ndɔr̄sí gə̄ ō.

²⁹ *Nge tun̄ yá̰a̰ Sepania tə́da makətūbə̄ ní adə̄ *nge koō ta Jeremi oō.

³⁰ Tā anī, Kɔ́ɔ̄ɓē ɔr̄ najə̄ kə Jeremi ədan na:

³¹ Ə́la kəla ə́da de gə̄ malang ń əhɔn̄də́ aw̄n̄ sedə́ ní na: Kɔ́ɔ̄ɓē ɔr̄ najə̄ dɔ Semaya kə́ Nehelam tə́ i tītə̄ ń toō beé: Semaya ɔr̄ najə̄ kə́ *nge koō ta tə́ sesí ba mā m-ə́lan aĺ ō, ni gól̄sí kə najə̄ kə́ rɔ̄kum aĺ gə̄ ō.

³² Semaya kə́ Nehelam tə́ ō, ngánən gə̄ ō, ngán kaan gə̄ ō ní, deē kógə̄ḿ dandə́ tə́ kə́ kadə̄ ənge loo ndiń dan gír de gə̄ ń toō tə́ yā rāań rɔ̄nel̄ dɔ yá̰á̰ kə́ majə gə̄ ń m-ā m-ādə̄ gír deē yāḿ gə̄ ní a gətóo. Ni sə̄lā i de gə̄ kadə̄ mbātə́n̄ najə̄ ta Kɔ́ɔ̄ɓē tə́ aĺ a? Najə̄ ń Kɔ́ɔ̄ɓē əda ní n noó.