JEREMI 28 - Bible sar

Jeremi ō, Hanania nge koō ta ō

¹ Kem ɓāl̄ gə̄ ń Sedekias mban̄g kə́ *Juda tə́ o̰o̰ń ɓē tə́ ní, kə nāā kə́ nge ko̰ mí yā ɓāl̄ kə́ nge ko̰ sɔ́ anī, Hanania *nge koō ta kə́ ngōn̄ Ajur ń i de kə́ Gabaon ní, ɔr̄ najə̄ seḿ kem *kújə yā Kɔ́ɔ̄ɓē tə́, ta kum *ngé tun̄ yá̰a̰ gə̄ tə́ ō, Juda gə̄ tə́ malang ō ədam̄ na:

² Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel əda ní n toó: m̄-tetə njúkə yā mban̄g kə́ *Babilon kɔ̄ɔ́.

³ Na̰y ɓāl̄ jōó ngóy kadə̄ m-ā m̄-tél kə yá̰a̰ rāā kəla gə̄ malang kə́ kem *kújə yā Kɔ́ɔ̄ɓē tə́ ń Nabukodonosor, mban̄g kə́ Babilon tə́ ɔy loo ń toō tə́ aw̄ń Babilon ní, yā reēń gogə́.

⁴ M-ā m̄-tél kə Yekonia, ngōn̄ Joakim, mban̄g kə́ Juda tə́ ō, de kə́ Juda tə́ gə̄ malang ń əhɔn̄də́ aw̄n̄ sedə́ *Babilon tə́ ní ō, yā reē sedə́ loo ń toō tə́ gogə́ tɔdɔ̄ m̄-tetə njúkə yā mban̄g kə́ Babilon kɔ̄ɔ́. Najə̄ ń Kɔ́ɔ̄ɓē əda ní n noó.

⁵ Jeremi *nge koō ta tél əda Hanania *nge koō ta, ta kum *ngé tun̄ yá̰á̰ gə̄ tə́ ō, ta kum ngán *Juda gə̄ tə́ malang ń ran̄ kem *kújə yā Kɔ́ɔ̄ɓē tə́ ní ō

⁶ na: A̰á̰ā̰, ādə̄ Kɔ́ɔ̄ɓē rāā tītə̄ ń ə́dań noō, ādə̄ Kɔ́ɔ̄ɓē rāā adə̄ najə̄ gə̄ ń ə́dá ní reē udən̄ gírí, ādə̄ ni-rāā adə̄ yá̰a̰ rāā kəla kə́ kem *kújə yā Kɔ́ɔ̄ɓē tə́ ń aw̄n̄neé *Babilon tə́ ní ō, de gə̄ malang ń əhɔn̄də́ aw̄n̄ sedə́ Babilon tə́ ní ō, tél reēn̄ gogə́.

⁷ Ɓá tā ba ōō najə̄ ń m-ə́da sɔɔ̄ dɔí ḭ̄ ō, ngán *Juda gə̄ malang ō ní.

⁸ Jóo nəkɔ́ ń toō ní, *ngé koō ta gə̄ ń ɔrə̄n̄ najə̄ noḿ mā tə́ ō, noí ḭ̄ tə́ ō ní, ədan̄ i najə̄ kə́ sɔɔ̄ dɔ ɓē kə́ ngá̰ý gə̄ ō, ɓē ko̰o̰ kə́ bo gə̄ ō, adə̄ tāān̄ de gə̄ i najə̄ rɔ̄ɔ̄ ō, yá̰á̰ kə́ to kum kaȳ aĺ ō, mo̰y ngāl̄bɔ̄gīí ō.

⁹ Ba ré *nge koō ta kógə̄ḿ ɔr̄ najə̄ kə́ dɔ lɔm tə́ anī, i dan ń najə̄ kɔrə̄n reē udə gírí ní n de gə̄ a gerə̄n̄ kadə̄ i Kɔ́ɔ̄ɓē n əlan rɔ̄kum ní.

¹⁰ Tā anī Hanania *nge koō ta ɔr̄ njúkə́ kə́ míndə Jeremi *nge koō ta tə́ ba tétə̄ naā tə́.

¹¹ Hanania *nge koō ta əda ta kum ngán *Juda gə̄ tə́ malang na: Najə̄ ń Kɔ́ɔ̄ɓē əda ní n toó: Ɓāl̄ jōó asə dejə anī, m-ā m̄-tétə̄ njúkə yā Nabukodonosor mban̄g kə́ *Babilon tə́ ō, m-ā m-ɔ̄r̄ njúkə́ kə́ míndə́ nápar de gə̄ tə́ malang kɔ̄ɔ́ ō i tītə̄ ń noō. Loo ń noō tə́ Jeremi *nge koō ta ɔtə aw̄.

¹² Dan ń Hanania *nge koō ta tetə njúkə́ kə́ míndə Jeremi *nge koō ta tə́ oy anī, Kɔ́ɔ̄ɓē ɔr̄ najə̄ kə Jeremi ədan na:

¹³ Āw̄ ə́da Hanania na: Najə̄ ń mā Kɔ́ɔ̄ɓē m-ə́dá ní n toó: Ī-tetə sáa kāgə̄ naā tə́ kɔ̄ɔ́ ɓá ní, ī-mbél̄ gíŕdə́ kə sáā gində̄ gēé.

¹⁴ Tɔdɔ̄ najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel əda ní n toó: I njúkə gində̄ n m-ā m-ə̄nī míndə́ nápar de gə̄ malang ń toō tə́ yā kadə̄ rāān̄eé kəla adə̄n̄ Nabukodonosor mban̄g kə́ *Babilon tə́ ní, a rāān̄ kəla yā kadə̄n. M-ā m-ə́la dā̰ gə̄ kə́ bembeé gə̄gē kem jīn tə́.

¹⁵ Tā anī, Jeremi əda Hanania na: Hanania ī-nēl̄ mbīí ōōń. Kɔ́ɔ̄ɓē əlaī alé. I ḭ̄ n ā ī-rāā kadə̄ gír de gə̄ ń toō gólə̄n̄ rɔ̄də́ kə najə̄ kə́ rɔ̄kum aĺ gə̄ ní.

¹⁶ I tām̄ ń toō tə́ n Kɔ́ɔ̄ɓē ɔr̄ najə̄ əda na: M-ā m̄-tə̄ɓāī kɔ̄ɔ́ dɔ nang tə́ ní. Ā óy kem ɓāl̄ ń toō tə́ tɔdɔ̄ ī-sə̄lā de gə̄ kə najə̄ kə́ taí tə́ kadə̄ mbātə́n̄ koō ta Kɔ́ɔ̄ɓē.

¹⁷ Hanania *nge koō ta oy kem ɓāl̄ nəkɔ́ ń noō tə́ kə nāā kə́ nge ko̰ sīrí.