JEREMI 23 - Bible sar

Mban̄g kə́ nge kajə de gə̄

¹ Yá̰á̰ kə́ to kum kaȳ aĺ a teē dɔ ngé kul̄ yá̰a̰ gə̄ ń əya̰n̄ yá̰a̰ kul̄ yāḿ gə̄ adə̄ ongə̄n̄ ō, tadə́ tḭ̄ḭ̄ ō ní. Najə̄ ń Kɔ́ɔ̄ɓē əda ní n noó.

² I tām̄ ń toō tə́ n najə̄ ń Kɔ́ɔ̄ɓē Nə́ɓā yā *Israel əda ngé kul̄ yá̰á̰ gə̄ ń i ngé ngɔ̄m̄ gír deē yāḿ gə̄ ní n toó ní: Sḭḭ̄ əya̰ī yá̰a̰ kul̄ yāḿ gə̄ kɔ̄ɔ́ adə̄ aw̄n̄ kə̄ loo gə̄ tə́. Ba mā m-ə̄ndā kumḿ gíŕsí tə́ yā kəndasí tām̄ yá̰a̰ rāāsí kə́ gōtə́ aĺ gə̄ tə́. Najə̄ ń Kɔ́ɔ̄ɓē əda ní n noó.

³ Mā m-ā m̄-kán̄ nja gotə yá̰a̰ kul̄ yāḿ gə̄ ń m̄-tə̄ndā m̄-tḭ̄ḭ̄də́ kə̄ gō ɓē gēé ní naā tə́ malang. M-ā m̄-tél yā reē sedə́ gogə́ dɔ mu kə́ mbōl̄ tə́. A ojən̄ naā ngá̰ý.

⁴ M-ā m-ādə̄də́ ngé kul̄ yá̰a̰ gə̄ kadə̄ a aw̄n̄ sedə́ ko̰ó̰. A ɓōlə́n̄ to̰ aĺ ō, yá̰a̰ a a̰ȳ ndíĺdə́ to̰ aĺ ō, ta kógə̄ḿ a tḭ̄ḭ̄ aĺ ō. Najə̄ ń Kɔ́ɔ̄ɓē əda ní n noó.

⁵ Á̰a̰ī, kem ndɔ̄ gə̄ ń a reēn̄ noó tə́ ní, m-ā m̄-rāā kadə̄ ngōn̄ kaa Dabid kógə̄ḿ kə́ súmūú a ḭḭ dɔɔ́. Mban̄g kógə̄ḿ a ḭḭ yā ko̰o̰ ɓē ba a rāā yá̰a̰ i kə kum kedēé. A rɔ̄ɔ̄ dɔ yá̰á̰ kə́ súmūú tə́ ō, yá̰á̰ kə́ gōtə́ tə́ ō, kem ɓēé.

⁶ Ɓāl̄ yān tə́ ní, ngán *Juda gə̄ a ajən̄ ō, ngán *Israel gə̄ a ndin̄ kanjə̄ sōl̄ yá̰á̰ kógə̄ḿ ō. Ōōī rī ń a ɓār̄nən̄neé ní: Kɔ́ɔ̄ɓē i gōtə́ yājí.

⁷ Najə̄ ń toō ń na Kɔ́ɔ̄ɓē kə́ nge rāā kadə̄ ngán Israel gə̄ teēn̄ kem ɓē kə́ Ejiptə tə́ kɔ̄ɔ́ na ndi kə kumneé noō ní de gə̄ a ton̄ dan kəda to̰ alé, ba á̰a̰ī, kem ndɔ̄ gə̄ ń a reēn̄ noō tə́ ní.

⁸ A ədan̄ na: Kɔ́ɔ̄ɓē ń ɔr̄ ngán Israel gə̄ kɔ̄ɔ́ dɔ nang kə́ mbɔ́r ɓē kə́ ko̰ó̰ tə́ ō, kem ɓē gə̄ malang ń ni tə̄ndā tḭ̄ḭ̄də́ tū tə́ tə́ ní ō, ba tél reē sedə́ kadə̄ ndin̄ dɔ nang yādə́ tə́ ō ní, ni-ndi kə kumneé noō. Najə̄ ń Kɔ́ɔ̄ɓē əda ní n noó.

Ngé koō ta kə́ rɔ̄kum aĺ gə̄

⁹ Jeremi ɔr̄ najə̄ dɔ *ngé koō ta gə̄ tə́ əda na: Ngarā̰ kemḿ nujə ō, m̄-ndew yakə yakə ō. m̄-to tītə̄ nge kasə rāā ń kasə *nduú rāān ngá̰ý noō beé, najə̄ yā Kɔ́ɔ̄ɓē tə́ ō, tām̄ najə̄ kə́ *táĺ gə̄ tə́ ō.

¹⁰ De gə̄ malang kə́ kem ɓēé rāān̄ rāȳ, adə̄ ɓē nujə ō, ndɔ̄ĺ i dɔ tə́ ō. Yá̰a̰ tutə malang loo ń yá̰a̰ kul̄ gə̄ a o̰o̰n̄ tū tə́ ní. O̰o̰ de gə̄ i ta rāā yá̰á̰ kə́ majaĺ ō, əhɔn̄ rɔ̄də́ tɔgə i ta nujə loo ō ngóy.

¹¹ Ngé koō ta gə̄ ō, *ngé tun̄ yá̰a̰ gə̄ ō nujən̄ háĺdə́ adə̄ m-á̰a̰ kem ndul yādə́ kem kújə yāḿ tə́ gə̄gē. Najə̄ ń Kɔ́ɔ̄ɓē əda ní n noó.

¹² Ní loo a ndəte sedə́ dɔ róbə yādə́ gə̄ tə́ ō, a ndɔmə̄n̄ kum loo kə́ risə til tə́ ō, a tə́sōn̄ ō. M-ā m̄-rāā kadə̄ yá̰á̰ kə́ to kum kaȳ aĺ əso dɔdə́ tə́, kem ɓāl̄ ń m-ā m-ādə̄ a ɔjəmə̄nneé kəla rāādə́ gə̄ tə́ ní. Najə̄ ń Kɔ́ɔ̄ɓē əda ní n noó.

Ngé koō ta kə́ majən̄ aĺ tɔȳ ngé kə́ Samari gə̄

¹³ M-á̰á̰ yá̰á̰ kə́ ngɔr mbiti gə̄ rɔ̄ *ngé koō ta kə́ Samari tə́ gə̄ tə́. Nin̄ ɔrə̄n̄ najə̄ kə rī *Baal adə̄ gír deē yāḿ gə̄ ń i *Israel gə̄ ní ndɔmə̄n̄ róbə.

¹⁴ Banī m-á̰á̰ yá̰a̰ gə̄ kə́ majaĺ kə́ to ɓōĺ ngá̰ý rɔ̄ *ngé koō ta kə́ Jerusalem tə́ gə̄ tə́. Nin̄ ɓōkə́n̄ rɔ̄də́ kem rāȳ tə́ ō, ɔrə̄n̄ najə̄ kə́ rɔ̄kum aĺ gə̄ ō. Ənīn̄ najə̄ kə̄ gíŕ ngé rāā háĺ kə́ majaĺ gə̄ tə́, adə̄ de kə́ kəya̰ ta kem ndul yān gətóo. M-á̰a̰ kadə̄ de gə̄ malang tél rāān̄ yá̰a̰ i tītə̄ de kə́ Sodom tə́ gə̄ ō, de kə́ kem ɓēé gə̄ tél rāān̄ yá̰a̰ i tītə̄ ngé kə́ Gomor tə́ gə̄ ō,

¹⁵ Anī Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ kə́ dɔ *ngé koō ta gə̄ tə́ əda na: M-ā m-ādə̄də́ man̄ ngəra kāgə̄ kə́ katə̄ kárárá ō, man̄ kə́ yḛl kum ō, kadə̄ a̰ȳn̄, tɔdɔ̄ i *ngé koō ta kə́ Jerusalem tə́ gə̄ n ndóōn̄ ɓē kə taá malang loo kim̄ Nə́ɓā ní.

Ngé koō ta kə́ ngé sor̄ gə̄

¹⁶ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Ə̄ndāī mbīsí gír najə̄ ń *ngé koō ta gə̄ ədan̄sí ní tə́ alé. Tɔdɔ̄ nin̄ gólə̄n̄ i kumsí. Yá̰a̰ gə̄ ń a̰a̰n̄ á ənīn̄sí gotə ní i gír̄ yādə́ nin̄ kɔ́ gə̄. Yá̰a̰ ń noō teē i ta Kɔ́ɔ̄ɓē tə́ alé.

¹⁷ Nin̄ nāān̄ kəda ngé gə̄ ń kídə̄n̄ najə̄ yā Kɔ́ɔ̄ɓē ní na, Kɔ́ɔ̄ɓē əda na: Yá̰a̰ malang a njə̄rā majə tām̄ yāsí tə́. Nin̄ ədan̄ náā nəkɔ́ ń a rāā dɔ ngan̄g kə̄ non tə́ ní na: Yá̰á̰ kə́ to kum kaȳ aĺ a əsō dɔí tə́ alé.

¹⁸ I náā n ndi loo koō naā dɔ najə̄ tə́ kə Kɔ́ɔ̄ɓēé adə̄ a̰a̰ yá̰a̰ rāān ō, oō najə̄ kɔrə̄n ō ní? I náā n nēl̄ mbīn gō najə̄ kɔrə̄n tə́ ō, oō ō ní?

(Jeremi əda na)

¹⁹ Á̰a̰ī nél ń əla kə tɔ́gɔ́ noō i wōn̄g yā Kɔ́ɔ̄ɓē kə́ ngá̰ý n ḭḭ seneé ní. Nél balway əla kə ngangá ngá̰ý kum kə̄ dɔ de gə̄ ń najə̄ i dɔdə́ tə́ ní.

²⁰ Wōn̄g yā Kɔ́ɔ̄ɓē a tetə alé, bátə́ kadə̄ rāań yá̰á̰ ń núm̄ ní adə̄ udə gírí majə. Ndɔ̄ń tə́ anī ā ī-gerī kum yá̰á̰ ní ɓáý.

(Kɔ́ɔ̄ɓē əda na)

²¹ M-ə́lá *ngé koō ta gə̄ ń noō alé, banī unən̄ ngɔ̄də̄ aw̄n̄. M-ɔ̄r̄ najə̄ sedə́ alé, ba oōn̄ najə̄ ədan̄.

²² Nə́ngētə́ gēé ndin̄ loo koō naā dɔ najə̄ tə́ seḿ anī. A gerə̄n̄ loo kɔr̄ najə̄ yāḿ kadə̄ gír deē yāḿ gə̄ oōn̄ ō, a gerə̄n̄ loo rāā sedə́ kadə̄ əya̰n̄ gō háĺdə́ kə́ majaĺ gə̄ ō, kəla rāādə́ kə́ majaĺ gə̄ ō kɔ̄ɔ́.

Kɔ́ɔ̄ɓē ndi i kə̄ loo gə̄ tə́ malang

²³ Mā i Nə́ɓā kə́ m̄-ndi i ngɔr rɔ̄ de gə̄ tə́ ngóy a? m̄-ndi sa̰y rɔ̄də́ tə́ ō aĺ a? Najə̄ ń Kɔ́ɔ̄ɓē əda ní n noó.

²⁴ Deē a ɓɔ̄ɔ̄ rɔ̄n kɔgə̄ loo yān tə́ kanjə̄ kadə̄ mā m-á̰a̰n a? Najə̄ ń Kɔ́ɔ̄ɓē əda ní n noó. I mā n m̄-ndi m̄-taā kem loo kə́ dɔ rā̰ tə́ ō, kə́ dɔ nang tə́ ō ní aĺ a? Najə̄ ń Kɔ́ɔ̄ɓē əda ní n noó.

Kádə́ yá̰a̰ ō, kumən ō ton̄ tītə̄ naā alé

²⁵ M-ōō najə̄ kə́ sor̄ gə̄ ń *ngé koō ta gə̄ ədan̄ kə rīḿ na: Nī rāām̄, nī rāām̄ ní.

²⁶ Ngé koō ta gə̄ ń toō a sorə̄n̄ kə̄ nodə́ tə́ i bátə́ ta kə́ rá? A gólə̄n̄ loo kə̄ nodə́ tə́ i bátə́ ta kə́ rá?

²⁷ Nin̄ gírə̄n̄ kadə̄ nī yādə́ gə̄ ń a ənīn̄ gotə adə̄n̄ naā noó gól̄ gír deē yāḿ gə̄ adə̄ dɔdə́ ndígə̄nal dɔ rīḿ tə́ tītə̄ ń ɓesə̄ *Baal góləń kaadə́ gə̄ adə̄ dɔdə́ ndigənal dɔ rīḿ tə́ ní.

²⁸ Ādə̄ *nge koō ta ń nī rāān ní, ənī gotə nī yān ní, ba ādə̄ deē ń m-ə̄ndā najə̄ yāḿ tan tə́ ní, ənī mbēr̄ dɔ ngarā̰ kum najə̄ ní tə́ kə ndū boó. Kádə́ yá̰á̰ ō, kumən ō ton̄ tītə̄ naā a? Najə̄ ń Kɔ́ɔ̄ɓē əda ní n noó.

²⁹ Najə̄ yāḿ to i tītə̄ hor kə́ o̰o̰ loo ō, i tītə̄ mūú kə́ tɔ̄ɔ̄ mbal̄ adə̄ tetə ndujə̄ ō aĺ a? Najə̄ ń Kɔ́ɔ̄ɓē əda ní n noó.

³⁰ Adə̄ m-ā m-ə́ndá *ngé koō ta gə̄ ń ɓogən̄ najə̄ yāḿ gír naā tə́ ní. Najə̄ ń Kɔ́ɔ̄ɓē əda ní n noó.

³¹ M-ā m-ə́ndá *ngé koō ta gə̄ ń teēn̄ tadə́ ɔrə̄n̄neé najə̄ kə rīḿ ní.

³² M-ā m-ə́ndá *ngé koō ta gə̄ ń a nīn̄ nī kə́ rɔ̄kum aĺ gə̄ ō, a ənīn̄ gotə a sorə̄neé ō, a tə́dan̄ najə̄ kə́ kanjə̄ kumən gə̄ ō, adə̄ gír deē yāḿ gə̄ ndɔmə̄n̄neé ta róbə ní. Tɔdɔ̄ mā m-ə́ládə́ aĺ ō, m̄-mēr̄də́ rāā yá̰a̰ kógə̄ḿ aĺ ō. M-á̰á̰ yá̰á̰ sḛ́ý kə́ nin̄ asən̄ rāā tām̄ yā gír de gə̄ ń toō tə́ aĺ ō. Najə̄ ń Kɔ́ɔ̄ɓē əda ní n noó.

Najə̄ yā Kɔ́ɔ̄ɓē i yá̰á̰ kətō kə́ ɔȳ ngá̰ý a?

³³ Ré de gə̄ ń toō adə̄ i *nge koō ta, aláa i *nge tun̄ yá̰a̰ dəjeī najə̄ əda na: I yá̰á̰ rí yā Kɔ́ɔ̄ɓē n i yá̰a̰ kətō kə́ ɔȳ ngá̰ý ní anī, ə́dan na: I sḭḭ̄ n i yá̰a̰ kətō kə́ ɔȳ ngá̰ý ní, adə̄ m-ā m̄-mbātə́sí kɔ̄ɔ́. Najə̄ ń Kɔ́ɔ̄ɓē əda ní n noó.

³⁴ Ré *nge koō ta, aláa *nge tun̄ yá̰a̰, aláa deē kógə̄ḿ kə́ dan ngán *Israel gə̄ tə́ əda najə̄ ń toō ń na: Yá̰a̰ kətō yā Kɔ́ɔ̄ɓē na i yá̰á̰ kə́ ɔȳ ngá̰ý ní anī, m-ā m̄-rāā kɔ́ɔ̄ yá̰á̰ kə́ tōr̄ ō. M-ā m̄-rāā gír kojə yān yá̰á̰ kə́ tōr̄ ō.

³⁵ Najə̄ ń ā ə́daī naā dɔ dáńsí tə́ ní n toó: Kɔ́ɔ̄ɓē tél əda na i rí? Kɔ́ɔ̄ɓē ɔr̄ najə̄ i əda na i rí?

³⁶ Ba najə̄ ń na yá̰a̰ kətō kə́ kɔȳ ngá̰ý yā Kɔ́ɔ̄ɓē ní a teē tasí tə́ to̰ alé, i najə̄ kɔrsí gə̄ n a tél yá̰a̰ kətō kə́ kɔȳ ngá̰ý yāsí kógə̄ḿ kógə̄ḿ ní, tɔdɔ̄ sḭḭ̄ ī-nujiī najə̄ yā Nə́ɓā kə́ ndi kə kumneé. Ni ń i Kɔ́ɔ̄ɓē kə́ bo kə́ tɔ́gən i ngá̰ý á i Nə́ɓā yājí ní.

³⁷ Yá̰á̰ ń ā ə́da *nge koō ta ní n toó: Kɔ́ɔ̄ɓē tél ədaī na i rí? Kɔ́ɔ̄ɓē ɔr̄ najə̄ əda na i rí?

³⁸ Ba ré sḭḭ̄ ə́daī najə̄ ń na yá̰a̰ kətō kə́ kɔȳ yā Kɔ́ɔ̄ɓē ní anī, á̰a̰ī Kɔ́ɔ̄ɓē ɔr̄ najə̄ i tītə̄ ń toō beé: Sḭḭ̄ ə́daī najə̄ ń Kɔ́ɔ̄ɓē ɔgə̄sí kəda á na i yá̰a̰ kətō kə́ kɔȳ yā Kɔ́ɔ̄ɓē adə̄ teē tasí tə́ na i yá̰a̰ kətō kə́ kɔȳ yā Kɔ́ɔ̄ɓē kɔ̄ɔ́ ɓá ní,

³⁹ á̰a̰ī m-ā m-ə́yá̰sí kɔ̄ɔ́ ō, m-ā m̄-tə̄ɓāsí kɔ̄ɔ́ ta kumḿ tə́ ō. M-ā m-ə́yá̰sí sḭḭ̄ ō, ɓē ń m-ādə̄sí ō, m-ādə̄ kaasí gə̄ ō ní kɔ̄ɔ́.

⁴⁰ M-ā m̄-rāā kadə̄ de gə̄ a kídə̄n̄sí ngándáńg ō, a əlan̄ rɔ̄sɔl̄ dɔsí tə́ kə́ mjɔ́ḿ gə̄ tə́ ō. Dɔ deē a ndígə̄nal dɔ tə́ alé.