JEREMI 20 - Bible sar

Do̰ō̰n̄ Jeremi tū kāgə̄ tə́

¹ Pasəhur *nge tun̄ yá̰á̰ ń i ngōn̄ Imer ní, i nge ndi dɔ kəla malang kə́ kem *kújə yā Kɔ́ɔ̄ɓē tə́. Ni oō najə̄ gə̄ malang ń Jeremi *nge koō ta ɔr̄ ní,

² anī nelə̄n alé, adə̄ ənda mbɔ́rən ō, adə̄ do̰ō̰nən̄ tū kāgə̄ tə́ ta róbə́ kə́ dɔɔ́ ń a ɓārə́n̄ na i ta róbə yā Benjamḛ ní tə́ ō, adə̄ i ta róbə́ kə́ yā kudəń kə̄ kem *kújə yā Kɔ́ɔ̄ɓē tə́.

³ Dan ń teē kə ndɔ̄ kə́ nge ko̰ jōó anī, Pasəhur reē tútən tə́ tū kāgə̄ tə́. Jeremi ədan na: Kɔ́ɔ̄ɓē ɓāríī na i Pasur to̰ alé, ba na i Ɓōĺ kə́ al̄ naā kə̄ loo gə̄ tə́ malang.

⁴ Tɔdɔ̄ najə̄ ń Kɔ́ɔ̄ɓē əda ní n toó: Á̰a̰ā̰, m-ā m-ādə̄ yá̰á̰ kə́ to ɓōĺ ngá̰ý a əsō dɔí īkɔ́ tə́ ō, madí gə̄ tə́ ō. Madə̄ ba̰ā̰də́ gə̄ a tɔ̄lə̄n̄də́ kə kaskaraá kadə̄ ā á̰a̰ā̰ kə kumií. M-ā m-ə́la de kə́ *Juda tə́ gə̄ jī mban̄g kə́ *Babilon tə́. A əhɔdə́ dɔ gúú tə́ yā kaw̄ sedə́ Babilon ō, a tɔ̄l̄də́ kə kaskaraá ō.

⁵ Yá̰á̰ kə́ kəndā kon̄ tə́ gə̄ malang kə́ kem ɓē ń toō tə́ ō, yá̰a̰ gə̄ ń teēn̄ tū kəla rāān gə̄ tə́ malang ō, yá̰a̰ yān malang kə́ gātə̄də́ i ngá̰ý gə̄ ō, yá̰a̰ gə̄ malang kə́ kem kújə ngɔ̄m̄ yá̰a̰ kənge gə̄ yā mban̄g kə́ Juda tə́ gə̄ ō ní, m-ā m-ə́ya̰ m-ādə̄ madə̄ ba̰ā̰də́ gə̄ kadə̄ ɔyn̄ dɔ gúú tə́. A ɔyn̄ nánáḿ yā kaw̄ń Babilon.

⁶ Banī ḭ̄ Pasəhur ō, de gə̄ malang ń ndin̄ kem kújə yāí tə́ ō ní, a əhɔn̄sí yā kaw̄ sesí dɔ ɓē kə́ rang tə́. Ā āw̄ yā kugə̄ Babilon ō, ā óy i noō ō. A dubə̄nī ḭ̄ ō, madí gə̄ malang ń ī-gól̄də́ kə najə̄ kɔrīí kə́ loo *nge koō ta kə́ rɔ̄kum aĺ tə́ ní ō i loo ń noō tə́.

Jeremi nōō kə̄ dɔ Nə́ɓā tə́

⁷ Kɔ́ɔ̄ɓē ḭ̄ ī-kɔ́ləm̄ ō, m-ə́ya̰ rɔ̄ḿ adə̄ ī-kɔ́l ō, ḭ̄ ī-ngan̄g ī-tɔȳm̄, adə̄ ī-tetəm̄ rɔ̄ɔ̄. De gə̄ lurmə̄n̄ kə kum mbang gə̄ malang, nin̄ malang əgōmə̄n̄ ō.

⁸ Ré najə̄ to kadə̄ m-ə́da ɓá anī i gáŕ kadə̄ m̄-ɓāríī kadə̄ ī-diīm̄ ō, kadə̄ m-ə́ga kɔŕ ō, na dɔ́nɔ ō, dəngáy ō rāām̄ ngá̰ý. Tɔdɔ̄ tájə̄ ndū ō, lur loo ō, asəm̄ nák gír najə̄ yā Kɔ́ɔ̄ɓē tə́ kə kum mbang gə̄ malang.

⁹ Ba ré m-ə́da na m-ā m̄-gír̄ dɔ tə́ to̰ aĺ ō, m̄-rāā rɔ̄ḿ i kújə dəngáý tə́ tām̄ yā najə̄ ní tə́. M-ə́hɔ rɔ̄ḿ tɔgə yā kɔgə̄n teē ndágá tā ba tɔ́gə́ḿ asə alé.

¹⁰ M-ōō najə̄ kə́ to ka̰ȳ ndíl gə̄ ń kósə de gə̄ ɔrə̄n̄ ní, nin̄ ədan̄ na: Ɓōĺ kə́ al̄ naā i kə̄ loo gə̄ tə́ malang. Ī-teēī kə gírneé ndágá, j-a jə-teēī kə gírneé. Madə̄ taḿ gə̄ ń m̄-gḛydə́ ngá̰ý ní ngóōn̄ taḿ sḛḛ yā ka̰a̰ ké tɔ́gə́ḿ a gətóo i rə́ngáý tə́ wa. Nin̄ ədan̄ na: Majanī yá̰á̰ kógə̄ḿ a gól̄ mbóo deē ń noō ngɔr, kadə̄ j-a jə-rāāī yá̰á̰ ń kemjí ndigə ní ta ō, j-a jə-rāāī ba̰ā̰ seneé ō.

¹¹ Banī Kɔ́ɔ̄ɓē i seḿ tītə̄ go̰ rɔ̄ɔ̄ kə́ tɔ́gən i ngá̰ý. adə̄ nja ngé rāāḿ ndoō tə́ gə̄ a əhɔ nang aĺ ō, asən̄ rāā yá̰á̰ ń a sāān̄ rāā ní aĺ ō. a asən̄ alé, adə̄ rɔ̄də́ a sɔl̄də́ ngá̰ý. I rɔ̄sɔl̄ kə́ a to ta kaw̄ jóo ō, dɔ deē a ndígə̄nal dɔ tə́ aĺ ō.

¹² Kɔ́ɔ̄ɓē kə́ bo kə́ tɔ́gən i ngá̰ý, ḭ̄ ń ā ə̄ndā ma̰ȳ de kə́ súmūú ō, ā á̰á̰ gír̄ yā de gə̄ ō, ngarā̰ kemdə́ ō ní, ādə̄ m-á̰a̰ ba̰ā̰ ń ā ī-rāā sedə́ ní, tɔdɔ̄ m-ə́ya̰ najə̄ yāḿ i kem jīí ḭ̄ tə́.

¹³ Ə̄nīī pā tām̄ yā Kɔ́ɔ̄ɓē tə́, ɔ́siī gɔn Kɔ́ɔ̄ɓē, tɔdɔ̄ ni-ɔr̄ ngé ndoō gə̄ jī ngé rāā majaĺ gə̄ tə́.

¹⁴ Ādə̄ ndɔ̄ĺ i dɔ ndɔ̄ kojəḿ tə́ ō, ādə̄ deē tɔ́r̄ tan dɔ ndɔ̄ ń ní tə́ aĺ ō.

¹⁵ Ādə̄ ndɔ̄ĺ i dɔ deē ń aw̄ əda bɔbə́ḿ na: Ojən̄ ngōn̄ kə́ dəngam kógə̄ḿ adə̄nī, adə̄ adə̄n rɔ̄nel̄ ngá̰ý ní.

¹⁶ Ādə̄ yá̰á̰ ń rāā ɓē gə̄ ń Kɔ́ɔ̄ɓē ɓéngə̄lēdə́ nang tə́ kɔ̄ɔ́ kanjə̄ ndə̄ngā rɔ̄n ní rāā deē ń noō. Ādə̄ əgan̄ kɔŕ dḭḭ̄ naā ta mbīn tə́ kə ndɔ̄ý ō, ādə̄ əgan̄ kɔŕ rɔ̄ɔ̄ ta mbīn tə́ dan kadə ndaá ō.

¹⁷ Ba i tām̄ rí tə́ á Kɔ́ɔ̄ɓē rāām̄ ādə̄ m-óy kem kó̰ó̰ḿ tə́ aĺ ní. Nə́ngē tə́ kem kó̰ó̰ḿ tɔgə aĺ bátə́ adə̄ tél bāá yoḿ ɗer aĺ na i rí ō.

¹⁸ I tām̄ rí tə́ á m̄-teē kem kó̰ó̰ḿ tə́, yā kadə̄ m-á̰á̰ tápə̄ ō, kadə̄ wurəḿ ɔləm̄ ō, yā kadə̄ m̄-ndi i kə rɔ̄sɔlɔ̄ɔ́ kə dɔ ndɔ̄ gə̄ ń noō malang ō ní?