JEREMI 2 - Bible sar

Kəɓa man̄ kə́ unjə̄ ō, bəlo taā man̄ ndī kə́ njár̄ gə̄ ō

¹ Kɔ́ɔ̄ɓē ɔr̄ najə̄ seḿ əda na:

² Āw̄, ə́ga kɔŕ ta mbī de gə̄ kə́ Jerusalem tə́: Najə̄ ń Kɔ́ɔ̄ɓē əda ní n toó: m̄-ter̄ kemií dɔ kəhɔ kə́ ə́hɔ gō Kɔ́ɔ̄ɓē adə̄ gan̄g dan mandií tə́ ō, dɔ tár yāí tə́ dan taí ngaa kijə tə́ ō. Ḭ̄ ún gōḿ kem dəla loo tə́ ō, dɔ nang kə́ deē ndɔr̄ tū tə́ aĺ tə́ ō.

³ *Israel i yá̰á̰ kə́ kɔr̄ kam̄ kəndā tayā tām̄ yā Kɔ́ɔ̄ɓē tə́. I kōō gə̄ kə́ ta kəga dɔ tām̄ yān tə́, náā nəkɔ́ ń əsa kōō kə́ ta kəga dɔ ngeé ń toō ní najə̄ i dɔ tə́. Yá̰á̰ kə́ to kum kaȳ aĺ əsō dɔn tə́. Najə̄ ń Kɔ́ɔ̄ɓē əda ní n noó.

⁴ Ōōī najə̄ kɔr̄ Kɔ́ɔ̄ɓē, sḭḭ̄, deē yā Jakob gə̄, naā tə́ kə de gə̄ kə́ gír kojə yā Israel tə́ malang.

⁵ Kɔ́ɔ̄ɓē ɔr̄ najə̄ i tītə̄ ń toō beé əda na: I rí kə́ gōtə́ aĺ n kaasí gə̄ əngen̄ rɔ̄ḿ tə́, kadə̄ nin̄ ɔrə̄n̄neé rɔ̄də́ kɔ̄ɔ́ sa̰y rɔ̄ḿ tə́ ní? Nin̄ ngɔ̄də̄n̄ gō yá̰á̰ kə́ kanjə̄ kumən gə̄ tə́. Ń toō nin̄ télən̄ yá̰á̰ kə́ kanjə̄ kumən ō.

⁶ Nin̄ mbātə́n̄ kəda na: Kɔ́ɔ̄ɓē ń teē sejí kɔ̄ɔ́ kem ɓē kə́ Ejiptə tə́ ō, ni i nge ɔr̄ nojí kem dəla loo tə́ ō, dɔ nang kə́ i kə̄sā gə̄ ō, i mbḛ̄ gə̄ ō n i tū tə́ ō, kem ɓē kə́ loo laa ō, ndíl yo ō, i tū tə́ ō, kem ɓē ń deē kógə̄ḿ kə́ mān̄ tū tə́ gətóo ō, kem ɓē ń deē kógə̄ḿ kə́ ndi tū tə́ gətóo ō ní i rá?

⁷ m̄-rāā adə̄ údiī kem ɓē kə́ kāgə̄ kə́ kəndā gə̄ i ngá̰ý tū tə́, yā kadə̄ sḭḭ̄ ī-nāī kan̄ kāgə̄ kə́ nel̄ gə̄. Banī dan ń sḭḭ̄ údiī kem ɓē nge ń toō tə́ kɔ̄ɔ́ anī, sḭḭ̄ ī-tákī ɓē yāḿ kə majaĺ ō, sḭḭ̄ ī-rāāī yá̰á̰ kə́ majaĺ ngá̰ý kə yá̰a̰ yāḿ ō.

⁸ Ngé tun̄ yá̰a̰ gə̄ mbātén̄ kəda na: Kɔ́ɔ̄ɓē i rá? Ngé ger̄ *ndū najə̄ gə̄ gerə̄mə̄n̄ alé. Ngé ngɔ̄m̄ yá̰a̰ kul̄ gə̄ mbātə́mə̄n̄ kɔ̄ɔ́. Ngé koō ta gə̄ ɔrə̄n̄ najə̄ kə rī ɓesə̄ *Baal ō, nin̄ a̰ȳn̄ ngɔ̄də̄ gō nə́ɓā gə̄ kə́ kanjə̄ kumən gə̄ tə́ ō.

⁹ I tām̄ ń toō tə́ n m-ā m̄-rāā sarya sesí ní. Najə̄ ń Kɔ́ɔ̄ɓē əda ní n noó. M-ā m̄-rāā sarya kə ngán kaasí gēé ō.

¹⁰ Ī-mān̄ āwī dor̄ gə̄ kə́ Kitim tə́ á̰a̰ī ō. Ə́laī de gə̄ Kedar ō, ī-dəjeī gír najə̄ kə gōó ō. Ə̄ndāī ma̰ȳ á̰a̰ī ké yá̰á̰ kə́ tītə̄ ń noō rāā yá̰a̰ aĺ ɓáý wa.

¹¹ Napár de gə̄ kə́ mbélə̄n̄ gíŕ nə́ɓā gə̄ ndin̄ noó a? Tá nin̄ i nə́ɓā gə̄ aĺ gə̄gē ɓáý. Banī gír deē yāḿ gə̄ ní, nin̄ a̰a̰n̄ kɔsə gɔn yāḿ gerə̄n̄ majə, ɓá tā ba nin̄-mbélə̄n̄ gírə́ḿ kə nə́ɓā kə́ rang gə̄ kə́ asən̄ rāā yá̰a̰ tām̄ yādə́ tə́ alé.

¹² Sḭḭ̄, dɔ rā̰ gə̄, ādə̄ yá̰á̰ ń noō ɔr kumsí. Ādə̄ ɓōĺ rāāsí tāmə̄n̄ n tə́ ō, ādə̄ kə̄ngā sā gān̄gsí ō. Najə̄ ń Kɔ́ɔ̄ɓē əda ní n noó.

¹³ Rɔ̄kum, yá̰á̰ kə́ gōtə́ aĺ ń gír deē yāḿ gə̄ rāān̄ ní, gír i jōó: Nin̄ mbātə́mə̄n̄ kɔ̄ɔ́, mā ń i kəɓa man̄ kə́ kə kumuú ní. Tām̄ ndērə̄n̄ bəlo taā man̄ ndī gə̄, bəlo taā man̄ ndī kə́ njár̄ kɔ̄ɔ́ gə̄ kə́ man̄ to kemdə́ tə́ alé.

I yá̰á̰ kə́ to wur katə̄ ngá̰ý kadə̄ deē mbātə́ Kɔ́ɔ̄ɓē

¹⁴ *Israel ní i ɓəlo a, ojənən̄ i ɓəloó a? I tām̄ rí tə́ á ɓē kə́ rang gə̄ lángə̄nən̄ ta naā tə́ tītə̄ dā̰ beé ní?

¹⁵ Ngán ɓɔl gə̄ do̰o̰nən̄ rɔ̄ɔ̄, nin̄ nōōn̄ kə kɔrɔ́. De gə̄ rāān̄ adə̄ ɓē yān nujə sák sák kɔ̄ɔ́. Əlan̄ hor dɔ ɓē bo yān gə̄ tə́, De gə̄ təgān̄ kɔ̄ɔ́ kem ɓē bo gə̄ ní tə́.

¹⁶ De gə̄ kə́ Mempis ō, Tapanes ō gə̄gē a dəsān̄ nənga dɔí.

¹⁷ Majə yá̰á̰ ń noō kə́ tām̄ yāí tə́ i rí, Ré ngá̰ý a i mbātə́ kə́ ī-mbātə́ Kɔ́ɔ̄ɓē Nə́ɓā yāí, Kum mbang ń ni i nge ndɔ́rī ta róbə́ ní tə́ aláa?

¹⁸ Ngɔlaā ní i rí n nelī ngá̰ý kum róbə́ kə́ Ejiptə tə́, kadə̄ āw̄ ā̰ȳ man̄ bā kə́ Nil tə́ ní? I rí n nelī ngá̰ý kum róbə́ kə́ Asiri tə́, Kadə̄ āw̄ ā̰ȳ man̄ kə́ bāá ní?

¹⁹ Ādə̄ yá̰á̰ kə́ gōtə́ aĺ yāí tél əndaī, ādə̄ túy taā kem yāí gɔŕyɔ̄ī. Ī-ndi kem wur kɔl tə́ ō, kem wur katə̄ tə́ ō, mbóńg ta tɔ̄l̄ ta tə́, sɔɔ̄ ń dɔ mbātə́ kə́ ī-mbātə́ Kɔ́ɔ̄ɓē Nə́ɓā yāí. Rɔ̄kum, ī-ndew to̰ aĺ bátə́ gə̄gē ta kumḿ tə́. Najə̄ ń Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý əda ní n noó.

Israel i dəyá̰ kə́ əhɔ ta kújə ngaa aĺ ō, kə́ ra dɔ ndūn tə́ aĺ ō

²⁰ Nəkɔ́ ń jóo toó ḭ̄ ā ī-tétə̄ njúkə kɔ̄ɔ́ ō, ī-gān̄g kəlā kə́ tṵ́ṵ̄īn̄neé gə̄ kɔ̄ɔ́ ō, ba ə́da na: m̄-ndigə rāā ɓəlo to̰ alé. Kə dɔ ngán mbal̄ gə̄ tə́ malang ō, kə gír kāgə̄ gə̄ kə́ to mbōl̄ gə̄ tə́ malang ō ní, ḭ̄ ī-rāā ájə́ba yā rāań ɓesə̄.

²¹ Mā m-ə̄ndāī, adə̄ ī-to tītə̄ *kāgə̄ nduú kə́ majə ngá̰ý, tītə̄ kāgə̄ kə́ majən to tayā. I ba̰ý á ī-tél kāgə̄ nduú kə́ deē ger̄ aĺ ō, kə́ kanə̄n gə̄ majən̄ aĺ ō ní.

²² Ká ré ī-ndogə̄ man̄ i kə sabūnūú aké ī-ndogə̄ man̄ i kə sabūn̄ katāá gə̄gē anī, yá̰á̰ kə́ to yḛr kum ń ī-rāā ní a to ta kumḿ tə́ ɓáý. Najə̄ ń Kɔ́ɔ̄ɓē Nə́ɓā əda ní n noó.

²³ I ba̰ý á ī-nāā kəda na: Yá̰á̰ kə́ yḛr tákə̄m̄ aĺ ō, m̄-ngɔ̄də̄ gō ɓesə̄ *Baal gə̄ tə́ aĺ ō ní? Á̰a̰ kəla rāāí kə́ kem wól loo tə́, ḭ̄kɔ́ ī-ger̄ yá̰á̰ ń ī-rāā ní. Kó̰ó̰ jámbal kə́ nge dáȳ dɔɔ́ kanjə̄ kɔr̄ koō.

²⁴ Kó̰o̰ kərō kə́ bembeé, kə́ ger̄ dəla loo majə! Dan ń ngur kadə̄ kərō kə́ bəra ḭḭ dɔn tə́ rāān á ni un sēēn kə gō nélé ní, i náā n asə dəban ní? Kɔr rāā ngé gə̄ malang ń ndəlenən̄ ní alé, nin̄ əngenən̄ kem nāā yān tə́.

²⁵ Ī-dəba aĺ anī, ā ī-tél de kə́ nge njə̄rā da njan karī ō, kem míndí a tutə ō. Banī ə́da na: Yá̰á̰ kə́ yā rāā to̰ gətóo! Nelə̄m̄ kə mbā gēé ō, m̄-ndigə ngɔ̄də̄ gōdə́ tə́ ō.

²⁶ Tītə̄ ń rɔ̄ nge ɓogə kə́ əhɔnən̄ dɔ ɓogə yá̰á̰ tə́ sɔlə̄n ní, de kə́ *Israel tə́ gə̄ rɔ̄də́ sɔl̄də́ i beé ō, nin̄ ō, mban̄g yādə́ gə̄ ō, de kə́ bo yādə́ gə̄ ō, *ngé tun̄ yá̰a̰ yādə́ gə̄ ō.

²⁷ Nin̄ ədan̄ kāgə̄ na: Ḭ̄ i bɔbə́ḿ, nin̄ ədan̄ mbal̄ na: I ḭ̄ n ójəm̄. Rɔ̄kum, nin̄ tūrə̄n̄ i gə́ra gōdə́ n ɔjəmə̄n̄ ba i nɔtə nodə́ alé. Ba dan nəkɔ́ ń yá̰á̰ kə́ to kum tō ndoō teē dɔdə́ tə́ anī, nin̄ ədamə̄n̄ na: Ḭ́ḭ dɔɔ́, ájə́jí!

²⁸ Nə́ɓā gə̄ ń ḭ̄kɔ́ ī-rāādə́ ní nin̄ i rá? Ré asən̄ kajəjí anī, ādə̄ ḭḭn̄ dɔɔ́ dan ń yá̰á̰ kə́ to kum kaȳ aĺ teē dɔí tə́ ní. Tɔdɔ̄ kutə nə́ɓā yāí gə̄ asə kə kutə ɓē bo yāí gə̄, ḭ̄ *Juda.

²⁹ I tām̄ rí tə́ á ī-rāāmī kə najá ní? Sḭḭ̄ malang ī-mbātə́mī kɔ̄ɔ́. Najə̄ ń Kɔ́ɔ̄ɓē əda ní n noó.

³⁰ M-ə́ndá ngáńsí gə̄ i ndāńg karī, nin̄ ndigən̄ kɔjə̄ ní alé. Kaskar yāsí tɔ̄l̄ *ngé koō ta yāsí gə̄ tītə̄ ɓɔl kə́ nge kəhɔ yá̰a̰.

³¹ Sḭḭ̄ de kə́ kōnīí laā gə̄, ə̄ndāī ma̰y najə̄ yā Kɔ́ɔ̄ɓē. Mā m̄-tél dəla loo tām̄ yā *Israel tə́ a? Aké ɓē yā loo kə́ ndɔ̄ɔ́ kə́ risə til nding a? I tām̄ rí tə́ á ngé kə́ dan gír deē yāḿ gə̄ tə́ ədan̄ na: Jḭḭ j-aw̄ loo nəkɔ́ ń jə-gḛy kaw̄ tū tə́ ní ō, Jḭḭ j-a jə-tél j-aw̄ rɔ̄í tə́ to̰ aĺ ō ní?

³² Dɔ ngōmandə a ndígə̄nal yá̰á̰ súū rɔ̄ yān? Dəyá̰ ń a aw̄ kə̄ ngaawaá ní, dɔn a ndígə̄nal dɔ kəlā do̰ō̰ ɓōdə̄n tə́ a? Banī ngé kə́ dan gír deē yāḿ gə̄ tə́ mbātə́mə̄n̄ dan i ngá̰ý kɔ̄ɔ́.

³³ Tītə̄ ń ḭ̄ ɔ́ĺ ngá̰ý loo njə̄rā tə́ yā sāań táŕ ní, kə́ rɔ̄kum tə́ ḭ̄ āw̄ mbóńg ādə̄ tɔ̄l̄ deē ndérī kɔ̄ɔ́.

³⁴ Mósə́ ngé rɔ̄ tō ndoō gə̄ kə́ kanjə̄ najə̄ dɔdə́ tə́ ō, kə́ ə́hɔ́də́ dɔ rāā yá̰á̰ kógə̄ḿ kə́ majaĺ tə́ aĺ gə̄ ō, aw̄ mbóńg to ta kūbə̄ yāí gə̄ tə́.

³⁵ Ḭ̄ ə́da na: Mā i kanjə̄ najə̄ dɔḿ tə́, wōn̄g yān a rāān dɔḿ tə́ to̰ alé. Banī mā m-ā m̄-rāā sarya kə́ gōtə́ seí, tɔdɔ̄ ḭ̄ ə́da na: m̄-rāā majaĺ alé.

³⁶ Tītə̄ ń ḭ̄kɔ́ ī-rāā ādə̄ de gə̄ kídīnī sɔɔ̄ ń dɔ hál koō naā loo mundə̄ tə́ yāí gə̄ ní, rɔ̄í a sɔlī ngá̰ý Ejiptə tə́ ō, Asiri tə́ ō.

³⁷ Loo ń noō tə́ ḭ̄ ā ī-kán̄ jīí dɔí tə́ yā teēń. Rɔ̄kum, Kɔ́ɔ̄ɓē mbātə́ ngé gə̄ ń ə̄nī kemií ādə̄də́ mámák ní kɔ̄ɔ́. I beé n ā ī-teēń kum tə́ ní alé.