JEREMI 19 - Bible sarJóo man̄ tɔ̄ɔ̄ 1 Kɔ́ɔ̄ɓē ɔr̄ najə̄ i tītə̄ ń toō beé: Āw̄ ī-mang jóo man̄ jī kɔdə̄ jóó tə́, ba ī-gə̄rā *kum kɔɔ̄ kə́rēý gə̄ dan ngáń *Israel gə̄ tə́ ō, dan *ngé tun̄ yá̰a̰ gə̄ tə́ ō ādə̄ aw̄n̄ seí. 2 Gō tə́ anī, ī-teē kum kə̄ wól loo kə́ Ben Hinom ń i ta róbə yā jóo man̄ kə́ tɔ̄ɔ̄ gə̄ tə́ ní kadə̄ ə̄nī mbēr̄ najə̄ gə̄ ń m-ā m-ə́daī ní loo ń noō tə́. 3 Ā ə́da na: Mban̄g kə́ *Juda tə́ gə̄ ō, sḭḭ̄ de gə̄ ń ī-ndiī Jerusalem tə́ ní ō, ōōī najə̄ yā Kɔ́ɔ̄ɓē. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel əda ní n toó: M-ā m̄-rāā kadə̄ yá̰á̰ kə́ to kum kaȳ aĺ əsō dɔ loo ń toō tə́. Adə̄ deē nəkɔ́ ń oō najə̄n anī a jənga. 4 Tɔdɔ̄ əya̰mə̄n̄ kɔ̄ɔ́, nin̄ rāān̄ loo ń toō adə̄ tél to rim kɔ̄ɔ́. Róōn̄ *yá̰a̰ ndējə̄ gə̄ horoó tū tə́ adə̄n nə́ɓā kə́ rang gə̄ kə́ nin̄ kɔ́ gə̄ ō, kaadə́ gə̄ ō, mban̄g kə́ Juda tə́ gə̄ ō gerə̄n̄də́ alé. Ɓōkə́n̄ mósə ngán gə̄ kə́ najə̄ gətóo dɔdə́ tə́ gə̄ nang tə́ adə̄ taā loo ní. 5 Rāān̄ loo kə́ kḭḭ kə̄ dɔɔ́ gə̄ kə rī ɓesə̄ *Baal ba róōn̄ ngáńdə́ gə̄ horoó dɔ tə́ adə̄nən̄. I yá̰á̰ kə́ m-ādə̄də́ ndūḿ dɔ tə́ aĺ ō, m-ɔ̄r̄ najə̄n sedə́ aĺ ō, i yá̰á̰ kə́ m̄-gír̄ dɔ tə́ aĺ ō. 6 I tām̄ najə̄ ń noō tə́ n ndɔ̄ gə̄ a reēn̄ noō kadə̄ a ɓārə́n̄ loo ń toō na i Topet to̰ aĺ ō, wól loo kə́ Ben Hinom to̰ aĺ ō, ba a ɓārə́n̄ na i wól loo tɔ̄l̄ naā ní. Najə̄ ń Kɔ́ɔ̄ɓē əda ní n noó. M-ā m̄-tɔ̄l̄də́ kə kaskaraá ta kum madə̄ ba̰ā̰də́ gə̄ tə́, 7 m-ā m-ādə̄ i ngé ndə̄ngān̄də́ yo gə̄ n a tɔ̄lə̄n̄də́ kə jīdə́ ní. M-ā m-ādə̄ nīń de kə́ ngá̰ý gə̄ ń toō yel̄ kə́ dɔ rā̰ tə́ gə̄ ō, dā̰ kə́ dɔ nang tə́ gə̄ ō kadə̄ əsan̄. 8 M-ā m̄-rāā kadə̄ ɓē ń toō tél loo kə́ to kum ko̰ kə́ de gə̄ a əgan̄ kɔŕ ɓōĺ dɔ tə́. De gə̄ ń a mānə̄n̄ kadə tə́ á a̰a̰n̄ yá̰a̰ gə̄ malang ń nujə ní a ɔr kumdə́ ō, a tə́gān̄ dɔdə́ nek nek ō. 9 M-ā m̄-rāā kadə̄ əsan̄ dā̰ ngáńdə́ kə́ dəngam gə̄ ō, kə́ dəyá̰ gə̄ ō. A əsan̄ dā̰ naā dɔ dáńdə́ tə́ dan wur kɔl tə́ ō, kə sōlōó ō, dan ń madə̄ ba̰ā̰də́ kə́ ngé ndə̄ngādə́ yo gə̄ a utə̄n̄də́ ní. 10 Ā ī-tɔ̄ɔ̄ jóo man̄ ní ta kum de gə̄ ń ndān̄ tə́ ní. 11 Gō tə́ anī, ā ə́dádə́ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: m̄-nujə kə gír de gə̄ ń toō ō, kə ɓē ń toō ō, tītə̄ loo tɔ̄ɔ̄ jóó ń kɔdə̄ jóo əɓā ní beē, adə̄ deē a asə kəndā ta naā tə́ to̰ alé. Loo kə́ yā dubə̄ń yo a asə alé, adə̄ de gə̄ a dubə̄n̄ nīń Topet tə́ gə̄ gə̄gē. 12 I yá̰á̰ ń noō n m-ā m̄-rāā kə loo ń noō ní ō kə de gə̄ ń ndin̄ kemeé ní ō. M-ā m̄-rāā ɓē ń toō kadə̄ to tītə̄ Topet. Najə̄ ń Kɔ́ɔ̄ɓē əda ní n noó. 13 Kújə́ kə́ Jerusalem tə́ gə̄ ō, *Juda tə́ gə̄ ō, a télən̄ yá̰á̰ kə́ yḛr tītə̄ loo kə́ Topet tə́. Rɔ̄kum, kújə gə̄ ń noō malang ń de gə̄ róōn̄ *yá̰a̰ ndējə̄ gə̄ ndágə loo gə̄ kə́ dɔ tə́ tə́ adə̄n̄ tə́yō̰ gə̄ ō, tə́ten̄ kasə nang tə́ tū tə́ adə̄n̄ nə́ɓā kə́ rang gə̄ ō ní, a télən̄ yá̰á̰ kə́ yḛr. 14 Jeremi tél Topet ń Kɔ́ɔ̄ɓē əlan kadə̄ ɔr̄ najə̄ yān tū tə́ ní reē. Ni-ra ndágə loo kə́ gīr̄ gidə *kújə yā Kɔ́ɔ̄ɓē tə́ tə́ ba əda ngáń *Israel gə̄ malang na: 15 Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: M-ā m̄-rāā kadə̄ yá̰á̰ kə́ to kum kaȳ aĺ gə̄ malang ń m-ɔ̄r̄ najə̄də́ ní əsōn̄ dɔ Jerusalem tə́ ō, dɔ ɓē gə̄ malang ń ni-o̰o̰ ɓē dɔ tə́ ní ō, tɔdɔ̄ nin̄ rāān̄ dɔ ngan̄g ō, mbātə́n̄ koō najə̄ yāḿ gə̄ ō. |
© 2006, 2010 Alliance Biblique du Tchad
Bible Society of Chad