JEREMI 16 - Bible sar

Jeremi ndi kə kérneé

¹ Kɔ́ɔ̄ɓē ɔr̄ najə̄ seḿ əda na:

² Ḭ̄ ā ī-taā dəyá̰ aĺ ō, ḭ̄ ā ə́nge ngáń kə́ dəngam gə̄ aláa kə́ dəyá̰ gə̄ loo ń toō tə́ aĺ ō.

³ Tɔdɔ̄ Kɔ́ɔ̄ɓē ɔr̄ najə̄ kə́ sɔɔ̄ dɔ ngáń kə́ dəngam gə̄ ō, kə́ dəyá̰ gə̄ ō ń ojən̄də́ loo ń toō tə́ ní ō, sɔɔ̄ dɔ kó̰o̰ kojədə́ gə̄ ō, bɔbə̄ kojədə́ gə̄ ō kem ɓē ń toō tə́ tītə̄ ń toō beé əda na:

⁴ Ɓō a rāādə́ bátə́ yā tɔ̄l̄də́. Deē a nōōdə́ aĺ ō, dubə̄də́ aĺ ō, a télən̄ bū loo dɔ dā̰ nang tə́ ō, a oyn̄ yo kaskar ō, yo ɓō ō. Nīńdə́ a téĺ yá̰a̰ kəsa yā yel̄ kə́ no rā̰ tə́ gə̄ ō, dā̰ kə́ dɔ nang tə́ gə̄ ō.

⁵ Rɔ̄kum, Kɔ́ɔ̄ɓē ɔr̄ najə̄ i tītə̄ ń toō beé: Údə kem kújə́ kə́ de gə̄ kánə̄n̄ naā kemeé yā nōoń yo tə́ alé. Āw̄ loo rāā yá̰a̰ kūjə́ kə́ loo nōō yo gə̄ tə́ aĺ ō. Ādə̄ kumií o̰o̰ī kə de gə̄ ń noō aĺ ō, tɔdɔ̄ m-ā m̄-tél yā taā ndi lɔm yāḿ jī gír de gə̄ ń toō tə́ ō, m-ā m̄-rāā kem majə sedə́ to̰ aĺ ō, kumḿ a o̰o̰ḿ sedə́ to̰ aĺ ō. Najə̄ ń Kɔ́ɔ̄ɓē əda ní n noó.

⁶ Kem ɓē ń toō tə́ ní, de kə́ bo gə̄ ō, de kə́ dūú gə̄ ō a oyn̄ mbak. Deē a dubə̄də́ aĺ ō, a un pā yo dɔdə́ tə́ aĺ ō, a əja rɔ̄n kə doó najə̄ yādə́ tə́ aĺ ō, a dəsā dɔn aĺ ō.

⁷ Deē a gān̄g ta mápa yā kadə̄ nge kəhɔ ndoō yā sɔlə̄ń kemən najə̄ ngeen de kə́ oy tə́ aĺ ō, deē a ndējə̄n kópə sɔl̄ kem najə̄ yā bɔbə̄n deē aláa kó̰o̰n de kə́ oy tə́ aĺ ō.

⁸ Ā údə kem kújə́ kə́ de gə̄ a əsan̄ yá̰a̰ nāā tū tə́ tə́ yā ndi ta kār̄ tə́ sedə́ kəsań yá̰a̰ ō, ka̰ȳń ō alé.

⁹ Tɔdɔ̄ Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, ɔr̄ najə̄ i tītə̄ ń toō beé: M-ā m̄-rāā kadə̄ pā walya ō, najə̄ kə́ to rɔ̄nel̄ ō, pā yā ngaa dəyá̰ ō, rɔ̄nel̄ yā nge taā ngaa ō, a dəba loo ń toō tə́, ɓāl̄ yāsí tə́ ō, ta kumsí tə́ ō.

¹⁰ Dan ń ḭ̄ ā ə́dá gír de gə̄ ń toō najə̄ gə̄ ń noō malang, ba nin̄ a ədanī na ké i tām̄ rí tə́ á Kɔ́ɔ̄ɓē əda kadə̄ yá̰á̰ kə́ to kum kaȳ aĺ kə rāādə́ ō, ké yá̰á̰ kə́ gōtə́ aĺ ō, kə́ majaĺ ō ń n-rāān̄ kə Kɔ́ɔ̄ɓē Nə́ɓā yādə́ ní ké i rí ō wa anī,

¹¹ ḭ̄ ā ī-tél yā kədádə́ na: I tɔdɔ̄ kaasí gə̄ mbātə́mə̄n̄ kɔ̄ɔ́, ba ngɔ̄də̄n̄ gō nə́ɓā yā tə̄rā gə̄ tə́ ō, ndɔ̄ȳn̄də́ ō, ɔsən̄ nodə́ nang tə́ nodə́ tə́ rɔȳn̄neédə́ ō. Nin̄ mbātə́mə̄n̄ kɔ̄ɔ́ ō, ngɔ̄mə̄n̄ *ndū najə̄ yāḿ aĺ ō. Najə̄ ń Kɔ́ɔ̄ɓē əda ní n noó.

¹² Sḭḭ̄ tā anī ī-rāāī yá̰a̰ majaĺ tɔȳ yā kaasí gə̄ ɓáý. Náā nəkɔ́ ɓáa rāā dɔ ngan̄g kə́ dum̄ kəda ta tə́ kə̄ non tə́ ba ōōī najə̄ yāḿ alé.

¹³ M-ā m-ɔ́ýsí dɔ nang ń toō tə́ yā tə́nīsí dɔ nang kə́ rang kə́ sḭḭ̄ gə̄gē kaasí gə̄gē ī-gerī aĺ tə́. Loo ń noō tə́, ā ī-ndɔ̄yī nə́ɓā yā tə̄rā gə̄ ndɔ̄ɔ́ ō, kadaá ō. Ba ā ə̄ndāī kemsí dɔḿ tə́ kadə̄ m̄-dḭḭ̄sí to̰ alé.

Ta téĺ ngán Israel gə̄

¹⁴ Najə̄ ń de gə̄ ədan̄ ngándáńg na Kɔ́ɔ̄ɓē kə́ nge rāā kadə̄ ngán *Israel gə̄ teēn̄ kem ɓē kə́ Ejiptə tə́ kɔ̄ɔ́ na ndi kə kumneé noō ní, de gə̄ a ton̄ dan kəda tə́ to̰ alé, ba á̰a̰ī kem ndɔ̄ gə̄ ń a reēn̄ noó tə́ ní a ədan̄ na:

¹⁵ Kɔ́ɔ̄ɓē ń rāā adə̄ ngán Israel gə̄ teēn̄ kem ɓē kə́ mbɔ́r ɓē kə́ ko̰ó̰ tə́ ō, kem ɓē gə̄ malang ń tə̄ndā tḭ̄ḭ̄də́ tū tə́ ní ō ní na ndi kə kumneé noō. Tɔdɔ̄ m-ā m̄-tél yā reē sedə́ dɔ nang ń m-ādə̄ kaadə́ gə̄ ní tə́ rɔ̄kum. Najə̄ ń Kɔ́ɔ̄ɓē əda ní n noó.

A əhɔn̄ de gə̄ malang ń najə̄ i dɔdə́ tə́ ní.

¹⁶ M-ā m-ə́lá kósə de kə́ ngé ndo̰ kānjə̄ gə̄ kadə̄ a ndo̰ō̰n̄də́ tītə̄ loo ndo̰ kānjə̄. Gō tə́ anī, m-ā m-ə́la kósə de kə́ ngé ndo̰ dā̰ gə̄ kadə̄ a ndo̰ō̰n̄də́ tītə̄ loo ndo̰ dā̰ dɔ mbal̄ kə́ bo gə̄ tə́ malang ō, dɔ ngán mbal̄ gə̄ tə́ malang ō, kem bəlo mbal̄ gə̄ tə́ ō. Najə̄ ń Kɔ́ɔ̄ɓē əda ní n noó.

¹⁷ Tɔdɔ̄ m-ə̄ndā kumḿ dɔ róbə njə̄rādə́ gə̄ tə́ malang. Nin̄ ton̄ loo ɓɔ̄ɔ̄ rɔ̄ tə́ ta kumḿ tə́ aĺ ō, yá̰á̰ kə́ gōtə́ aĺ yādə́ a to ta kumḿ tə́ ngándáńg ō.

¹⁸ M-ā m-ə̄gādə́ kə̄rā loo nja kə́ jōó tə́, tām̄ mósə́ kə́ ɓōkə́n̄ nang tə́ tə́ ō, tām̄ yá̰á̰ kə́ majaĺ kə́ rāān̄ tə́ ō, tɔdɔ̄ nujən̄ kə ɓē yāḿ. Nin̄ ɓōkə́n̄ nīń yá̰á̰ kə́ yḛr yādə́ gə̄ ō, yá̰a̰ rāādə́ kə́ majaĺ gə̄ ō, adə̄ taā kem yá̰á̰ kənge yāḿ ń i ɓē yāḿ ní.

De gə̄ malang gerə̄n̄ Nə́ɓā kə́ rɔ̄kum tā

¹⁹ Kɔ́ɔ̄ɓē, ḭ̄ ń i tɔ́gə́ḿ ō, nge ngɔ̄mə̄ḿ ō, loo ɓɔ̄ɔ̄ rɔ̄ yāḿ ndɔ̄ wur kɔl tə́ ō ní, nápar de gə̄ a ḭḭn̄ ta ngóy dɔ nang tə́ yā reē rɔ̄í tə́ yā kəda na: Yá̰á̰ ń kaají gə̄ əngen̄ loo nə̄ɓō naā yá̰á̰ tə́ ní, i yá̰á̰ kə́ rɔ̄kum alé ō, i yá̰á̰ kə́ kanjə̄ kumən kə́ yá̰á̰ kə́ yā rāań gətóo ō.

²⁰ Deē ndul gə̄ ń i nə́ɓā gə̄ aĺ ní asən̄ rāā nə́ɓā gə̄ tām̄ yādə́ nin̄ kɔ́ gə̄ tə́ a?

²¹ I tām̄ ń toō tə́ n m-ā m̄-rāā kadə̄ gerə̄n̄ tɔ́gə jīḿ kə́ ɔl watang ō, a gerə̄n̄ kadə̄ rīḿ i Kɔ́ɔ̄ɓē ō.