JEREMI 15 - Bible sar

¹ Kɔ́ɔ̄ɓē ədam̄ na: Ká ré Moijə nin̄ kə Samuel reē ran̄neé ta kumḿ tə́ gə̄gē anī, m-ā m-ōō ndɔ̄ȳ yādə́ kə́ tām̄ yā de gə̄ ń noō tə́ alé. Ī-tə́ɓādə́ kɔ̄ɔ́ ta kumḿ tə́, ādə̄ aw̄n̄.

² Ba ré dəjenī ədan̄ na: Ní kə j-aw̄ i kə̄ rá tāā wa anī, ḭ̄ ā ī-téĺ ə́dádə́ na: Najə̄ ń Kɔ́ɔ̄ɓē əda ní n toó: Deē ń i tām̄ yā yo tə́ ní i tām̄ yā yo tə́. Deē ń i tām̄ yā kaskar tə́ ní i tām̄ yā kaskar tə́. Deē ń i tām̄ yā ɓō tə́ ní i tām̄ yā ɓō tə́, deē ń i tām̄ yā kəhɔn dɔ gúú tə́ kaw̄ seneé dɔ ɓē kə́ rang tə́ ní, i tām̄ yā kəhɔn dɔ gúú tə́ kaw̄ seneé dɔ ɓē kə́ rang tə́.

³ M-ā m-ə́la kə yá̰á̰ kə́ majaĺ gə̄ gíŕ sɔ́ dɔdə́ tə́: M-ā m-ə́la kə kaskaraá yā tɔ̄ləńdə́ ō, kə bísə gēé yā ndɔ́rəńdə́ nang tə́ ō, kə yel̄ kə́ no rā̰ tə́ gə̄ ō, kə dā̰ kə́ dɔ nang tə́ gə̄ ō yā rə́yańdə́ naā tə́ ō, yā gāngəń gír yādə́ kɔ̄ɔ́ ō. Najə̄ ń Kɔ́ɔ̄ɓē əda ní n toó.

⁴ M-ā m̄-rāā kadə̄ télən̄ yá̰á̰ kɔjə kə́ to ɓōĺ ngá̰ý ta kum ɓē ko̰o̰ gə̄ malang kə́ dɔ nang tə́. M-ā m̄-rāā tītə̄ ń noō i najə̄ yā Manase ngōn̄ Ejekias, mban̄g kə́ *Juda tə́, tām̄ yā yá̰a̰ malang ń ni-rāā Jerusalem tə́ ní.

Kɔr asə Kɔ́ɔ̄ɓē nak ta gír deē yān gə̄ tə́

⁵ I náā n a a̰a̰ kum tō ndoō yāí tā, Jerusalem? I náā n a nōō ndoōí? I náā n a njə́ɓā rɔ̄n ta dəje kōōí?

⁶ I ḭ̄ n ə́yam̄ kɔ̄ɔ́ ō, ī-tūr̄ gidií taḿ tə́ kɔ̄ɔ́ ō ní. M-ə́la jīḿ kə̄ dɔí tə́ kadə̄ m̄-nujə seí. Kɔr asəm̄ ta tə́gā taḿ tə́.

⁷ M-ún keē kógə̄ḿ kadə̄ m̄-tə̄ndā m̄-tḭ̄ḭń de kə́ kem ɓēé gə̄ kə̄ loo gə̄ tə́. m̄-tɔ̄l̄ ngán kem gír deē yāḿ gə̄ kɔ̄ɔ́. m̄-nujə kə gír deē yāḿ gēé sák sák kɔ̄ɔ́, banī tūrə̄n̄ háĺdə́ alé.

⁸ m̄-rāā adə̄ dəyá̰ yān kə́ ngaa koy gə̄ i ngá̰ý tɔȳ kum nán̄g ngárə̄ḿnjēý kə́ ta bā tə́. m̄-rāā ādə̄ nge nujə loo reē dan kadə ndaá dɔ kó̰o̰ nge rɔ̄ɔ̄ kə́ balsáá tə́. m̄-rāā ādə̄ yá̰á̰ kə́ tə́la naā kə́ to ɓōĺ ngá̰ý əsō dɔn tə́ gidə kógə̄ḿ.

⁹ Nge ń ojə ngán gə̄ i sīrí ní tɔ́gən teē kɔ̄ɔ́. Ni-taā koō yon. Mbang udə kɔ̄ɔ́ dɔn tə́ dan ń loo i dan kadə ndaá ɓáý ní. Rɔ̄n sɔlən ngá̰ý adə̄ ger̄ yá̰á̰ kə́ yā rāā alé. Ngé gə̄ ń na̰yn̄ ní, m-ā m-ə́yadə́ kadə̄ oyn̄ yo kaskar kem jī madə̄ ba̰ā̰də́ gə̄ tə́. Najə̄ ń Kɔ́ɔ̄ɓē əda ní n noó.

¹⁰ Kum kaȳ aĺ kə́ ba̰ý beē, kó̰ó̰ḿ! Ḭ̄ ójəm̄ mā ń de kə́ kem ɓēé gə̄ malang mbātə́n̄ najə̄ taḿ tə́ ō, nel̄də́ seḿ aĺ ō ní? M-ādə̄ yá̰a̰ loo ndə̄mā tə́ aĺ ō, m̄-taā yá̰a̰ loo ndə̄mā tə́ aĺ ō, banī de gə̄ malang ndɔ̄ĺmə̄n̄.

¹¹ Kɔ́ɔ̄ɓē əda na: Njaḿ gē m-ā m̄-gān̄g dɔí kadə̄ i-ndi majə. Njaḿ gē m-ā m̄-rāā kadə̄ madə̄ ba̰ā̰í sāā njaí dan ń yá̰á̰ kə́ to kum kaȳ aĺ ō, to wur kɔl ō a teēn̄neé dɔn tə́ ní.

¹² I náā n a asə tetə gində̄ naā tə́ ní. Gində̄ kə́ kḭḭ mbɔ́r ɓē kə́ ko̰ó̰ tə́ ō, gində̄ nə̄ngá kasə ō ní, i náā n a asə tetə naā tə́ ní?

(Kɔ́ɔ̄ɓē əda na)

¹³ M-ādə̄ de gə̄ a ɔyn̄ yá̰a̰ kənge yāí gə̄ ō, yá̰a̰ yāí gə̄ kə́ gātə̄də́ i ngá̰ý ń ə̄ndā dɔ jīí ní ō dɔ gúú tə́. Yá̰á̰ ń m-ə̄gań kə̄rā majaĺ yāí gə̄ malang ń ī-rāā gō nang yāí tə́ kə taá malang ní n noó.

¹⁴ M-ə́la dɔí gíŕ tɔ́gə yā madə̄ ba̰ā̰í gə̄ tə́ kem ɓē kə́ ī-ger̄ aĺ tə́. Wōn̄g yāḿ əɓa bup kə́ hor tə́ yā ko̰o̰sí kə́ njɔ́ḿ gə̄ tə́.

(Jeremi əda na)

¹⁵ Ḭ̄ Kɔ́ɔ̄ɓē ī-ger̄ yá̰a̰ gə̄ malang, ādə̄ əga kemií dɔḿ tə́, á̰a̰ gōḿ. Ī-dal ba̰ā̰ḿ dɔ ngé rāā kumḿ ndoō tə́ gə̄ tə́. Ī-lōō to gír kəndā ɓam tə́ kadə̄ m̄-nujə. Ī-ger̄ majə kadə̄ m̄-tə́gā taḿ dɔ ndū gə̄ ń a tájə̄mə̄n̄ tə́ ní i najə̄ yāí tə́.

¹⁶ Najə̄ yāí gə̄ ń m̄-teē dɔ tə́ ní m-ə́sádə́ mak mak. Nelə̄n̄ taḿ páráng ō, adə̄mə̄n̄ rɔ̄nel̄ kə́ ngá̰ý ngarā̰ kemḿ tə́ ō. Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý, rīí ɓār̄ dɔḿ tə́.

¹⁷ m̄-sāā nja ngé koō naā gə̄ ń ɔsən̄ dɔdə́ naā tə́ ní yā ndi dáńdə́ tə́ rāā rɔ̄nel̄ alé. Tɔdɔ̄ ə́hɔm̄ kə jīí tɔgə adə̄ m̄-ndi kə kérə́ḿ ō, ī-rāā adə̄ wōn̄g asəm̄ nak ō.

¹⁸ I tām̄ rí tə́ á tápə̄ yāḿ i kə́ dum̄ təgā ō, do yāḿ i kə́ dum̄ kedə̄ ō, dum̄ ta kəga gə̄ malang ō ní. Kə́ rɔ̄kum tə́ ní ḭ̄ ī-tél ī-to i tītə̄ kəɓa man̄ kə́ a gól̄ loo beé ō, kə́ deē asə kəndā kemən dɔ tə́ aĺ beé ō tām̄ yāḿ tə́.

¹⁹ I tām̄ ń toō tə́ n Kɔ́ɔ̄ɓē ɔr̄ najə̄ tītə̄ ń toō beé ní: Ré ī-tél ī-reē rɔ̄ḿ tə́ anī, m-ā m̄-rāā kadə̄ ī-tél ī-reē gogə́ loo kəla yāí tə́ ta kumḿ tə́. Ré ɔ̄r̄ najə̄ kə́ kə kumneé gə̄ ba ə́yá̰ gíŕ ngé kə́ diring diring gə̄ kɔ̄ɔ́ anī, najə̄ kɔrīí a tél i najə̄ kɔrə̄ḿ mə̄kɔ́. Adə̄ i gír deē yāḿ gə̄ n a télən̄ yā reē rɔ̄í tə́, ba i ḭ̄ n ā ī-tél yā kaw̄ rɔ̄də́ tə́ alé.

²⁰ M-ā m̄-rāāī kadə̄ ḭ̄ i ndogə̄ mbal̄ kə́ ngan̄g ngá̰ý tām̄ yā gír de gə̄ ń toō tə́. I ndogə̄ kə́ rāā kə gində̄ nə̄ngá kasaá. A rɔ̄ɔ̄nī ba a tetənī rɔ̄ɔ̄ alé. Tɔdɔ̄ mā i naā tə́ seí yā taā dɔí ō, yā gān̄g dɔí ō. Najə̄ ń Kɔ́ɔ̄ɓē əda ní n noó.

²¹ M-ɔ̄rī kɔ̄ɔ́ jī ngé kem ndul gə̄ tə́ ō, m̄-taāī jī ngé rāā yá̰a̰ kə dɔ́nɔ́ gə̄ tə́ ō.