JAKARI 6 - Bible sar

Yá̰á̰ kə́ nge ko̰ sɔ́sɔ́ i púsə rɔ̄ɔ̄ gə̄ sɔ́

¹ M-ún kumḿ kə̄ dɔɔ́ ɓáý to̰, anī m-á̰á̰ púsə rɔ̄ɔ̄ gə̄ sɔ́. Púsə rɔ̄ɔ̄ gə̄ ní njə̄rān̄ kumdə́ kə̄ kété, ba i dɔ dán mbal̄ bo gə̄ jōó tə́. Rāān̄ mbal̄ bo gə̄ ní i kə gində̄ nə̄ngá kasaá.

² I sə́ndá kə́ kərē gə̄ n unən̄ púsə rɔ̄ɔ̄ kə́ ta kəga dɔ ní ō, i sə́ndá kə́ ndul gə̄ n unən̄ púsə rɔ̄ɔ̄ kə́ nge ko̰ jōó ní ō,

³ i sə́ndá kə́ ndaa gə̄ n unən̄ púsə rɔ̄ɔ̄ kə́ nge ko̰ mətá ní ō, i sə́ndá kə́ kərē suk suk gə̄ n unən̄ púsə rɔ̄ɔ̄ kə́ nge ko̰ sɔ́ ní ō.

⁴ m̄-dəje *de kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní na: Kɔ́ɔ̄ɓē yāḿ, nin̄ ɔsən̄ i kum gotə rí?

⁵ Anī ni-tél ədam̄ na: I nél kə́ sɔ́ gə̄ kə́ dɔ rā̰ tə́. Kété ní, nin̄ i kadə Kɔ́ɔ̄ɓē ń i kɔ́ɔ̄ dɔ nang kə taá malang ní tə́ ō, ngɔlaā ɓáa nin̄ a aw̄n̄ i mbée ō.

⁶ Púsə rɔ̄ɔ̄ ń sə́ndá kə́ ndul gə̄ unən̄ ní, aw̄ kum kə̄ dām̄ mbɔ́r ɓē kə́ ko̰ó̰ tə́ ō, sə́ndá kə́ ndaa gə̄ aw̄n̄ kum kə̄ no ɓē tə́ ō, sə́ndá kə́ ɓál gə̄ aw̄n̄ kum kə̄ dām̄ mbɔ́r ɓē kə́ geleé tə́ ō.

⁷ Sə́ndá kə́ kərē gə̄ ndɔ́tə̄n̄ kə̄ kété. Ngur kaw̄ kə̄ loo gə̄ tə́ malang dɔ nang tə́ rāādə́ ngá̰ý. Anī Kɔ́ɔ̄ɓē ədadə́ na: Āwī kə̄ loo gə̄ tə́ malang dɔ nang tə́. I yá̰á̰ ń noō n nin̄ rāān̄ ní.

⁸ Loo ń noō tə́ Kɔ́ɔ̄ɓē ɓārə́m̄, ba ədam̄ na: Á̰a̰ā̰: ngé gə̄ ń aw̄n̄ kə̄ dām̄ mbɔ́r ɓē kə́ ko̰ó̰ tə́ ní, a aw̄n̄ yā rāā kadə̄ ndílə́ḿ risə gō nang ngeé ń noō tə́.

A əlan̄ jākā mbang dɔ Yesua tə́. I najə̄ ń Nə́ɓā əndā ta nge koō ta tə́ ní

⁹ Kɔ́ɔ̄ɓē ədam̄ yá̰á̰ ń toō kadə̄ m̄-rāā:

¹⁰ Yá̰a̰ ndējə̄ gə̄ ń de gə̄ kə́ əhɔn̄də́ aw̄n̄ sedə́ dɔ ɓē kə́ rang tə́ dɔ gúú tə́ adə̄n̄ Helday ō, Tobia ō, Yedaya ō, adə̄ reēn̄neé ní, ī-taā jīdə́ tə́. Nin̄-ḭḭn̄ *Babilon reē ugə̄n̄ i ngɔr ɓáý. Ɓōólaā nəkɔ́ ń toō ā āw̄ ɓē Yosiya kə́ ngōn̄ Sepania, loo ń nin̄ aw̄n̄ tū tə́ ní tə́.

¹¹ Ā ī-taā gində̄ arjā̰a̰ ō, lɔ́r ō yā rāā *jākā mbang tə́, ba ā ə́la dɔ Yesua kə́ ngōn̄ Yosadak ń i ngol *ngé tun̄ yá̰a̰ gə̄ ní tə́.

¹² Ā ə́dan na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: De kógə̄ḿ i laā, rīn na i Nge ń sɔɔ̄ kadə̄ əɓa ní. Ndi kə kumuú a əɓa loo ń ni i tū tə́ ní tə́ ō, i ni n a tél yā rāā *kújə yāḿ gogə́ ní ō.

¹³ A̰á̰ā̰, i ni n a tél yā rāān gogə́ ní. Ni a o̰ō̰ kūbə̄ mban̄g ō, a ndi dɔ kōr̄ kāgə̄ mbang tə́ ō, yā ko̰ó̰ń ɓē. *Nge tun̄ yá̰á̰ kógə̄ḿ a ra kadən tə́. Ba nin̄ jōó mbak a gerə̄n̄ kum najə̄ kə naá majə

¹⁴ Jākā mbang ní a to kem *kújə yā Kɔ́ɔ̄ɓē tə́, yā kadə̄ əgań kem deē dɔ Helday tə́ ō, Tobia tə́ ō, Yedaya tə́ ō, yā kadə̄ əngeń kem deē dɔ kem majə yā Yosiya kə́ ngōn̄ Sepania tə́ ō.

¹⁵ Ngé gə̄ ń nin̄ i sa̰y ní, a reēn̄ yā tél rāā *kújə yā Kɔ́ɔ̄ɓē gogə́ rang. Loo ń noō tə́ ā ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý rɔ̄kum n əlam̄ kə̄ rɔ̄sí tə́ ní. Yá̰á̰ ń noō a rāā yá̰a̰ dan ń ōōī ta Kɔ́ɔ̄ɓē Nə́ɓā yāsí rɔ̄kum ní.