JA̰A̰ 12 - Bible sar

Mari ur ítər gidə nja Jeju tə́

¹ Ndɔ̄ mehḛ́ kété no nāā *Pákə́ tə́ anī, Jeju aw̄ Betani ɓē ń Lajar oy tū tə́ á ni-ndólə̄n dan de kə́ koy gə̄ tə́ ní.

² Nin̄-rāān̄ yá̰a̰ kəsa tām̄ yān tə́ kem ɓē ngeé ń noō tə́. Martə a rāā i kəla nə̄ɓō yá̰a̰ kəsa, banī Lajar i dan ngé gə̄ ń ndin̄ kə Jeju ta kār̄ kəsa tə́ ní.

³ Anī Mari un ítər kə́ rāān̄ kə mu náŕ kə́ *unjə̄ njáý njáý, kə́ gātə̄n i ngá̰ý, kə́ ndi ɓōdə̄ lítər kógə̄ḿ, ur gidə nja Jeju tə́ ba ɔl̄ kə nənga dɔneé, adə̄ usə ítər ní taā kem kújə.

⁴ Nge ndóō yá̰a̰ yān kógə̄ḿ kə́ rīn na i Judas kə́ Iskariot, nge ń a əlan jī de gə̄ tə́ ní, əda na:

⁵ I tām̄ rí tə́ á igən̄ kə ítər ń toō kum gúrsə dūbú kutə ba adə̄n̄ ngé ndoō gə̄ narən aĺ ní?

⁶ Ni-əda najə̄ ń noō i tɔdɔ̄ ndigə kə́ ni-ndigə i ngé ndoō gə̄ alé. Ba i tām̄ ni i nge ɓogə. Ni i nge ngɔ̄m̄ ngong nar, adə̄ a ɔy yá̰á̰ kə́ kemeé loo ɓogə tə́.

⁷ Banī Jeju əda na: Əya̰n! Yá̰á̰ ń ni-rāā ní i tām̄ yā ndɔ̄ dubə̄ḿ tə́.

⁸ Ngé ndoō gə̄ nin̄ i sesí kə ndɔ̄ gə̄, banī mā m-ā m̄-ndi sesí kə dɔ ndɔ̄ gə̄ alé.

Ngol gə̄ kə́ dɔ ngé tun̄ yá̰a̰ gə̄ tə́ oōn̄ naā dɔ Lajar tə́ yā tɔ̄lən

⁹ Kósə *Jipə gə̄ ngá̰ý oōn̄ kadə̄ Jeju i noó anī reēn̄, ba i tām̄ yā ka̰a̰ Jeju ngóy alé, banī i tām̄ yā ka̰a̰ Lajar ń ni-ndólə̄n dan de kə́ koy gə̄ tə́ ní ō.

¹⁰ Loo ń noō tə́ ngol gə̄ kə́ dɔ *ngé tun̄ yá̰a̰ gə̄ tə́ gḛyn̄ tɔ̄l̄ Lajar ō,

¹¹ tɔdɔ̄ *Jipə gə̄ ngá̰ý əya̰n̄də́ kɔ̄ɔ́, ba taān̄ kem Jeju najə̄ yā Lajar tə́.

Jeju udə kem ɓē kə́ Jerusalem tə́

¹² Teē kə ndɔ̄ kə́ noō anī, kósə de kə́ ngá̰ý gə̄ ń reēn̄ tām̄ yā nāā *Pákə́ tə́ ní,

¹³ oōn̄ kadə̄ Jeju na a reē kə̄ *Jerusalem. Anī ɔyn̄ ta jī túmbur gə̄, ba aw̄ tə́nīn̄ tan. Nin̄-əgan̄ kɔŕ ədan̄ na: Kɔsə gɔn i yā Nə́ɓā! Ādə̄ Nə́ɓā rāā majə kə nge ń a reē kə rī Kɔ́ɔ̄ɓēé ní! Ādə̄ Nə́ɓā rāā majə kə mban̄g kə *Israel!

¹⁴ Jeju ənge ngōn̄ kərō, anī ndi gidən tə́ tītə̄ ń makətūbə̄ yā Nə́ɓā ədań ní. Ndangən̄ na:

¹⁵ Ngōmandə kə́ *Siyo̰, ī-lōō ɓōĺ. Á̰a̰ mban̄g yāí a reē noó, ni-ndi i gidə ngōn̄ kərō tə́.

¹⁶ Ta kəla gíŕ tə́ ní, ngé ndóō yá̰a̰ yān gə̄ gerə̄n̄ kum yá̰á̰ ní alé. Ba dan ń ɔsən̄ gɔn Jeju oy anī, əga kemdə́ dɔ tə́ kadə̄ yá̰á̰ ń rāā yá̰á̰ ní i kə́ ndangən̄ najə̄n kem makətūbə̄ tə́ kété ɔjənə̄ń dɔn.

¹⁷ Kósə de gə̄ ń nin̄ i kə Jeju dan ń ni ɓārə́nń Lajar kadə̄ teē kɔ̄ɔ́ bəlo yo tə́, ba ndólə̄n dan de kə́ koy gə̄ tə́ ní, ɔrə̄n̄ gíŕ yá̰á̰ ń ni-rāā á a̰ā̰n̄ kə kumdə́ ní.

¹⁸ I tɔdɔ̄ kósə de gə̄ oōn̄ kadə̄ ni-rāā yá̰á̰ kə́ yáā ngeé ń toō n nin̄-tə́nān̄ tan ní.

¹⁹ Anī *Parijiyḛ gə̄ ədan̄ naā dɔ dáńdə́ tə́ na: Á̰a̰ī tā waḿ, sḭḭ̄ ī-rāāī yá̰á̰ kógə̄ḿ alé, de gə̄ malang aw̄n̄ i gōn tə́!

Gərek kə́rēý gə̄ sāān̄ Jeju

²⁰ Gərek kə́rēý gə̄ i dan de gə̄ ń reēn̄ *Jerusalem ndɔ̄yɔ̄ɔ́ nāā *Pákə́ tə́ ní.

²¹ Nin̄-aw̄ əngen̄ Pilipə ń i de kə́ Betsaida gō nang kə́ Galile tə́ ní, rāānən̄ ɓɔ́ ba ədanən̄ na: Kɔ́ɔ̄ɓē, jə-gḛy ka̰a̰ Jeju.

²² Pilipə aw̄ əda Andəre, ba gō tə́ anī, Andəre nin̄ kə Pilipə ədan̄ Jeju.

²³ Anī Jeju tél ədadə́ na: Mbang asə kɔ̄ɔ́ adə̄ ɔsən̄ gɔn Ngōn̄ Deē.

²⁴ Ādə̄ m-ə́dásí najə̄ kə́ bo ngá̰ý, ré kum kōō gémē əsō nang tə́ aĺ ō, oy aĺ ō anī, ni a to i kógə̄ḿ beē ngóy. Banī ré oy anī, a ojə madə̄ ngá̰ý.

²⁵ Deē ń tár rɔ̄n ní, a tḭ̄ḭ̄ ta rɔ̄n. Ba deē ń im̄ rɔ̄n dɔ nang tə́ laā ní, a ngɔ̄m̄ rɔ̄n tām̄ yā ndi kə kumuú kə́ ngándáńg tə́.

²⁶ Ré deē kógə̄ḿ gḛy rāā kəla yāḿ anī, ādə̄ un gōḿ, ba loo ń mā i tū tə́ ní, nge rāā kəla yāḿ i tū tə́ ō. Ré deē kógə̄ḿ rāā kəla yāḿ anī, Bɔbə́ḿ a ɔsə gɔnən.

²⁷ Ngɔlaā ní ndílə́ḿ ndi kə gōó to̰ alé, ba kə m-ə́da na i rí tā. Kə m-ə́da na: Bɔbə́ḿ, ɔ̄rə̄m̄ kɔ̄ɔ́ kum mbang ń toō tə́ a? Ba i tām̄ yā kum mbang ngeé ń toō tə́ mandang n m̄-reēń ní.

²⁸ Bɔbə́ḿ, ɔ́sə gɔn rīí! Anī ndū Nə́ɓā ɓār̄ dɔ rā̰ tə́, əda na: M-ɔ́sə gɔn rīḿ kɔ̄ɔ́ ɓá, ba m-ā m-ɔ́sə gɔnən ɓáý to̰.

²⁹ Kósə de gə̄ ń ran̄ noó ō, oōn̄ ndū deē ní ō ní ədan̄ na i man̄ n na ndang. De kə́rēý gə̄ ədan̄ na i *de kə́ dɔ rā̰ tə́ kógə̄ḿ n na ɔr̄ najə̄ seneé ní.

³⁰ Ba Jeju tél ədadə́ na: Ndū deē ń toō ɓār̄ i tām̄ yāḿ mā tə́ alé, banī i tām̄ yāsí sḭḭ̄ tə́.

³¹ I ngɔlaā ń toō n a gāngə̄n̄ sarya yā de kə́ dɔ nang tə́ laā gə̄ ní. I ngɔlaā ń toō n a ənīn̄ ngār yā de kə́ dɔ nang tə́ laā gə̄ ndágá kɔ̄ɔ́ ní.

³² Ba mā, dan ń a əlamə̄n̄ dɔɔ́ oy anī, m-ā m̄-ndɔ́r̄ de gə̄ malang kə̄ rɔ̄ḿ tə́.

³³ Ni-əda najə̄ ń noō i yā kɔjəń loo koy ń a rāā yā koy ní.

³⁴ Anī kósə de gə̄ tél ədanən̄ na: Jḭḭ j-oō tū *ndū najə̄ tə́ na *Kərist a ndi ngándáńg. Ba i ba̰ý á ə́da na i gáŕ kadə̄ a əlan̄ Ngōn̄ Deē dɔɔ́ ní? Ngōn̄ Deē nəkɔ́ i náā?

³⁵ Anī Jeju ədadə́ na: Loo kə́ unjə̄ kow i dansí tə́ ɓáý. Ī-njə̄rāī dan ń loo kə́ unjə̄ kow i dansí tə́ ɓáý ní, yā kadə̄ loo kə́ risə til əhɔńsí dɔ jīsí tə́ alé. Tɔdɔ̄ deē ń njə̄rā tilií ní, ger̄ loo ń a aw̄ kə̄ tū tə́ ní alé.

³⁶ Dan ń loo kə́ unjə̄ kow i sesí ɓáý ní, ī-taāī kem loo kə́ unjə̄ kow ní, yā kadə̄ ī-téliīneé ngán loo kə́ unjə̄ kow gə̄. Dan ń Jeju ədadə́ najə̄ ń toō oy anī, ɔtə tadə́ tə́ aw̄ ɓɔ̄ɔ̄ rɔ̄n kɔ̄ɔ́.

Jipə gə̄ taān̄ kem Jeju alé

³⁷ Ká ré ni-rāā yá̰á̰ kə́ to kɔr kum gə̄ ngá̰ý ta kumdə́ tə́ gə̄gē anī, ba nin̄-taān̄ kemən alé.

³⁸ I yā kadə̄ najə̄ ń Ijai *nge koō ta əda toó reē udəń gírí, əda na: Kɔ́ɔ̄ɓē, i náā n taā kem najə̄ kɔr̄jí ní? I náā n Kɔ́ɔ̄ɓē ɔjən yá̰á̰ ń ni-rāā kə jīneé ní?

³⁹ I tām̄ najə̄ ń toō tə́ n nin̄-asən̄ taā kem alé ní, tɔdɔ̄ Ijai əda to̰ na:

⁴⁰ Nə́ɓā rāā adə̄ kumdə́ tɔ̄ɔ̄ kɔ̄ɔ́ ō, adə̄ kemdə́ ngan̄g ngóróró ō, yā kadə̄ kumdə́ a̰a̰ loo aĺ ō, yā kadə̄ ger̄nəń kum najə̄ kógə̄ḿ aĺ ō, na sōgə́ nin̄-tūrə̄n̄ háĺdə́, anī m-ájə́də́.

⁴¹ Ijai ɔr̄ najə̄ beé i tām̄ ni-a̰a̰ *kɔsə gɔn yā Jeju, adə̄ ni-ɔr̄ i najə̄ yān.

⁴² Ba dɔ dán ngār gə̄ tə́ gə̄gē ní, ngá̰ý gə̄ taān̄ kemən. Banī nin̄-ədan̄ najə̄ taā kem yādə́ kə̄ ndágá wáńg alé, najə̄ yā *Parijiyḛ gə̄ tə́. Tām̄ ɓōlə́n̄ najə̄ kadə̄ tə̄ɓān̄də́ kɔ̄ɔ́ kem kújə́ kán̄ naā gə̄ tə́.

⁴³ Tɔdɔ̄ nin̄-ndigən̄ kɔsə gɔn yā de gə̄ tɔȳ *kɔsə gɔn yā Nə́ɓā.

A gāngə̄n̄ sarya i kə ta kūl̄ najə̄ kɔr̄ Jeju

⁴⁴ Banī Jeju əga kɔŕ əda na: Deē ń taā kemḿ anī, taā i kemḿ mā alé, banī taā i kem nge ń əlam̄ ní.

⁴⁵ Deē ń a̰a̰m̄ anī, a̰a̰ i nge ń əlam̄ ní.

⁴⁶ m̄-reē dɔ nang tə́ i kə́ loo kə́ unjə̄ kow tə́, yā kadə̄ náā nəkɔ́ ń taā kemḿ anī, ndi kum til tə́ alé.

⁴⁷ Ré deē kógə̄ḿ oō najə̄ yāḿ banī rāā yá̰a̰ gə̄ ń m-ə́dá ní aĺ anī, i mā n m-ā m̄-gān̄g sarya dɔn tə́ ní alé. Tɔdɔ̄ m̄-reē i gān̄g saryaá dɔ de kə́ dɔ nang tə́ gə̄ tə́ alé, banī i kajə de kə́ dɔ nang tə́ gə̄ tə́.

⁴⁸ Deē ń mbātə́m̄ ō, ndigə najə̄ yāḿ aĺ ō ní, ni-ənge nge gān̄g sarya dɔn tə́ kɔ̄ɔ́ ɓá: Najə̄ ń m-ə́dá ní a gān̄g sarya dɔn tə́ ta ngóy ndɔ̄ gə̄ tə́.

⁴⁹ Tɔdɔ̄ m-ɔ̄r̄ najə̄ i kə dɔḿ mə̄kɔ́ alé, banī Bɔbə́ḿ ń əlam̄ ní i ni n adə̄m̄ gō míndən kadə̄ m-ə́da ō, kadə̄ m-ndóō de gə̄ ō ní.

⁵⁰ Tá m̄-ger̄ kadə̄ gō míndən i yá̰á̰ kə́ a rāā kadə̄ deē ndi kə kumneé ngándáńg: Najə̄ ń m-ə́dá ní, m-ə́da i tītə̄ ń Bɔbə́ḿ ədamə̄ń ní.