IJAI 7 - Bible sar

Kəla kə́ kadə̄ ədan̄ mban̄g Akaj

¹ Dan ngeé ń noō tə́ ní, i Akaj kə́ ngōn̄ Yotam kə́ ngōn̄ Ojias n ndi mban̄g dɔ nang kə́ *Juda tə́ ní. Anī Resin, mban̄g kə́ Aram ō, Peka kə́ ngōn̄ Remalia ń i mban̄g kə́ *Israel ō ní, reē ənīn̄ ɓē kə́ Jerusalem rɔ̄ɔ̄, banī nin̄ tetənən̄ rɔ̄ɔ̄ alé.

² Ədan̄ Akaj ń i de kə́ gír yā Dabid tə́ ní ō, de kə́ bo yān gə̄ malang ō na: De kə́ Aram gə̄ əndān̄ gérger yādə́ dɔ nang yā *Epəraim tə́. Najə̄ ní yéȳ mban̄g ō, yéȳ gír deē yān gə̄ ō, tītə̄ ń nél a yéyəń kāgə̄ gə̄ ní beē.

³ Loo ń noō tə́ Kɔ́ɔ̄ɓē əda Ijai na: Ún ngōnīí Seyar Yasub ādə̄ ni i seí, ba āw̄ ə́nge Akaj. Ni-ra i ta tɔ̄l̄ ta bəlo kə́ ndēr̄ kadə̄ man̄ kə́ kem loo ngɔ̄m̄ man̄ kə́ dām̄ loo kə́ kḭḭ kə̄ dɔɔ́ tə́ aw̄ kemeé tə́ tə́, dɔ róbə́ ń de gə̄ a aw̄nəń kə̄ loo yā ngé rāā kəla kūbə̄ gə̄ tə́ ní.

⁴ Ā ə́dan na: Á̰a̰ gō rɔ̄í majə! Ī-ndi jəke, ī-lōō ɓōĺ. Ī-lōō kadə̄ wōn̄g kə́ ngá̰ý yā Resin ń i de kə́ Aram ní ō, yā ngōn̄ Remalia ō, ɔr̄ tɔ́gí. Mban̄g gə̄ ń noō i ta kīr̄ hor kə́ jōó gə̄ kə́ a sūn̄ sa ngóy.

⁵ I rɔ̄kum kadə̄ Aram gə̄ ō, Peka ō, áskar gə̄ yā *Epəraim ō, gḛyn̄ rāāī yá̰á̰ kə́ majaĺ. Nin̄ ədan̄ na:

⁶ Ādə̄ j-aw̄ jə-rɔ̄ɔ̄ī ɓē ko̰o̰ kə́ *Juda! J-əlaī ɓōĺ kemən tə́! Jə-rāāī seneé gúu ta ɓoo rɔ̄n tū yājí tə́! J-əndāī ngōn̄ Tabeel mban̄g.

⁷ Ba yá̰á̰ ń Kɔ́ɔ̄ɓē Nə́ɓā əda ní n toó: Nge ń noō a əhɔ naā alé, yá̰á̰ ń noō a rāā yá̰a̰ alé.

^8-9 Tām̄ Damas i ɓē bo kə́ Aram ō, Resin ni i ngār kə́ Damas ngóy ō. Samari i ɓē bo kə́ Epəraim ō, Peka ni i ngār kə́ Samari ngóy ō. Kem ɓāl̄ kutə mehḛ́ gidə i mí anī, gír deē yā Epəraim gə̄ a gətóon̄ kɔ̄ɔ́. Ré ə̄nī kemsí mámák ādī Kɔ́ɔ̄ɓē aĺ anī, ā ásiī ra gotoó alé.

Emanuel

¹⁰ Kɔ́ɔ̄ɓē ɔr̄ najə̄ kə mban̄g Akaj ɓáý to̰, əda na:

¹¹ Ī-dəje Kɔ́ɔ̄ɓē Nə́ɓā yāí ādə̄ adī yá̰a̰ kɔjə kógə̄ḿ gə́le loo kə́ ɓádá tə́, aĺ ɓa dɔ rā̰ tə́.

¹² Banī Akaj tūr̄ əda na: I beé alé, m-ā m̄-dəje yá̰á̰ kógə̄ḿ alé, m̄-gḛy sāā ta Kɔ́ɔ̄ɓē alé.

¹³ Anī Ijai əda na: I beé ní, sḭḭ̄ ń i de gə̄ kə́ gír kojə yā mban̄g Dabid tə́ ní, ōōī! Sḭḭ̄ ī-rāāī de gə̄ adə̄ kɔr rāādə́ ō, tá to tītə̄ kə́ nge ń noō asəsí aĺ ɓáý beē. Sḭḭ̄ ī-rāāī Nə́ɓā yāḿ adə̄ kɔr rāān ō!

¹⁴ I beé ɓá ní, Kɔ́ɔ̄ɓē nəkɔ́ a adə̄sí yá̰a̰ kɔjə kógə̄ḿ: Ngōmandə a ndān̄ ngōn̄, ba a ojə ngōn̄ kə́ dəngam. A ɓārə́n na i Emanuel, kumən na i Nə́ɓā i sejí.

¹⁵ Ngōn̄ ní a ul̄ rɔ̄n i kə yibə̄ mba man̄g ō, kə tejə ō, bátə́ kadə̄ kum mbang ń ni a gerə̄ń mbātə́ yá̰á̰ kə́ majaĺ ba gə̄rań yá̰á̰ kə́ majə ní reē ugə̄ń.

¹⁶ Ngɔlaā ní ḭ̄ ī-ɓōĺ mban̄g gə̄ kə́ Aram ō, kə́ *Israel ō. Ɓá tā , ba pá tá kadə̄ ngōn̄ ní asə mbātə́ yá̰á̰ kə́ majaĺ ba gə̄rā yá̰á̰ kə́ majə ní, de gə̄ kə́ kem ɓē ko̰o̰ gə̄ kə́ gír i jōó gə̄ ń toō tə́ a əya̰n̄ ɓē yādə́ kɔ̄ɔ́.

¹⁷ Banī Kɔ́ɔ̄ɓē a əla kə ndɔ̄ kə́ majaĺ gə̄ yā kadī ō, yā kadə̄ gír deē yāí gə̄ ō, yā kadə̄ gír kojə yāí ō. Əla gír ndɔ̄ ń ɓē ko̰o̰ kə́ *Israel tə́ ɔrə̄ń rɔ̄n kɔ̄ɔ́ rɔ̄ ɓē ko̰o̰ kə́ *Juda tə́ ní, ndɔ̄ gə̄ kə́ ton̄ tītə̄ ndɔ̄ gə̄ ń noō gətóon̄ ɓáý. Yá̰á̰ ń noō a rāā yá̰a̰ i kə ta kūl̄ mban̄g kə́ Asiri.

Taān̄ loo ō, yá̰a̰ gə̄ kə́ rāān̄ yá̰a̰ gōtə́ ō

¹⁸ Ndɔ̄ kógə̄ḿ tə́ anī, Kɔ́ɔ̄ɓē a kɔ̄ŕ yá̰a̰ ta kógə̄ḿ, yā ɓārə́nń kón̄g gə̄ kə́ gō loo ń bā Nil a əsō kum bā bo tə́ tū tə́ ní tə́ ō, tejə gə̄ kə́ dɔ nang kə́ Asiri tə́ ō, kadə̄ reēn̄.

¹⁹ Nin̄ malang a reēn̄ yā ndi wól man̄ gə̄ kə́ mbal̄ gə̄ i tū tə́ tə́ ō, mbo̰ō̰ mbal̄ kə́ njár̄ gə̄ tə́ ō, kem túpə́ kámbə gə̄ tə́ malang ō, loo malang ń man̄ i tū tə́ ní tə́ ō.

²⁰ Ndɔ̄ ngeé ń noō tə́ ní, Kɔ́ɔ̄ɓē a un nə́ngá kógə̄ḿ gidə bā Opəratə tə́, nə́ngá ní i mban̄g kə́ Asiri. A̰á̰ā̰, ni a dəsā dɔsí ō, a dəsā bḭḭ̄sí malang kə́ rɔ̄sí tə́ ō, mbāýsí gə̄gē ni a dəsā kɔ̄ɔ́.

²¹ Ndɔ̄ ngeé ń noō tə́ ō ní, de gə̄ kógə̄ḿ kógə̄ḿ a ulə̄n̄ kó̰o̰ man̄g kógə̄ḿ ō, kó̰o̰ bə̄yā̰ gə̄ jōó ō.

²² Mbaadə́ a a̰ȳ ngá̰ý, adə̄ de gə̄ a o̰o̰n̄ yibə̄ kə́ tū mbaa man̄g tə́. A̰á̰ā̰, gotə de gə̄ malang ń a ndin̄ kem ɓēé ní, a ulə̄n̄ rɔ̄də́ i kə yibə̄ kə́ tū mbaa man̄g tə́ ō, i kə yibə̄ tejeé ō.

²³ Ndɔ̄ ngeé ń noō tə́ ɓáý to̰ ní, ndɔr̄ *kāgə̄ nduú kə́ kāgə̄ nduú gə̄ i dūbūú kemeé, kə́ gatən i sə́lē gində̄ arjā̰a̰ dūbú ní, a əya̰n̄ kɔ̄ɔ́ yā kadə̄ túpə kōn̄ gə̄.

²⁴ Túpə kōn̄ gə̄ a taān̄ loo kem ɓēé malang ō, de gə̄ a reēn̄ ndo̰ó̰ kemeé kə kum gərāá ō, kə ga̰ gərā gēé ō.

²⁵ De gə̄ a ɓōlə́n̄ túpə kōn̄ gə̄, adə̄ deē a aw̄ dɔ ngán mbal̄ gə̄ ń kété a ndɔrə̄n̄ tū tə́ kə kɔsɔɔ́ ní tə́ to̰ alé. A tél i loo kə́ man̄g gə̄ aw̄n̄ ko̰ó̰ tū tə́ ō, a tél i loo ra batə̄ gə̄ ō.