GALATƏ 3 - Bible sar

Ndū najə̄ ō taā kem ō

¹ Galatə gə̄, sḭḭ̄ i de kə́ kur̄ dɔsí gətóo. Sḭḭ̄ ń ɔjən̄sí najə̄ yā Jeju *Kərist kə́ əndanən̄ kə máyá̰ tū kāgə̄ kə́ dēsə́ tə́ adə̄ unjə̄ ta kumsí tə́ ní, i náā n tūr̄ kumsí kɔ̄ɔ́ ní?

² I najə̄ kə́ kal kógə̄ḿ beē ń toō n m̄-gḛy kadə̄ ī-tūr̄mī tə́ ní. Najə̄ ní n toō: Əngeī Ndíĺ Nə́ɓā i tām̄ rāā kə́ ī-rāāī yá̰á̰ kə́ *ndū najə̄ əda kadə̄ yā rāā tə́, aké i tām̄ koō kə́ ōōī Najə̄ kə́ Majə ba ī-taāī kem tə́ ḿ?

³ Kur̄ dɔsí gətóo asə naā beé a? Sḭḭ̄ ń ə́laī gír i kə Ndílí ní, ngɔlaā ī-gḛyiī tɔ̄l̄ ta i kə tɔ́gə́sí tā a?

⁴ Tasí nāā yá̰á̰ kə́ majə asə naā beé gə̄ i ndāńg karī a? Kadə̄ i ndāńg karī ní loon gətóo.

⁵ Nge ń adə̄sí Ndíl ō, rāā yá̰a̰ kə́ yáā gə̄ dɔ dáńsí tə́ ō ní, rāā i tām̄ rāā kə́ sḭḭ̄ ī-rāāī yá̰á̰ gə̄ kə́ *ndū najə̄ əda kadə̄ yā rāā gə̄ tə́, aké i tām̄ koō kə́ ōōī Najə̄ kə́ Majə ō ī-taāī kem ō ḿ?

⁶ Dan ń Abəraham taā kem Nə́ɓā ní, Nə́ɓā rāān de kə́ gōtə́ tə́ sɔɔ̄ń taā kem yān ní,

⁷ majə kadə̄ ī-gerī na i ngé taā kem gə̄ n i ngán kaa Abəraham kə́ rɔ̄kum gə̄ ní.

⁸ Tá ndangən̄ kem makətūbə̄ yā Nə́ɓā tə́ kété na, Nə́ɓā a rāā kadə̄ de gə̄ ń i Jipə aĺ gə̄ ní, a télən̄ de kə́ súmūú gə̄ loo ń a taān̄ kem ní. I tām̄ najə̄ ń toō tə́ n ədan̄ Abəraham Najə̄ kə́ Majə ń toō kemeé na: Nápar de gə̄ malang a əngen̄ tɔ́r̄ ta i kə ta kūlīí ní.

⁹ Abəraham taā kem Nə́ɓā, anī Nə́ɓā tɔ́r̄ tan dɔn tə́. Adə̄ ngé taā kem gə̄ malang ní, Nə́ɓā tɔ́r̄ tan dɔdə́ tə́ tītə̄ yān ō.

¹⁰ Ba ngé gə̄ ń əndān̄ tɔ́gə́də́ i dɔ rāā yá̰á̰ ń *ndū najə̄ əda tə́ ní, ndɔ̄ĺ i dɔdə́ tə́. Tɔdɔ̄ i kə́ ndang na: Náā nəkɔ́ ń rāā yá̰a̰ malang ń ndangən̄ kem makətūbə̄ ndū najə̄ tə́ ní aĺ ní i de kə́ ndɔ̄ĺ i dɔn tə́.

¹¹ Kadə̄ *ndū najə̄ asə rāā kadə̄ deē kógə̄ḿ tél de kə́ súmūú ta kum Nə́ɓā tə́ aĺ ní, nge ń noō i yá̰á̰ kə́ to i kə̄ dɔ ndágá wáńg. Tɔdɔ̄ i kə́ ndang na: Deē ń i de kə́ gōtə́ ta kum Nə́ɓā tə́ kə ta kūl̄ taā kem yān ní, a ndi kə kumneé i kə ta kūl̄ taā kem.

¹² Ba *ndū najə̄ teē i tū taā kem tə́ alé, banī deē ń rāā yá̰a̰ gə̄ ń ndū najə̄ əda ní, kɔ́ɔ̄ a ndi kə kumneé i kə ta kūl̄də́.

¹³ Dan ń *Kərist tél de kə́ ndɔ̄ĺ i dɔn tə́ kum gotəjí ní, ni-ɔr̄jí kɔ̄ɔ́ gír ndɔ̄ĺ yā *ndū najə̄ tə́. Tɔdɔ̄ i kə́ ndang na: Deē ń naānən̄ dɔɔ́ tū kāgə̄ tə́ ní, ndɔ̄ĺ i dɔn tə́.

¹⁴ Nge ń noō i yā kadə̄ tɔ́r̄ ta yā Abəraham reēń dɔ de gə̄ ń nin̄ i Jipə aĺ gə̄ ní tə́ kə ta kūl̄ Jeju Kərist ō, yā kadə̄ j-əngeīń Ndíĺ ń Nə́ɓā ənī míndən yā kadə̄ ní kə ta kūl̄ taā kem ō.

Ndū najə̄ ō kənī míndə yā Nə́ɓā ō

¹⁵ Ngákó̰ó̰ḿ gə̄, m-ā m-ún yá̰a̰ rāā deē ndul gə̄ yā kɔjəńsí yá̰á̰ kógə̄ḿ. Ré najə̄ gə̄ kə́ dɔ kənge yá̰á̰ kə́ gotə deē tə́ i kə́ ndang kə gōó anī, de kə́ yā kɔr̄ kum najə̄ kógə̄ḿ tū tə́ kɔ̄kə́, aké kə́ yā kənī yān dɔ tə́, gətóo.

¹⁶ Banī i Abəraham ō, ngōn̄ kaan ō n Nə́ɓā ənī míndən adə̄də́ ní. I kə́ kəda na i ngán kaan gə̄ tītə̄ kə́ nin̄ i ngá̰ý beē alé, ba na i ngōn̄ kaaí, adə̄ i de kə́ kal kógə̄ḿ beē, deē ní i *Kərist.

¹⁷ Najə̄ ń m-ə́dá ní n toó: Kété ní Nə́ɓā ənī míndən ba ɔjə yá̰a̰ gə̄ kə́ dɔ tə́ kə́ yā rāā. Ɓāl̄ ɓú sɔ́ kə kutə mə́ta gō tə́ anī, *ndū najə̄ reē yān. Ba ndū najə̄ ní asə nujə ndū Nə́ɓā ń ənī ní alé. Ré i beé aĺ anī ndū Nə́ɓā ń ənī ní i yá̰á̰ kə́ kanjə̄ kumən.

¹⁸ Ba ré yá̰a̰ ndəbā ń Nə́ɓā adə̄ deē karī ní, i kə ta kūl̄ ndū najá anī, i kə ta kūl̄ kənī ndūú to̰ alé. Banī Nə́ɓā rāā majə kə Abəraham i kə ta kūl̄ míndən kə́ ənī adə̄n.

¹⁹ Ré i beé anī, əndān̄ *ndū najə̄ i tām̄ rí tə́? Əndān̄ ndū najə̄ dɔ kənī míndə́ tə́ i yā kadə̄ mān̄ dɔ ndū najə̄ ɔjəń rɔ̄n kə̄ ndágá, yā ngóōń ta reē ngōn̄ kaa ń kənī míndə i tām̄ yān tə́ ní. I *de kə́ dɔ rā̰ tə́ gə̄ n teēn̄ kə *ndū najə̄ ní, kə ta kūl̄ jī nge ra mbənā tə́ kógə̄ḿ.

²⁰ Tá nge ra mbənā tə́ ní, i nge ra mbənā deē kógə̄ḿ tə́ ngóy alé. Banī Nə́ɓā i kal kógə̄ḿ beē.

Nə́ɓā adə̄ de gə̄ ndū najə̄ i tām̄ rí tə́?

²¹ I beé tā ní, *ndū najə̄ a ɔgə̄ kənge yá̰á̰ ń Nə́ɓā ənī míndən najə̄n tə́ ní a? Sḛ́ý aĺ bátə́. Tɔdɔ̄ nə́ngētə́ adə̄n̄jí ndū najə̄ kə́ asə kadə̄ de gə̄ əngen̄ kajə tū tə́ anī, ndū najə̄ a rāā kadə̄ de gə̄ télən̄ de kə́ gōtə́ gə̄ rɔ̄kum.

²² Ba i tītə̄ ń noō alé, tām̄ makətūbə̄ yā Nə́ɓā əla dɔ yá̰a̰ gə̄ malang kə́ dɔ nang tə́ gíŕ tɔ́gə yā majaĺ tə́, yā kadə̄ Nə́ɓā adə̄ń ngé taā kem gə̄ yá̰á̰ ń ni-ənī míndən yā kadə̄ ngé taā kem Jeju *Kərist gə̄ ní.

²³ Kété tá kadə̄ taā kem reē ní, *ndū najə̄ əhɔjí dəngáý bátə́ kadə̄ teēn̄ kumjí dɔ taā kem tə́.

²⁴ Adə̄ ndū najə̄ əndā kumən gíŕjí tə́ bátə́ kadə̄ dan ń Kərist reē ugə̄ anī, jə-taāī kemən yā téləń de kə́ súmūú gə̄.

²⁵ Ba dan ń taā kem reē ugə̄ anī, jḭḭ̄ i gír nge kəndā kumən gíŕjí tə́ to̰ alé.

²⁶ Tɔdɔ̄ sḭḭ̄ malang i ngáń Nə́ɓā gə̄ sɔɔ̄ ń taā kə́ ī-taāī kem *Kərist Jeju,

²⁷ tām̄ sḭḭ̄ malang ń rāān̄sí *batém kə rī Kərist ní, ə́laī Kərist rɔ̄sí tə́ tītə̄ kūbə̄ beé.

²⁸ Adə̄ dansí tə́ ní, kəda na de kə́ beé na i *Jipə, ba de kə́ beé na i Gərek, de kə́ beé na i ɓəlo, ba de kə́ beé na i kɔ́ɔ̄ rɔ̄n, aláa kəda na ni ń toō na i de kə́ dəyá̰, ba ni ń toō na i kə́ dəngam ní, i yá̰á̰ kə́ kumən gətóo.

²⁹ Tɔdɔ̄ sḭḭ̄ malang i de kə́ kógə̄ḿ beē gə̄, sɔɔ̄ń ɓoo kə́ ī-ɓooī naā kə *Kərist. Adə̄ ré sḭḭ̄ i de gə̄ yā Kərist anī, sḭḭ̄ i gír kaa yā Abəraham ō, ngé kənge yá̰a̰ gə̄ ń Nə́ɓā ənī míndən yā kadə̄də́ ní ō.