ESTER 7 - Bible sar

Najə̄ a majaĺ dɔ Haman tə́ ō, oy ō

¹ Mban̄g nin̄ kə Haman reē əsan̄ yá̰a̰ kə Ester nə̄yá̰ mbangāá.

² Kə ndɔ̄ kə́ nge ko̰ jōó ngeé ń toō dan ń əsan̄ yá̰a̰ oy anī mban̄g tél əda Ester ɓáý to̰ na: Ester, nə̄yá̰ mban̄g, i rí n ī-sāā dəjem̄ ní? M-ā m-ādī yá̰á̰ ní! Yá̰á̰ ń ī-gḛy ní i rí? Ká i núsə ɓē ko̰o̰ yāḿ gə̄gē a m-ā m-ādī.

³ Ester tél ədan na: Kɔ́ɔ̄ ɓē gə̄, ré ī-rāā kem majə seḿ ō, ī-ndigəm̄ ō anī, ādə̄ m-óy aĺ ō, ādə̄ gír deē yāḿ gə̄ oyn̄ aĺ ō, yá̰á̰ ń m̄-sāā dəjeī ní n noó.

⁴ Tɔdɔ̄ igən̄ seḿ mā ō gír deē yāḿ gə̄ ō kadə̄ nujən̄ sejí kɔ̄ɔ́! Kadə̄ tɔ̄lə̄n̄jí kadə̄ jə-gətóo kɔ̄ɔ́! Ré igən̄ sejí i kadə̄ jḭḭ i ɓəlo gə̄ anī m-ā m̄-ndi taḿ mbóo. Tɔdɔ̄ rāā kum naā ndoō tə́ kə́ tītə̄ ń noō asə kadə̄ deē njə́ɓań mban̄g alé.

⁵ Anī mban̄g Jerses dəje nə̄yá̰n Ester na: Deē ń gír̄ rāā yá̰á̰ kə́ beē ní i náā? Ndi i rá?

⁶ Ester tél əda na: Nge rāā kumjí ndoō tə́ ō, madə̄ ba̰ā̰jí ō, i Haman de kə́ majaĺ ń ndi toó! Loo ń noō tə́ Haman oy mámák ta kum mban̄g tə́ nin̄ kə nə̄yá̰n.

⁷ Mban̄g ḭḭ kə wōngōó ta yá̰a̰ kəsa tə́ ba teē aw̄ kem ndɔr̄ kə́ kem ndogə̄ yān tə́. Haman ger̄ kadə̄ mban̄g gḛy i kadə̄ yá̰á̰ kə́ to kum kaȳ aĺ rāān. Adə̄ ni-ndi gotoó yā rāā Ester nə̄yá̰ mban̄g ɓɔ́ kadə̄ ajən.

⁸ Ni-əsō bəruk dɔ yá̰a̰ ndi ń Ester ndi dɔ tə́ ní anī, mban̄g tél kem ndɔrɔ́ udə kújə kəsa yá̰á̰ tə́ gogə́. Kə̄ ta jī tə́ noō mban̄g əda na: I gḛy sāā nə̄yá̰ mban̄g dɔ gúú tə́ kə̄ dɔ tə́ ɓáý ta kumḿ tə́ kem kújə yāḿ tə́ a? Mban̄g əda najə̄ tan kógə̄ḿ anī jóó ń jóo toó ngé kəla gə̄ utə̄n̄ ta kum Haman kə kūbūú kɔ̄ɔ́.

⁹ Anī *áji mbang kógə̄ḿ kə́ dan madə̄ gə̄ tə́ ń rīn na i Harbona ní əda ta kum mban̄g tə́ na: Ee, kāgə̄ tɔ̄l̄ deē ń Haman nəkɔ́ rāā tām̄ yā Mardose ń najə̄ kə́ tan tə́ ajə mban̄g ní n noó. Kāgə̄ ní ra i ta kújə yā Haman tə́. Ngālən kə́ kə̄ dɔɔ́ i métər kutə jōó gidə i mí. Anī mban̄g əda na: Ə̄nīī kəlā míndən tə́ ba ī-do̰ō̰niī tū tə́!

¹⁰ Adə̄ ənīn̄ kəlā míndə Haman tə́ ba do̰ō̰nən̄ dɔɔ́ tū kāgə̄ tɔ̄l̄ deē ń ni-rāā tām̄ yā Mardose tə́ ní. Loo ń no ō tə́ wōn̄g yā mban̄g tetə.