ESTER 4 - Bible sar

Mardose mēr̄ Ester rāā yá̰á̰ kógə̄ḿ

¹ Mardose oō yá̰a̰ malang ń rāā yá̰á̰ ní adə̄ ni *rə́yā̰ kūbə̄ yān gə̄ kə̄ rɔ̄n tə́ ba o̰ō̰ kūbə̄ kəhɔ ndoō ō, ɔy bū kə̄ dɔn tə́ ō. Ni teē aw̄ njə̄rā kem ɓēé ba əga kɔŕ kə wur katāá.

² Dan ń ugə̄ ta róbə ndogə̄ yā mban̄g tə́ anī dəba tɔdɔ̄ de kə́ o̰ō̰ kūbə̄ kəhɔ ndoō a udə kem ndogə̄ yā mban̄g tə́ alé.

³ Tá gō nang gə̄ kógə̄ḿ kógə̄ḿ ń yá̰a̰ ń mban̄g ndang kadə̄ yā rāā ní ugə̄ tū tə́ ní, *Jipə gə̄ ń ndin̄ tū tə́ ní əhɔn̄ ndoō ngá̰ý: Nin̄ *ndin̄ ɓō tām̄ yā Nə́ɓā tə́, nōōn̄ kə man̄ kumdə́ ō, nōōn̄ rɔ̄də́ ō. Ngá̰ý gə̄ o̰ō̰n̄ kūbə̄ kəhɔ ndoō ō, ton̄ dɔ bū tə́ ō.

⁴ Ngán kə́ dəyá̰ yā Ester gə̄ ō, *áji mbang yān gə̄ ō reē ədan̄ Ester anī ni ń i nə̄yá̰ mban̄g ní sōl̄ ngá̰ý. Ni-əla kə kūbūú kadə̄ Mardose əla rɔ̄n tə́ ba kə ɔrə̄ń kūbə̄ kəhɔ ndoō rɔ̄n tə́ kɔ̄ɔ́, banī Mardose ɔdə alé.

⁵ Ester ɓāŕ Hatak, áji mbang kə́ dan madə̄ gə̄ tə́ ń mban̄g adə̄n seneé kadə̄ rāā kəla yān ní, əlan kadə̄ aw̄ dəje Mardose yá̰á̰ ń rāā yá̰á̰ ní ō, kadə̄ Mardose ɔjən gír ō.

⁶ Hatak teē ənge Mardose ndágə loo kə́ kem ɓēé tə́ ta róbə ndogə̄ yā mban̄g tə́.

⁷ Anī Mardose ɔjən yá̰a̰ malang ń rāān yá̰á̰ ní ō, ɔjən kutə nar ń Haman ɔjə kadə̄ a ɓōkə́n̄ loo ngɔ̄m̄ yá̰a̰ kənge yā mban̄g tə́ loo ń tɔ̄lə̄n̄ *Jipə gə̄ malang oy kɔ̄ɔ́ ní ō.

⁸ Mardose adə̄ Hatak makətūbə̄ mbēr̄ tɔ̄l̄ Jipə gə̄ ń ənīn̄ kem ɓē kə́ Sujə tə́ ní kadə̄ aw̄ń ɔjə Ester ō, ədan na kə əda Ester najə̄ ní kadə̄ kə oō ō, kə mērən kaw̄ rɔ̄ mban̄g tə́ yā dəjen kadə̄ rajən ō, kadə̄ ra ta kum mban̄g tə́ kə rāān ɓɔ́ tām̄ yā gír deē yān gə̄ tə́ ō.

⁹ Hatak reē əda Ester najə̄ gə̄ ń Mardose ɔr̄ seneé ní.

¹⁰ Anī Ester ədan na kə tél kə aw̄ kə əda Mardose na

¹¹ de gə̄ malang ń, əla gír dɔ ngé rāā kəla kə́ ndogó mbangāá gə̄ tə́ bátə́ ugə̄ń dɔ de kə́ kem ɓēé gə̄ kə́ gō nang yā mban̄g tə́ ní na gerə̄n̄ *ndū najə̄ kə́ tām̄ yādə́ tə́ majə: Kadə̄ náā nəkɔ́ ń i dəngam aláa i dəyá̰ ń aw̄ ta kum mban̄g tə́ ndágə loo kə́ ta kújə yān tə́ kanjə̄ kadə̄ i ni n ɓārə́n ní, *ndū najə̄ kə́ tām̄ yā de kə́ beé tə́ i kógə̄ḿ beé ngóy, i tɔ̄l̄ kɔ́ɔ̄ kɔ̄ɔ́. Ba ré i mban̄g n əla kāgə̄ ko̰o̰ ɓē yān kə́ rāā kə lɔ́rɔ́ kum kə̄ rɔ̄ deē ní tə́ tá kɔ́ɔ̄ a ndi kə kumneé. Ba kə́ tām̄ yān ni Ester tə́ tá na asə ndɔ̄ kutə mətá kɔ̄ɔ́ tā n əlan̄ gōn tə́ aĺ ní.

¹² Ədan̄ Mardose najə̄ gə̄ ń Ester ɔr̄ ní.

¹³ Anī ni-əda kadə̄ tél ədanən̄ na: Yá̰á̰ ń na a rāā yā rāā *Jipə gə̄ malang ní kə lōō kɔjəń na ni a teē kum tə́ tām̄ ndi kə́ ndi i kem ndogə̄ yā mban̄g tə́.

¹⁴ Tɔdɔ̄ ré na ndi tan mbóo dan ń toō tə́ anī, a rāān̄ kə Jipə gēé kə ta róbə́ kə́ rangaá kadə̄ nin̄ a ajən̄. Banī ni na a oy, adə̄ ta gír kojə yān na a udə kɔ̄ɔ́. Tá i náā n ger̄? Majanī ni na tél nə̄yá̰ mban̄g i kadə̄ əndāń rɔ̄n ta yá̰á̰ kə́ beé gə̄ tə́.

^15-16 Loo ń noō tə́ Ester əla əda Mardose na Jipə gə̄ malang ń ndin̄ kem ɓē kə́ Sujə tə́ ní, kə aw̄ kə ɔsə dɔdə́ naā tə́ ba kə *ndin̄ ɓō tām̄ yān tə́ ndɔ̄ mətá. Kadaá ō ndɔ̄ɔ́ ō ní kə *ndin̄ ɓō tām̄ yā Nə́ɓā tə́ ō, ka̰ȳ yá̰a̰ ō. Ba ni kə ngáń kə́ dəyá̰ yān gēé n-a n-rāān̄ tītə̄ ń noō ō. Gō tə́ anī n-ā n-rāā yá̰á̰ ń *ndū najə̄ ɔgə rāā ní. N-a n-aw̄ rɔ̄ mban̄g tə́. Ba ré i yā kadə̄ n-oy gə̄gē anī kə n-oy.

¹⁷ Loo ń noō tə́ Mardose ɔtə aw̄ ba ra yá̰a̰ malang tītə̄ ń Ester ədanneé ní.