EJEKIEL 6 - Bible sar

Najə̄ yā ngé rāā ɓesə̄ gə̄

¹ Kɔ́ɔ̄ɓē ɔr̄ najə̄ seḿ, əda na:

² Ḭ̄ ngōn̄ deē, ī-tūr̄ kumií kə̄ rɔ̄ mbal̄ bo gə̄ kə́ *Israel tə́ ba ɔ̄r̄ najə̄ kə́ sɔɔ̄ dɔdə́ ō,

³ ā ə́da na: De gə̄ ń ndin̄ ɓē dɔ mbal̄ bo gə̄ tə́ ō, dɔ ngán mbal̄ gə̄ tə́ ō, guúru loo gə̄ tə́ ō, wól loo gə̄ tə́ ō ní najə̄ ń mā Kɔ́ɔ̄ɓē Nə́ɓā m-ə́dádə́ ní n toó. M-ā m̄-reē kə ngé rɔ̄ɔ̄ gēé dɔsí tə́ yā nujəń loo ndɔ̄ȳ yāsí gə̄ kɔ̄ɔ́.

⁴ A nujən̄ kə *loo tun̄ yá̰a̰ yāsí gēé sák sák kɔ̄ɔ́ ō, a tɔ̄ɔ̄n̄ *loo róō ndujə̄ yá̰á̰ kə́ kotə majə yāsí gə̄ kɔ̄ɔ́ ō, m-ā m̄-rāā kadə̄ de kə́ koy yāsí gə̄ a tə́sōn̄ no ɓesə̄ gə̄ tə́ ō.

⁵ M-ā m̄-ɓōkə́ nīń *Israel gə̄ no ɓesə̄ yādə́ gə̄ tə́ ō, m-ā m̄-tə̄ndā kə̄ngādə́ gə̄ yā tḭ̄ḭ̄ kə̄ loo gə̄ tə́ gīr̄ gidə *loo tun̄ yá̰a̰ yādə́ gə̄ ō.

⁶ Loo malang ń ī-ndiī tū tə́ ní, a nujən̄ ɓē yāsí gə̄ kɔ̄ɔ́ ō, ā ə́ya̰ī loo ndɔ̄ȳ yāsí gə̄ kɔ̄ɔ́ ō, adə̄ a nujən̄ kə *loo tun̄ yá̰a̰ yāsí gə̄ ń najə̄ i dɔ tə́ ní kɔ̄ɔ́ ō. A tétə̄n̄ ɓesə̄ yāsí gə̄ kɔ̄ɔ́ ō, a nujənə̄ń sák sák kɔ̄ɔ́ ō, a tɔ̄ɔ̄n̄ *loo róō ndujə̄ yá̰á̰ kə́ kotə majə yāsí gə̄ kɔ̄ɔ́ ō, a nujən̄ yá̰a̰ malang ń ī-rāāī ní ō.

⁷ De gə̄ a oyn̄ dɔ dáńsí tə́, adə̄ ā ī-gerī kadə̄ mā i Kɔ́ɔ̄ɓē.

⁸ Banī m-ā m-ə́ya̰ gotə de kə́ sḛ́ý beē gə̄ ngóy, de gə̄ kə́ dɔ dáń nápar de gə̄ tə́ ń teēn̄ ta yo kaskar tə́ ní, dan ń a tə̄ndā tḭ̄ḭ̄n̄sí kə̄ kem ɓē kə́ rang gə̄ tə́ ní.

⁹ A əga kem deē yāsí gə̄ ń teēn̄ ta yo tə́ ní dɔḿ tə́, dɔ dáń nápar de gə̄ ń a əhɔn̄də́ nin̄ dɔ gúú tə́ aw̄n̄ sedə́ dandə́ tə́ ní, nin̄ ń m-ā m̄-tétə̄ ngarā̰ kemdə́ kə́ a rāā ájə́ba ń mbātə́m̄ kɔ̄ɔ́ ní ō, kumdə́ gə̄ kə́ rāān̄ háĺ ájə́ba kə ɓesə̄ yādə́ gēé ō ní. Nin̄ a a̰ā̰n̄ ta kum naā to̰ alé ɔjəń dɔ yá̰á̰ kə́ majaĺ ń nin̄ rāān̄ ní ō, sɔɔ̄ń dɔ yá̰á̰ kə́ majaĺ ngá̰ý gə̄ malang yādə́ ō.

¹⁰ Loo ń noō tə́ nin̄ a gerə̄n̄ kadə̄ mā i Kɔ́ɔ̄ɓē. Dan ń m̄-tāādə́ najə̄ yá̰á̰ kə́ tōr̄ gə̄ ń noō ní, m-ɔ̄r̄ najə̄ kanjə̄ kumən alé.

¹¹ Kɔ́ɔ̄ɓē Nə́ɓā ɔr̄ najə̄ tītə̄ ń toō beé əda na: Ə́nda jīí, ə́ɓa njaí nang tə́, ba ə́da na: Gír yá̰á̰ kə́ majaĺ ngá̰ý yā ngán *Israel tə́ gə̄ ń oyn̄ yo kaskar ō, yo ɓō ō, yo mo̰y ngāl̄bɔ̄gīí ō ní gān̄g tā.

¹² Ngé gə̄ ń ndin̄ sa̰y ní, a oy yo mo̰y ngāl̄bɔ̄gīí. Ngé gə̄ ń ndin̄ ngɔr ní, a a tɔ̄lə̄n̄də́ ta rɔ̄ɔ̄ tə́. Ngé gə̄ ń a teēn̄ ta yo tə́ ní, a oyn̄ yo ɓō. M-ā m̄-bəgā wōn̄g yāḿ dɔdə́ tə́ bátə́ ta tɔ̄l̄ ta tə́.

¹³ Loo ń noō tə́ nin̄ a gerə̄n̄ kadə̄ mā i Kɔ́ɔ̄ɓē. Nīń yādə́ a ton̄ nang tə́, dan ɓesə̄ yādə́ gə̄ tə́. Loo malang ń nin̄ a tunə̄n̄ yá̰a̰ a adə̄n̄ ɓesə̄ yādə́ gə̄ tū tə́ ní, nīń gə̄ ton̄ tū tə́. A tōn̄ kə̄ dɔ mbal̄ gə̄ tə́ ō, kə̄ dɔ ngán mbal̄ mbal̄ gə̄ tə́ ō, kə̄ gír kāgə̄ gə̄ kə́ mbīdə́ to mbōl̄ ō, əga ku tə́ ō, loo kə́ rang gə̄ malang ń ɓesə̄ yādə́ gə̄ i tū tə́ ní, nīń gə̄ ń a tōn̄ tū tə́ ō.

¹⁴ M-ā m-ɔ́jə́ tɔ́gə́ḿ kə̄ ndágá dɔdə́ tə́. M-ā m̄-nujə ɓē yādə́ kɔ̄ɔ́. M-ā m-ə́lá gír i kem dəla loo kə́ dām̄ mbɔ́r ɓē kə́ geleé tə́ bátə́ kem ɓē kə́ Ribəla tə́ dām̄ mbɔ́r ɓē kə́ ko̰ó̰ tə́. Loo ń noō tə́ nin̄ a gerə̄n̄ kadə̄ mā i Kɔ́ɔ̄ɓē.