1 SAMUEL 3 - Bible sar

¹ Ba Samuel ń i ngōn̄ ní, a rāā kəla yā Kɔ́ɔ̄ɓē i ta kum Eli tə́. Dan ngeé ń noō tə́ ní Kɔ́ɔ̄ɓē a ɔr̄ najə̄ kə deé i láẃ láẃ aĺ ō, a rāā kadə̄ deē a̰a̰ yá̰a̰ i láẃ láẃ aĺ ō.

Nə́ɓā əndā Samuel nge koō ta yān tə́

² Ndɔ̄ kə́rēý tə́ ndɔ̄ɔ́ anī Eli ń kumən a̰a̰ loo ngá̰ý to̰ aĺ ní, to a ɓīī loo ń a to tū tə́ kété gə̄ tə́ ní.

³ Samuel to kem *kújə yā Kɔ́ɔ̄ɓē tə́ loo ń sandúkə yā Nə́ɓā i tū tə́ ní tə́ a ɓīī ō, hor yā Nə́ɓā i kə́ deē tɔ̄l̄ aĺ ɓáý ō.

⁴ Kɔ́ɔ̄ɓē ɓāŕ Samuel anī Samuel ndigən na: Mā n toó.

⁵ Samuel ḭḭ a̰ȳ ngɔ̄də̄ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Anī Eli tél ədan na n-ɓārə́n alé ba kə tél aw̄ kə to nang tə́. Samuel tél aw̄ to nang tə́.

⁶ Kɔ́ɔ̄ɓē ɓāŕ Samuel nja kə́ nge ko̰ jōó ɓáý to̰ na: Samuel. Anī Samuel ḭḭ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Anī Eli tél ədan na: Ngōnə̄ḿ, m̄-ɓāríī alé, ba ī-tél āw̄ ī-to nang tə́.

⁷ Dan ń noō tə́ ní Samuel ger̄ Kɔ́ɔ̄ɓē aĺ ɓáý, tɔdɔ̄ Kɔ́ɔ̄ɓē ɔr̄ najə̄ seneé nja kógə̄ḿ aĺ ɓáý.

⁸ Kɔ́ɔ̄ɓē ɓāŕ Samuel nja kə́ nge ko̰ mətá anī Samuel ḭḭ aw̄ rɔ̄ Eli tə́ ba ədan na: Ī-ɓārə́m̄ ní mā n toó. Loo ń noō tə́ Eli ger̄ kadə̄ i Kɔ́ɔ̄ɓē n a ɓāŕ ngōn̄ ní.

⁹ Adə̄ əda Samuel na: Ī-tél āw̄ ī-to nang tə́. Ba ré a ɓāríī ɓáý to̰ anī, ə́da na: Kɔ́ɔ̄ɓē, ɔ̄r̄ najə̄ na nge kəla yāí nēl̄ mbīn yā koōń. Samuel tél aw̄ to gotən tə́ gogə́.

¹⁰ Kɔ́ɔ̄ɓē reē ra ba ɓārə́n tītə̄ kə́ kété gə̄ na: Samuel, Samuel. Anī Samuel tél ədan na: Ɔ̄r̄ najə̄ na nge kəla yāí nēl̄ mbīn yā koōń.

¹¹ Kɔ́ɔ̄ɓē əda Samuel na: M-ā m̄-rāā yá̰á̰ kógə̄ḿ dan *Israel gə̄ tə́ kə́ kadə̄ náā nəkɔ́ ń a oō anī ndílən a a̰ȳ.

¹² Ndɔ̄ ń noō tə́ ní yá̰a̰ malang ń m-ə́da dɔ Eli tə́ ō, dɔ gír kojə yān tə́ ō ní m-ā m̄-rāā. M-ā m-ə́lá gír i ta kəla gíŕ tə́ bátə́ ta tɔ̄l̄ ta tə́ kanjə̄ kəya̰ yá̰á̰ kógə̄ḿ kɔ̄ɔ́.

¹³ Ngɔlaā ní m̄-tāān adə̄ āw̄ ə́dan na m-ā m̄-gān̄g sarya kə́ ngándáńg dɔ de kə́ ta kújə yān tə́ gə̄ tə́, tām̄ yá̰á̰ kə́ majaĺ ń ni-rāā tə́ ní. Yá̰á̰ kə́ majaĺ ní i ngánən gə̄ ń a̰a̰mə̄n̄ adə̄ mā i yá̰a̰ aĺ ta kumdə́ tə́ ō, ni ger̄ ō, ba əya̰də́ dɔ háĺdə́ tə́ ní.

¹⁴ I tām̄ najə̄ ń noō tə́ n m̄-túbə m-ādə̄ de kə́ gír kojə yān tə́ gə̄ m-ə́da na: Yá̰a̰ tun̄ gə̄, aláa yá̰a̰ ndējə̄ gə̄ a asən̄ kɔl̄ yá̰á̰ kə́ majaĺ ń de kə́ gír kojə yā Eli tə́ gə̄ rāān̄ ní aĺ bátə́ ní.

¹⁵ Samuel to nang tə́ bátə́ loo tīī. Gō tə́ anī ḭḭ aw̄ teē ta *kújə yā Kɔ́ɔ̄ɓē. Ni ɓōĺ kaw̄ kɔjə Eli gotə yá̰á̰ ń a̰ā̰ ní.

¹⁶ Banī Eli ɓārə́n na: Ngōnə̄ḿ Samuel. Anī Samuel ndigən na: Mā n toó.

¹⁷ Anī Eli dəjen najə̄ əda na: Ədaī na i rí? Ɓɔ́, najə̄ ń ədaī ní ī-lōō mundə̄m̄. Ré ī-mundə̄m̄ najə̄ kógə̄ḿ kə́ dan najə̄ gə̄ ń ɔr̄ seí tə́ ní anī, ādə̄ Nə́ɓā rāāī yá̰á̰ kə́ tōr̄ ń toō ō, nge kə́ tōr̄ ń toō ō.

¹⁸ Loo ń noō tə́ Samuel ədan yá̰a̰ malang ń Kɔ́ɔ̄ɓē ɔr̄ seneé ní kanjə̄ mundə̄n yá̰á̰ kógə̄ḿ. Eli əda na: Ni i Kɔ́ɔ̄ɓē. Ādə̄ rāā yá̰á̰ ń ni-a̰a̰ kadə̄ i yá̰á̰ kə́ majə ní.

¹⁹ Samuel tɔgə. Kɔ́ɔ̄ɓē i naā tə́ seneé ō, əya̰ najə̄ yān kógə̄ḿ adə̄ əsō nang tə́ aĺ ō.

²⁰ I beé n de gə̄ malang kə́ dɔ nang kə́ *Israel tə́ ń əla gír dɔ ɓē kə́ Dan tə́ bátə́ ugə̄ń Beer Seba ní gerə̄n̄neé kadə̄ Samuel i *nge koō ta yā Kɔ́ɔ̄ɓē kə́ rɔ̄kum ní.

²¹ Kɔ́ɔ̄ɓē na̰y kə̄ loo rāā tə́ kadə̄ Samuel a̰a̰n *Silo. Tɔdɔ̄ Kɔ́ɔ̄ɓē ɔr̄ najə̄ seneé *Silo, ba najə̄ ní rāā adə̄ kumən teē dɔ Kɔ́ɔ̄ɓē tə́.