Ɛstɛrə 9 - Yálá laawoo hɛɓɛ

Ɉuifəɠaa nwąną kulɔ mɛ̨nį

¹ Ɲąnįn bow kɔ́w hveelɛ naa ŋɛ̨i da kɛ mą Hebreu woo hu: Adarə, nwɔ hvolo pow gɔw haaɓa yələ, tɔɔmun nwɔ wɛlɛɛi aa kɛ həli kɛɛnąą kəlee ɓa. Volói tii ɓə kɛ mąąnɛ̨ɛ̨ di ɉɛɓɛ́ woo pɔ mɛ̨nį kɛ la. Volói ɓə Ɉuifəɠaa di yowoɠaa di kɛi di kiliŋąhiɛ la, diɛ kɛ di yee kaa pai tɛɛi Ɉuifəɠaa diɛ. Kɛlaa yaamun, Ɉuifəɠaa ɓə di yee ə tɛɛ di yowoɠaa diɛ.

² Ɉuifəɠaa di di ŋąąkpɔn daaɠaa hu, da tɔɔmun Asuerusə nwɔ koɓitaaɠaai hu, ə gɛ, nuąi diɛ di mɛ̨nį ɲɔ̨n gɛ a diɛ, di di hon. Nui lɔpee ta hvo pɛli tɔɔi di la. Mąąhɔlɔɓo, Ɉuifəɠaa mąą mɛ̨nį ə kɛi nɔi nuą mąą ɲɔw.

³ Nuąi kɛi nɔi ɲąą wooɓo tɔɔmun naa hu, nɔi nąmįną, gbahanamaɠaa, gəlee tɔɔi kɛ Ɉuifəɠaa pulu. Mąąhɔlɔɓo, di kɛi ɲɔw Mardose ɓa.

⁴ Mardose kɛ a nu kɛnɛ̨, tɔɔmun ɲəi gwəlii, ɛlɛɛ naa tɛɛ goɓitaaɠaa kəlee hu. Mardose nwɔ kɛnɛ̨ laa ta lɔ ɓə kɛi pɛlɛ ma.

⁵ Ɉuifəɠaa di di yowoɠaa paa kpɔ kɛnɛ̨, di nu tamąą paa. Di di yowoɠaa hon, yɛ bələi di kɛ la bɔ.

⁶ Susə daa kwəi, nuąi Ɉuifəɠaa di di paa, di kɛ a nu nwun nɔɔli.

⁷ Di Parsandata paa, da Dalfɔn, da Aspata,

⁸ da Porata, da Adalia, da Aridata,

⁹ da Parmasta da Arisai, da Waizata;

¹⁰ Nu powi tii ɓə kɛ a Haman lon ɉinąą. Haman ŋɛ̨i kɛ a Hamedata lon ɉulɔnu, yai kɛ a Ɉuifəɠaa di yowo, Ɉuifəɠaa di di paa, kɛlaa, di hvo kɔ́ pulu hɛn ɉəɠə.

¹¹ Maa hvólói tii, nuąi di di paa Susə daa kwəi, di pa di bələ ɓo tɔɔmun ma.

¹² Tɔɔmun yɛ nɛ̨ą Ɛstɛrə ɓa: «Nuąi Ɉuifəɠaa daa baa Susə daa kwəi ɓɛ, nwɛi lɔ ka tii a nu nwun nɔɔli, ə pɛlɛ Haman lon ɉinąą pow ɓa. Goɓitaaɠaa hu nwɛi, kɛ di gɛ ləi! Kɛlaa, ə mą kɛ tii, lə mɛ̨nį ɓə ə́ kaa bɔ ŋį́ gɛ yɛ́? Yii yá kɛ bɔ, ŋį́ dɛɛ ə pɔ. Lə kpɔ ɓə ə́ kaa bɔ? Yii ə́ kaa bɔ ŋį́ pɛli ŋį́ gɛ.»

¹³ Ɛstɛrə yɛ tɔɔmun ma: «Akɛ tɔɔmun a hvaa mą, pələi tii Ɉuifəɠaa di gɛ la kələi, di da kɛ tii tinąą; ɛlɛɛ, di Haman lon ɉinąą powi ŋɛ̨i ɓɛ, di di powa hɛlɛn wulu ɓa.»

¹⁴ Tɔɔmun ə mo yɛ diɛ, ə kɛ yɛ pələi tii ə́ mo la. Di ɉɛɓɛ́ kɛ, di noloɓo Susə daai, di Haman lon ɉinąą pow tii hɛlɛn wulu ɓa.

¹⁵ Ɉuifəɠaa kɛ Susə daai, di di ɲąąkpɔn, a ɲąnįn ŋɛ̨i da kɛ mą Hebreu woo hu, Adarə, nwɔ hvolo pow kɔ́w nąąn ɲələ. Di nu nwun ɉaaɓa paa Susə daai, kɛlaa, di hvo kɔ́ pulu hɛn ɉəɠə.

¹⁶ Ɉuifə yiiɠaai tii kɛ nɔi kwəi pələ, di kɛi di ɲąąkpɔn, diɛ di keeni mąą kɔ́nwɔ̨ di yowoɠaa yəi, di nu waa pow mɛ̨ihveelɛ kɔ́w lɔɔli paa, kɛlaa, di hvo kɔ́ pulu hɛn ɉəɠə.

¹⁷ Yili ə kɛ tii, a ɲąnįn ŋɛ̨i da kɛ mą Hebreu woo hu, Adarə, nwɔ hvolo pow kɔ́w haaɓa yələ. Di di hvitɔɔ a voló pow kɔ́w nąąn ɲələ, di ɉəɠə ɉu a hvįįtɔɔ hvolo.

¹⁸ Ɉuifə yiiɠaai ŋɛ̨i kɛ Susə daa, di di ɲąąkpɔn a voló pow kɔ́w haaɓa da voló pow kɔ́w nąąn ɲələ. Di di hvįįtɔɔ a voló pow kɔ́w lɔɔli yələ, di yili həɠə ɉu a hvįįtɔɔ hvolo.

¹⁹ Yili ɓə gɛ, Ɉuifəɠaa kpɔ di kaa daaɠaa hu, di voló pow kɔ́w nąąn ɲələ tii həɠə ɉu, di gɛ a di wɔ hɛli hvolo da di kwəinɛ̨ɛ̨ hvolo. Volói tii a ɉəli, da kɛ mɛ̨inɛ̨ɛ̨ɠaa kɛi di kee ɓa.

Ɉuifəɠaa di wɔ kili lɛɛ ɉu hɛli

²⁰ Mardose ə mɛ̨nįɠaai tii kəlee pɛ̨ɛ̨ hɛɓɛ́ hu, ə dɛɛ Ɉuifəɠaa kpɔ kɛ tɔɔmun Asuerusə nwɔ lɔi hu, gəlee diɛ, yiiɠaai kɛ kwɛa la, da yiiɠaai kɛ kpuwɔ la.

²¹ Nwun na nɛ̨ɛ̨ hvólóɠaai tii kɛ mɛ̨nį ɓa a hɛli, a Adarə ɲąnįn nwɔ hvolo pow kɔ́w nąąn da gɔw lɔɔli yələ.

²² Mąąhɔlɔɓo, volóɠaai tii ɓə Ɉuifəɠaa di liilaa yɛnɛ̨ɛ̨ hɔlɔɓo la, a kulɔi di mo di yowoɠaa yəi. Volói tii ɓə di wɔ liihɛlɛn mąą ə hvalin na a kwəinɛ̨ɛ̨, da kwəinɛ̨ɛ̨ hɛli, diɛ mɛ̨inɛ̨ɛ̨ kɛ di wɛlikɛmąą nuą da mąąwɛli nuą diɛ.

²³ Ɉuifəɠaa kəlee di hvaa mą, ɉɛli tɔlɔɔ ŋɛ̨i di bu, ə kɛ kɛa a di huwu la tɔ́n. Ə kɛ a kili lɛɛ ɉu hɛn, yii Mardose ə bɛ̨ɛ̨.

²⁴ Agagə huwuhu ŋɛ̨i a Hamedata, non Haman yai kɛ a Ɉuifəɠaa di yowo, bələi ə di paa hɛɓɛ́ pɛ̨ɛ̨ la, yɛ voló kwɛli a kpɛɛn; Mardose ə yiliɠaa kəlee pɛ̨ɛ̨, ə kɛ a kili lɛɛ ɉu hɛn.

²⁵ Kɛlaa, ɓɛlɔwai Haman ə kɛi pa mɛ̨nįi tii hu hvɛlii la tɔɔmun ma, mɛ̨nį tii ə bɛ̨ɛ̨ yɛ hvilɛn na Ɉuifəɠaa diɛ, ə pənə ə too mɛ̨i. Yaa Haman, da non ɉinąą, di di hɛlɛn wulu ɓa.

²⁶ Yili ɓə gɛ, di volóɠaai tii laa hee a: «Hee dɔwɔ», mąąhɔlɔɓo, di volóɠaai tii kwɛli a kpɛ̨ɛ̨. Mɛ̨nįɠaai di kɛi pa naai diɛ, da mɛ̨nįɠaai həli diɛ, di gəlee pɛ̨ɛ̨ ɉɛɓɛ́ hu.

²⁷ Ɉuifəɠaa di ɉee di kpɔɔ mɛ̨i a tɔ́n, ə kɛ a di huwu la mɛ̨nį ta, ə mą kɛ nuą yiiɠaai da lɔ di wɔ kalan hu, di mąąnɛ̨ɛ̨ kɛ diɛ ɉɛli tii pu a kwɛlan gəlee, nɔi kəlee hu, taa kəlee hu, pɛlɛ kəlee mu.

²⁸ Volóɠaa tii mąąnɛ̨ɛ̨ kɛ diɛ gɛ a hɛli a kwɛlan gəlee, gili hvo kpɛɛ nuąi pai pulu pələ di ŋą.

²⁹ Tɔɔmun nɛ̨ą Ɛstɛrə, Avihailə lon, da Ɉuifə ŋɛ̨i a Mardose, di di kɛ mɛ̨nįɠaai tii kəlee pɛ̨ɛ̨, ə mą kɛ ɉee dɔwɔ hɛli pu mɛ̨nį.

³⁰ Di ɉɛɓɛ́i tii tɛɛ Ɉuifəɠaa kəlee diɛ, diɛi kɛ tɔɔmun Asuerusə nwɔ koɓitaa nwundɔ̨nɔ̨ ɲee hveelɛ kɔ́w mɛ̨ihveelɛi hu. Ɉɛɓɛ́i tii hu, liilaa da nuą kɛɛ di nɛɛ hu mɛ̨nį ɓə kɛ ɉu.

³¹ Ɉɛɓɛ́i tii ɓə a nɛ yɛ di ɉɛlii tii pu a bui lɔwai, yɛ pələi, Mardose ŋɛ̨i a Ɉuifə da tɔɔmun nɛ̨ą Ɛstɛrə di bɛ̨ɛ̨ la diɛ kpinįi di mąą mɛ̨nį ɓa, da di huwuhu nuą; da yii nwɔ̨nɔ̨ hvilɛn na hin nɔɔ da woolaa mɛ̨nį ɓa.

³² Ɛstɛrə nwɔ hɛɓɛ́i tii ə kɛ a ɉee dɔwɔ hɛli naa kili too ŋą hɛn, yii di bɛ̨ɛ̨ ɉɛɓɛ́ hu.